चंपावतीचा प्रशांत कुलकर्णी संस्था चालकांचा जावाई आहे की संचालक, शिक्षणाधिकारी याच्या ताटाखालची मांजरं आहेत?

बीड — शहरात प्रतिष्ठित समजल्या जाणाऱ्या “चंपावती” शिक्षण संस्थेत टीईटी परीक्षा पात्र नसल्याच्या कारणावरून दलित शिक्षकाला सेवा जेष्ठता असताना देखील जातीयवादाच्या कारणावरून मुख्याध्यापक पदाला मुकावे लागले. त्याचवेळी प्रशांत कुलकर्णी नावाचा शिक्षक संस्थाचालकांच्या इज्जतीची लक्तर वेशीवर टांगण्यास पुरेसा आहे.हा महाभाग टीईटी पास तर नाहीच नाही शिवाय टीईटी परीक्षेत घोटाळा केल्याच्या कारणावरून त्याच्यावर सायबर पोलिसांनी फौजदारी गुन्हा दाखल केला इतकच नाही तर टीईटी परीक्षेत बसण्यास त्याला राज्य परीक्षा परिषदेने प्रतिबंध ही केलेला आहे.तरी देखील तो संस्थेत कार्यरत आहे. मग तो संस्थाचालकांचा जावई आहे की, संस्थाचालक शिक्षणाधिकारी त्याच्या ताटाखालची मांजर आहेत? का त्याला संस्थेतून काढून टाकल्यावर संस्थाचालकांची अंड पिल्लं बाहेर येण्याची भीती संस्थाचालकांना वाटत आहे असे एक ना अनेक प्रश्न निर्माण झाले आहेत.

महाराष्ट्र शिक्षक पात्रता परीक्षा (MAHATET) पास न झाल्याच्या कारणावरून राम शिंदे नावाच्या शिक्षकाला मुख्याध्यापक पदावरून हाकालपट्टी करण्यासाठी संस्थाचालकांनी आपले डावपेच खेळले. डावपेचात ते यशस्वी ही झाले. राम शिंदे यांना मुख्याध्यापक पदावर बसवायचं तर शिक्षण संस्थेतल्या भ्रष्टाचाराला आळा बसतो. हे कारण तर आहेच आहे पण जातीयवादाचा किडा चावलेल्या संस्थाचालकांना दलित व्यक्ती मुख्याध्यापकपदी कसा चालेल हा खरा मोठा प्रश्न होता. याबाबत पोलिसात तक्रार देऊन संस्थाचालकावर गुन्हे दाखल करावेत अशी मागणी राम शिंदे यांनी केली आहे. पण त्यांना पायउतार करण्यासाठी ज्या टीईटी पात्रता परीक्षेचा मुद्दा मोठा केला. त्याच पात्रता परीक्षेच्या नियमांना हरताळ फासण्याचं काम संस्थाचालक मात्र राजरोस करत आहेत. त्याला कारणही तसेच आहे प्रशांत दत्तात्रय कुलकर्णी नावाचा हा शिक्षक ,शिक्षक भरती प्रक्रिया 2012 पासून बंद असताना 7 फेब्रुवारी 2015 साली बोगसपणे नियुक्त करण्यात आला. संस्थाचालकांना शिक्षण विभागात माफियागिरी करणाऱ्या चंद्रकांत मुळे ची मर्जी संपादन करून संस्थेत नंगानाच करायचा होता त्यासाठी त्याचा हा प्यादा संस्थेत घेतला. मग काय चंपावती संस्थेत बोगस शिक्षक भरती मोठ्या प्रमाणावर झाली. आपण सगळे भाऊ भाऊ लुटून सगळी चंपावती खाऊ हा मूलमंत्र बनला गेला.

प्रशांत कुलकर्णी चा टीईटी परीक्षेत घोटाळा

बोगस शिक्षक भरतीत संस्थेत घुसलेल्या या महाभागाने टीईटी पात्रता परीक्षा पास असणं गरजेचं असतं मग त्यासाठी “वाट्टेलं ते” असं म्हणत 2019 20 मध्ये झालेल्या टीईटी परीक्षेत ही त्याने गैरप्रकार केला. परिणामी सायबर पोलिसांनी पुणे शहर पोलीस ठाण्यात गुरनं 56/2021 भादवि कलम 406 ,409, 420, 465, 467, 468 ,34 ,120 ब तसेच माहिती तंत्रज्ञान अधिनियम 2000 कलम 66 (डी) आणि महाराष्ट्र विद्यापीठ मंडळाच्या व इतर विनिर्दिष्ट परीक्षांमध्ये येणाऱ्या गैरप्रकारास प्रतिबंध अधिनियम 1990 (सुधारित) कलम 7,8 अन्वये 16 डिसेंबर 2021 रोजी गुन्हा दाखल करण्यात आला. या नगावर नुसता गुन्हाच दाखल केला नाही तर शिक्षक पात्रता परीक्षेसाठी त्याला कायमस्वरूपी प्रतिबंध घालण्यात आला. त्या परीक्षेत त्याचा आसन क्रमांक 530 11 10 120 असा होता. असाच टीईटी परीक्षेत प्रशांत कुलकर्णी याने 2018 मध्ये झालेल्या परीक्षेत देखील केला होता. या प्रकरणी देखील सायबर पोलिसांनी गुरनं 58/2021 नुसार विविध कलमान्वये फौजदारी गुन्हा दाखल केला होता. 2018 साली झालेल्या परीक्षेचा आसन क्रमांक 5302310238 हा होता. एवढं मोठं गंभीर प्रकरण असताना देखील त्याच्यावर कुठलीच कारवाई संस्थेला करावीशी वाटली नाही.

संस्थाचालकांना अंड पिलं बाहेर येण्याची भीती

शिक्षण विभागात काळे कारणामे करणाऱ्या चंद्रकांत मुळेचा डावा हात असलेल्या या प्रशांत कुलकर्णी ने खोटे कागदपत्र तयार करण्याची कलादेखील अवगत केली आहे. मुळेचा माणूस म्हणून विश्वासू मग काय संस्थाचालकांचा सगळाच काळा चिट्ठा याच्या हातात आला. राम शिंदे हे मुख्याध्यापक असताना शालार्थ पासवर्ड, संच मान्यता पासवर्ड, यु-डायस पासवर्ड चा वापर हा प्रशांत कुलकर्णीच करत होता. या संदर्भात मुख्याध्यापक या नात्याने ही बाब अनेक वेळा शिक्षणाधिकारी पे युनिटचे ढाकणे यांच्या निदर्शनास पत्राद्वारे आणून दिली. मात्र शेण खायला भेटलं की काहीही करायची तयारी ठेवणाऱ्या अधिकाऱ्यांनी त्यांच्या पत्राला केराची टोपली दाखवली. शिक्षण विभागाकडे तक्रारी केल्याच्या कारणावरून चंद्रकांत मुळे ने अनेक वेळा राम शिंदे यांना धमकावल्याचे प्रकार घडले होते. याच पासवर्डच्या माध्यमातून प्रशांत कुलकर्णी हा शासनाला खोटी माहिती देणे, बोगस पगार बिले तयार करत शासनाच्या तिजोरीवर दरोडे घालण्याचे काम तो करीतच होता आजही तो प्रकार सुरूच आहे. याच एकंदरीत प्रशांत कुलकर्णीच्या कारनाम्यामुळे
त्याच्यावर कारवाई करायची म्हणजे जेलवारी पक्की याची जाणीव संस्था चालकांना असल्याने त्यांना देखील ताटाखालचं मांजर होऊन म्यांव करण्याची वेळ आज येऊन ठेपली आहे‌.

शिक्षणाधिकाऱ्यासह शिक्षण विभाग लाचार

शालार्थ आयडी घोटाळा, वेतन घोटाळा, बोगस शिक्षक भरती यासारख्या एक ना अनेक घोटाळ्यामुळे बीडचा शिक्षण विभाग सध्या गाजतो आहे. पैसा मिळतो ना, वर कमाई होती ना मग संस्थाचालकांपुढे थोडासा गोंडा घोळला तर बिघडतं कुठं हाच मूलमंत्र जपत शिक्षण विभागातला क्लासवन अधिकारी असो की चपराशी प्रत्येक जण शासनाशी नाहीतर संस्थाचालकांशी ईमान राखण्यात धन्यता मानत आहे. याच कारणामुळे जिल्ह्यात अनेक बोगस शाळा, बोगस शिक्षक भरती, वेतन घोटाळे झालेले असताना देखील हे काही शिक्षण अधिकाऱ्याने याला पायबंद घालण्यासाठी कुठलेच पाऊल उचलले नाही. जो येतो तो संस्थाचालकांच्या चपला उचलण्यातच धन्यता मानतो. मग वरपासून खालपर्यंत मिंधे असलेले अधिकारी कारवाई करणार कशी हा मोठा प्रश्न निर्माण झाला आहे. याच लाचारीच्या भूमिकेमुळे प्रशांत कुलकर्णी सारख्या गुन्हेगाराचं फावलं आहे.

जवाहरलाल सारडा सारखी हिम्मत इतर संस्था चालक दाखवणार का?

श्री चंपावती शिक्षण संस्थेचे संचालक मंडळ पाहिले तर यामध्ये चार प्रथित यश वकील आहेत. चार सुप्रसिद्ध डॉक्टर आहेत. दोन प्राध्यापक आहेत. यांच्यासारख्या नामवंत लोकांच्या संस्थेत यांच्या संमतीने नंगा नाच सुरू असताना यांची तोंड मात्र शिवली गेलेली आहेत.
यामध्ये जवाहर सारडा हेच खरे प्रामाणिक निघाले असं म्हणायची वेळ आली आहे. जवाहर सारडा यांनी 15 जुलै 2026 रोजी शिक्षणाधिकाऱ्यांकडे लेखी तक्रार दिली. या तक्रारीमध्ये प्रशांत दत्तात्रय कुलकर्णी याच्यावर असलेल्या वेगवेगळ्या गुन्ह्यांची माहिती दिली आहे. बोगस प्रमाणपत्र तयार करणे पोलिसात गुन्हा नोंद असताना हा शिक्षक विद्यार्थ्यांना शाळेत फसवणुकीचे धडे देणार का? असा प्रश्न उपस्थित करत त्याची बेकायदेशीर नियुक्ती तात्काळ रद्द करण्यात यावी तसेच 7 फेब्रुवारी 2015 ते आज पर्यंत जे वेतन व भत्ते घेतले आहेत ते दंड व्याजासह वसूल करण्यात यावे अशी मागणी त्यांनी संस्थेचा संचालक तसेच जागरूक नागरिक या नात्याने सारडा यांनी केली आहे. याबरोबरच कायम मान्यता देत असताना बनावट टी ई टी प्रमाणपत्र तपासणे आवश्यक असताना त्याला मान्यता देण्यात आली. खोटे प्रमाणपत्र दिल्यामुळे शिक्षणाधिकाऱ्याची देखील प्रशांत कुलकर्णी याने फसवणूक केल्याचा देखील त्यांनी म्हटलं आहे. दरम्यान याप्रकरणी पोलीसात कुलकर्णी विरोधात गुन्हा दाखल करण्याची मागणी देखील त्यांनी शिक्षणाधिकारी यांच्याकडे केली. दरम्यान सारडा यांनी दिलेल्या तक्रार अर्जाला दोन महिन्याहून अधिक कालावधी उलटत असला तरी कर्तव्यदक्षतेचा आव आणणाऱ्या शिक्षणाधिकाऱ्याला कुठलीच कारवाई करण्याची गरज वाटली नाही.
एकंदरच या चंपावती शिक्षण संस्थेत सुरू असलेल्या भ्रष्टाचाराच्या खेळामध्ये प्रशांत दत्तात्रय कुलकर्णी हा संस्थाचालकांचा, शिक्षणाधिकाऱ्यांचा जावई आहे म्हणून कारवाई होत नाही. की सगळे ताटाखालची खालची मांजरं होऊन मिळणाऱ्या खरकट्यावरच जगण्यात धन्यता मानत आहेत. प्रशांत कुलकर्णी वर शिक्षणाधिकाऱ्यासह संस्थाचालक कारवाई करणार का? शिक्षणाधिकारी संस्थाचालक चंपावती संस्थेतून विद्यार्थ्यांना फसवेगिरी, शासनाच्या लुटीचे धडे देणार का? शिक्षणाधिकाऱ्याचा प्रामाणिकपणा थोडा तरी दिसणार का? संस्थेतील भ्रष्टाचाराची सगळी पोलखोल झाल्यानंतरच कारवाई करणार का? आज पर्यंत संस्थाचालकांनी शहरात कमावलेली इज्जत सगळी गेल्यानंतरच जाग येणार का? असे एक ना अनेक प्रश्न निर्माण झाले आहेत.