याच अपघात स्थळी मृताचे वडील चुलत्यांचाही झाला होता अपघाती मृत्यू

बीड — आष्टी मतदारसंघाचे भाजपचे आमदार सुरेश धस यांच्या मुलाने सोमवारी (ता.7) कार चालवताना एका दुचाकीस्वाराला धडक दिली. यामध्ये दुचाकीस्वाराचा जागीच मृत्यू झाल्याची घटना घडली. नितीन शेळके असे मृत व्यक्तीचे नाव आहे. नितीन शेळके चा ज्या ठिकाणी अपघात झाला त्याच ठिकाणी वर्षभरापूर्वी त्यांचे वडील प्रकाश शेळके आणि काही वर्षांपूर्वी चुलते यांचाही अपघाती मृत्यू झाल्याची धक्कादायक माहिती मिळत आहे.

सुपा पोलिस स्टेशनमध्ये या प्रकरणी अपघाताचा गुन्हा नोंद करण्यात आला आहे.नगर-पुणे महामार्गा ७ जुलै रोजी रात्री १०.३० च्या सुमारास पारनेर तालुक्यातील जातेगाव फाटा येथे ही घटना घडली आहे. या अपघातात नितीन प्रकाश शेळके (वय ३४, रा. पळवे खुर्द ता.पारनेर) यांचा मृत्यू झाला आहे. आमदार सुरेश धस यांचा मुलगा सागर सुरेश धस हा अपघातावेळी एम.जी. ग्लॉस्टर (क्र. MH 23 BG 2929) ही कार चालवत होता. सुपा पोलीस ठाण्यात त्याच्याविरुद्ध अपघाताचा गुन्हा दाखल करण्यात आला असून पोलिसांनी त्याला ताब्यात घेतले आहे.

मृत नितीन शेळके हे सह्याद्री खादी हॉटेलवरून आपल्या गावाकडे मोटारसायकलने निघाले होते. जातेगाव फाटा येथे महामार्गावर यु-टर्न घेत असताना पुण्याकडे भरधाव वेगाने जाणाऱ्या एम. जी. ग्लॉस्टर कारने त्यांच्या दुचाकीला जोरदार धडक दिली. अपघातात ते रस्त्यावर फेकले गेले आणि गंभीर जखमी झाले. नागरिकांनी त्यांना तातडीने सुपा येथील रुग्णालयात दाखल केले, मात्र डॉक्टरांनी त्यांना मृत घोषित केले.

घटनेची माहिती मिळताच सुपा पोलीस ठाण्याचे सहायक पोलीस निरीक्षक सोमनाथ दिवटे आपल्या पथकासह घटनास्थळी दाखल झाले. पोलिसांनी कारचालक सागर धस व त्याच्यासोबत असलेल्या एका मित्राला ताब्यात घेतले असून त्यांची वैद्यकीय तपासणी करण्यात आली आहे. मृतदेह शवविच्छेदनासाठी पारनेर ग्रामीण रुग्णालयात हलविण्यात आला. ८ जुलै रोजी सकाळी शवविच्छेदन झाल्यानंतर मृतदेह नातेवाइकांच्या ताब्यात देण्यात आला आणि पळवे येथे अंत्यसंस्कार करण्यात आले.

मृत नितीन शेळके यांच्या मागे पत्नी, दोन लहान मुले, भाऊ, भावजय, पुतणे असा परिवार आहे. विशेष म्हणजे, ज्या ठिकाणी हा अपघात झाला त्याच ठिकाणी वर्षभरापूर्वी त्यांचे वडील प्रकाश शेळके आणि काही वर्षांपूर्वी चुलते यांचाही अपघाती मृत्यू झाल्याची माहिती त्यांच्या कुटुंबीयांनी दिली.

बीड — उमाकिरण लैंगिक अत्याचार प्रकरणातील आरोपी विजय पवार याच्यावर ॲट्रॉसिटी ॲक्ट तसेच बाललैंगिक अत्याचाराचा आणखी एक गुन्हा दाखल झाला आहे.
खाजगी कोचिंग क्लासेस मध्ये झालेल्या लैंगिक अत्याचार प्रकरणी पोलीस अधीक्षक नवनीत कावत यांनी पालक व विद्यार्थ्यांनी पुढे येऊन गुन्हा नोंद करावा असे आवाहन केले होते. अल्पवयीन मुलीवरील अत्याचार प्रकरणातील आरोपी शिक्षक विजय पवार व प्रशांत खटोकर या दोघांना न्यायालयीन कोठडीत रवानगी करण्यात आली आहे. राज्य महिला आयोगाच्या अध्यक्ष रूपाली चाकणकर यांनी शनिवारी भेट घेत पीडितेची व पालकांशी चर्चा केली. 2023 मध्ये विजय पवार विरोधात जिल्हा परिषदेचे सीईओ यांच्याकडे बाललैंगिक अत्याचाराची तक्रार केली होती. मात्र या प्रकरणात काहीच कारवाई झाली नव्हती. या प्रकरणात चौकशी करून गुन्हा दाखल करण्याच्या सूचना चाकणकर यांनी दिल्या होत्या. दरम्यान विजय पवार विरोधात बाललैंगिक अत्याचार (पाॅक्सो अॅक्ट) तसेच ॲट्रॉसिटी ॲक्ट नुसार दुसरा गुन्हा दाखल करण्यात आला आहे. दोन-तीन दिवसांपूर्वीच पवारच्या संस्थेत शिक्षण घेत असलेल्या मुलीच्या पालकांनी पुढे येत पोलिसांकडे तक्रार दाखल केली होती.

बीड — भाजप पदाधिकारी डॉ.लक्ष्मण जाधव व त्याची पत्नी यांच्या सावकारकीतून झालेल्या त्रासाला कंटाळून 42 वर्षीय कपडा व्यापाऱ्याने गळफास घेऊन आत्महत्या केल्याची घटना घडली आहे.

राम दिलीप फटाले वय 42 वर्ष.रा काळा हनुमान ठाणा बीड असं आत्महत्या केलेल्या व्यापाऱ्याचं नाव आहे. राम फटाले हे कपड्याचा व्यापार करत होते आठवडी बाजारात ते दुकान लावून कपडे विक्री करायचे. कपडा व्यवसायासाठी त्यांनी डॉ. लक्ष्मण जाधव या सावकाराकडून कर्ज घेतले होते. कर्जाची रक्कम व्याजासह देऊन देखील जाधव पती-पत्नीकडून मानसिक त्रास देत शिवीगाळ केली जात होती. सावकाराने फटाले यांच्याकडून चेक घेतला होता. पैसे परत देऊनही आणखी पैशाची मागणी करत चेक परत देण्यास इन्कार केला जात होता. याबरोबरच त्यांनी काही पतसंस्थांकडून देखील कर्ज घेतलेले होते. कोरोना नंतर कपडा विक्रीत घट झाली धंदा बसला खर्च वाढला. त्यामुळे व्याजही वाढत गेले जानेवारी महिन्यामध्ये सावकाराच्या रकमेची परतफेड देखील केली. शनिवारी रात्री फोनवरून सावकाराने शिवीगाळ केली. पहाटे पाच च्या सुमारास राम फटाले यांची पत्नी सुलभा झोपेतून उठली. तोपर्यंत राम यांनी पंख्याला दोरी बांधून लटकल्याचे दिसले. त्यांनी मृत्यूपूर्वी सावकार डॉ. लक्ष्मण जाधव व त्याची पत्नी यांच्या त्रासाला कंटाळून आत्महत्या करत असल्याची सात पानी चिठ्ठी लिहून ठेवली.डाॅ. लक्ष्मण जाधव हा भाजपच्या भटके विमुक्त आघाडीचा जिल्हाध्यक्ष आहे.
दरम्यान याप्रकरणी पोलीस ठाण्यात गुन्हा नोंद करण्यात आला असून प्रकरणाचा पुढील तपास पोलीस निरीक्षक देविदास चव्हाण करत आहे.

बीड — कोचिंग क्लासेस मधील अल्पवयीन विद्यार्थिनीच्या लैंगिक छळ प्रकरणातील आरोपी विजय पवार आणि प्रशांत खटोकर यांना 14 दिवसांची न्यायालयीन कोठडी देण्यात आली आहे.दोन्ही आरोपींना आज न्यायालयापुढे हजर करण्यात आले होते.
लैंगिक छळ प्रकरणात या दोघांना यापूर्वी दोन दिवसांची आणि त्यानंतर पाच दिवसांची पोलीस कोठडी सुनावण्यात आली होती. आज पोलीस कोठडीची मुदत संपल्याने त्यांना न्यायालयात हजर करण्यात आलं. पोलिसांनी
आतापर्यंत याप्रकरणी पोलिसांनी 30 जणांचे जबाब नोंदवले असून पीडितेच्या मैत्रिणी, कुटुंबीय, क्लासमधील काही जणांचा समावेश आहे. पोलिसांनी खाटोकरची दुचाकी जप्त केली असून दोघांचे मोबाइल, टॅब, लॅपटॉपही जप्त केले आहेत. तर क्लासमध्ये 40 सीसीटीव्ही कॅमेरे असून त्यांचे डीव्हीआर जप्त केले आहेत. पोलिसांनी या घटनेतील लॅपटॉप, मोबाईल, सीसीटीव्ही फुटेज फॉरेन्सिक लॅबला तपासणीसाठी पाठवले आहे. तसेच 30 पेक्षा अधिक जणांचे जबाब देखील नोंदवले आहेत. आज प्रशांत खाटोकर व विजय पवार यांना न्यायालयासमोर हजर केले असता न्यायालयाने त्यांना न्यायालयीन कोठडी सुनावली आहे. सध्या या प्रकरणाची चौकशी सुरू असून, पुढील तपासासाठी पोलिसांकडून पुरावे संकलनाची प्रक्रिया सुरू आहे.