बीड — आठवडी बाजाराला निघालेल्या सराफा व्यापाऱ्याचे साठ लाख रुपये किमतीचे सोन्या चांदीचे दागिने लुटल्याची घटना माजलगाव‌ मध्ये घडली होती. या प्रकरणाचा छडा लावण्यात स्थानिक गुन्हे शाखेला यश आले आहे. याप्रकरणी चार जणांना पोलिसांनी अटक केली असून त्यांच्याकडून 18 तोळे सोने व एक किलो चांदी जप्त करण्यात आली आहे.
सराफा दुकानदार अमोल पंढरीनाथ गायके वय ३१ वर्ष रा. भाट वडगाव ता. माजलगाव) हे त्यांचे माजलगाव येथील अमोल ज्वेलर्स या दुकानातून आठवडी बाजारात खेर्डा येथे सोन्या चांदीचे दागिने विक्री करण्यासाठी २५ जानेवारी रोजी त्यांच्या दुचाकीवर पुतण्यसाह जात होते. यावेळी पाठीमागून दुसऱ्या दुचाकीवर आलेल्या आरोपींनी त्यांना बाजूला थांबण्यास भाग पाडले. गायके यांनी गाडी थांबविल्यावर त्यांना तीन आरोपींनी सत्तूरचा धाक दाखवून त्यांचेकडील सोन्या-चांदी दागिन्याची पिशवी बळजबरीने काढून घेऊन पळ काढला. त्यावरून माजलगाव ग्रामीण पोलीस ठाण्यात गुन्हा दाखल झाला.

वरील प्रमाणे गुन्हा घडल्यापासून बीडचे पोलीस अधीक्षक नवनीत कॉवत यांनी स्थानिक गुन्हे शाखेला यांना आदेशीत केले की दरोड्याचा गुन्हा उघडकीस आणून गुन्ह्यातील गेला माल सोन्या चांदीचे दागिने हस्तगत करावे. त्यानुसार स्थानिक गुन्हे शाखेचे पोलीस निरीक्षक शिवाजी बंटेवाड यांनी तीन वेगवेगळे पथक तयार करून गुन्ह्याचा समांतर तपास सुरु केला.तपासात तांत्रिक विश्लेषण व सीसीटीव्ही फुटेजच्या आधारावर असे निष्पन्न झाले की, यातील फिर्यादी गायके यांचा माजलगाव शहरातून रेकी करून पाठलाग केला असून आरोपींनी दुचाकींची अदला बदली करून पोलीसांची दिशाभूल करण्याचा प्रयत्न केला. परंतु पोलिसांनी बारकाईने तपास करून यातील आरोपीं निष्पन्न केले. यातील आरोपी हे सध्या बीड येथील शांताई हॉटेलच्या पाठीमागील गल्लीत आहेत, अशी माहिती मिळताच पथकांनी आरोपी एकनाथ ऊर्फ नारायण अरुण कपाले वय ३५ वर्ष, रा. पाटोदा ता. परतूर जि.जालना ह.मु. बीड, कृष्णा तुकाराम निरडे वय २२ वर्ष, अभिषेक अशोक शिंदे वय २२, दोघेही रा. माजलगाव यांना ताब्यात घेतले.

आरोपींतांनी गुन्हा केल्याचे कबुल केले. त्यांना अधिक विचारपूस करता एकनाथ कपाले याने सांगितले की, तो सराफा कारागिर असून त्याने पूर्वी माजलगाव येथे वेगवेगळे ठिकाणी कारागिरीचे काम केले होते व त्याला माजलगाव येथील सोनार दुकानदार यांच्या आठवडी बाजारात जाण्याचे वार व वेळ माहिती होती. तसेच तो सध्या खूप कर्जबाजारी झालेला होता. त्यामुळे नारायण याने माजलगाव येथील सराफा दुकानदार यास आठवडी बाजारास जाताना लुटण्याचे ठरवले. एकनाथ कपाले याने रेकॉर्डवरील गुन्हेगार कृष्णा निरडे व अभिषेक शिंदे यांना त्याचा प्लॅन सांगितला. त्यानुसार त्यांनी त्यांचे इतर दोन साथीदार मित्र संजीव ऊर्फ संजय विष्णूदास कांबळे वय २८ वर्ष, रा. उमरगा मन्त्रा ता. उदगीर जि.लातूर ह. मु. पुणे), व विशाल सूर्यकांत सुळ(रा. माजलगाव ह.मु. पुणे) यांना कटात सामील केले.
आरोपींचे प्लॅन नुसार २५ जानेवारी रोजी एकनाथ कपाले व संजीव ऊर्फ संजय विष्णूदास कांबळे यांनी फिर्यादी यांचे रेकी करून ते आठवडी बाजारास निघाल्यानंतर त्यांचा पाच आरोपीतांनी दोन दुचाकीवर पाठलाग करून शस्त्राचा धाक दाखवून गुन्हा केला आहे. आरोपीतांचे ताब्यातून १८ तोळे सोन्याचे दागिने व १ किलो चांदी असा एकूण ३० लाख रुपयाचा मुद्देमाल हस्तगत करण्यात आलेला आहे. तसेच संजीव ऊर्फ संजय विष्णूदास कांबळे यासही ताब्यात घेतले असून एकूण चार आरोपींना अटक करण्यात आलेली आहे व एक फरार आरोपीचा शोध सुरु आहे. गुन्ह्याचा पुढील तपास सहायक पोलीस निरीक्षक गोविंद पांडव हे करीत आहेत.

केज — जिल्ह्यात कायदा सुव्यवस्थेची लक्तर रोज वेशीवर टांगली जाऊ लागली आहेत. पोलीस अधीक्षक मात्र अशा घटनांकडे दुर्लक्ष करून महिमा मंडन करण्यात मश्गुल आहेत.परिणामी खाकीचा धाक राहिलेला नसल्याने गुन्हेगारींच्या घटनांमध्ये वाढ झाली आहे. त्यातच केज मधील हनुमंत पिंपरी शिवारात 25 वर्षीय तरुणाची गळा चिरून हत्या करण्यात आल्याची घटना आज शनिवारी सकाळी उघडकीस आली.
पोलीस अधीक्षकांची माध्यमांकडे पाहण्याची धृतराष्ट्रासारखी भूमिका, पोलीस अधिकाऱ्यांना दिलं जाणार पाठबळ यामुळे अवैध धंद्यांसोबतच गुन्हेगारी घटनांमध्ये वाढ झाली आहे. खाकीचा धाक उरला नाही त्यामुळे राजरोसपणे मुडदे पाडले जात आहेत. पोलीस यंत्रणा मात्र बघ्याची भूमिका घेत असल्याचे चित्र जिल्ह्यात निर्माण झाला आहे. कायदा सुव्यवस्थेचे धिंडवडे काढले जात असताना सर्वसामान्यांच जीवन मात्र अवघड होऊन बसला आहे. त्यातच हनुमंत पिंपरी मध्ये 25 वर्षाच्या तरुणाची गळा चिरून हत्या करण्यात आली.विक्की उर्फ आण्णा रावसाहेब चंदनशिव असं मृत तरुणाचं नाव आहे. केवड आणि हनुमंत पिंपरीच्या शिवारात विक्कीचा मृतदेह रक्ताच्या थारोळ्यात पडलेला आढळून आला. अज्ञात हल्लेखोराने विक्कीच्या गळ्यावर तीक्ष्ण हत्याराने वार केले होते. जखम खोल असल्याने मोठ्या प्रमाणावर रक्तस्त्राव झाला आणि त्यातच त्याचा मृत्यू झाला. आज सकाळी 10 च्या सुमारास ही घटना ग्रामस्थांच्या निदर्शनास आली.घटनेची माहिती मिळताच केज पोलीस दलासह वरिष्ठ अधिकाऱ्यांनी घटनास्थळी धाव घेतली. यामध्ये अप्पर पोलीस अधीक्षक चेतना तिडके, उपविभागीय पोलीस अधिकारी व्यंकटेश देशपांडे, पोलीस निरीक्षक स्वप्नील उनवणे व महेश क्षीरसागर, पोलीस उपनिरीक्षक उमेश निकम, इनामदार आणि अशोक सोनवणे यांनी घटना स्थळाचा पंचनामा करून तपास वेगाने सुरू केला आहे.या प्रकरणी पोलिसांनी तत्परता दाखवत महेश चंदनशिव नावाच्या संशयित आरोपीला ताब्यात घेतले आहे. हा खून जुन्या वादातून झाला की अन्य काही कारणातून, याचा तपास पोलीस करत आहेत.या घटनेमुळे तालुक्यात भीतीचे वातावरण पसरले आहे.

बीड — परळीतील टोकवाडी भागात असलेल्या साई लॉजवर सुरू असलेल्या वेश्या व्यवसायाचा अनैतिक मानवी वाहतूक प्रतिबंधक विभागाच्या पथकाने छापा मारून पर्दाफाश केला यावेळी दोन पीडित महिलांची सुटका करण्यात आली.
बाहेरच्या जिल्ह्यातून महिलांना आणून वेश्याव्यवसाय करण्यास भाग पाडले जात आहे. हा व्यवसाय टोकवाडी भागातील साई लॉजवर सुरू असल्याची गुप्त माहिती अनैतिक मानवी वाहतूक प्रतिबंधक कक्ष परळी ग्रामीण पोलिसांना मिळाली. माहिती मिळताच
पोलीस उप निरीक्षक पल्लवी जाधव व परळी ग्रामीणचे सहायक पोलीस निरीक्षक सदानंद मेंडके यांनी ही माहिती वरिष्ठांना दिली. त्यावरून वरिष्ठांनी या ठिकाणी छापा टाकण्याचे लेखी आदेश दिले.त्यावरून परळी ग्रामीण चे पीआय मझहरअली सय्यद, एपीआय सदानंद मेंडके स्टाफसह व अ. मा. वा. प्र. कक्षाच्या प्रमुख पी एस आय पल्लवी जाधव या त्यांच्या संपूर्ण स्टाफसह तसेच डमी ग्राहक व दोन शासकीय पंचासह सापळा पूर्व पंचनामा करून सदर ठिकाणी गेले. डमी ग्राहकास या ठिकाणी पाठवून खात्री केली असता तेथे असलेल्या एजंटने वेश्या गमनासाठी होकार देवून त्यासाठी 1500 रुपयांची मागणी केली. डमी ग्राहकाने ठरल्या प्रमाणे रक्कम देवून पोलीस पथकास ठरलेला इशारा केला असता, पोलीस पथकाने या लॉजवर छापा मारला. पैसे स्वीकारलेल्या पुरुषाला त्याचे नाव गाव विचारले असता, त्याने त्याचे नाव नाशर नशीर शेख असे सांगितले.या पुरुषाची पंचासमक्ष झडती घेतली असता, डमी ग्राहकाने दिलेल्या नमूद वर्णनाच्या 500 रू. दराच्या 3 नोटा सापडल्या. पंचासमक्ष नोटा जप्त केल्या. लॉजवर दोन पीडित महिला मिळून आल्या . त्यापैकी डमी ग्राहकासोबत रूम मधे मिळून आलेल्या पीडीत महिलेला विश्वासात घेवून चौकशी केली असता , तीने सांगितले की, ती भिवंडी ठाणे ची असून दत्ता अंतराम मुंडे याने मला फोन करून इथे बोलावून घेतले आहे. तसेच दुसरी महिला पुणे येथून आली आहे. प्रत्येक ग्राहकाकडून 1500 रू घेतात व त्यापैकी आम्हाला 500 रु देतात अशी माहिती दिली. एजंट नाशर नशीर शेख व लॉजचा मॅनेजर सोमनाथ ज्ञानोबा मुंडे रा. टोकवाडी तसेच दत्ता अन्तराम मुंडे रा. कन्हेरवाडी ता. परळी जि बीड पीडीत महिलांना बोलवून घेतात व स्वतःच्या आर्थिक फायद्यासाठी ग्राहकाकडून पैसे घेवून, पीडीत महिलांकडून वेश्या व्यवसाय करुन घेत असल्याचे सांगितले. तसेच रुमची झडती घेतली असता 6 विना वापरलेले निरोध मिळून आले आहे. आरोपी , पीडीत महिलेस स्वतःच्या आर्थिक फायद्यासाठी बोलावून घेऊन, स्वतःच्या ताब्यातील जागेचा वापर करुन त्याच कमाईवर उदरनिर्वाह करुन वेश्याव्यवसाय करण्यास लावले व सदर महिलांचे शोषण करण्याच्या उद्देशाने बोलावले म्हणून त्यांच्या विरुद्ध परळी ग्रामीण पोलीस ठाण्यात अनैतिक मानवी व्यापार प्रतिबंध कायदा 1956 कलम 3,4,5,6 प्रमाणे गुन्हा दाखल करण्यात आला आहे, तसेच पीडित महिलांची सुटका करण्यात आली आहे. हि कारवाई पोलीस अधीक्षक नवनीत काँवत, अपर पोलीस अधीक्षक सचिन पांडकर, चेतना तिडके, सहायक पोलीस अधीक्षक ऋषिकेश शिंदे अंबाजोगाई उपविभाग यांच्या मार्गदर्शनाखाली पोलीस निरीक्षक मझहरअली सय्यद , परळी ग्रामीणचे सपोनि सदानंद मेंडके, पोलीस उप निरीक्षक पल्लवी जाधव, अंकुश निमोने, महीला पोलीस हवालदार उषा चौरे, पोलीस हवालदार अशोक शिंदे, राजेंद्र मिसाळ, नवनाथ हारगावकर, रमेश तोटेवाड, तुळशीराम परतवाड, रावसाहेब मुंडे, विठ्ठल परजणे, पोलीस शिपाई योगेश निर्धार, महादेव केदार यांनी केली.

सिरसाळा — उसणे दिलेल्या पैशांच्या वादातून झालेल्या धक्काबुक्कीत एका तरुणाचा मृत्यू झाल्याची धक्कादायक घटना घडली आहे. संजू गंगाराम उबदे वय 40 वर्ष, रा.सिरसाळा असं मृत व्यक्तीचं नाव आहे.
येथील मसनजोगी वस्तीत राहणारे सायलू रामलू पस्तमवाड आणि गंगा पस्तमवाड यांचा संजू उबदे याच्याशी पैशांच्या उसने दिलेल्या दोनशे रुपयाच्या कारणावरून वाद झाला. हा वाद इतका विकोपाला गेला की, सायलू आणि गंगा यांनी संजू उबदे यांना पाठीवर जोरात धक्का दिला. या धक्क्यामुळे संजू यांचा तोल गेला आणि ते तोंडावर जमिनीवर आदळले. यात त्यांच्या डोक्याला व तोंडाला गंभीर दुखापत झाली. त्यांना उपचारासाठी नेण्यापूर्वीच त्यांचा मृत्यू झाला. घडलेल्या घटनेची माहिती मिळताच सिरसाळा पोलिसांनी तातडीने घटनास्थळी धाव घेतली. मृतदेह शवविच्छेदनासाठी पाठविण्यात आला असून पुढील तपास सुरू आहे. या घटनेमुळे सिरसाळा परिसरात खळबळ उडाली आहे.

केज — तालुक्यातील एका माजी सरपंचासह एका कृषी पंप व्यापाऱ्याने तामिळनाडू राज्यात बनावट नोटा चालवण्याचा बेकायदेशीर प्रयत्न केला. तामिळनाडू पोलिसांनी दोघांनाही अटक केली असून साडेआठ लाख रुपयाच्या बनावट नोटा जप्त केल्याचा प्रकार उघडकीस आला आहे.
तामिळनाडूमधील तिरुचिरापल्ली जिल्ह्यातील थुवाकुडी पोलिसांनी ही कारवाई केली आहे.या प्रकरणाचा तपास तामिळनाडूच्या गुन्हे अन्वेषण विभागाकडे सोपवण्यात आला आहे.
केज येथील माजी सरपंच रमेश बाबुराव भांगे आणि मूळचा राजस्थानचा असलेला व्यापारी नारायण राम पटेल हे दोघे त्यांच्या खाजगी कार क्र.एम.एच 44 झेड 2383 ने तामिळनाडूत फिरायला गेले होते. बुधवारी इंधन भरताना त्यांनी एका पेट्रोल पंपावर 200 रुपयांच्या काही नोटा दिल्या. तेथून ते निघूनही गेले मात्र कर्मचाऱ्याला नोटांचा स्पर्श आणि कागदावरून संशय आला. त्याने तातडीने याची माहिती पोलिसांना दिली आणि पोलिसांनी मंजाथिदल चेक पोस्टवर सापळा रचून ही कार अडवली. कार अडवल्यानंतर
पोलिसांनी कारची झडती घेतली असता कारमध्ये 200 रुपयांच्या बनावट नोटांचे तब्बल 41 बंडल दडवून ठेवलेले आढळले. कारवाईत सापडलेल्या 8 लाख 37 हजार 800 रुपयांच्या नोटा या बनावट असल्याचे समोर आले. तपासादरम्यान या दोघांनी मदुराई, पुदुक्कोट्टई आणि तंजावर भागात यापूर्वीच अनेक नोटा चलनात आणल्याची कबुली दिली आहे.
या बनावट नोटा त्यांना कोणी पुरवल्या? या रॅकेटचे मुख्य सूत्रधार कोण आहेत? आणि तामिळनाडूमध्ये त्यांना कोणी आश्रय दिला होता? या प्रश्नांची उत्तरे शोधण्यासाठी आता गुप्त वार्ता विभाग आणि गुन्हे अन्वेषण विभाग सक्रिय झाला आहे. या घटनेमुळे केज तालुक्यासह बीड जिल्ह्यात खळबळ उडाली आहे.