भीमकन्येच्या नेतृत्वात नव्या राजकारणाची घडी बसली
बीड — येणारा काळ लोकांनी व्यक्त केलेल्या विश्वासाचा आणि आम्ही दिलेले आश्वासन पूर्तीचा असणार आहे. बीड जिल्ह्याचे पालकमंत्री ना. अजितदादा पवार या कडक शिस्तीच्या नेतृत्वात बीडचा कायापालट आपणाला करायचा आहे, यासाठी नवनिर्वाचित पदाधिकाऱ्यांनी सज्ज रहावे अशा सूचना नवनिर्वाचितांना राष्ट्रवादी काँग्रेस पक्षाचे प्रदेश सरचिटणीस माजी आमदार अमरसिंह पंडित यांनी दिल्या. भिमकन्येच्या नेतृत्वात नव्या राजकारणाची घडी यानिमित्ताने बसली असून येणाऱ्या काळात बीड तालुक्यात नव्या दमाच्या नेतृत्वांना संधी देण्याची भुमिका पक्ष घेत असल्याचे सुतोवाच अमरसिंह पंडित यांनी यावेळी व्यक्त केले. राष्ट्रवादी काँग्रेस आणि मित्रपक्षाच्या नवनिर्वाचित नगराध्यक्षा श्रीमती प्रेमलता ताई पारवे आणि २१ नगरसेवकांचा सत्कार सोहळ्यात ते बोलत होते. पक्षाच्यावतीने शिवछत्र येथे नवनिर्वाचित पदाधिकाऱ्यांचा भव्य सत्कार सोहळा संपन्न झाला.
बीड नगर परिषद निवडणुकीतील नवनिर्वाचित नगराध्यक्षा श्रीमती प्रेमलता ताई पारवे यांच्यासह २१ नगरसेवकांचा सत्कार राष्ट्रवादी काँग्रेस पक्षाचे प्रदेश सरचिटणीस अमरसिंह पंडित यांच्या उपस्थित संपन्न झाला. यावेळी आ. विजयसिंह पंडित, राष्ट्रवादी ओबीसी सेलचे प्रदेशाध्यक्ष कल्याणराव आखाडे, शिवसेनेचे जिल्हा प्रमुख अनिलदादा जगताप, सचिन मुळूक, शिवसंग्रामचे तालुकाध्यक्ष सुहास पाटील, माजी नगराध्यक्ष दिलीपराव गोरे, राजेंद्र राऊत, बळीराम गवते यांच्यासह नवनिर्वाचित नगराध्यक्षा श्रीमती प्रेमलता ताई पारवे, नवनिर्वाचित नगरसेवक फारुक पटेल, शेख निजाम, शेख मुजीब यांच्यासह नवनिर्वाचित नगरसेवक पदाधिकारी व कार्यकर्ते उपस्थित होते.
यावेळी बोलताना अमरसिंह पंडित पुढे म्हणाले की, बीड शहरातील आजवरच्या राज्यकर्त्यांच्या अकार्यक्षम व्यवस्थेचा लोकांना विट आला होता, जिल्ह्याचे पालकमंत्री ना. अजितदादा पवार यांनी बीड जिल्ह्याचा कायापालट करू हा विश्वास लोकांना दिला होता या विश्वासावरच बीड शहरातील नागरीकांनी या नव्या दमाच्या लोकांना निवडून दिले आहे. पिण्याचे पाणी, रस्ते आणि स्वच्छता या मुलभूत सुखसूविधा यापुढील काळात कमी पडू दिल्या जाणार नाहीत. निवडून आलेल्या नगरसेवकांच्या प्रभागात ज्या पध्दतीचे विकास कामे होतील त्याच पध्दतीची विकास कामे पराभूत नगरसेवकांच्या प्रभागातही केले जातील असा विश्वास त्यांनी यावेळी व्यक्त केला.
याप्रसंगी बोलताना अनिलदादा जगताप म्हणाले की, लोकांनी विश्वासाने आपल्याला निवडून दिलेले आहे. यापुढील काळात चांगल्या पध्दतीचे काम करून वचने पूर्ण करू असेही ते यावेळी म्हणाले. नियोजनबध्द प्रचार यंत्रणा राबविल्यामुळे आपल्याला हे घवघवीत यश मिळालेले आहे. अहंकारी व्यक्तिमत्वाला आपण त्यांची जागा दाखवून दिली असून बारामतीच्या धरतीवर बीड जिल्ह्याचा कायापालट करण्यासाठी आपण सर्व मिळून काम करू असे राष्ट्रवादी ओबीसी सेलचे प्रदेशाध्यक्ष कल्याणराव आखाडे म्हणाले. आपल्या प्रास्ताविकपर भाषणात राष्ट्रवादीचे माध्यम प्रमुख भागवत तावरे म्हणाले की, बीड नगर परिषद निवडणुकीचा निकाल ही नव्या राजकारणाची नांदी आहे, शिवछत्र परिवाराच्या नेतृत्वावर लोकांनी टाकलेला विश्वास आपल्याला सार्थ करायचा आहे असेही ते यावेळी म्हणाले.
सामान्य लोकांच्या मतांचा आदर करत मुलभूत सुविधा आणि सुरक्षा देणार — आ.विजयसिंह पंडित
बीड नगर परिषद निवडणुकीत राष्ट्रवादी काँग्रेस व मित्र पक्षाच्या महायुतीला बीडकरांनी आश्वासक आणि अपेक्षित प्रतिसाद दिला आहे. हा विजय पालकमंत्री ना. अजितदादा पवार यांच्या विकासाभिमुख कारभार आणि राष्ट्रवादी आणि मित्र पक्षाच्या कार्यकर्त्यांचा आहे. बीडकरांनी विकासाच्या भुमिकेवर विश्वास ठेऊन युतीला दिलेला हा जनाधार आहे. प्रचाराच्या दरम्यान सामान्य लोकांनी नागरी सुविधा संदर्भात विविध मागण्या केल्या. त्यावर आम्ही येणाऱ्या काळात काम करणार असून सामान्य लोकांच्या मतांचा आदर करत मुलभूत सुविधा आणि सुरक्षा आम्ही देऊ. मागील काळात लोकांना वेठीस धरण्याचे काम प्रस्थापितांकडून केले जात होते. नगर परिषदेच्या सत्तेच्या माध्यमातून लोकांची अडवणुक केली जात होती. त्याला आता पूर्णविराम मिळाला असून येणाऱ्या काळात लोकांची कसलीही अडवणुक यापुढे होणार नाही असा विश्वास आ. विजयसिंह पंडित यांनी व्यक्त केला. नगर परिषद निवडणुकीच्या विजयानंतर पत्रकारांशी संवाद साधताना ते बोलत होते. यावेळी नवनिर्वाचित नगराध्यक्षा श्रीमती प्रेमलता ताई पारवे यांच्यासह नवनिर्वाचित नगरसेवक, शिवसेनेचे जिल्हा प्रमुख अनिलदादा जगताप, राष्ट्रवादी ओबीसी सेलचे प्रदेशाध्यक्ष कल्याणराव आखाडे, शिवसंग्रामचे तालुकाध्यक्ष सुहास पाटील, माजी नगराध्यक्ष दिलीपराव गोरे, राजेंद्र राऊत, बळीराम गवते यांच्यासह नवनिर्वाचित नगरसेवक पदाधिकारी व कार्यकर्ते उपस्थित होते.
