बीड — संतोष देशमुख हत्या प्रकरणानंतर बीड पोलीस दलाला नवनीत कांवत यांच्या रूपाने नवा चेहरा मिळाला. कायदा सुव्यवस्था ताळ्यावर येईल असा विश्वासही वाटला होता. नव्याचे नऊ दिवस सरले अन् पुन्हा कायदा सुव्यवस्थेचे धिंडवडे निघू लागले. पोलीस कर्मचाऱ्यांची जात दिसू नये म्हणून नेम प्लेट बदलली पण एस पी साहेब पोलीस दलाची प्रतिमा बदलण्यात तुमची कारकीर्द अपयशी ठरू लागली. गुन्हेगारावर तर वचक राहिलाच नाही ती तर मोकाटच आहेत.पण नुकतीच मिसरूड फुटलेली कोवळी पोरं देखील खिशात चाकू घेऊन फिरू लागली. एवढंच नाही तर एस पी ऑफीस पासून हाकेच्या अंतरावर गजबजलेल्या ठिकाणी खूनही करू लागले. दोन महिन्याहून कमी काळात तब्बल दहा खून हे खाकी वर्दीच्या इज्जतीच्या चिरफाळ्या उडवणारे आहेत.अजूनही वेळ गेली नाही धृतराष्ट्राची व कच्च्या कानाची भूमिका सोडून डोळसपणाने स्टंटबाजी न करता वरिष्ठांच्या भूमिकेत या तरच तुमची कर्तव्यदक्षतेची प्रतिमा जपली जाईल अन्यथा बीडचा भेसूर बनलेला चेहरा बदलता आला नाही म्हणून अपयशाचं खापर फुटायला वेळ लागणार नाही. सध्या तरी “रातभर पाखडलं, काही नाही सापडलं” अशीच स्थिती तुमची बनली आहे.

अतिशय कर्तव्यदक्ष अधिकारी म्हणून पोलीस अधीक्षक नवनीत कांवत यांना बीडला आणण्यात आलं. बीडच्या कायदा सुव्यवस्थेचा चेहरा नक्कीच बदलेल अशी अपेक्षा व्यक्तही केली जात होती. सुरुवातीच्या काळात अतिशय चांगलं काम पोलीस दलाच झालं, बीडकर समाधानी झाले. पण थोड्याच दिवसात पोलीस अधीक्षकांकडून स्टंटबाजीचे फतवे निघू लागले. त्यातच जात कुणाला कळू नये म्हणून पोलीस कर्मचाऱ्यांच्या नेमप्लेट बदलण्यात आल्या.आता तर बीड पोलीस मुंबई पोलिसांची बरोबरी करेल का काय? अशी भावना देखील निर्माण झाली.पण ती फोल ठरली. थोड्याच दिवसात गुन्हेगारीने तोंड वर काढले. बीडच्या माध्यमानी जागरूकतेने आवाज उठवायला सुरुवात केली. तर पोलिसावर सत्यतेच्या बातम्यांचा मानसिक दबाव येतो असं नव मानसशास्त्र शोधत पोलिस आणि पत्रकारांमध्ये समन्वय ठेवणारा Beed police press ग्रुप फक्त पोलिसांकडून दिल्या जाणाऱ्या माहिती पुरताच मर्यादित ठेवला. इथेच धृतराष्ट्राची भूमिका घ्यायला एस पीं नी सुरू केल्याचं लक्षात आलं. माध्यमांच्या बातम्यांची दखल घ्यायची नाही. आपल्याच दिशाहीन करणाऱ्या कर्मचाऱ्यांच ऐकून डोळेझाक करायची मग कुरुक्षेत्रावर (बीडच्या भूमीत) सुरू असलेल्या कारस्थानाची कितीजरी माहिती संजय (प्रसारमाध्यमं) ने दिली तरी विश्वासच ठेवला नाही. परिणामी अराजकतेने पुन्हा तोंड वर काढलं. अवैध धंदे प्रचंड वाढले. गुन्हेगारीत तर वाढच होऊ लागली. गुन्हेगारावर वचक ठेवण्यासाठी एम पी डी ए सारख्या कारवाया करण्यात आल्या. दुर्दैवाने त्या सुद्धा वरिष्ठांच्या आदेशापुढे सपशेल फेल ठरल्या. नुसते कागदी घोडे नाचवून वचक बसत नसतो. हे पुन्हा एकदा स्पष्ट झाले पण स्टंटबाजीलाच कर्तव्यदक्षता समजणाऱ्या धृतराष्ट्राला समजवणार कोण? मोठमोठे गुन्हे करणारे मोकाट तर आहेच पण आता परिस्थिती इतकी हाताबाहेर जाऊ लागली आहे की, पोलीस अधीक्षक कार्यालयाबाहेर मारहाण करतानाचा व्हिडिओ व्हायरल झाला होता. इथेच खरी खाकीच्या इभ्रतीची लक्तर टांगली गेली होती. या घटनेनंतरही बोध घेण्यात आलाच नाही.
गुन्हेगारांकडून गोरगरिबांना होणाऱ्या मारहाणीचे व्हिडिओ व्हायरल होऊ लागले. स्वतःची चाललेली ईभ्रत राखण्यासाठी एस पीं च्या सुपीक डोक्यातून नवी कल्पना उदयाला आली. स्टंटबाजीचा नवा फतवा काढत मारहाणीचे व्हिडिओ व्हायरल करणारा वर गून्हा दाखल करण्यात येईल त्यालाही सह आरोपी करण्यात येईल असं जाहीर करत.गुन्हेगारीवर पांघरून घालण्याचं व संविधानाने जनतेला दिलेल्या अधिकारावरच बंधन आणण्याच काम केलं गेलं.
याचीच परीनीती म्हणून आता तर
देशी कट्टे बाळगणारे अनेकजण बीडमध्ये मोकाट फिरू लागले आहेत. नेटकीच ओठावर कोवळी मिसरूड फुटलेली पोरं देखील खिशात चाकू बाळगून फिरू लागले आहेत. जिथे गुन्हेगारावरच वचक नाही तिथे या मुलांचं काय घेऊन बसलात? यातूनच काल एका पत्रकार बांधवांच्या मुलाचा गजबजलेल्या एस पी ऑफिस पासून अगदी हाकेच्या अंतरावर असलेल्या ठिकाणी खून झाला.आरोपी फरार होण्यात यशस्वी झाले. पोलिसांनी हाताबाहेर प्रकरण जात आहे. म्हणून एका आरोपीला तात्काळ अटक देखील केली. पण बाकीचे पाच-सहा आरोपी कोण? याचा उलगडा झाला नाही शेवटी यश देवेंद्र ढाका याच्या हत्येतील आणखी आरोपीचा शोध घ्या अन्यथा शवविच्छेदन करू देणार नाही अशी भूमिका घेत.बार्शी रस्त्यावर आंदोलन करावं लागलं तेही भर पावसात. दोन महिन्याहून कमी कालावधीत झालेला हा दहावा खून आहे. एस पी साहेब …! देवेंद्र ढाकाच्या मुलाच्या हत्येनंतर मात्र गुन्हेगारीचा कहर झाल्याचं दिसू लागला आहे.

नेमप्लेट बदलण्यासारख्या स्टंटबाजीतून काहीच साध्य झालं नाही.त्यासाठी ग्राउंड वर उतरून काम करावं लागेल. कच्चे कान व धृतराष्ट्राची भूमिका सोडून डोळसपणाने पाहावे लागेल. जनतेचा आक्रोश ऐकावा लागेल इथून पुढे तरी थोडाफार बदल होईल का? “येरे माझ्या मागल्या”अशीच बीडकरांची स्थिती होईल? असेच गुन्हेगार मोकाटच फिरत राहतील का? सर्वसामान्यांना दिलासा मिळणार नाही का? कोवळी पोर गुन्हेगारीच्या मार्गानेच जाणार का? बीड असाच बदनाम होत राहणार का? असे एक ना अनेक प्रश्न विचारले जाऊ लागले आहेत.

बीड — साठवून ठेवलेला गुटखा विक्रीसाठी घेऊन जाणार असल्याची माहिती स्थानिक गुन्हे शाखेला मिळाल्यानंतर मस्साजोग मध्ये कारवाई करून 35 लाख रुपयांचा गुटखा पकडण्यात आला आहे.

बीड जिल्ह्यात प्रतिबंधित असलेला गुटखा परराज्यातून आयात करून सर्रास विकला जातो. पोलिसांचा यावर कुठलाही नियंत्रण नाही. स्थानिक पोलीस ठाणे उलट गुटखा तस्करी करणाऱ्यांना सहकार्य करीत असल्याचं चित्र पाहायला मिळतं. त्यातच  अवैधरित्या विक्रीसाठी आणलेला गुटखा व सुगंधी तंबाखू पकडण्यात मोठे यश आले आहे. सदरची कारवाई ही मसाजोग, ता.केज, जि.बीड येथे करण्यात आली आहे.या कारवाईदरम्यान स्थानिक गुन्हे शाखेच्या पाथकाने एकूण 34 लाख46,हजार227 रुपये किमतीचा गुटखा व सुगंधी तंबाखूचा साठा जप्त केला. महाराष्ट्र शासनाने गुटखा व सुगंधी तंबाखूच्या विक्रीवर संपूर्ण बंदी घातली असतांना पण आरोपी  रोहित आसाराम देशमुख, 35 वर्ष रा. मसाजोग ता. केज व साहेबराव लिंबा आंधळे, वय 45 वर्ष रा.आंधळ्याचीवाडी ता. केज जि.बीड यांनी स्वतःचे ताब्यात बाळगल्याने तो जप्त करण्यात आलेला आहे.स्थानिक गुन्हे शाखेच्या अधिकाऱ्यांनी व अंमलदार यांनी वरील आरोपीविरुद्ध पोलीस स्टेशन केज येथे गुन्हा दाखल केला असून पुढील तपास पोलीस स्टेशन केज येथील अधिकारी हे करत आहेत. या कारवाईमुळे जिल्ह्यात गुटखा व सुगंधी तंबाखूची अवैध विक्री रोखण्यास मोठा हातभार लागणार आहे.ही कारवाई पोलीस अधीक्षक नवनीत काँवत, अप्पर पोलीस अधीक्षक सचिन पांडकर, श्रीमती चेतना तिडके  यांचे मार्गदर्शनाखाली पोलीस निरीक्षक शिवाजी बंटेवाड, पोलीस उपनिरीक्षक श्रीराम खटावकर पोलीस अंमलदार अनंत मस्के, विकास राठोड, सोमनाथ गायकवाड, अंकुश वरपे, राहुल शिंदे, राख, अश्फाक सय्यद, मनोज परजने, नितीन वडमारे, सिद्धार्थ मांजरे, सुनील राठोड सर्व नेमणूक स्थानिक गुन्हे शाखा बीड यांनी केली आहे.

बीड — शहरातील माने कॉम्प्लेक्स परिसरात रात्री साडेआठच्या सुमारास युवकांमध्ये झालेल्या बाचाबाचीत यश देवेंद्र ढाका वय 22 वर्ष याच्या छातीवर चाकूचे वार करण्यात आले. छातीत आरपार चाकूचे वार गेल्याने तो जमिनीवर कोसळला. दरम्यान पोलिसांनी घटनेच्या अर्ध्या तासातच आरोपीला जेरबंद केले आहे. पत्रकार देवेंद्रसिंग ढाका यांचा तो मुलगा आहे.
शहरात गुरूवारी रात्री साडेआठ वाजण्याच्या सुमारास यश देवेंद्र ढाका वय २२, रा. बीड या तरुणाचा चाकूने वार करून खून करण्यात आल्याची घटना माने कॉम्प्लेक्स परिसरात घडली आहे. छातीत झालेले दोन वार आरपार गेल्याने यश ढाका रक्तबंबाळ झाला होता. जखमी अवस्थेत त्यांना तातडीने जिल्हा रुग्णालयात दाखल करण्यात आले, परंतु डॉक्टरांनी त्याला मयत घोषित केले. यश हा अभियांत्रिकीचे (इंजिनिअरिंगचे) शिक्षण घेत होता. वाढदिवस साजरा करताना वाद झाल्याने हा प्रकार घडल्याचे सांगण्यात आले.
गूरूवारी रात्री शहरातील गजबजलेल्या माने कॉम्प्लेक्स भागात हा खून झाला असल्याने शहरातील कायदा सुव्यवस्थेवर प्रश्नचिन्ह निर्माण झाले आहे पोलिसांचा गुन्हेगारावर वचक राहिला नसल्याचं या घटनेवरून स्पष्ट झाला आहे . दरम्यान या घटनेनंतर आरोपीचा शोध घेण्यासाठी पोलिसांकडून तातडीने तपास सुरू करण्यात आला होता. स्थानिक गुन्हे शाखेच्या पथकाने अवघ्या अर्ध्या तासात सुरज आप्पासाहेब काटे वय 21 वर्ष रा.. बीड या आरोपीला बेड्या ठोकून शिवाजीनगर पोलिसांच्या स्वाधीन केले. ही कारवाई पोलीस निरीक्षक शिवाजी बंटेवाड, उपनिरीक्षक श्रीराम खटावकर यांच्या मार्गदर्शनाखाली हवालदार अशोक दुबाले, राहुल शिंदे आणि मनोज परजणे यांनी केली.