🎆 सरकारचं धोरणच “बळीराजा” पाताळात घाल; अतिवृष्टी अनुदान वाटपात मोठा झोल झाल 🎇

बीड — बलिप्रतिपदेच्या पूर्वसंध्येला सरकारने अतिवृष्टीने बाधित शेतकऱ्यांना मदत थेट खात्यावर जमा केली. मात्र या मदतीत मोठा झोल झाल सरकारने केला असल्याचं चित्र पाहायला मिळत आहे. सरकारही वामनासारखंच बळीराजाला पाताळात घालत असल्याची प्रतिक्रिया उमटू लागली आहे.

अतिवृष्टी होऊन शेतकऱ्यांच प्रचंड नुकसान झालं.हात तोंडाशी आलेला घास हिरावला गेला. लोकांचं झालेलं देणं पाणी कसं फेडायचं या विवंचनेत शेतकरी पुरता अडकला गेला‌. अनेकांनी आत्महत्याचा मार्ग स्वीकारला. महापुराने जमिनी खरवडून गेल्या क्षणात होत्याचं नव्हतं झालं. दिवाळी तोंडावर असताना बळीराजाचं पुरतं “दिवाळ” निघालं. अशावेळी अल्पशी मदत करण्याची घोषणा सरकारने करून शेतकऱ्यांच्या तोंडाला पानं पुसली.यामुळे राज्यात शेतकरी तसेच विरोधकांकडून टीकेची राळ उठली.मात्र सरकारने नेहमीप्रमाणेच आपला हेका कायम ठेवला 85 रुपये गुंठा मदत दिवाळीपूर्वी देण्याचं मोठ्या थाटात आश्वासन दिलं.हेक्टरी आठ हजार पाचशे रुपये दोन हेक्टर पर्यंत ही मदत दिली जाणार असे शासन आदेश काढले गेले. बलिप्रतिपदेच्या पूर्वसंध्येला सरकारने शेतकऱ्यांच्या खात्यात अतिवृष्टी अनुदानाची रक्कम जमा करण्यास सुरुवात केली. काही काळ आनंदाचे वातावरण शेतकरी वर्गात पसरलं गेलं कमीत कमी फुल नाहीतर फुलाची पाकळी मिळाली याचा आनंद झाला. मात्र तो आनंद क्षणिकच ठरला. शेतकऱ्यांच्या खात्यावर जसजशी रक्कम जमा होत होती. तसं तसं सरकारचा लबाडपणा उघडकीस येऊ लागला. हेक्टर भर जमीन असलेल्या शेतकऱ्याला तीन हजार रुपये दिले. दोन हेक्टरहून अधिक जमीन असलेल्या लोकांना कुणाला तेरा हजार रुपये, कुणाला दोन हेक्टर चे 3200 आले. सरकारने हे पैसे कोणत्या हिशोबाने दिले यावर समाज माध्यमातून प्रतिक्रिया उमटू लागल्या.
शेतकऱ्यांसाठी काम करत नेहमीच व्यापक लढा उभा करणारे बीडच्या पिंपळनेर सर्कलमधील धनंजय गुंदेकर यांनी त्यांच्या फेसबुक अकाउंट वरून अनुदान वाटप सुरू झाले असा मेसेज शेतकऱ्यांना दिला.त्यावेळी शेतकरी वर्गातून उमटलेल्या प्रतिक्रिया मधून सरकारने केलेल्या लबाडीचा पर्दाफाश झाला गेला. नारायण देवकते या शेतकऱ्याने दोन हेक्टर जमिनीला 3200 अनुदान आल्याचं सांगितलं. माजलगाव मधील नित्रुड मंडळात हेक्‍टरी सोळाशे रुपये मदत मिळाल्याचं गणेश शिंदे या शेतकऱ्याने सांगितलं. रायमोहा मंडळात हीच मदत अनिस शेख या शेतकऱ्याच्या खात्यात 73 रुपये 33 पैशांने जमा झाली. मोतीराम राजे नाईकवाडे या शेतकऱ्याच्या खात्यात 64.6 पैसे प्रति गुंठा याप्रमाणे मदत जमा झाली. नोमन चाऊस या शेतकऱ्याने आठ हजार पाचशे ऐवजी 4505 रुपये खात्यात आल्याची माहिती प्रतिक्रियेत दिली. विकास चोले या शेतकऱ्याने दहा हजार रुपये अतिरिक्त देण्याची घोषणा मुख्यमंत्री देवा भाऊंनी केली होती. तेही या अतिवृष्टी अनुदानातच समाविष्ट आहे का? असा खोचक प्रश्न विचारला आहे. नारायण शेरकर या शेतकऱ्याला 55 रुपये गुंठ्याने पैसे खात्यात जमा झाले. अविनाश पाटील या शेतकऱ्याने मला 17000 रुपये यायला पाहिजे होते. पण प्रत्यक्षात नऊ हजार आठशे रुपये आल्याचं सांगितलं. गणेश राज या शेतकऱ्याला मात्र 18 गुंठ्याला आठ हजार पाचशे रुपये अनुदान पडलं गेलं.
एकंदरच समाज माध्यमातून शेतकरी वर्गाकडून सरकारने शेतकऱ्यांची केलीली क्रूर चेष्टा जगजाहीर होऊ लागली आहे. पुन्हा एकदा आश्वासनांच्या खोट्या चक्रव्यूहात अडकवून शेतकऱ्यांच्या तोंडाला पान पुसल्याचं स्पष्ट होऊ लागला आहे.अतिवृष्टी अनुदान वाटपात झालेल्या घोळामुळे व बलिप्रतिपदेच्या पूर्वसंध्येलाच फसवणूक उघड झाल्यामुळे सरकारने पुन्हा एकदा “वामनाने” बळीराजा पाताळात घातला होता. याची जाणीव करून दिल्याची भावना शेतकरी वर्गातून व्यक्त केली जाऊ लागली आहे.