बीड — एका तेरा वर्षीय अल्पवयीन मुलीचे पहिला नवरदेव लग्न लागल्यानंतर मंडपातून पळून जाताच दुसऱ्या सोबत विवाह लावल्याचा खळबळ जनक प्रकार बीड शहरातील शाहूनगर भागात उघडकीस आला.
याबाबत मिळालेल्या माहितीनुसार, बीड शहरातील तेरा वर्षीय मुलगी नुकतीच पाचवी उत्तीर्ण झाली. मात्र तिच्या वडिलांनी आणि सावत्र आईने तिचा विवाह लावण्याचे ठरवले. पहिला विवाह 32 वर्ष मुलासोबत ठरवण्यात आला. तो विवाह झाला. या 32 वर्षीय इसमाला दोन पत्नी आहेत. दोघीही सध्या नांदत नसल्याची माहिती मिळाली आहे. या लग्नाची माहिती त्याच्या पहिल्या पत्नीला मिळाली. येत असल्याचे पाहताच त्याने तिथून पळ काढला. या नंतर लागलीच दुसरा नवरदेव लग्नासाठी बोलविण्यात आला आणि त्याच्यासोबत या तेरा वर्षीय मुलीचा विवाह लावला गेला. याची माहिती प्रशासनाला मिळताच, पळून जात असताना पोलिसांनी रस्त्यावर अडवून त्या व्यक्तीला ताब्यात घेतले. दरम्यान या प्रकरणी शिवाजीनगर पोलीस ठाण्यात गुन्हा नोंद करण्याची प्रक्रिया सुरू आहे.
दरम्यान बालविवाहाची माहिती मिळाली यावेळी पाेलिसांना सांगितले. पाचवीच्या वर्गातील मुलीचे दोन विवाह झाल्याचे समोर आले. परंतु, यात गुन्हा दाखल करण्यासाठी प्रशासनाने सहकार्य केले नाही. टोलवाटोलवी केली. अशाने बालविवाह कसे थांबतील‌ असा प्रश्न सामाजिक कार्यकर्ते तत्त्वशील कांबळे यांनी उपस्थित केला आहे.

बीड — शेपवाडी येथील पावर ग्रिड मधील ॲल्युमिनियम तसेच वैद्यनाथ साखर कारखान्यातील पितळी साहित्य चोरून नेणाऱ्या टोळीच्या मूसक्या बांधण्यात स्थानिक गुन्हे शाखेला यश आले आहे.

पोलीस अधीक्षक बीड यांनी बीड जिल्हयामध्ये चोरीच्या घटना होत असल्याने चोरी करणाऱ्या टोळीला पकडण्यासाठी स्थानिक गुन्हे शाखेला सुचना दिल्या होत्या. त्याअनुषंगाने स्थानिक गुन्हे शाखेने पोलीस ठाणे अंबाजोगाई शहर दाखल गुन्हयातील मौजे शेपवाडी येथील पॉवरग्रीड येथील 12.95,000/- किमतीचे अॅल्युमिनीयमचे साहीत्य चोरीस गेलेले होते व परळी वैजनाथ येथील साखर कारखाण्यामधील 60,000/-किमतीचे पितळी साहित्य चोरी गेले होते. या गुन्हयांचा तांत्रिक विश्लेषण व समांतर तपास करीत असताना गुप्त बातमीदारामार्फत माहीती मिळाली की, आरोपी शेख जावेद शेख हबीब व त्याचे साथीदार तसेच बंडू लक्ष्मण जोगदंड व त्याचे साथीदार या दोन्ही टोळयांनी चोरले आहे. त्या टोळी मधील आरोपी परळी येथे आहेत त्यावरुन तात्काळ स्थानिक गुन्हे शाखेचे पोलीस निरीक्षक शिवाजी बंटेवाड यांनी पो. उपनिरीक्षक सुशांत सुतळे यांच्या टिमला आरोपी शोधात परळी येथे रवाना केले. तेथे जावुन टिमने आरोपीचा शोध घेतला असता मोठ्या शिताफीने यातील आरोपी शेख जावेद हबीब, वय 39 वर्ष, रा. बरकत नगर परळी बंडु लक्ष्मण जोगदंड, वय 50 वर्ष, रा. रुमना जवळा ता. गंगाखेड, जि. परभणी ह.मु शिवाजीनगर परळी ,विजय नारायण जोगदंड, वय 42 वर्ष, रा. भिमनगर परळी, शेख अब्दुल रौफ ईस्माईल, वय 45 वर्ष, रा. जुना रेल्वे स्टेशन परळी प्रेम रावसाहेब वाघमारे, वय 19 वर्ष, रा. नागसेननगर परळी ,संतोष सोपान कांबळे, वय 30 वर्ष, रा मिलींदनगर परळी. यांना ताब्यात घेवुन पुढील तपासकामी पोलीस ठाणे अंबाजोगाई शहर यांचे ताब्यात देण्यात आले त्याच्या कडुन पोलीस ठाणे अंबाजोगाई शहर व परळी ग्रामीण असे चोरीचे दोन गुन्हे उघड करण्यास स्थानिक गुन्हे शाखेला यश आले आहे. यातील चोरीस गेलेले अॅल्युमिनीयम साहीत्य कोणास विकले, कोणाकडे आहे याचा संयुक्तरित्या शोध पोलीस ठाणे अंबाजोगाई शहर व स्थानिक गुन्हे शाखा बीड हे घेत आहेत.ही कारवाई पोलीस अधीक्षक नवनीत काँवत, अप्पर पोलीस अधीक्षक श्रीमती चेतना तिडके यांच्या मार्गदर्शनाखाली पोलीस निरीक्षक शिवाजी बंटेवाड, सुशांत सुतळे, पोलीस उपनिरीक्षक,पो.ह. मारोती कांबळे, विकास राठोड, विष्णु सानप, नितीन वडमारे व सचिन आंधळे, विको सुरवसे यांनी केली आहे.

माजलगाव — लग्नाचे आमिष दाखवत तरुणीवर लैंगिक अत्याचार केल्याचा धक्कादायक प्रकार समोर आला आहे. पोट दुखू लागल्याने तरुणीची तपासणी केली त्यावेळी पीडिता 5 महिन्याची गर्भवती असल्याचे समोर आले आहे.ही घटना मे महिन्यात उघडकीस आली. याप्रकरणी माजलगाव शहर पोलीस ठाण्यात गुन्हा दाखल करण्यात आला आहे.

आरोपीचे नाव सुनील अलजेंडे आहे. पीडित तरुणी ही सुमारे 20 वर्षांची असून, तिची ओळख सुनील अलझेंडे या तरुणाशी झाली होती. दोघांची मैत्री वाढू लागली आणि त्याने लग्नाचे आमिष दाखवून तिचा विश्वास संपादन केला. त्यानंतर त्याने वेळोवेळी तिच्यासोबत शारीरिक संबंध ठेवले. सुरवातीला त्याने तरुणीला लग्नाचे आश्वासन दिले म्हणून तरुणीने त्याला विरोध केला नाही. मात्र नंतर त्याने लग्न करण्यास नकार दिला.

मे महिन्यात तरुणीला सतत पोटदुखीचा त्रास जाणवू लागला. त्यामुळे तिच्या आई- वडिलांनी तिला माजलगाव येथील खासगी रुग्णालयात तपासणीसाठी नेले. यावेळी डॉक्टरांनी केलेल्या तपासणीत ती सुमारे पाच महिन्यांची गर्भवती असल्याचे स्पष्ट झाले. हे ऐकून कुटुंबीयांवर आभाळ कोसळलं.या प्रकरणाची माहिती पोलिसांना देण्यात आली. त्यानुसार माजलगाव शहर पोलीस ठाण्यात सुनील अलझेंडे विरोधात बलात्काराचा गुन्हा दाखल करण्यात आला आहे.

मोटार सायकल अपघातात एक ठार

केज — केज – कळंब महामार्गावर प्रवाशांना घेऊन जाणारी बस दुपारी अचानक पेटली. ही जळालेली बस रस्त्यावर उभी असलेली अचानक दिसल्यामुळे मोटार सायकल स्वाराचा ताबा सुटला यात मोटार सायकल वरून जाणारे दोघे रस्त्यावर पडले. त्याचवेळी ट्रकने या दोघांना फरपटत नेले यात एक जणांचा मृत्यू झाला असून एक जण जखमी आहे.
याबाबत अधिक माहिती अशी की, दुपारी साडेतीन च्या सुमारास केस हून कळंब कडे जाणारी बस क्र.एम एच 11/ बी एल 9374 ने अचानक पेट घेतला. यातील 22 प्रवासी सुखरूप बाहेर पडू शकले. ही पेटलेली बस विझवल्या नंतर रस्त्याच्या कडेला तशीच राहिली. परिणामी रात्री आठच्या सुमारास माळेवाडी (ता.केज)येथील गणेश कल्याण हाके व अशोक बबन हाके मोटार सायकल क्र.एम एच 44) ए बी- 6234 ने प्रवास करत होते. अचानक समोर उभी असलेली जळालेली बस दिसल्याने मोटार सायकल स्वाराचा ताबा सुटला गेला. मोटर सायकलसह दोघेही रस्त्यावर पडले. त्याचवेळी कळंब कडून केजकडे जात असलेल्या ट्रकने एम एच- 10 /एस- 7916 मोटार सायकल सह दोघांना शंभर ते दीडशे फुट फरपटत नेले. यामध्ये गणेश हाके तसेच अशोक हाके हे दोघेही गंभीर जखमी झाले.या दोघांना तातडीने केजच्या उपजिल्हा रुग्णालयात दाखल केले मात्र अशोक बबन हाके याचा मृत्यू झाला असल्याची माहिती मिळत आहे.

बीड — वडवणी पोलीस ठाणे हद्दीतील उपळी या गावात गोवंशांची कत्तल केली जात असल्याची गोपनीय माहिती मिळताच पोलिसांनी छापा मारून 400 किलो गोमांस जप्त केले असून आरोपीला जेरबंद केले आहे.
उपळी या गावात एक इसम गोवंश जातीचे जनावरांची कत्तल करीत असल्याची गोपनीय माहिती वडवणी प्रभारी वर्षा व्हगाडे यांना मिळाली. त्यांनी तात्काळ मिळालेल्या माहितीच्या ठिकाणी छापा मारला असता तेथे फिरोज सिकंदर कुरेशी वय 35 वर्ष, राहणार उपळी हा त्याचे घरामध्ये गोवंश जातीची जनावरे कत्तल करताना मिळून आला. पोलिसांनी घटना स्थळावरून 80 हजार रुपये किमतीचे 400 किलो वजनाचे गोवंश जनावरांचे मांस, लोखंडी सुरे व लाकडी ओंडका जप्त केला. सध्या आरोपी अटकेत असून पुढील तपास सहाय्यक फौजदार विष्णू जायभाये करत आहेत. सदरची कारवाई पोलीस अधीक्षक नवनीत काँवत व अपर पोलीस अधीक्षक चेतना तिडके यांचे मार्गदर्शनाखाली वडवणी पोलीस ठाण्याच्या सहायक पोलीस निरीक्षक वर्षा व्हगाडे, पोलीस उपनिरीक्षक राजू राठोड, संदीप चव्हाण, पोलीस अंमलदार विष्णू खरात, किरण इरमले, वसंत करे यांनी केली