बीड — धनंजय मुंडेंचे निकटवर्तीय वाल्मिक कराड यांच्यासह राष्ट्रवादीच्या केज तालुकाध्यक्षवर खंडणीचा गुन्हा दाखल करण्यात आला आहे. या तिघांवर मस्साजोग येथील अवादा कंपनीच्या अधिकाऱ्यांना धमकावत असल्याची तक्रार केली असून संबंधित अधिकाऱ्यांचं अपहरण करून जिवे मारण्याची धमकी देण्यात आली असल्याची तक्रार अवादा कंपनीच्या अधिकाऱ्यांनी केज पोलीस ठाण्यात दिली आहे. त्यामुळे केज पोलिसांनी धनंजय मुंडे यांचे निकटवर्तीय वाल्मिक कराड यांच्यासह राष्ट्रवादी काँग्रेसचे केज तालुकाध्यक्ष विष्णू चाटे आणि सुदर्शन घुले या तिघांवर दोन कोटीची खंडणी मागितली आणि जिवे मारण्याची धमकी दिल्याचा गुन्हा दाखल करण्यात आला आहे. त्यामुळे जिल्ह्यात खळबळ माजली आहे.

‌‌. याबाबत मस्साजोग येथील अवादा कंपनीचे प्रकल्प अधिकारी सुनिल केदु शिंदे रा. नाशिक ह.मु. मोंढा रोड बीड यांनी दिलेल्या फिर्यादीत म्हटले आहे की मागील एक वर्षापासून ते अवादा एनर्जी प्राव्हेट लिमीटेड कंपनीत प्रकल्प अधिकारी म्हणून काम पाहत आहे. त्यांच्याकडे बीड जिल्हयातील केज तालुक्यातील विविध ठिकाणी पवन उर्जा प्रकल्पाची मांडणी आणि उभारणीचं काम आहे. मस्साजोग या ठिकाणी प्रकल्पाचे मुख्य कार्यालय असून, त्या ठिकाणी विविध प्रकल्पाचे अधिकारी काम पाहत आहेत.
२९ नोव्हेंबर रोजी मस्साजोग येथील अवादा एनर्जी प्रकल्पाच्या कार्यालयात हजर असताना सुनिल शिंदे यांच्या फोनवर विष्णू चाटे याने फोन केला आणि त्यांनी मला वाल्मीक आण्णा बोलणार आहेत असे म्हणाले, ते काम बंद करा, ज्या परिस्थीतीमध्ये सुदर्शनने सांगितले आहे, त्या परिस्थीतीत काम बंद करा, अन्यथा त्याचे परिणाम गंभीर होतील, काम चालू केलं तर याद राखा असं म्हणून प्रकल्पाचं काम बंद करण्याबाबत धमकी दिली.

कार्यालयात हजर असताना दुपारी अडीच वाजण्याच्या सुमारास सुदर्शन घुले, रा. टाकळी हा मस्साजोग येथील प्रकल्पाच्या ठिकाणी आला आणि त्याने पुन्हा काम बंद करा, अन्यथा जी मागणी यापूर्वी केलेली आहे त्याची पुर्तता करा, असं म्हणून केजमध्ये चालू असलेल्या इतर ठिकाणाचे अवादा कंपनीचे सर्व काम बंद करा, अन्यथा तुमचे हात-पाय तोडून तुमची कायमची वाट लावून टाकेन, असं म्हणत धमकी दिली होती.
काही दिवसांपूर्वी शिवाजी थोपटे यांना वाल्मीक आण्णा कराड यांनी त्यांचे परळी येथील कार्यालयात बोलावून अवादा कंपनीचे केज तालुक्यातील सर्व काम बंद करा अन्यथा काम चालू ठेवायचं, असेल तर दोन करोड रुपये द्या असं सांगितलं होतं. त्यानंतर वेळोवेळी विविध लोकांच्या मोबाईलवरुन प्रत्यक्ष-अप्रत्यक्षरित्या प्रकल्पाचं काम बंद न ठेवल्यास सांगितलं. तसंच मारहाण करण्याच्या आणि जिवे मारण्याच्या धमक्या दिलेल्या आहेत. यापूर्वी २८ मे २०२४ रोजी ११ वाजता याच कारणावरुन आपलं आपहरण केल्याचं सुनिल शिंदे यांनी सांगितलं. त्याबाबत पोलीस ठाणे केज येथे तक्रार दिल्याचंही ते म्हणाले.
त्यानंतर ६ डिसेंबर २०२४ रोजी देखील सुदर्शन घुले आणि इतरांनी आवादा कंपनीचे मस्साजोग येथील प्रकल्पाच्या ठिकाणी जबरदस्तीने प्रवेश करुन गेटवरील कामगारांना धमकी देऊन मारहाण केली होती. त्यावेळी कंपनीचे शिवाजी थोपटे यांनी सुदर्शन घुले आणि इतर लोकांविरुध्द पोलीस ठाणे केज येथे तक्रार दिल्याने गुन्हा दाखल झालेला आहे.
अवादा कपंनीचे केज तालुक्यातील पवन उर्जा प्रकल्पाचे काम बंद करण्यासाठी वाल्मीक कराड रा. परळी, विष्णु चाटे रा. कौडगाव ता. केज आणि सुदर्शन घुले रा. टाकळी ता. केज हे वारंवार प्रकल्पाचे काम चालु झाल्यापासुन धमकी देत आहेत. त्यामुळे त्यांच्या दहशतीखाली असल्याने, तसंच मनस्थिती बरी नसल्याने सुनिल केदु शिंदे त्यांनी कपंनीचे वरिष्ठ पदाधिकाऱ्यांशी चर्चा करून त्यांच्या सल्ल्याने बुधवारी तक्रार दाखल केली असल्याचे म्हटले आहे

सातारा — न्यायपालिकेवर आजही सर्वसामान्य जनतेचा पूर्ण विश्वास आहे. आपल्यावर होणाऱ्या अन्याय,अत्याचारविरुद्ध दाद मागण्याचे अंतिम ठिकाण म्हणजे न्यायालय. लोकशाही प्रक्रियेत न्यायालय ही स्वतंत्र यंत्रणा अस्तित्वात असल्याने प्रशासन आणि राजकीय दबाव यांच्याविरुद्धची लढाई देखील मोठ्या आशेने न्यायालयात लढली जाते. मात्र साताऱ्यात न्याय देण्यासाठी एका न्यायाधीशालाच लाच घेताना लाचलुचपत प्रतिबंधक विभागाने पकडल्याने राज्यात खळबळ उडाली आहे.शहराती एका हॉटेलमध्ये सापळा रचून न्यायाधीश महोदयांना पोलिसांनी रंगेहात पकडले. त्यानंतर, गुन्हा दाखल करण्यात आला असून पुढील प्रक्रिया सुरू आहे. विशेष म्हणजे न्यायालयाच्या आवारातच ही घटना घडली आहे. त्यामुळे, सर्वसामान्यांच्या न्याय-हक्काचं शेवटचं आश्वासक ठिकाण असलेल्या न्यायपालिकेवरील विश्वासाला देखील या घटनेनं तडा गेला आहे.

पुणे-सातारा लाच लुचपत प्रतिबंधक विभागाने संयुक्तिकपणे साताऱ्यात ही मोठी कारवाई केली आहे. सातारा जिल्हा न्यायालयातील न्यायाधीश महोदयांविरुद्धच गुन्हा दाखल झाला आहे. जिल्हा व सत्र न्यायाधीश धनंजय निकम यांच्यासह तिघांना लाचलुचपत प्रतिबंधक विभागाने रंगेहात पकडले, त्यानंतर गुन्हा दाखल करुन पुढील कारवाई सुरू आहे. पाच लाख रुपयांच्या लाच प्रकरणात न्यायाधीश महोदयांसह खाजगी इसम किशोर खरात व आनंद खरात तसेच एक अनोळखी इसम यांना रंगेहात पकडल्याने न्यायपालिका क्षेत्रात खळबळ उडाली आहे.

फिर्यादीच्या वडिलांना जामिन देण्यासाठी पाच लाखांची मागणी करण्यात आली. होती, अशी प्राथमिक माहिती आहे. विशेष म्हणजे जिल्हा सत्र न्यायालयाच्या आवारातच या घडामोडी घडल्या आहेत. येथील एका हॉटेलमध्ये सापळा रचून अँटीकरप्शनच्या पोलिसांनी सर्वांना रंगेहात पकडले, त्यानंतर कायदेशीर प्रक्रियेद्वारे गुन्हा दाखल करण्यात आला. दरम्यान, या घटनेने सातारा जिल्ह्यासह राज्यभरात खळबळ उडाली आहे. ज्या न्यायव्यवस्थेवर सामान्य माणसांचा शेवटचा विश्वास असतो, त्याच न्यायव्यवस्थेवरही या कारवाईनंतर प्रश्नचिन्ह उपस्थित झाले आहेत.
दरम्यान, सर्वसामान्य नागरिकांचा विश्वास हा न्यायपालिकेवर आहे, पोलिस यंत्रणांकडून अन्याय झाला तरी न्यायालयात आपणास दाद मिळेल, न्यायाधीशांच्या खुर्चीवर बसलेल्या न्यायमूर्तींकडून आपल्यावरील अन्याय दूर होईल, अशी सर्वसाधारण भावना असते. मात्र, चक्क न्यायाधीश महोदयच लाच घेताना आढळून आल्याने विश्वास कुणावर ठेवायचा असा प्रश्न यानिमित्ताने उपस्थित झाला आहे. पोलीस, व प्रशासनातील भ्रष्टाचाराच्या घटना सातत्याने समोर आल्या आहेत. पण, थेट न्यायपालिकेतील वरिष्ठ अधिकारीच अडकल्याने सर्वत्र खळबळ उडाली आहे.

बीड — केज तालुक्यातील मस्साजोगचे माजी सरपंच संतोष पंडीतराव देशमुख यांच्या हत्या प्रकरणी पोलिसांनी आज तिसऱ्या आरोपीला पुण्यामधून अटक केली आहे.

प्रतिक भीमराव घुले वय 25 वर्ष, रा.टाकळी ता.केज असे अटक केलेल्या आरोपीचे नाव आहे.प्रतिकच्या अगोदर पोलिसांनी जयराम माणिक चाटे वय 25 वर्ष रा.तांबवा ता. केज, महेश सखाराम केदार वय 21 रा. मैंदवाडी ता.धारुर या दोघांना अटक केली होती. आरोपी प्रतिक हा खून केल्यानंतर पुण्याच्या दिशेने रवाना झाल्याची माहिती पोलिसांना मिळाली होती. त्या अनुषंगाने स्थानिक गुन्हे शाखेच्या पथकाने सापळा रचून त्याला अटक केली आहे. या आरोपीला गुरुवारी न्यायालयात हजर केले जाणार आहे. दरम्यान जयराम चाटे व महेश केदार यांना सात दिवसाची पोलीस कोठडी देण्यात आली आहे.
असं आहे प्रकरण ?
संतोष देशमुख व त्यांचा वाहन चालक हे चारचाकी गाडीतून मस्साजोगकडे जात होते. यावेळी डोणगावजवळ दोन वाहनातून येऊन अज्ञात व्यक्तींनी त्यांची गाडी अडवली. अपहरणकर्त्यांनी सरपंच संतोष देशमुख यांना त्यांच्या कारमधून बाहेर काढल्यानंतर काठीने बेदम मारहाण केली. नंतर अपहरणकर्त्यांनी त्यांना बळजबरीने ते आलेल्या गाडीत बसवून केजच्या दिशेने नेले.
याबाबत केज पोलीस ठाण्यात अपहरणाची तक्रार दाखल करण्यात आली होती. घटनेचं गांभीर्य लक्षात घेत पोलिसांनी तपास सुरु केला होता. मात्र काही तासानंतर बोरगाव-दहीटना रस्त्यावर संतोष देशमुख यांचा मृतदेह आढळून आला होता. यानंतर केज पोलीस ठाण्यात खुनाचा गुन्हा दाखल करण्यात आला.या प्रकरणात एका पोलीस अधिकाऱ्याचं निलंबन देखील करण्यात आले. देशमुख यांचं अपहरण झाल्यानंतर संबंधित पोलीस अधिकाऱ्यानं तपासात कसूर केल्याचा आरोप गावकऱ्यांकडून करण्यात आल्याने पोलीस अधीक्षक अविनाश बारगळ यांनी संबंधित पीएसआयचे निलंबन केले.

चौसाळा — जवळच असलेल्या हिंगणी (बु) येथील शेतकरी शहाजी वायसे यांच्या घराबाहेर ठेवलेलं सोयाबीनची 62 कट्टे बुधवारी मध्यरात्री चोरून नेल्याची घटना घडली. या घटनेमुळे चौसाळा परिसरात भीतीचे वातावरण निर्माण झाले आहे.

हिंगणी (बु.) येथील शेतकरी शहाजी शंकरराव वायसे यांनी घराबाहेर सोयाबीन पोत्यांची थप्पी लावलेली होती. बुधवारी रात्री वायसे कुटुंबातील सगळे झोपलेले असताना मध्यरात्रीच्या
सुमारास अज्ञात चोरट्यांनी सोबत आणलेले वाहन चौसाळा नांदूर रस्त्यावर उभे केले. चोरट्यांनी सोबत आणलेल्या माणसाच्या साह्याने सोयाबीन थप्पीतील 62 पोते जवळपास एक हजार फूट अंतरापर्यंत पाठीवर घेऊन जात. सोबत आणलेल्या वाहनात भरून ते लंपास केले. चोरीला गेलेले सोयाबीन अंदाजे 40 क्विंटल इतके होते. अज्ञात चोरट्यांनी सुमारे दीड लाख रुपयाचा मुद्देमाल चोरून नेला असून नेकनूर पोलिसांनी गुरुवारी सकाळी घटनास्थळी भेट देऊन पंचनामा केला. याप्रकरणी नेकनूर पोलिसात गुन्हा दाखल करण्याची प्रक्रिया सुरू आहे. या घटनेने मात्र खळबळ माजली असून भीतीचे सावट पसरले आहे.

आष्टी — वीट भट्टीवर दुसऱ्या जिल्ह्यातून आलेल्या मजुराच्या पंधरा वर्षीय मुलीवर रेल्वेतून उतरलेल्या तिघांनी लैंगिक अत्याचार घटना घडली. पीडिता नऊ महिन्याची गर्भवती असल्यानंतर ही बाब समोर आली.

याप्रकरणी तिघांविरुद्ध सोमवारी आष्टी पोलिस ठाण्यात अत्याचाराचा गुन्हा दाखल करण्यात आला आहे.
हिंगोली जिल्ह्यातील एक कुटुंब मागील दोन वर्षांपूर्वी आष्टी तालुक्यातील एका गावात वीटभट्टीवर कामासाठी आले होते. याच कालावधीत मार्च 2024 नक्की तारीख माहीत नाही.15 वर्षीय अल्पवयीन मुलगी याच गावातील शाळेत रेल्वे पटरीच्या बाजूने जात असताना अनोळखी तिघे जण रेल्वेतून उतरले व यातील दोघांनी तिच्या हाताला धरून शेजारच्या शेतात नेले. यातील एकाने तिच्यावर बळजबरीने अत्याचार केल्याची घटना समोर आली. पीडिता यातून 9 महिन्यांची गर्भवती असल्याची धक्कादायक माहिती समोर आली आहे.
याप्रकरणी आष्टी पोलिस ठाण्यात अल्पवयीन मुलीच्या फिर्यादीवरून 2 डिसेंबर रोजी अनोळखी तिघांविरुद्ध गुन्हा दाखल करण्यात आला आहे. आष्टीचे उपअधीक्षक बाळकृष्ण हानपुडे, पोलिस निरीक्षक शरद भुतेकर, सहायक पोलिस निरीक्षक विक्रांत हिंगे याच्या मार्गदर्शनाखाली पुढील तपास पोलिस उपनिरीक्षक कृष्णा शिंदे करीत आहेत.