बीड — अवैध वाळू वाहतूक करणाऱ्या दोन वाहनांवर दिंद्रुड पोलिसांनी कारवाई करत तब्बल 12 लाख 15 हजार रुपयांचा मुद्देमाल जप्त केला आहे

याबाबत पोलिसांनी दिलेल्या माहितीनुसार 18 नोव्हेंबर रोजी हॉटेल बप्पाश्री जवळ, आनंदगाव ते लोनगाव रोड वर पांढऱ्या रंगाचे क्रमांक नसलेले पिकअप वाहनात  जितीन राजेभाऊ पौळ, वय 32 वर्षे, रा. खरात आडगाव हा एक ब्रास वाळू 6000 रुपये किमतीची ची अवैधरित्या वाहतूक करतांना मिळून आला. त्याच्या ताब्यातील पिकअप व एक ब्रास वाळू असा एकूण चार लाख सहा हजार रुपयाचा चा मुद्देमाल जप्त करुन गुन्हा नोंद करण्यात आला. तर दुसऱ्या कारवाईत लोनगाव चौकाजवळ, आनंदगाव ते लोनगाव रोड वर आरोपी जीवन काशिनाथ साळवे, वय 30 वर्षे, रा. खरात आडगाव, ता. माजलगाव हा त्याच्या ताब्यातील वाहन क्रमांक 407 टेम्पो क्र. एम एच 21 एक्स 0353 मध्ये अवैधरीत्या नऊ हजार रुपये किमतीची दीड ब्रास वाळू वाहतूक करतांना मिळून आल्याने त्याच्या ताब्यातील आठ लाख रुपयाचा टेम्पो वाहन  दिड ब्रास वाळू  8 लाख 9 हजार रुपये किमतीचा  मुद्देमाल जप्त करण्यात आला आहे. आरोपीविरुद्ध  दिंद्रुड पोलीस ठाण्यात कलम: 303(2) बीएन एस प्रमाणे गुन्हा दाखल करण्यात आला आहे.
सदर कारवाई पोलीस अधीक्षक कॉंवत, अपर पोलीस अधीक्षक चेतना तिडके, उपविभागीय पोलीस अधिकारी शैलेश गायकवाड, यांच्या मार्गदर्शनात सपोनि. महादेव ढाकणे, पोउपनि. पवनसिंग जंघाळे,भराडे,सचिन गायकवाड यांनी केली आहे.

बीड — जिल्हाधिकाऱ्यांच्या स्वाक्षरीचे बनावट आदेश व जुन्या तारखांच्या आधारे
राष्ट्रीय महामार्गाच्या 154 प्रकरणातील लवाद प्रकरणात 241.62 कोटी रुपयांचा वाढीव मोबदला मंजूर केला. यामध्ये 73.4 कोटी रुपयांचा अपहार झाल्याची तक्रार भूसंपादनचे उपजिल्हाधिकारी सतीश धुमाळ यांनी दिली आहे.याप्रकरणी दहा जणांवर शिवाजीनगर पोलिसात गुन्हे दाखल करण्यात आहेत.तर तीन जणांना अटक करण्यात आली आहे.
बीडचे जिल्हाधिकारी विवेक जॉन्सन यांनी अप्पर जिल्हाधिकारी, तहसलीदार महसूल आणि भूसंपादन कार्यालय बीड कार्यालयास भेटी दिल्या. तसेच जायकवाडी प्रकल्प भूसंपादन आणि उपविभागीय अधिकारी बीड ही कार्यालये तपासली.या दरम्यान काही संचिकांची तपासणी करण्यात आली. भूसंपादन लवाद प्रकरणात तत्कालीन जिल्हाधिकाऱ्यांचे नाव व पदनाम लिहून वाढीव भूसंपादनाचे आदेश मंजूर केले. त्यावरच्या तारखाही जुन्या होत्या.भ्रमणध्वनी वरील संभाषणातून ही बाब उघडकीस आली.

जुन्या तारखेची 40 प्रकरणे आणखी केले जातील असे उल्लेख असणाऱ्या ध्वनीफिती जिल्हाधिकाऱ्यांना तपासणीत आढळून आल्या.1मार्च ते 17 एप्रिल 2025 दरम्याच्या 154 बनावट आदेशाव्दारे 241.62 कोटी रुपयांची वाढीव रक्कम मंजूर असल्याचे कागदपत्र तयार करण्यात आले. या कागदपत्राच्या आधारे छत्रपती संभाजीनगरच्या राष्ट्रीय महामार्ग प्राधिकरणातून 73 कोटी रुपयांचा निधी मिळवून त्याचे वितरण करण्यात आले. 17 एप्रिल रोजी असे 50 बनावट आदेश मंजूर करण्यात आले. त्यादिवशी कोणताही पक्षकार हजर नव्हता. त्यामुळे हा प्रकार संशास्पद असल्याचे जिल्हाधिकाऱ्यांच्या लक्षात आले.भूसंपादनातील अधिकारी, कर्मचारी, वकील यांनी संगनमताने हा कोट्यावधीचा घोटाळा केल्याचे दिसून आल्यानंतर बीडच्या शिवाजीनगर पोलीस ठाण्यात दहा आरोपी विरोधात गुन्हा दाखल करण्यात आला आहे. यातील तीन जणांना अटक करण्यात आली आहे. या घोटाळ्याची व्याप्ती पाहता बीडचे अप्पर पोलीस अधीक्षक सचिन पांडकर यांच्या अध्यक्षतेखाली विशेष तपास पथक स्थापन करण्यात आले आहे. या प्रकरणात महसूल मधील गळाला लागण्याची शक्यता निर्माण झाली आहे.या घोटाळ्यात परळी तहसील कार्यालयातील सहाय्यक महसूल अधिकारी संजय हांगे , अविनाश चव्हाण (कंत्राटी डाटा एन्ट्री ऑपरेटर, भूसंपादन समन्वय कार्यालय), शेख अजहर शेख बाबू (कंत्राटी ऑपरेटर भूसंपादन जायकवाडी प्रकल्प कार्यालय) व त्रिबंक पिंगळे (सेवानिवृत्त कंत्राटी कर्मचारी उपविभागीय अधिकारी कार्यालय बीड), पांडुरंग पाटील (सहायक महसूल अधिकारी, भूसंपादन समन्वय कार्यालय) राऊत (राष्ट्रीय महामार्ग कार्यालय), ॲड. एस. एम. नन्नवरे, ॲड.नरवडकर,ॲड. पिसूरे, ॲड.प्रवीण राख यांची नावे आहेत.

बीड — अवैध धंद्यांच्या बाबतीत “शितल” भूमिका घेत हप्ते खोरीत “बल”लावत “लाळ टपकवणाऱ्या ठाणे प्रमुखाच्या कारभारामुळे एलसीबी असो की डीवायएसपी यांच्यावर अवैध धंद्यांच्या बाबतीत कारवाई करण्याची वेळ आली आहे. डीवायएसपी पूजा पवार यांनी हवाला रॅकेटवर कारवाई करत 17 लाख रुपयांची रोकड शहर पोलीस ठाणे हद्दीत जप्त केली आहे.ऐन निवडणुकीच्या कालावधीमध्ये पूजा पवार यांनी ही मोठी कारवाई केल्याने शहरात मोठया प्रमाणावर शहर ठाणे प्रमुखाच्या कारभारावर प्रश्नचिन्ह उभे केले जात आहेत.
बस स्थानकासमोर सुरू असलेल्या अवैध धंद्याविरोधात डी वाय एस पी ना दोन वेळा कारवाई करावी लागली. त्यानंतर स्थानिक गुन्हे शाखेने झमझम कॉलनीत कारवाई करून लाखोंचा गुटखा जप्त केला. या तीन कारवाया चर्चेच्या केंद्रस्थानी राहिल्या. मात्र तरीही अवैध धंद्यांना आपल्या छत्रछायेत बळ देण्याचं काम शहर पोलीस ठाणे प्रमुखांकडून होत आहे. तर याच ठाणे प्रमुखावर पोलीस अधीक्षकांचा प्रचंड विश्वास तर आहेच शिवाय आशीर्वाद देखील आहेत. असा आरोप नागरिकांमधून केला जात आहे. बीडमध्ये ठाणे प्रमुखांची खांदेपालट झाली. मात्र शहर पोलीस ठाणे प्रमुखाची खुर्ची यामुळेच बळकट राहिली की काय? असा प्रश्न त्यावेळी उपस्थित केला जात होता. दरम्यान नगरपालिका निवडणुकांची रणधुमाळी सुरू असताना देखील अवैध धंद्यांना आळा घालावा गुन्हेगारी कमी करावी याची उपरती शहर पोलीस ठाणे प्रमुखाला झाली नाही. त्यामुळे आजही राजरोस अवैध धंदे सुरूच आहेत. जर डीवायएसपींनी, स्थानिक गुन्हे शाखेंच्या पथकानेच कारवाया करायच्या अवैध धंद्यांना आळा घालायचा प्रयत्न करायचा तर ठाणे प्रमुख बुजगावण्याचीच भूमिका घेत राहणार का? नुसता अवैध धंद्यांनाच ते आशीर्वाद देणार का ? हप्ते खोरीतच आत्म मग्न राहणार का? असे प्रश्न उपस्थित केले जात आहेत. ठाणे प्रमुखाच्या बुजगावण्या भूमिकेचाच  परिपाक म्हणून निवडणुकीच्या रणधुमाळीत हवाला रॅकेट उध्वस्त करण्याची गरज डी वाय एस पी पूजा पवार यांना वाटली.मसरत नगरमधील एका अपार्टमेंटमध्ये पैशांचा बाजार भरवून हवाला सुरु असल्याची माहिती डीवायएसपी पूजा पवार यांना मिळाली होती. त्यानुसार सायंकाळी त्यांच्या टीम ने छापा मारला असता घरात 17 लाखांची रोकड आढळून आली आहे. यावेळी पोलिसांनी एका आरोपीला ताब्यात घेतले असून सध्या शहर पोलीस ठाण्यात याप्रकरणी गुन्हा नोंद करण्याची प्रक्रिया सुरु असल्याची माहिती मिळत आहे. ही कारवाई पोलीस अधिक्षक नवनीत कॉवत, अप्पर पोलीस अधिक्षक सचिन पांडकर यांच्या मार्गदर्शनाखाली पोलीस उपाधीक्षक पूजा पवार, एपीआय पुजारी, सचिन आगलावे, मनिषा केदार यांनी केली आहे.

बीड — पोलीस अधीक्षक नवनीत कांवत यांनी “पोलीस आपल्या बांधावर”ही संकल्पना नेहमीसारखीच तोंडातून निघालेल्या वाफेसारखीच ठरली. शेतीच्या वादातून चौघा जणांना लोखंडी पाईप, रॉड आणि लाठ्या काठ्याने बेदम मारहाण करत गंभीर जखमी केल्याची घटना उदंड वडगाव येथे घडली.
संतोष देशमुख हत्याकांडाने राज्य हादरले गेले. त्यानंतर पोलीस दलाचा भार पोलीस अधीक्षक नवनीत कांवत या प्रामाणिक अधिकाऱ्यावर सोपवण्यात आला.ते प्रामाणिक जरी असले तरी पोलीस दलातील अधिकाऱ्यावरचा अतिविश्वास कायदा सुव्यवस्थेला घातक ठरवू लागला आहे. मारहाणीच्या घटनांचे अनेक व्हिडिओ संतोष देशमुख प्रकरणानंतर देखील समोर आले. कायदा सुव्यवस्थेचे धिंडवडे निघत असले माध्यमामधून याची वाच्यता केली जात असली तरी माध्यमांकडे दुर्लक्ष करण्याचं धोरण सर्वसामान्यांच्या अंगलट येऊ लागला आहे. नेकनूर सारख्या ठिकाणी तर पोलीस यंत्रणेवरचा विश्वास देखील ठाणे प्रमुखाच्या कार्यशैलीमुळे उडाला आहे. पोलीस अधीक्षकांच्या पोलीस अधिकाऱ्यांवरच्या दुर्लक्षामूळे आराजकतेला खतपाणी घातले जात आहे. परिणामी “पोलीस आपल्या बांधावर”हा उपक्रम पोलीस अधीक्षकांनी राबवला संवादातून शेतीचे वाद विवाद मिटवण्यासाठी आमच्याशी संपर्क साधा असे आवाहन देखील केले. मात्र जिथे ठाणे प्रमुखानेच विश्वास गमावला तिथे शेतकरी जाणार कसा? यातूनच उदंड वडगाव मध्ये शेतीच्या वादातून रक्त रंजीत थरार घडला गेला. याचा व्हिडिओ समाज माध्यमात सध्या धुमाकूळ घालत आहे.जमिनीची मोजणी चव्हाण कुटुंबीयांनी केली. भावकीतीलच शेजाऱ्याकडे एक एकर शेती जास्तीची असल्याचे यात स्पष्ट झाले. तुम्हीही जमिनीची मोजणी करून आमचं क्षेत्र आम्हाला परत द्या असं सांगितलं गेलं. तोपर्यंत जास्तीचं तुमच्याकडे गेलेल क्षेत्र वहिवाटू नका असही सांगितलं मात्र यातून वाद उफाळला गेला.सात-आठ लोकांच्या गटाने चार जणांना बेदम मारहाण करण्यास सुरुवात केली. मारहाणीसाठी लोखंडी रॉड लाठ्या काठ्या धारदार शस्त्राने प्राणघातक हल्ला केला. हा वाद पाहून गावातील बरेच जण घटनास्थळी धावून आले. या मारहाणीत एकाच्या कानाजवळ तेरा टाके पडले आहेत. हात मोडल्यामुळे हातात राॅड टाकावे लागल्याच सांगितलं जात आहे. ‌समाधान चव्हाण, मनोज चव्हाण, जीवन चव्हाण आणि सुदाम चव्हाण हे गंभीर जखमी झाले आहेत. त्यांच्यावर बीड मधील जीवन ज्योती खाजगी रुग्णालयात सध्या उपचार सुरू आहेत. या प्रकरणाची नेकनूर पोलीसात तक्रार देऊन देखील फारसा प्रतिसाद तक्रारदाराला मिळाला नाही. माणसं मरणाच्या दारात पोहोचली तरी पोलिसांना जवाब घ्यायला लवकर वेळ मिळाला नाही. कसंतरी जखमींचा जवाब नोंदवला मात्र एफ आय आर दाखल करून घेत कारवाई करण्यास वेळ मिळाला नसल्याचं चित्र पाहायला मिळत आहे.

माजलगाव — जिल्ह्यात सर्वत्र चोरट्यांनी धुमाकूळ घातला आहे.गजानन नगर रोडवर असलेल्या श्रीकृष्ण ट्रेडर्स या होलसेल दुकानाचे शटर वाकून चोरट्याने आतील दहा लाख रुपये किमतीचे सिगारेटचे आठ बॉक्स व नगदी 75 हजार रुपये लंपास केल्याची घटना सोमवारी सकाळी पाच वाजण्याच्या दरम्यान घडली आहे. याप्रकरणी अज्ञात चार चोरट्याविरुद्ध माजलगाव शहर पोलीस स्टेशन मध्ये गुन्हा दाखल करण्यात आला आहे.

शहरातील गजानन रोडवर श्रीकांत श्रीनिवास रुद्रवार यांचे श्रीकृष्ण ट्रेडर्स हे होलसेल दुकान असून ते नेहमीप्रमाणे रविवारी रात्री लवकर दुकान बंद करून गेले होते. सोमवारी त्यांना सकाळी सात वाजता शेजारील दुकानदाराने फोन करून सांगितले की तुमचे दुकान फोडले असून तुम्ही तात्काळ इकडे या, यावर ते दुकान कडे गेले असता त्यांना दुकानचे शटर वाकलेले दिसले.

आत प्रवेश केला असता दुकानातील सिगरेटचे दहा लाख किमतीचे आठ बॉक्स व गल्ल्यातील नगदी 75 हजार रुपये गायब असल्याचे दिसून आले. तर दुकानातील सीसीटीव्हीचा डीव्हीआर ही चोरट्याने तोडून नेल्याचे दिसले. यावरून त्यांनी बाजूला असलेल्या बँकेचे सीसीटीव्ही चेक केले असता दुकान समोर सकाळी पाच वाजता स्विफ्ट गाडीत आलेल्या चार चोरट्यांनी सिगरेट बॉक्स पळवल्याचे दिसून आले.शहर पोलीस आणि घटनास्थळी भेट देऊन सीसीटीव्हीची पाहणी करत शहरात अनेक ठिकाणी या वेळेचे सीसीटीव्ही फुटेज हस्तगत केले आहे. याप्रकरणी दुकान मालक श्रीकांत श्रीनिवास रुद्रवार यांच्या फिर्यादीवरून अज्ञात चार चोरट्याविरुद्ध शहर पोलीस स्टेशनला गुन्हा दाखल झाला असून पोलीस आरोपींचा शोध घेत आहेत