मुंबई — राष्ट्रवादी काँग्रेस शरदचंद्र पवार पक्षाने संघटनात्मक पातळीवर मोठा निर्णय घेत पक्षाच्या नव्या प्रवक्त्यांची नियुक्ती जाहीर केली आहे. पक्षाकडून एकूण 10 प्रवक्त्यांची नियुक्ती करण्यात आली असून, राज्य आणि राष्ट्रीय पातळीवर पक्षाची अधिकृत भूमिका माध्यमांसमोर मांडण्याची जबाबदारी या नेत्यांवर सोपवण्यात आली आहे.
पक्षाच्या कोअर कमिटीची बैठक आज पार पडली. या बैठकीला प्रदेशाध्यक्ष शशिकांत शिंदे, जयंत पाटील, अनिल देशमुख, हर्षवर्धन पाटील, जितेंद्र आव्हाड, राजेश टोपे, खासदार डॉ. अमोल कोल्हे, खासदार निलेश लंके, फौजियाताई खान, राजेंद्र शिंगणे आणि माजी आमदार ॲड. अशोकबापू पवार यांच्यासह पक्षातील प्रमुख नेते उपस्थित होते.
बैठकीनंतर नव्या प्रवक्त्यांची यादी जाहीर करण्यात आली.
कोण आहेत राष्ट्रवादी शरद पवार गटाचे नवे प्रवक्ते?
पक्षाने नियुक्त केलेल्या 10 प्रवक्त्यांमध्ये जितेंद्र आव्हाड, क्लाईड क्रास्टो, भीमराव हत्तीअंबीरे, अनिश गवांदे, ॲड. फैजल मिर्झा, महेबूब इब्राहीम शेख, प्रवीण कुंटे पाटील, प्रशांत सोनबा वीरकर, ॲड. हेमाताई पिंपळे आणि डॉ. चंद्रकांत बारेला यांचा समावेश आहे.
आगामी काळात विरोधकांकडून होणाऱ्या आरोपांना प्रत्युत्तर देणे, राजकीय घडामोडींवर पक्षाची भूमिका स्पष्ट करणे तसेच विविध सामाजिक आणि सार्वजनिक प्रश्नांवर पक्षाची अधिकृत बाजू मांडण्याची महत्त्वाची जबाबदारी या प्रवक्त्यांवर असेल.
4 ऑगस्टला जुन्या नियुक्त्या रद्द
दरम्यान, 4 ऑगस्ट 2026 रोजी राष्ट्रवादी काँग्रेस शरदचंद्र पवार पक्षाने यापूर्वी नियुक्त केलेल्या प्रवक्त्यांच्या नियुक्त्या रद्द केल्या होत्या. प्रदेशाध्यक्ष शशिकांत शिंदे यांच्या स्वाक्षरीच्या पत्राद्वारे याबाबत माहिती देण्यात आली होती.
त्यावेळी माजी आमदार विद्या चव्हाण आणि महेश तपासे हे पक्षाचे अधिकृत प्रवक्ते म्हणून माध्यमांसमोर पक्षाची भूमिका मांडतील, असे स्पष्ट करण्यात आले होते.
मात्र, आता पक्षाने पुन्हा नव्या 10 प्रवक्त्यांची नियुक्ती केल्याने राष्ट्रवादी शरदचंद्र पवार पक्षाने आपली मीडिया रणनीती अधिक आक्रमक करण्याच्या दिशेने पाऊल टाकल्याची चर्चा सुरू झाली आहे. आगामी राजकीय संघर्षाच्या पार्श्वभूमीवर नव्या प्रवक्त्यांची भूमिका महत्त्वाची ठरणार आहे.
