टाकरवण — परिसरातील एका गावात अधिक मासानिमित्त लेक-जावयाच्या स्वागतासाठी सुरू असलेल्या आनंदाच्या वातावरणात एक अजब आणि धक्कादायक घटना घडली. जावयाला भेट म्हणून देण्यासाठी खास पिठाच्या धोंड्यात लपवून ठेवलेली पाच ग्रॅम सोन्याची अंगठी घरातील मांजराने गिळल्याने संपूर्ण कुटुंबाची एकच धावपळ उडाली. अखेर चार दिवसांच्या प्रतीक्षेनंतर आणि पशुवैद्यकीय उपचारांनंतर मृत मांजराच्या पोटातून अंगठी बाहेर काढण्यात आली.
जावयासाठी खास तयारी
अधिक मासातील पारंपरिक “धोंडे जेवण” कार्यक्रमासाठी लेक आणि जावयाला सासुरवाडीत आमंत्रित करण्यात आले होते. जावयाचा सन्मान करण्यासाठी सासूबाईंनी पाच ग्रॅम सोन्याची अंगठी एका पिठाच्या धोंड्यात लपवून ठेवली होती. योग्य वेळी ही भेट देण्याचा त्यांचा मानस होता.
मांजराने गिळला अंगठी असलेला धोंडा
घरात पाहुणचाराची लगबग सुरू असतानाच अचानक आलेल्या एका मांजराने अंगठी लपवलेला धोंडाच गिळून टाकला. हा प्रकार लक्षात येताच कुटुंबातील सदस्यांमध्ये एकच खळबळ उडाली. तातडीने मांजराला पकडून सुरक्षित ठिकाणी बांधण्यात आले.
दरम्यान, जावयाचा जेवणाचा कार्यक्रम पूर्ण करण्यात आला. त्यानंतर संपूर्ण प्रकाराची माहिती जावयाला देण्यात आली. अंगठी नंतर परत मिळाल्यानंतर देण्याचे ठरवून लेक-जावयाची पारंपरिक बोळवण करण्यात आली.
चार दिवस प्रतीक्षा, पण निष्फळ
अंगठी नैसर्गिकरित्या बाहेर पडेल या आशेने कुटुंबीयांनी मांजरावर चार दिवस लक्ष ठेवले. मात्र, विष्ठेद्वारे अंगठी बाहेर आली नाही. त्यामुळे मांजराला पशुवैद्यकाकडे नेण्यात आले.
उपचारादरम्यान मांजराचा मृत्यू
पशुवैद्यकांनी मांजराला उलटी होण्यासाठी औषधोपचार केले. मात्र, उपचारादरम्यान दुर्दैवाने मांजराचा मृत्यू झाला. त्यानंतर कुटुंबीयांच्या संमतीने मृत मांजरावर शस्त्रक्रिया करण्यात आली. शस्त्रक्रियेदरम्यान मांजराच्या पोटातून सोन्याची अंगठी सुरक्षितपणे बाहेर काढण्यात आली.
परिसरात चर्चेचा विषय
अधिक मासातील जावयाच्या पाहुणचारादरम्यान घडलेली ही अनोखी घटना सध्या टाकरवण परिसरात चर्चेचा विषय ठरली आहे. सोन्याची अंगठी परत मिळाली असली, तरी एका निरपराध प्राण्याचा मृत्यू झाल्याने कुटुंबीयांनी हळहळ व्यक्त केली.
