शिरूर — आ. सुरेश धस यांचा कार्यकर्ता असलेल्या सतीश भोसले उर्फ खोक्या याचे नव नविन कारनामे समोर येत असून आता एका व्हिडिओ मध्ये तो चक्क शालेय कार्यक्रमात विद्यार्थ्यांना हात-पाय मोडण्याची धमकी देत असल्याचे एका व्हिडिओतून समोर आले आहे.

तसेच आधीच माझ्यावर खूप सार्‍या केसेस आहेत. आणखी काही केसेस झाल्याने काही फरक पडत नाही असे देखील म्हणत असल्याचे दिसते. हा व्हिडिओ शिरूर येथीलच कालिकादेवी विद्यालयातील असल्याचे समोर आले असून यामध्ये प्राचार्य व शिक्षक उपस्थित असल्याचे दिसते. प्राचार्य व शिक्षकांनी अशा व्यक्तीला विद्यार्थ्यांना मार्गदर्शन करायला कसे काय बोलावले असेल असा प्रश्न आता या निमित्ताने उपस्थित होऊ लागला आहे.

शिरूर तालुक्यातील सतीश भोसले याने एका व्यक्तीला बॅटने मारहाण करतानाचा व्हिडिओ समोर आला होता. त्यानंतर ढाकणे पिता पुत्राला देखील अमानुष मारहाण करत जखमी केले होते. या दोन्ही प्रकरणात गुन्हा दाखल झाला असून सतीश भोसलेला ताब्‍यात घेण्यासाठी पोलिसांची दोन पथके रवाना झाली आहेत.

या दरम्यानच आता सतीश भोसलेचा एक नवा व्हिडिओ समोर आला असून यामध्ये तो शाळेत असलेल्या विद्यार्थ्यांना हातपाय मोडण्याची धमकी देत असल्याचे दिसते. कार्यक्रमात हा सगळा प्रकार सुरू असून यावेळी संबंधित विद्यालयाचे प्राचार्य शिक्षक देखील उपस्थित असल्याचे व्हिडिओमध्ये दिसते. अशा प्रकारच्या गुन्हे दाखल असलेल्या व्यक्तीला विद्यार्थ्यांना मार्गदर्शन करायला कस काय बोलावले असा प्रश्न या निमित्ताने उपस्थित होऊ लागला आहे.

बीड — संतोष देशमुख हत्या आणि खंडणी प्रकरणात तुरुंगात असलेल्या वाल्मिक कराड विषयी मोठी माहिती समोर आली आहे. कराडलाच खंडणीसाठी धमकावण्यात आले होते. त्यानंतर जीवाच्या भीतीने त्याने खंडणी खोराला 15 लाख रुपये दिले होते.माजी मंत्री धनंजय मुंडे यांच्या जगमित्र कार्यालयातून हे पैसे दिल्याचे स्पष्ट झाले आहे.

https://x.com/anjali_damania/status/1897924759859638443

कराडला खंडणीसाठी धमकी दिल्याप्रकरणी मागील वर्षी जानेवारी महिन्यातच गुन्हाही दाखल झाला आहे. सामाजिक कार्यकर्त्या अंजली दमानिया यांनी या बाबतचा एफआयआर सोशल मीडियात शेअर केला आहे. त्यानुसार माजी मंत्री धनंजय मुंडे यांच्या परळी येथील कार्यालयात टाइप रायटरची नोकरी करणाऱ्या गणेश उगले याने ही फिर्याद दिली आहे. तो इतर कार्यालयीन कामही पाहतो. शिवराज बांगर हा 1 जानेवारी 2023 रोजी जगमित्र संपर्क कार्यालयात आला होता, असे फिर्यादीत म्हटले आहे.वाल्मिकअण्णा कराड यांना बोललो आणि त्यांनी मला 15 लाख रुपये देण्यात सांगितले आहेत, असे बांगर आपल्याला म्हणाल्याचे उगले याने फिर्यादीत नमूद केलेआहे. कराड यांना फोन करून आपण याबाबत विचारणा केल्यानंतर त्यांनी सांगितले की, बांगर मला वारंवार व समक्ष भेटून तसेच वॉट्सअपद्वारे कॉल करून धमकी देत होता. मला 15 लाख रुपये देत नाहीतर तुझ्या अंगावर गाडी घालून ठार मारीन, तुझी समाजामध्ये बदनामी करेन. मला माझ्या जिवाचा धोका नको आहे. त्यामुळे त्याला 15 लाख रुपये दे, असे कराड यांनी सांगितल्याचे उगले म्हटले आहे.
बांगरला पैसे दिल्याचे सीसीटीव्हीमध्ये असल्याचा दावाही उगलेने केला आहे. पैसे घेतल्यानंतर बांगरकडून धमकी दिली जात होती. त्यामुळे पोलिसांत फिर्याद दिल्याचे उगलेने म्हटले आहे. ही फिर्याद मागील वर्षी 2 जानेवारी 2024 रोजी परळी पोलिस ठाण्यात नोंदवण्यात आली आहे. त्यानुसार खंडणीचा गुन्हाही दाखल करण्यात आला आहे.एफआयआर पोस्ट करताना दमानिया यांनी म्हटले आहे की, वाल्मिक कराड कडून 15 लाखाची खंडणी शिवराज बांगर यांनी वसुल केली होती, असा एफ आय आर बाहेर आला आहे. वारंवार समक्ष भेटून व व्हॉट्सअप कॉल वरून, “पैसे दे नाहीतर तुला मारून टाकिन” अशी धमकी शिवराज बांगर यांनी दिली आणि 15 लाख कराडच्या सांगण्यावरून, जगमित्रच्या लॉकर मधून देण्यात आले? कराडला कोणी धमकी देऊ शकत होतं, हे माझ्या बुद्धीला पटत नसल्याचं दमानिया यांनी म्हटलं आहे.

शिरूर (का) –अज्ञात व्यक्तीस विवस्त्र करून मारहाण करणाऱ्या सतीश भोसले ऊर्फ खोक्या याचा व्हिडिओ समाज माध्यमावर व्हायरल झाला होता. याप्रकरणी पोलिसांकडून गुन्हा दाखल झाल्यानंतर  भोसलेने तीक्ष्ण हत्याराने मारहाण करून जिवे मारण्याची धमकी दिल्याची तक्रार बावी येथील एका व्यक्तीने गुरुवारी पोलिसात दिली आहे.दिल्यानंतर भोसलेवर दुसरा गुन्हा दाखल करण्यात आला.

तालुक्यातील बावी येथील एका व्यक्तीला विवस्त्र करून मारहाण केली जात असल्याची चित्रफीत व्हायरल झाली होता. या व्यक्तीच्या पायावर एका तुटलेल्या बॅटने जोरजोरात अमानुषपणे मारहाण केली जात असल्याचे दिसत आहे. याप्रकरणात बुधवारी सतीश भोसलेसह चार जणांवर पोलिस उपनिरीक्षक धनंजय कुळकर्णी यांच्या फिर्यादीवरून गुन्हा दाखल करण्यात आला होता.

याप्रकरणी दुसराही गुन्हा दाखल झाला आहे. बावी येथील फिर्यादी दिलीप ढाकणे (वय ५५) हे रानवस्ती येथे आपल्या कुटुंबीयांसह राहतात. ते आपल्या जांभळीच्या शेतामधे गेल्यानंतर झापेवाडी येथील भाऊसाहेब भोसले याने हरिण पकडण्याकरीता जाळे लावल्याचे त्यांना समजले. जाळे काढून घेण्यास सांगताच भोसलेने साथीदारांना बोलावून मारहाण केली.

आरडाओरड ऐकून दिलीप ढाकणे यांचा मुलगा महेश त्याठिकाणी आल्यानंतर ते पळाले. फोन करून त्यांनी सतीश भोसले आणि साथीदारांना बोलून घेऊन दोघांना मारहाण केली. त्यामध्ये दिलीप यांचे दात पडले तर महेशच्या पायाला गंभीर दुखापत झाली आहे.
दरम्यान, सतीश भोसले हा माझा कार्यकर्ता असला तरी त्याच्यावर कारवाई करावी, अशी मागणी आमदार सुरेश धस यांनी केली आहे.

चौसाळा — बीड तालुक्यातील अंजनवती गावातील पोष्ट मास्तर भाऊसाहेब शिवलिंग शेटे यांनी बनावट पासबुक तयार करून चौसाळा उप डाकघरातील कार्यालयात पैसे जमा न करता जवळपास ५० लाख रुपयांचा घोटाळा केल्याचा आरोप अंजनवती आणि घारगाव येथील ग्रामस्थांनी केला असुन यामध्ये रॅकेट कार्यरत असुन चौसाळा डाकघरातील अधिकारी कर्मचाऱ्यांसह सर्वांचीच सखोल चौकशी करून गोरगरिबांच्या खात्यावरील पैसे परत करावेत अशी मागणी सरपंच कैलास येडे,रेवण येडे, वैभव येडे, सुधीर सोनवणे, महादेव माळी,बाळु शिंदे,मारोती वारकरी, बन्सी शिंदे आदींनी केली आहे.

याबाबत अधिक माहिती अशी की, भाऊसाहेब शेटे याने बनावट पासबुक तयार करून जनतेसह पोस्ट खात्याची फसवणूक केली. या प्रकरणात फसवणूक झालेले अनेक जण आपली कैफियत मांडू लागले आहेत.मालक वारल्यानंतर , मेंढ्या सांभाळणं होईना मग त्या विकुन दीड लाख रुपये पोस्टात टाकले. बटईने दिलेल्या जमिनीतुन मिळणाऱ्या पैशातून पोटापाण्याचं भागतं. काल गावात कालवा झाला तेव्हा कळलं पोष्ट मास्तरनं घोटाळा केलाय.आता आम्ही काय करावं असा प्रश्न ७५ वर्षीय अनुसया कोंडिबा कर्डुले हताश होऊन विचारताहेत.अशाच प्रकारे फसवणूक झाल्याचे पपिता प्रभाकर थोरात, मुक्ताबाई श्यामराव सोनावणे यांनी सांगितले.

केंद्र शासनाच्या आखत्यारीत पोस्ट खाता येत  असल्याने याची विश्वासाहर्ता होती म्हणून गोर गरीब शेतमजुर यांनी पोष्टात पैसे जमा केले.२ वर्षांपूर्वी भाऊसाहेब शेटे पोष्ट मास्तर म्हणुन आल्यावर गोंधळ सुरू झाला. एका माणसाचे काम नसुन चौसाळा डाकघरातील अधिकारी व कर्मचारी यांचा सुद्धा यामध्ये सहभाग असल्याचा संशय ग्रामस्थांनी व्यक्त केला आहे. या प्रकरणात सखोल चौकशी करून कारवाई करावी आणि खातेदारांचे पैसे परत करावेत अशी मागणी सरपंच कैलास येडे यांनी केली आहे.

चौसाळा डाकघराचे निरीक्षक जाकोरे यांनी अंजनवती गावात ग्रामस्थांशी चर्चा करत.खातेदारांनी त्यांच्याकडे असलेल्या खात्याचे पुरावे द्या पुढील कारवाई करण्यात येईल तसेच पोलिसांत गुन्हा दाखल करण्यात येणार आहे.असे जाकोरे यांनी सांगितले.

बीड — सरपंच संतोष देशमुख यांचे अपहरण करून हत्या करण्यात आली. त्या प्रकरणी वाल्मीक कराड यांच्यासह आठ जणांवर दाखल करण्यात आलेल्या खंडणी, खून आणि ॲट्रॉसिटी प्रकरणाची पुढील सुनावणी 12 मार्च रोजी विशेष मकोका न्यायालयात होणार आहे.

सरपंच संतोष देशमुखांनी आवादा या पवनचक्की प्रकल्पाच्या कंपनीत खंडणी मागणाऱ्यांचा विरोध केला होता. म्हणून त्यांचे दिनांक 6 डिसेंबर रोजी टोल नाक्यावर वरून अपहरण करून हत्या करण्यात आली होती. या प्रकरणाचा तपास सीआयडीने अवघ्या 80 दिवसांत पूर्ण करून दि. 28 फेब्रुवारी रोजी दीड हजार पानांचे दोषारोप-पत्र विशेष मकोका न्यायालयात सादर केले आहे.

या हत्या प्रकरणात अन्न व नागरी पुरवठा मंत्री धनंजय मुंडे यांचे निकटवर्तीय वाल्मीक बाबुराव कराड आणि अजित पवार गटाचे राष्ट्रवादी काँग्रेस पक्षाचे तत्कालीन केज तालुकाध्यक्ष विष्णू महादेव चाटे यांच्यासह सराईत गुन्हेगारी टोळीचा प्रमुख ज्ञानेश्वर उर्फ सुदर्शन चंद्रभान घुले आणि प्रतीक भीमराव घुले, सुधीर ज्ञानोबा चाटे, महेश सखाराम केदार, जयराम माणिक चाटे आणि फरार असलेला कृष्णा शामराव आंधळे यांच्या विरुद्ध दि. 28 फेब्रुवारी रोजी दीड हजार पानांचे दोषारोप-पत्र विशेष मकोका न्यायालयाचे दुसरे अतिरिक्त जिल्हा सत्र न्यायाधीश सुधीर भाजीपाले यांच्या न्यायालयात दाखल झालेले आहे.

दि. 1 मार्च रोजी विशेष मकोका न्यायालयात सुनावणी झाली असून अतिरिक्त जिल्हा सत्र न्यायाधीश सुधीर भाजीपाले यांनी या प्रकरणाची पुढील सुनावणी ही 12 मार्च रोजी केज न्यायालयात ठेवली आहे. राज्य शासनाच्या वतीने सरकारी वकील ॲड उज्वल निकम आणि सहाय्यक सरकारी अभियोक्ता म्हणून ॲड. बाळासाहेब कोल्हे हे काम पहात आहेत.