बीड — जिल्ह्यात गेल्या दोन दिवसापासून जिल्ह्यात  सुरू असलेल्या मुसळधार पावसामुळे बहुतांश तालुक्यात अतिवृष्टीची नोंद झाली आहे अनेक नद्या नाल्यांना महापूर आल्याने जनजीवन विस्कळीत झाले आहे त्यामुळे हवामान विभागाच्या अंदाजानुसार पावसाचा जोर कायम राहणार असल्याने बीड जिल्हा प्रशासनाच्या वतीने जिल्ह्यातील सर्व खाजगी आणि सरकारी शाळा अंगणवाडी आश्रम शाळा महाविद्यालय यांना मंगळवारी सुट्टी जाहीर करत सतर्कतेचा इशारा दिला आहे.

बीड जिल्ह्यासह मराठवाड्यात गेल्या दोन-तीन दिवसापासून मोठ्या प्रमाणात मुसळधार पाऊस कोसळत आहेत जिल्ह्यातील 16 मध्यम आणि 126 लघु प्रकल्प ओसंडून वाहत असल्यामुळे शिरूर पाटोदा आष्टी बीड वडवणी गेवराई अंबाजोगाई परळी या तालुक्यातील अनेक गावांचा संपर्क तुटला आहे.

गोदावरी नदीपात्रामध्ये एक लाख क्युसेक  पेक्षा अधिकच पाणी विसर्ग करण्यात येत आहे तसेच वडवणीच्या उर्ध्व कुंडलिका माजलगाव मांजरा या धरणातून देखील गेटमधून हजारो क्यू सेक पाणी नदीपात्रात सोडण्यात येत असल्यामुळे अनेक गावात पूरस्थिती निर्माण झाली आहे.

बीड सह महाराष्ट्रात पुढचे काही दिवस पावसाची संततधार सुरूच राहण्याचा इशारा हवामान विभागाने दिला आहे या पार्श्वभूमीवर बीडचे जिल्हाधिकारी विवेक जॉन्सन यांनी मंगळवारी जिल्ह्यातील सर्व शाळा महाविद्यालय आश्रम शाळा अंगणवाडी यांना सुट्टी दिली आहे.

शाळांना सुट्टी दिली असली तरी मराठवाडा मुक्ती संग्राम दिनाच्या पार्श्वभूमीवर शिक्षक आणि कर्मचारी यांनी शाळेत हजर राहावे असेही आदेश जिल्हाधिकारी यांनी दिले आहेत.

बीड — काल झालेल्या अतिवृष्टीमुळे नदीला पूर आल्याने आष्टी तालुक्यातील कडा, सुलेमान देवळा, पिंपरखेड, धानोरा, शिरापुर, टाकळी अमिया आणि डोंगरगण या गावांचा संपर्क तुटला आहे. तसेच कडा गावातील 11 नागरिक तर सुलेमान देवळा 06, पिंपरखेड 03, धानोरा 03, डोंगरगण 03, शिरापुर 10 व टाकळी अमिया 15 असे एकूण सात गावात 51 लोक अडकलेले आहेत. यासाठी एनडीआरएफ पथकाला पाचारण केले आहे तसेच एयरलिफ्टिंग ची व्यवस्था जिल्हा आपत्ती व्यवस्थापन प्राधिकरणकडुन मा. जिल्हाधिकारी यांचे प्रयत्नांनी करण्यात आलेली आहे. एअर फोर्सच्या माध्यमातून पूर बाधित गावांतील नागरिकांना सुरक्षित बाहेर काढण्याची कार्यवाही सुरू आहे. मा. जिल्हाधिकारी यांनी सैन्यदल व राष्ट्रीय आपत्ती प्रतिसाद दल यांचे माध्यमातून बचाव कार्य सुरू केलेले आहे.

उपमुख्यमंत्री, पालकमंत्री अजित पवार यांनी अतिवृष्टी, पूरबाधित गावांतील नागरिकांना आवश्यक ते मदतकार्य तात्काळ करणेबाबत जिल्हाधिकारी यांना सूचित केले. त्यानुसार तात्काळ कार्यवाही स्थानिक पथक व शोध व बचाव पथकांच्या माध्यमातून करण्यात येत आहे.

जिल्हा नियंत्रण कक्ष, मंत्रालय नियंत्रण कक्ष, एनडीआरएफ, आर्मी, विभागीय नियंत्रण कक्ष यांचे सोबत समन्वय स्थापन करण्यात येत असून स्थानिक तहसीलदार, उपविभागीय अधिकारी यांचे सोबत मा. जिल्हाधिकारी स्वतः संपर्क ठेवून आहेत व पूर परिस्थितीवर नियंत्रण ठेवून आहेत. पूरग्रस्त गावातील नागरिकांनी घाबरू नये आणि प्रशासनास सहकार्य करावे. मा. जिल्हाधिकारी यांचेमार्फत सर्वांशी समन्वय साधून आवश्यक ठिकाणी मदत पाठवण्यासंदर्भात व बचाव कार्य करण्याची कार्यवाही करण्यात आली. स्थानिक आमदार. सुरेश धस हे प्रत्यक्ष घटनास्थळावर उपस्थित होते संबंधित तहसीलदार व उपविभागीय अधिकारी यांचे मदतीत प्रत्यक्ष पूरबाधित क्षेत्रात मदत कार्य सुरू आहे

बीड — जिल्ह्यामध्ये गेल्या काही दिवसात पावसाने उसंत घेतली होती. मात्र मागील २४ तासात झालेल्या पावसामुळे १८ महसूल मंडळामध्ये अतिवृष्टीची नोंद झाली आहे. बीडच्या गेवराई आणि शिरूर कासार तालुक्यात सर्वाधिक पाऊस पडला असून यामुळे खरिपाच्या पिकांचे यामुळे नुकसान झाले आहे.

जिल्हयातील या १८ महसूल मंडळात झालेली अतिवृष्टी

बीड तालुका राजुरी ७७.३ मिमी, नाळवंडी ७४.३ मिमी, चहऱ्हाटा ७७.३ मिमी, पारगाव सिरस ७७.३ मिमी,

पाटोदा तालुका – पाटोदा ६७.८ मिमी, थेरला ८६.८ मिमी

गेवराई तालुका – धोंडराई १९८. मिमी, उमापुर १३९.३ मिमी, रेवकी १४३ मिमी, तलवाडा ९४ मिमी, गेवराई ८८ मिमी, चकलांबा १३१.८ मिमी

परळी तालुका – पिंपळगाव ८०.८ मिमी

शिरूर कासार – शिरूर ९१.५ मिमी, रायमोहा १२१.८ मिमी, ब्रम्हनाथ येळंब १०९ मिमी, तिंतरवणी १००.८ मिमी, खालापुरी ९६.५ मिमी,
दरम्यान अतिवृष्टी झालेल्या महसूल मंडळामध्ये काढणीला आलेल्या खरिपांच्या पिकाचे मोठे नुकसान झालेले आहे.प्रामुख्याने सोयाबीन,कापूस,मूग या पिकांचे प्रामुख्याने नुकसान झालेले आहे. पैठण येथील जायकवाडी धरणातून पाणी सोडल्याने गोदावरी नदीला पूर आला असून नदी तीरावरील गेवराई तालुक्यातील राक्षसभुवन येथे असलेले शनी मंदिर पुन्हा एकदा पाण्याखाली गेले आहे. प्रशासनाकडून गोदावरी नदीकाठच्या गावांना सतर्कतेचा इशारा देण्यात आला आहे.
जायकवाडी धरणातून शनिवारी रात्री पासूनच नदीपात्रात पाणी सोडण्यात आल्याने गोदावरी नदी दुथडी भरून वाहत आहे. पाणीपातळी वाढल्यास गेवराई तालुक्यातील गुंतेगावं, बोरगांव, पाथरवाला, पांचाळेश्वर, राक्षसभुवन, सावळेश्वर, म्हाळसपिपंळगावं, नागझरी, खामगाव, आगरनादुंर, पांढरी, मिरगावं, पागुळगावं, राजापुर, रामपुरी, भोगलगावं आदि गावांना पाण्याचा वेढा पडण्याची शक्यता आहे.

माजलगाव धरणातून सिंधफणा नदीपात्रात विसर्ग

माजलगाव येथे असलेल्या धरणातून धरणाचे १० वक्र दरवाजे ०.८० मीटरने वर उचलत सिंदफणा नदी पात्रात ३१ हजार ३३५ क्यूसेक इतका पाण्याचा विसर्ग केला जात आहे. माजलगाव धरणातील सोडण्यात आलेले पाणी आणि गोदावरीतील पूरस्थितीमुळे सिंदफणा नदीची पाणी पातळी वाढल्याने माजलगाव, मंजरथ व ढालेगाव नदीकाठच्या गावामध्ये पूरस्थिती निर्माण होण्याची शक्यता आहे. जिल्ह्यातील 32 गावांना पूर परिस्थिती चा सामना करावा लागणार आहे. जिल्हा प्रशासनाने तसे सतर्कतेचे आदेश दिले आहेत.