बीड — तालुक्यातील चौसाळा येथील जिल्हा परिषद माध्यमिक शाळेतील ज्येष्ठ शिक्षक दिलीप बोराडे गुरुवारी (दि.३०) सेवानिवृत्त झाले. त्यांच्या दीर्घ आणि उल्लेखनीय सेवेनिमित्त शाळेच्या वतीने सपत्नीक सत्कार करण्यात आला. कार्यक्रमाला मुख्याध्यापक, सामाजिक कार्यकर्ते आणि ग्रामस्थांची मोठी उपस्थिती होती.
कार्यक्रमाच्या अध्यक्षस्थानी जि प. माध्यमिक शाळेच्या मुख्याध्यापिका पद्मजा हम्पे होत्या. प्रमुख पाहुणे म्हणून सामाजिक कार्यकर्ते प्रेमचंद (बाबूशेठ) लोढा तसेच जिल्हा परिषद सदस्य आणि भाजपा बीड शहर अध्यक्ष अशोक लोढा उपस्थित होते.
यावेळी बोलताना बाबूशेठ लोढा म्हणाले की, “शिक्षक हा समाजाचा शिल्पकार असतो. दिलीप बोराडे यांनी 30-35 वर्षे विद्यार्थ्यांना ज्ञानदान करून अनेक यशस्वी विद्यार्थी घडवले आहेत.”
त्यांनी ग्रामीण भागातील विद्यार्थ्यांसाठी तळमळीने केलेल्या कार्याचे कौतुक करत त्यांच्या पुढील आयुष्यासाठी उत्तम आरोग्य व सुखसमृद्धीच्या शुभेच्छा दिल्या.
अध्यक्षीय भाषणात पद्मजा हम्पे यांनी बोराडे यांच्या कार्याचा गौरव केला. यावेळी हिंगणी (बु.) ग्रामस्थांच्या वतीने बबनदास वैष्णव, सुरज वैष्णव, शमशाद सय्यद,अॅड. चंद्रकांत गोरे अंकुश नाईकवाडे, मिलिंद कुलकर्णी, शहाजी सुरवसे आणि बाबासाहेब बोराडे आदींच्या वतीने त्यांचा सत्कार करण्यात आला.
