बीड — जिल्हयातील अवैध व्यवसायांच्या विरुध्द करण्यात येणाऱ्या कारवायांचाच एक भाग म्हणून अवैध शस्त्रे बाळगणा-यांविरुध्द पोलीस अधिक्षक श नवनीत काँवत यांनी मोहिम उघडलेली आहे. त्यानुसार सर्व पोलीस ठाणे प्रभारी अधिकारी व स्थानिक गुन्हे शाखा यांना आदेशित करुन बीड जिल्हयात कोणत्याही प्रकारे अवैध शस्त्रांचा वापर होणार नाही याची खबरदारी घेऊन जे कोणी अवैध शस्त्रे बाळगतील अशांविरुध्द कारवाई करण्याचे आदेशित करण्यात आलेले आहे. त्यानुसार स्थानिक गुन्हे शाखेचे अधिकारी यांना गोपनिय बातमीदारांमार्फत बातमी मिळाली की, परळी वैजनाथ येथील रेल्वे स्टेशन परीसरात दोन इसम येत असून त्यांच्याजवळ अवैध गावठी कट्टा आहे. सदर माहितीच्या आधारे दिनांक १६ मे रोजी सकाळी  वरिष्ठांच्या मार्गदर्शनाखाली परळी येथे स्थानिक गुन्हे शाखेच्या पथकाने परळी रेल्वे स्टेशन परिसरात सापळा लाऊन दोन इसम नामे अमोल रामहरी कांदे, वय ३२ वर्षे, रा. माणिकनगर, परळी , पांडूरंग प्रकाश शेंडगे, वय ३० वर्षे, रा. एलआयसी कॉलनी, रिंगरोड लातूर यांना पकडले. त्या दोघांची अंगझडती घेतली असता आरोपी अमोल कांदे याचे पॅन्टच्या आतमध्ये कमरेला एक गावठी कट्टा खोवलेला मिळून आला. तसेच त्यासोबत ०३ जीवंत काडतूस देखिल मिळून आले. दोन्ही आरोपी यांच्या ताब्यातून एक गावठी कट्टा/पिस्टल (अग्नीशस्त्र) व ०३ जीवंत काडतूस असा एकूण ४३,०००/- रुपये किंमतीचा मुद्देमाल जप्त करण्यात आला आहे. सदर अवैध गावठी कट्टा/पिस्टल बाबत सदर अटक आरोर्पीकडे विचारपूस करता त्यांनी तो सतीष मुंडे, रा. डाबी, ता. परळी व मनोहर मुंडे, रा. बेलंबा, ता. परळी यांच्याकडून विकत घेतल्याचे प्राथमिक तपासात कबुल केले असून सदर चारही आरोपींविरुध्द पोलीस ठाणे संभाजीनगर, परळी वैजनाथ येथे पोलीस अंमलदार श्री विष्णू बाजीराव सानप यांच्या फिर्यादीवरुन गुरनं. १०४/२०२५, कलम ३, २५ भारताचा शस्त्र अधिनियम अन्वये गुन्हा नोंद केला आहे. तसेच गावठी पिस्टलसह पकडलेल्या वरील दोन इसमांना अटक करण्यात येऊन मा. न्यायालयात हजर केले असता मा. न्यायालयाने त्यांची एक दिवस पोलीस कस्टडी रिमांड मंजुर केली. पिस्टल विकणारे दोन आरोपी १) सतीष मुंडे व २) मनोहर मुंडे यांचा गुन्हयाचे तपासी अधिकारी  प्रविण जाधव, सहाय्यक पोलीस निरीक्षक, पोलीस ठाणे संभाजीनगर, परळी हे शोध घेत आहेत. सदरील कारवाई  काँवत, पोलीस अधिक्षक बीड, मा. श्रीमती चेतना तिडके, अप्पर पोलीस अधिक्षक, अंबाजोगाई, श्री शिवाजी बंटेवाड, प्रभारी पोलीस निरीक्षक स्थानिक गुन्हे शाखा, बीड यांच्या मार्गदर्शनाखाली बीड स्थानिक गुन्हे शाखेचे पोलीस उपनिरीक्षक श्री सुशांत सुतळे, पोह/विकास राठोड, पोलीस अंमलदार श्री विष्णू सानप, श्री नितीन वडमारे, विक्की सुरवसे यांनी केली आहे.

बीड — वाहनांची खरेदी-विक्री करणाऱ्या व्यापाऱ्याचे चौघांनी पाच लाख रुपयांच्या खंडणीसाठी संगनमत करून अपहरण करत बेदम मारहाण केल्याची घटना गिरामनगर भागात घडली. याप्रकरणी शिवाजीनगर पोलिस ठाण्यात चार जणां विरोधात गुन्हा नोंद करण्यात आला आहे
पंजाब पांडुरंग शिंदे वय 33, रा. गिरामनगर, पांगरी रोड, बीड यांनी शिवाजीनगर पोलिस ठाण्यात दिलेल्या फिर्यादीनुसार दिनेश पोपट ठोसर, विठ्ठल गायकवाड हे दोघेही रा. उखंडा, लिंबादेवी, ता. बीड, बालाजी बहिरवाळ रा. धानोरा रोड, बीड, मयूर खोमणे चऱ्हाटा फाटा, बीड अशी अपहरण करणाऱ्या आरोपींची नावे आहेत.
रात्री सव्वा नऊला घरी असताना दिनेश पोपट ठोसर, विठ्ठल गायकवाड बालाजी बहिरवाळ व मयूर खोमने या चौघांनी घराबाहेर बोलावून लाथाबुक्क्यांनी मारहाण केली. त्यानंतर जबरदस्तीने त्यांच्या काळ्या रंगाच्या स्विफ्ट कारमध्ये बसवून त्यांना नगर रोडवरील देवराज बारमध्ये नेण्यात आले. तेथे आरोपींनी पाच लाख रुपयांची मागणी करत पुन्हा एकदा मारहाण केली.यावेळी बालाजी बहिरवाळ याने बीअरच्या बाटलीने शिंदे यांच्या डोक्यात मारून गंभीर जखमी केले. मारहाण झाल्यानंतर शिंदे यांनी जीव वाचवण्यासाठी अंधाराचा फायदा घेत बारमधून पळ काढला व जवळील स्टोन क्रशरवर लपून बसले.काही वेळाने पोलिसांनी त्यांना ताब्यात घेतले व शिवाजीनगर पोलिस ठाण्यात आणले. याप्रकरणी आरोपी दिनेश ठोसर, विठ्ठल गायकवाड, बालाजी बहिरवाळ व मयुर खोमणे यांच्या विरोधात अपहरण, मारहाण, जबरदस्ती, खंडणी मागणी व इतर कलमांतर्गत गुन्हा दाखल करण्यात आला आहे. या प्रकरणाचा पुढील तपास शिवाजीनगर पोलिस करत आहेत.

केज — एक भरधाव कंटेनर जो समोर आला त्याला चिरडत गेला. युसुफ वडगाव पोलीस ठाणे हद्दीत अडवण्याचा प्रयत्न केला मात्र तो निष्फळ ठरला अखेरीस लोखंडी सावरगाव जवळ वळणावर तो पलटी झाला. या थरारक अपघातात 25 पेक्षा जास्त नागरिक जखमी झाले आहेत. तर चिंचोली माळी येथील महिला मृत्युमुखी पडली आहे. जखमीमध्ये एका पोलीस कर्मचाऱ्याचा देखील समावेश आहे. ही घटना शुक्रवारी दुपारी तीनच्या सुमारास केज शहरातील रस्त्यावर घडली ‌.

या बाबतची माहिती अशी की, 16 मे रोजी की, नेकनुरकडून एक भरधाव वेगात कंटेनर क्र.डी डी- 01/झेड-9771 येत असल्याची माहिती नेकनुर पोलिसांनी केज पोलिसांना दिली. ते कंटेनर अडविण्यासाठी केज पोलीस ठाण्याचे पोलिस निरीक्षक वैभव पाटील, पोलीस उपनिरीक्षक आनंद शिंदे, पोलीस उपनिरीक्षक राकेश बनसोडे, वाहतूक शाखेचे शहा, पाशा, शिवाजी कागदे, आणि इतर पोलिस हे केज चौकात थांबले होते. मात्र भरधाव वेगातील कंटेनरने शिक्षक कॉलनी जवळ असलेल्या होंडा शो- रूम जवळ एका टमटम क्र. एम एच- 23/एच- 545 ला जोराची धडक दिली. त्यातील प्रवाशी जखमी झाले. त्या नंतर पुढे त्या कंटेनरने शासकीय विश्राम गृहा समोर उभ्या असलेल्या मोटार सायकल क्र.एम एच- 44/ए डी- 1460 आणि क्रएम एच- 44/ए सी- 5814 या दोन मोटार सायकलींना धडक दिली.

त्या नंतर जुन्या उपविभागीय पोलिस उपअधिक्षक कार्यालया समोर रस्त्याने चालत असलेल्या मीना प्रवीण घोडके वय 37 वर्ष रा. चिंचोलीमाळी ता. केज या महिलेला चिरडले. या दुर्घटनेत या महिलेचा जागीच मृत्यू झाला. त्या नंतर धारूर चौकात उभ्या असलेल्या एका कार क्र. एम एच- 23/ए एस- 0897 ला धडक दिली. त्या नंतर ते तसेच पुढे गेले. त्या नंतर चंदनसावरगाव येथेही दोघांना धडक दिली.

त्यानंतर युसुफवडगाव पोलीस ठाण्याचे सपोनि मच्छिंद्रनाथ शेंडगे, पो. उपनिरीक्षक राहुल पतंगे, बालासाहेब घोरपडे, राऊत, आतकरे, डोंगरे, जाधव, हनुमंत गायकवाड यांनी रस्त्यावर अडथळे लावून तो कंटेनर रोखण्याचा प्रयत्न केला परंतु सर्व प्रयत्न निष्फळ ठरले. त्या नंतर सदर कंटेनर हा लोखंडी सावरगाव येथील कळंब कडे जाणाऱ्या चौकात पलटी झाला. कंटेनर पलटी होताच त्याला आग लागली.अपघातातील जखमीवर केज येथील उपजिल्हा रुग्णालयात प्रथमोपचार करून त्यांना पुढील उपचारासाठी स्वामी रामानंद तीर्थ ग्रामीण रुग्णालय व वैद्यकीय महाविद्यालय अंबाजोगाई येथे हलविले असून त्यांच्यावर तेथे उपचार सुरू आहेत.

या अपघातातील जखमी
1) कृष्णा हरिदास कापरे वय 20 वर्ष, रा. कापरेवाडी ता. केज, 2) श्रद्धा मधुकर चिंचकर वय 18 वर्ष रा. येवता ता. केज,3) सुनील सुंदर घुले वय 59 वर्ष रा. केळगाव ता. केज, 4) बळीराम आप्पराव पांचाळ वय 40 वर्ष रा. ढाकेफळ ता. केज, 6) सोनू बाबु शेख वय 20 वर्ष रा. केज, 7) विकास वसुदेव काकडे वय 22 वर्ष रा. कापरेवाडी ता. केज, 8) कुमार गायकवाड 55 वर्ष रा. देवगाव ता. केज, 9) शेषेराव मारुती चंदनशिवे वय 55 वर्ष रा. शिरपुरा ता. केज, 10) सरिता रावसाहेब मुंडे 57 वर्ष रा. चारदरी ता. धारूर, 11) फुलाबाई धोंडीराम सावंत वय 60 वर्ष रा. तुगाव ता. अंबाजोगाई, 12)रावसाहेब यादवराव मुंडे वय 79 वर्ष रा. चारदरी ता. धारूर, 13) विद्या विलासराव सूर्यवंशी वय 30 वर्ष, रा. पिसेगाव ता. केज, 14) विलासराव ज्ञानोबा सूर्यवंशी वय 40 वर्ष रा. पिसेगाव ता. केज, 15) सिद्धेश्वर वसुदेव कापरे वय 22 वर्ष रा. युसुफवडगाव ता. केज, 16 )पोलिस कॉन्स्टेबल सिद्धार्थ शिंदे वय ३० वर्ष रा. युसुफवडगाव ता. केज, 17) अतुल बाबुराव कुलकर्णी, वय 40 वर्ष रा. तांबवा ता. केज, 18) आशालता मुंडे वय 50 वर्ष रा. चारदरी ता. धारूर, 19) बाबासाहेब देशमुख वय 45 वर्ष रा. बोरीसावरगाव ता. केज, 20) सौ. देशमुख बाबासाहेब देशमुख यांची पत्नी वय ४० वर्ष रा. बोरीसावरगाव ता. केज आणि 21) शेख वय 30 वर्ष रा. केज

पोलिस उपनिरीक्षक राकेश बनसोडे थोडक्यात बचावले
अपघातातील भरधाव वेगातील कंटेनर हे केज येथील धारूर चौकात येत असल्याची माहिती मिळताच त्याला अडविण्यासाठी पोलिस उपनिरीक्षक राकेश बनसोडे हे रोडवर येऊन थांबविण्याचा प्रयत्न केला परंतु ते कंटेनर सरळ अंगावर येत असल्याने त्यांनी प्रसंगावधान राखून चपळाईने बाजूला झाले त्यामुळे ते थोडक्यात बचावले !

केजला रिंग रोडची गरजेचा
केज शहरातून दोन हाय- वे जात असल्याने आणि शहरात मोठी गर्दी असते. तसेच वाहने व दुचाकी रस्त्यावर उभ्या कराव्या लागतात. यामुळे अशा घटना टाळण्यासाठी शहरा बाहेरून एखादा रिंग रोडची आवश्यकता आहे.

कंटेनर चालक जखमी

कंटेनर पलटी.झाल्या नंतर त्याचा चालक जखमी झाला असून त्याच्यावर अंबाजोगाई येथे उपचार सुरू आहेत.

बीड — दहा गाईसह दोन वासरे घेऊन जाताना बुधवारी रात्री बीड शहरात टॅम्पो पकडण्यात आला. यातील जनावरे व टेम्पो असा जवळपास 11 लाखाचा मुद्देमाल पोलिसांनी जप्त केला आहे. या प्रकरणी पाच जणांविरोधात शिवाजीनगर पोलीस ठाण्यात गुन्हा दाखल करण्यात आला आहे.

टेम्पो क्र.एम.एच.17 सीव्ही.7664 यामधून अवैध रित्या दहा गाई आणि दोन वासरे हैद्राबादकडे नेली जात होती. हा टेम्पो शिवाजी नगर पोलिस ठाण्याच्या हद्दीमध्ये पकडण्यात आला. यातील जनावरे व टेम्पो असा एकूण 10 लाख 80 हजारांचा मुद्देमाल जप्त करण्यात आला आहे. या प्रकरणी माधव कारभारी खेमणर रा. चन्नेगाव ता. संगमनेर जि. अहिल्यानगर, संकेत बाळासाहेब लांबगे रा.लोणी प्रवरा ता. राहता जि. अहिल्यानगर, असनगरी श्रीसाई लांब रा. इल्ली मेंदू, इब्राहीम पटनम रा. तेलंगणा, उपारी सतई रा. जहगा इलिमेंदू इब्राहीम पटनम रा. तेलंगणा, मल्लया असनगरी रा. जहगा इलिमेंदू रा. तेलंगणा
या पाच जणांविरोधात गुन्हा दाखल करण्यात आला आहे. जनावरे शिवाजी नगर पोलिसांनी ताब्यात घेतले आहेत. वैभव जाधव यांच्या फिर्यादीवरून हि कारवाई करण्यात आली आहे.

बीड — खासगी रुग्णालयात काम करणारे दोघे जण तीन वर्षे रिलेशन शिपमध्ये राहिले. परंतु आता तरूणीने फोन न उचलल्याने तिला पहाटेच्या सुमारास घरात घुसून गळा दाबत मारहाण करत जातीवाचक शिवीगाळ केली. तसेच तिच्या दाजीला ही जीवे मारण्याच्या धमक्या दिल्याचा प्रकार 12 मे रोजी पहाटेच्या सुमारास स्वराज्यनगर भागात घडला. याप्रकरणी दारूड्या तरूणावर शिवाजीनगर पोलिस ठाण्यात गुन्हा दाखल झाला आहे.
लक्ष्मण सपकाळ (वय 25 रा. सुर्डी ता. गेवराई) असे आरोपीचे नाव आहे. पीडिता ही वडवणी तालुक्यातील रहिवासी असून लक्ष्मण व ती एकाच खासगी रूग्णालयात काम करतात. तीन वर्षांपासून ते रिलेशनशिपमध्ये होते. त्यांचे फोनवर ही बोलणे होत असे. लक्ष्मण हा पीडिता सध्या बीडमध्ये राहत असलेल्या किरायाच्या घराकडेही चकरा मारत असे. 12 मे रोजीही तो दारूच्या नशेत होता. मला तुझ्या रूमवर यायचे आहे, असे म्हणत तो पीडितेला त्रास देत होता. तिने सकाळी ये म्हणल्यानंतर ही लक्ष्मणने ऐकले नाही.पहाटे 4 वाजताच तो पीडितेच्या रूमवर गेला. तिला जातीवाचक शिवीगाळ करत गळ्याला पकडून मला चापटाने मारहाण केली. तू माझा फोन उचलत का करत नाहीस, असे म्हणून मला शिवीगाळ केली. त्यानंतर पीडितेने तिच्या दाजीला बोलावून घेतले. यावेळी त्यांनाही तुझा काय संबंध आहे आमच्यामध्ये का बोलतोस, असे म्हणून जिवे मारण्याची धमकी दिल्याचे पीडितेने तक्रारीत म्हटले आहे. याप्रकरणी अॅट्रॉसिटीसह विविध कलमान्वये शिवाजीनगर पोलिस ठाण्यात गुन्हा दाखल करण्यात आला आहे