बीड — संतोष देशमुख खून प्रकरणातील आरोपी कृष्णा आंधळे 65 दिवसापासून फरार आहे.त्याची संपत्ती जप्त करण्याचे आदेश न्यायालयाने दिले आहेत.
मस्साजोगचे सरपंच संतोष देशमुख यांची 9 डिसेंबर 2024 रोजी निर्घृण हत्या करण्यात आली होती.
ज्यामध्ये कृष्णा आंधळे हा प्रमुख आरोपी होता. पण हत्येच्या दिवसापासून कृष्णा आंधळे हा फरार असून अद्यापही त्याचा शोध पोलिसांना लागलेला नाही. त्यामुळे आता त्यांची संपत्ती जप्त करण्याचे आदेश कोर्टाने दिले आहेत.
फरार आरोपी कृष्णा आंधळे याची संपत्ती जप्त करण्याची परवानगी द्यावी असा अर्ज सीआयडीच्या अधिकाऱ्यांनी न्यायालयाकडे काही दिवसांपूर्वीच केला होता, तसेच याबाबतची माहिती देखील सादर केली होती. याच बाबत आता कोर्टाने संपत्ती जप्तीचे आदेश दिले आहेत.कृष्णा आंधळे याच्याकडे 5 विविध प्रकारची वाहने असून धारूर व केज येथील बँकेत तीन खाते देखील आहेत. सदरची संपत्ती जप्त करण्याचे आदेश न्यायालयाने दिले असून त्यानुसार कारवाई सुरू करण्यात आली आहे.
दरम्यान, कृष्णा आंधळेच्या संपत्ती जप्त करण्याचे कोर्टाने आदेश दिल्यानंतर संतोष देशमुख यांचे बंधू धनंजय देशमुख यांनी काही महत्त्वाची मागणी केली आहे. उद्या 17 फेब्रुवारी रोजी मस्साजोग ग्रामस्थ एक महत्त्वाची बैठक घेणार असल्याची माहिती धनंजय देशमुख यांनी दिली आहे.
कृष्णा आंधळे याची संपत्ती जप्त करणे एक प्रक्रियेचा भाग आहे. मात्र, कृष्णा आंधळेला तात्काळ अटक करून त्याला फाशी देण्यात यावी. असेही ते म्हणाले आहेत. ज्यावेळेस या प्रकरणातील सर्व आरोपी फासावर लटकतील त्यावेळेस आमचं समाधान होईल. तपास योग्य दिशेने आणि निष्पक्ष पातीपणे चालवा यासाठी आम्ही वेळोवेळी विनंती करत आहोत.’ असेही धनंजय देशमुख म्हणाले आहेत.
