बीड — बैलजोडी चोरीला गेली आहे असा बनाव तयार करून पोलिसात खोटी तक्रार देणाऱ्या पिंपरखेड येथील दोन भावा विरोधात वडवणी पोलिसात गुन्हा दाखल करण्यात आला आहे.
. जिल्ह्यात खोट्या तक्रारी देऊन पोलिसांना कामाला लावण्याचे प्रकार उघडकिस आल्यानंतर पोलिसांनीही फिर्यादीवरच गुन्हे दाखल केल्यामुळे अशा प्रकारांना आळा बसला होता. दरम्यान वडवणी पोलिसांमध्ये पुन्हा असाच काहीसा प्रकार घडला आहे. पिंपरखेड येथील संपत त्रिंबक निपटे व त्याचा भाऊ मदन निपटे यांनी दीड लाख रुपये किमतीची बैलजोडी चोरीला गेली असल्याची तक्रार दाखल केली. चोरीची घटना घडून इतके दिवस तुम्ही तक्रार देण्यासाठी का आला नाहीत तसेच बैल जोडी संदर्भात आर्थिक व्यवहार काही होता का? अशी विचारणा देखील एपीआय वर्षा व्हगाडे यांनी वारंवार तक्रारदाराकडे केली होती.
पोलिसांनी याप्रकरणी तपासाची चक्र फिरवली असता सदर बैलजोडी ही श्रीकांत चंद्रकांत मगर, राहणार भावठाणा , तालुका आंबेजोगाई,बीड या शेतकऱ्याकडे असल्याची गोपनीय माहिती मिळाली. पोलिसांनी त्यास समक्ष पोलीस ठाणे येथे बैल जोडीसह आणले. यावेळी श्रीकांत मगर यांनी ही बैल जोडी बाबाराव डाके, राहणार टकारवाडी, तालुका माजलगाव, याचे कडून विकत घेतल्याचे सांगितले, त्यानंतर पोलिसांनी मध्यरात्री टकारवाडी,येथे जावून बाबाराव डाके यांचेकडे चौकशी केली असता, त्याने ही बैल जोडी तक्रारदार संपत निपटे
राहणार पिंपरखेड,यास पैसे देऊन विकत घेतली, असे सांगितले त्यानंतर पोलिसांनी पुन्हा विश्वासात घेऊन तक्रारदाराची चौकशी केली असता त्यानेच हा बैलचोरीचा खोटा बनाव केल्याचे तपासात निष्पन्न झाले. त्यामुळे सदर तक्रारदार संपत नीपटे व त्यांचे भाऊ मदन निपटे यांचे विरोधात पोलीस ठाणे वडवणी येथे पोलीस अंमलदार नितीन काकडे यांचे सरकारतर्फे फिर्यादीवरून “सर्व परिस्थिती माहिती असताना देखील पोलिसांचे कायदेशीर अधिकाराचा गैरवापर करण्यासाठी पोलिसांना खोटी माहिती देवून त्यांची दिशाभूल करने या कलमांतर्गत गुन्हा दाखल करण्यात आला आहे. यानंतर पोलिसांनी श्रीकांत मगर या शेतकऱ्यास ही बैलजोडी परत केल्याने त्याने त्यांनी व त्यांचे कुटुंबीयांनी वडवणी पोलिसांचे आभार मानले व कोणत्याही नागरिकांनी स्वतःच्या फायद्यासाठी खोट्या तक्रारी दाखल करू नये, असे आवाहन वडवणी पोलिसांनी केले आहेत.

सोने चांदी नगदी सह साडेपाच लाखाचा मुद्देमाल जप्त

बीड — दिवसाढवळ्या घरफोडीसह दरोडा चोरी खून यासारख्या 20 हून अधिक गुन्हे दाखल असलेला अट्टल गुन्हेगाराला जेरबंद करण्यात स्थानिक गुन्हे शाखेला मोठे यश आले आहे. त्याच्याकडून पाच घरफोडीचे गुन्हे उघड झाले असून चोरीचा साडेपाच लाख रुपये किमतीचा मुद्देमाल जप्त करण्यात आला आहे ‌
याबाबत अधिक माहिती अशी की, विविध गुन्ह्यांमध्ये पोलिसांना हवा असलेला तसेच यापूर्वी मकोका अंतर्गत कारवाई झालेला आरोपी संदीप ईश्वर भोसले रा. बेलगाव ता. कर्जत जि.अहिल्यानगर हा गेवराई तालुक्यातील राक्षस भुवन फाटा येथील हॉटेलवर जेवणाचे पार्सल घेण्यासाठी येणार असल्याची खात्रीलायक माहिती स्थानिक गुन्हे शाखेचे पोलीस निरीक्षक शिवाजी बंटेवाड यांना मिळाली. तात्काळ त्यांनी पोउपनि. श्रीराम खटावकर यांची टीम रवाना केली. या ठिकाणी पोलिसांनी सापळा लावला असता संदीप भोसले हा जेवणाचे पार्सल घेण्यासाठी आला. मात्र पोलिसांचा संशय आल्यामुळे त्याने पळून जाण्याचा प्रयत्न केला. मात्र पोलिसांनी तात्काळ झडप घालत त्याला जेरबंद केले.परंतु संदीप भोसले याला मोटार सायकल वरून घेऊन आलेला भगवान ईश्वर भोसले याने उसाच्या शेताचा आधार घेत पळून जाण्यात यश मिळवले. पकडलेल्या संदीप भोसले ला पोलिसांनी विचारणा केली असता पिंपळनेर, नेकनूर व शिरूर भागात आपला भाऊ भगवान भोसले च्या मदतीने दिवसा घरफोडी केल्याचे कबूल केले. आरोपी संदीप भोसले याच्याकडून चोरून नेलेल्या मुद्देमाला पैकी चार लाख 41 हजार 100 रुपये किमतीचे सोने व चांदीचे दागिने व नगदी तसेच गुन्ह्यात वापरलेली 90 हजार रुपये किमतीची मोटार सायकल हस्तगत करण्यात आली. पुढील तपास कामी पिंपळनेर पोलिसांच्या स्वाधीन करण्यात आले आहे.‌ पिंपळनेर पोलीस ठाण्यात संदीप भोसले याच्यावर दोन गुन्हे दाखल आहेत.
दरम्यान पोलीस अधीक्षक नवनीत कावत पोलीस उपाधीक्षक सचिन पांडकर, पोनि शिवाजी बंटेवाड यांच्या मार्गदर्शनाखाली सपोनि धनराज जारवाल,पोनि श्रीराम खटावकर, पोह. सोमनाथ गायकवाड अशोक दुबाले बाळू सानप राहुल शिंदे विकास राठोड अंकुश वरपे आश्पाक सय्यद मनोज परजणे विकी सुरवसे नितीन वडमारे सिद्धार्थ मांजरे या स्थानिक गुन्हे शाखेच्या पथकाने कामगिरी पार पाडली. या प्रकरणाचा पुढील तपास पिंपळनेर पोलीस करत आहेत.

माझगाव — दिवाणी सत्र न्यायालयातल्या लिपिकाने 15 लाख रुपयांची लाच स्वीकारली. याशिवाय लिपिकानं अतिरिक्त सत्र न्यायाधीशांना काॅल करून‌ रक्कम स्वीकारू का विचारलं, त्यावर न्यायाधीशांनी देखील संमती दिली.यामुळे आता लिपिकासह न्यायाधीशांवरही गुन्हा दाखल करण्यात आला आहे. लिपिकासह न्यायाधीश लाच प्रकरणात एसीबीच्या जाळ्यात अडकल्याने खळबळ उडाली आहे.
याबाबत मिळालेली माहिती अशी की, लाचलुचपत प्रतिबंधक विभागानं लिपिक चंद्रकांत हनमंत वासुदेव याला 15 लाख रुपयांची लाच घेताना अटक केली. तक्रारदाराच्या बाजूनं निकाल लावण्यासाठी क्लार्कने 25 लाखांची मागणी केली होती. त्यानं पैसे घेताच फोन लावला आणि न्यायाधीशांनीही ते घेण्यासाठी संमती दिली. आता या प्रकरणी न्यायाधीशांच्या अटकेसाठी प्रयत्न सुरू आहेत.
तक्रारदाराच्या पत्नीच्या कंपनीची जागा बळजबरीने ताब्यात घेतल्याचा वाद गेल्या 10 वर्षांपासून न्यायालयात चालू आहे. याची याचिका उच्च न्यायालयात दाखल केली आहे पण केस दिवाणी सत्र न्यायालयात वर्ग केली होती. 9 सप्टेंबरला कोर्टात गेल्यावर लिपिकानं तक्रारदाराशी संपर्क साधला. यानंतर निकाल बाजूने लावण्यासाठी 25 लाख रुपयांची मागणी केली.
न्यायाधीशांच्या माध्यमातून निकाल तुमच्या बाजूने लावतो म्हणून २५ लाख मागितले. यातले १० लाख मला आणि १५ लाख न्यायाधीशांना द्यावे लागतील असं सांगितलं. यानंतर सतत कॉल करून पैशांची मागणी केली. पण इतके पैसे देणं शक्य नसल्यानं तक्रारदाराने थेट एसीबीकडे तक्रार केली.
लिपिक वासुदेव यानं शेवटी 25 ऐवजी 15 लाखांवर तडजोड केली. यासाठी सापळा रचून 11 नोव्हेंबरला त्याला अटक केली. अटकेनंतर वासुदेवनं न्यायाधीश एजाजुद्दीन सलाउद्दीन काझी यांना कॉल करत लाचेची रक्कम स्वीकारल्याचं सांगितलं. न्यायाधीशांनी संमती दर्शवताच पोलिसांनी वासुदेवसह काझींविरोधात गुन्हा दाखल केला. पोलिसांनी न्यायाधीशांच्या अटकेसह घराची झडती घेण्यासाठी परवानगी मागितली आहे. परवानगी मिळाल्यानंतर पुढील कारवाई केली जाणार असल्याचं सांगण्यात येत आहे

आष्टी — हिंगणी जवळील सिना नदीपात्रात महसूल पथकाने छापा टाकल्यानंतर आणि बेकायदेशीर उत्खननात सहभागी असलेल्या वाहनांना जप्त केल्यानंतर वाळू माफियांनी एका महिला अधिकाऱ्यासह महसूल विभागाच्या पथकावर हल्ला केला आहे.बुधवारी सायंकाळी ५.४५ च्या सुमारास ही घटना घडली. हल्लेखोरांनी एका अधिकाऱ्याला लोडर वाहनाखाली चिरडण्याचा प्रयत्न केला, परंतु त्याच्या सहकाऱ्यांनी त्याला वेळीच वाचवले. याप्रकरणी नऊ जणांविरोधात गुन्हा दाखल करण्यात आला असून दोन आरोपींना अटक करण्यात आली आहे.

आष्टी तालुक्यातील हिंगणीजवळील सीना नदीच्या पात्रातून बेकायदेशीर वाळू उत्खनन होत असल्याची माहिती मिळाल्यानंतर तहसीलदार वैशाली पाटील यांनी त्यांच्या पथकासह छापा टाकला. कारवाईदरम्यान, एक बॅकहो लोडर मशीन, तीन ट्रॅक्टर, एक ट्रॅक्टर ट्रॉली आणि ३० ब्रास वाळू जप्त करण्यात आली. ज्यांची एकूण किंमत ५१ लाख रुपयांपेक्षा जास्त आहे. जप्त केलेल्या वस्तू महसूल विभागाचे पथक तहसील कार्यालयात नेत असताना, आष्टी शहरात एका पांढऱ्या कारने त्यांचा मार्ग अडवला.

जप्त केलेली वाहने आणि साहित्य परत मिळवण्यासाठी तीन जणांनी गाडीतून उतरून तहसीलदार पाटील आणि इतर कर्मचाऱ्यांवर हल्ला केला. एका हल्लेखोराने बॅकहो लोडर वाहन चालवणाऱ्या तलाठी सचिन तेलंग यांना ढकलले. तर, दुसऱ्याने साक्षीदार सूरज कोकणे यांना ढकलले. त्यानंतर त्यांच्या तिसऱ्या साथीदाराने लोडर वाहन थेट तेलंगकडे वळवून त्याला मारण्याचा प्रयत्न केला. तथापि, महसूल पथकाच्या इतर सदस्यांनी त्यांना सुरक्षित ठिकाणी नेल्याने ते वाचले.

दरम्यान, दोन कारमधून आणखी चार जण घटनास्थळी पोहोचले आणि जप्त केलेले ट्रॅक्टर रोखण्यासाठी प्रयत्न केला. त्यानंतर झालेल्या गोंधळात हल्लेखोरांनी तलाठी प्रवीण शिंदे यांच्याकडून जप्त केलेला एक ट्रॅक्टर जबरदस्तीने घेऊन जाण्यात यश मिळवले. पोलिसांच्या माहीतीनुसार, महसूल पथकाला अखेर बॅकहो लोडर वाहन आणि त्याचा चालक महेश आसावर यांना पकडण्यात यश आले. याप्रकरणी नऊ जणांविरोधात गुन्हा दाखल करण्यात आला आहे

गेवराई — घराच्या बांधकामासाठी बँकेत जमा केलेली अडीच लाख रुपयाची रक्कम काढून घेऊन जात असताना हातातली पिशवी हिसकावून घेत अज्ञात चोरट्यांनी मोटार सायकल वरून पळ काढला या घटनेने गेवराई शहरात खळबळ माजली आहे. शहरातील मुख्य रस्त्यावर दुपारी दोनच्या सुमारास ही घटना घडली.
गेवराई तालुक्यातील सेलू येथील रहिवासी दादासाहेब प्रभाकर यादव हे मंगळवारी घराच्या बांधकामासाठी दुपारी स्टेट बँक ऑफ इंडियामधून 2 लाख 50 हजार रुपये काढून घेऊन जात होते. ते रस्त्याने जात असताना, त्यांच्या पाठीमागून एका स्पोर्ट्स बाइकवरून दोन जण भरधाव वेगाने आले. या दोघांपैकी पाठीमागे बसलेल्या चोरट्याने दादासाहेब यादव यांच्या हातातील पैसे असलेली पिशवी हिसकावून दोघांनी बीडच्या दिशेने सूसाट पळ काढला. भरदिवसा आणि मुख्य रस्त्यावर घडलेल्या या घटनेमुळे गोंधळ उडाला. हातातील पिशवीची चोरी होताच दादासाहेब यादव यांनी तातडीने गेवराई पोलिसांना माहिती दिली. पोलिसांनी घटनेचे गांभीर्य लक्षात घेऊन तत्काळ पोलिस ठाणे हद्दीत नाकाबंदी केली आहे. बीडकडे पळून गेलेल्या चोरट्यांचा आणि त्यांच्या स्पोर्ट्स बाइकचा शोध पोलिस घेत आहेत. भरदिवसा झालेल्या या धाडसी चोरीमुळे गेवराई शहरातील कायदा व सुव्यवस्थेवर प्रश्नचिन्ह निर्माण झाले आहे. या घटनेने नागरिकांमध्ये भीतीचे वातावरण आहे.

जालना — मराठा योद्धा मनोज जरांगे पाटील यांच्या हत्येचा कट रचल्याप्रकरणी कांचन साळवी याला पोलिसांनी अटक केली आहे. दादा गरड आणि अमोल खुणे यांच्याशी कांचन नावाच्या व्यक्तीचा सबंध असल्याचा आणि तो धनंजय मुंडे यांचा पीए असल्याचा आरोप मनोज जरांगे यांनी केला होता याच प्रकरणाचा अधिक तपास करत रात्री (11 नोव्हेंबर) उशिरा कांचन साळवी याला जालना पोलिसांनी चौकशीसाठी ताब्यात घेऊन, चौकशी अंती त्याला अटक केलं आहे.
अटकेपूर्वी कांचन साळवीने आपली बाजू मांडली होती, ‘गरडसाहेब माझा अर्था अर्थी संबंध नाहीये. जे पण काही चौकशी असेल, नार्कोटिक्स असेल, त्याला मी पूर्णपणे समोर जायला तयार आहे.’ या अटकेमुळे आता पोलीस तपासात साळवी, गरड आणि अमोल खुने यांच्यातील संबंधांची चौकशी केली जाईल.दरम्यान, कालच माध्यमांसमोर येऊन कांचन साळवी याने आपण अमोल खूनेला ओळखतो. मात्र दादा गरडशी आपला कसलाही संबंध नव्हता, तोच आपल्याला काही रेकॉर्डिंग देण्याच्या बदल्यात पैसे मागत होता, असा आरोप कांचन साळवी याने केला होता.मराठा आंदोलक मनोज जरांगे पाटलांना यांना जीवे मारण्याचा कट रचल्याप्रकरणी, गोंदी पोलिसांनी गेवराईतून अमोल खुणे आणि विवेक उर्फ दादा गरुड या दोघांना अटक केली. कोर्टाने या दोन्ही आरोपींना 5 दिवसांची पोलीस कोठडी सुनावली आहे. या दोन आरोपींपैकी अमोल खुणे हा मनोज जरांगेंचा समर्थक असल्याचं सांगितलं जातं आहे.