लिंबागणेश – मागील आठवडाभरापासून बीड जिल्ह्यासह संपूर्ण महाराष्ट्रात मुसळधार पाऊस, अतिवृष्टी व ढगफुटी झाली. जिल्ह्यातील तब्बल ७ लाख ८९ हजार ६७६ हेक्टर क्षेत्रावर खरीप पिकांची नोंद झाली असून ती सरासरी पेरणीच्या ९७.६ टक्के इतकी आहे. यामध्ये मोठ्या प्रमाणावर पिकांचे नुकसान झाले आहे.

बीड जिल्ह्यातील २९ महसूल मंडळांत अतिवृष्टीची नोंद झाली असून, त्यापैकी लिंबागणेश महसूल मंडळात सर्वाधिक १०७.३ मि.मी. पाऊस झाला आहे. सततच्या पावसामुळे पिके वाहून गेली, शेतजमिनी तळाला गेल्या, घरांची पडझड झाली, तर कापूस, सोयाबीनसह इतर पिके पाण्यात बुडल्यानं शेतकरी पूर्णपणे हतबल झाले आहेत.

या पार्श्वभूमीवर शेतकऱ्यांना तातडीने दिलासा मिळावा, यासाठी आज मंगळवार दि. २३ रोजी सामाजिक कार्यकर्ते डॉ. गणेश ढवळे यांच्या नेतृत्वाखाली अहमदपूर – अहिल्यानगर राष्ट्रीय महामार्गावर लिंबागणेश येथील छत्रपती शिवाजी महाराज चौकात रास्ता रोको आंदोलन करण्यात आले. यावेळी बाळासाहेब मुळे, कृष्णा पितळे, रमेश गायकवाड आदींची भाषणे झाली.तहसीलदार चंद्रकांत शेळके यांना फोनवरून संवाद साधला, मंडळ अधिकारी जायभाये,तलाठी पोतदार,कृषी सहाय्यक आनंद वाघ, नेकनुर पोलिस स्टेशनचे पोलीस उपनिरीक्षक आप्पासाहेब रोकडे, सहाय्यक फौजदार बाबासाहेब राख, बाबासाहेब ढाकणे आदींना निवेदन दिले.यावेळी आंदोलनात राजेभाऊ गिरे, कल्याण वाणी,सरपंच बालासाहेब जाधव, दामोदर थोरात, सुरेश निर्मळ,श्रीहरी निर्मळ, ,अँड.गणेश वाणी, बाळासाहेब मुळे, पांडुरंग वाणी, संजय घोलप, शंकर वाणी, श्रीहरी कोटुळे,खंडू वाणी, भगवान मोरे आदी ग्रामस्थ सहभागी होते.

डॉ. ढवळे यांनी स्पष्ट केले की,“आता कसला पंचनामा आणि कसली नोंद? शेतकऱ्यांचं सगळंच वाहून गेलं आहे. प्रशासनाने औपचारिकता न करता तातडीने ओला दुष्काळ जाहीर करून सरसकट नुकसान भरपाई व कर्जमाफी करावी. अन्यथा शेतकरी आत्महत्यांकडे ढकलले जातील.”

लिंबागणेश – बोरखेड पुल खचला

लिंबागणेश ते बोरखेड मार्गावरील पूल मुसळधार पावसामुळे खचला असून वाहतूक पूर्णपणे ठप्प झाली आहे. यासंदर्भात आठवडाभरापूर्वी तलाठी, ग्रामविकास अधिकारी आणि बांधकाम विभागाच्या अधिकाऱ्यांनी पाहणी केली होती. मात्र, अद्याप दुरुस्ती न झाल्याने ग्रामस्थांमध्ये तीव्र नाराजी व्यक्त होत आहे. तातडीने पूल दुरुस्त करून वाहतूक सुरळीत करावी, अशी मागणी करण्यात आली आहे.

छ. संभाजीनगर — घराच्या छतावर सौर ऊर्जा संच बसवून मोफत वीज मिळविण्याच्या प्रधानमंत्री सुर्यघर मोफत वीज योजनेला मराठवाडयात उदंड प्रतिसाद मिळत आहे. मराठवाडयातील आठ जिल्हयात 46,688 घराच्या छतांवर संच बसवून वीज निर्मिती सुरू झाली असल्याने मोफत विजेचा लाभ मिळून शुन्य विजबिलाचे लाभार्थी झाले असून ही घरे प्रकाशाने उजळली आहेत. या लाभार्थी ग्राहकांच्या घराच्या छतावर सौर उर्जा पॅनलच्या माध्यमातून 173.91 मे.वॅट वीज निर्मिती होत आहे.

या योजनेत केंद्र सरकारतर्फे तीन किलोवॅट क्षमतेपर्यंतच्या प्रकल्पांसाठी ग्राहकांना ७८ हजार रुपयांपर्यंत सबसिडी मिळते. मा. पंतप्रधान नरेंद्र मोदी यांनी फेब्रुवारी महिन्यात दरमहा ३०० युनिटपर्यंत मोफत वीज उपलब्ध करुन देण्यासाठी १ कोटी घरांना रुफटॉप सोलर यंत्रणा आस्थापित करण्याचे उद्दिष्ट जाहीर केले आहे. त्या अनुषंगाने महाराष्ट्रासाठी २० लाख घरांवर रुफटॉप सोलर यंत्रणा आस्थापित करण्याचे उद्दिष्ट आहे. देशाचा हा प्रकल्प रु.७५,००० कोटी पेक्षा जास्त गुंतवणुकीचा आहे.
ग्राहकाच्या गरजेपेक्षा अधिक वीज निर्मिती झाल्यामुळे वीजबिल शुन्य होते. शिल्लक वीज महावितरण विकत घेते.निवासी घरगुती कुटुंबांसाठी प्रति किलोवॅट ३०,००० रुपये अनुदान २ किलोवॅट पर्यंत मिळते. ३ किलोवॅट पर्यंत अतिरिक्त एक किलोवॅट क्षमतेसाठी रु. १८,००० अनुदान मिळते. ३ किलावेंट पेक्षा मोठ्या सिस्टीमसाठी एकूण अनुदान रु. ७८,००० पर्यंत मर्यादित आहे.

मराठवाडयात सुर्यघर योजनेचे लाभार्थी

मंडल कार्यालय लाभार्थी
नांदेड मंडल — 3,905
परभणी मंडल — 3,929
हिंगोली मंडल — 1,726
नांदेड परिमंडल — 10,560
लातूर मंडल   — 7,264
बीड मंडल   — 3,702
धाराशिव मंडल — 1,942
लातूर परिमंडल —  12,908

छ. संभाजीनगर — 13,571
शहर
छ. संभाजीनगर —  5,339
ग्रामीण
जालना मंडल — 4,310
छ.संभाजीनगर
परिमंडल —  23,220

छ. संभाजीनगर
प्रादेशिक कार्यालय — 46,688

या योजनेसाठी सवलतीच्या दरात बँकेकडून कर्ज उपलब्ध होते. 300 युनिट पर्यंत वीज वापरणा—या घरगुती ग्राहकांना मोफत वीज मिळावी आणि अतिरिक्त वीज विकून उत्पन्नही मिळावे. यासाठी ही योजना सुरू केलेली आहे.

वीज ग्राहकांना https://www.pmsuryaghar.gov.in/ या संकेत स्थळावर योजनेची सर्व माहिती उपलब्ध असून ग्राहकांनी या योजनेचा लाभ घेण्याचे आवाहन महावितरण छत्रपती संभाजीनगर प्रादेशिक कार्यालयाचे सहव्यवस्थापकीय संचालक आदित्य जीवने यांनी केले आहे.

नवी दिल्ली: महागाईच्या झळा बसलेल्या सर्वसामान्यांना दिलासा देण्यासाठी केंद्र सरकारकडून मोठा निर्णय घेण्यात आला आहे. जीएसटी परिषदेच्या बैठकीत अनेक दैनंदिन गरजेच्या वस्तूंवरील जीएसटी दर कमी करण्याचा निर्णय घेण्यात आला असून तो उद्या, २२ सप्टेंबर २०२५ पासून लागू होणार आहे. यामुळे घरगुती वस्तू, इलेक्ट्रॉनिक्स, बांधकाम साहित्य, शिक्षण साहित्य तसेच औषधे यांची किंमत कमी होणार आहे.

साबण, शॅम्पू, टूथपेस्ट

रोजच्या वापरातील या वस्तूंवर जीएसटी १८% वरून ५% पर्यंत कमी

एसी, फ्रिज, टीव्ही यांसारख्या वस्तूंवरील जीएसटी २८% वरून १८% पर्यंत कपात.

घरबांधकामासाठी अत्यावश्यक असलेल्या सिमेंटवर २८% ऐवजी फक्त १८% जीएसटी.

जीवनरक्षक औषधे, निदान किट्स व हेल्थ उपकरणांवर आता १२% किंवा १८% ऐवजी फक्त ५% किंवा शून्य टक्के जीएसटी.

पेन्सिल, क्रेयॉन, खोडरबर, कॉम्पास बॉक्स, नोटबुक यावर १२% जीएसटी थेट ५% किंवा शून्यावर.

३५० सीसीपेक्षा कमी क्षमतेची दुचाकी व छोट्या कारवरील दर २८% वरून १८%.

तूप, लोणी, चीज आणि पॅकेज्ड खाद्यपदार्थ आता १२% ऐवजी ५% जीएसटीवर उपलब्ध.

जीएसटी कपातीचा परिणाम थेट एसी, डिशवॉशर, फ्रिज यांसारख्या वस्तूंवर दिसून येणार आहे. व्होल्टास, डायकिन, गोदरेज अप्लायन्सेस, पॅनासोनिक, हायर आदी एसी कंपन्यांनी २ ते ८ हजार रुपयांपर्यंत किंमती कमी करण्याची घोषणा केली आहे. बॉशसारख्या कंपन्या डिशवॉशर व इतर उपकरणांवरील दरही कमी करत आहेत. कपातीमुळे ऑक्टोबर महिन्यात ग्राहकांच्या खिश्यावरचा भार कमी होऊन खरेदी अधिक परवडणारी होणार आहे.

मुख्यमंत्र्यांसह उपमुख्यमंत्री, महसूलमंत्री, कृषिमंत्र्यांना दिले पत्र

बीड — अतिवृष्टीमुळे पावसामुळे शेतकरी बांधवांचे मोठ्या प्रमाणावर नुकसान झाल्यामुळे शासनाने ओला दुष्काळ जाहीर करून सरसकट नुकसान भरपाई देण्यात मागणी आ.संदीप क्षीरसागर यांनी केली आहे.

बीड विधानसभा क्षेत्रासह (बीड व शिरूर का. तालुका) जिल्हा व महाराष्ट्रामध्ये गत तीन महिन्यापासून मोठ्या प्रमाणावर पाऊस पडत आहे. गत ऑगस्ट महिन्यात व दि.१३ सप्टेंबर २०२५ पासून सातत्याने अतिवृष्टी पाऊस होत आहे. या पावसामुळे सर्वच पिके व फळबागांचे शतप्रतिशत नुकसान झाले आहे. महसुल, कृषी विभाग तथा तत्सम विभागाला सरसकट शेतकरी बांधवांना नुकसान भरपाई देण्याबाबत कार्यवाही करून पंचनामे करण्याचे आदेश द्यावेत. अशी मागणी राज्याचे मुख्यमंत्री ना. देवेंद्र फडणवीस, उपमुख्यमंत्री
ना.एकनाथ शिंदे, उपमुख्यमंत्री तथा बीड जिल्ह्याचे पालकमंत्री ना.अजित दादा पवार, महसूलमंत्री
ना.चंद्रशेखर बावनकुळे, कृषिमंत्री ना.दत्तामामा भरणे, राज्याचे मा.मुख्य सचिव, मा.विभागीय आयुक्त, छत्रपती संभाजीनगर आणि बीड चे जिल्हाधिकारी यांच्याकडे आ.संदीप क्षीरसागर यांनी पत्राद्वारे केली आहे.

यामध्ये बीड विधानसभा क्षेत्रातील बीड व शिरूर का. तालुक्यात सर्वच महसुल मंडळात अतिवृष्टीची नोंद झालेली आहे. मुख्य नदी व उप नद्यांना पुर येवून शेतकरी बांधवांच्या जमिनी खरडुन गेल्या आहेत. शेतामध्ये पुराचे पाणी शिरून पिक व फळबागाचे नुकसान झाले आहे. दीर्घकाळ पाणी जमिनीवर राहिल्याने पिकांचे नुकसान होऊन घरांची पडझड झाली आहे. सार्वजनिक मालमत्ता रस्ते व पुल खरडुन जाणे, शाळा व शासकीय इमारतीचे खूप मोठ्या प्रमाणात नुकसान होणे, पशुधन मृत्युमुखी पडणे, विजेच्या तारा तुटणे, खांब मोडणे, रोहित्र खराब होणे व त्यामध्ये जिवीतहानी होणे, बंधारे फुटल्यामुळे शेती वाहुन जाणे, तलाव फुटण्याची शक्यता असणे व कपिलधार ता.बीड, भानकवाडी (वरची) ता.शिरूर का. याठिकाणी भुस्खलन होणे या सर्व बाबींची सकारात्मक दृष्टीकोनातून नुकसानीचे सर्वेक्षण व वस्तुनिष्ठ पंचनामा करावा. शेतकरी बांधव,नागरिक यांना सरसकट नुकसान भरपाई देवून मदत करावी. तसेच मागील तीन महिन्यापासून होत असलेल्या पावसामुळे सर्वत्र जमीन, नदी, नाले, बंधारे, तलाव पाणीमय झालेले आहेत. त्यामध्ये सर्व पिकांचे व फळ बागांचे शतप्रतिशत नुकसान झाल्याचे चित्र पहावयास मिळत आहे. यासर्व बाबींचे निकष पाहता तथा आपत्ती व्यवस्थापन कायद्यानुसार शेतकरी बांधव, ग्रामस्थ व नागरिकांना सर्वरित्या सक्षम साथ व सहकार्य होणेसाठी ओला दुष्काळ जाहिर करून सर्वोतोपरी मदतीची गरज आहे. त्यामुळे शासनाने ओला दुष्काळ जाहीर करून शेतकऱ्यांना सरसकट नुकसान भरपाई देण्यात यावी अशी मागणी आ.संदीप क्षीरसागर यांनी पत्राद्वारे केली आहे.