बीड — गेवराई पोलिसांनी मोठी कारवाई करत नेकनूर मधून 50 हून अधिक चोरीच्या मोटारसायकली जप्त केल्या आहेत. जिल्ह्यातील दुचाकी चोरीच्या मोठ्या रॅकेटचा पर्दाफाश झाला आहे. पोलीस कारवाईत मोटार सायकल चेसिज् , इंजन, स्पेअर पार्टस् असा 25 लाख रुपयांचा मुद्देमाल जप्त करण्यात आला आहे.

दुचाकी चोरीच्या घटनांमध्ये वाढ झाल्यानंतर गेवराई पोलिसांनी सीसीटीव्ही फुटेज तसेच तांत्रिक विश्लेषणाच्या आधारे सखोल तपासाला सुरुवात करत गाडी चोरी करणाऱ्या आरोपींवर पाळत ठेवण्यात आली. मिळत गेलेल्या माहितीच्या आधारे गेवराई पोलिसांनी नेकनूर मधील टिपू सुलतान चौक परिसरात छापा टाकला.

यावेळी पोलिसांना 17 मोटार सायकल 16 मोटार सायकलचे सांगाडे तीस मोटरसायकल इंजन व मोटार सायकलच्या विविध कंपन्यांचे साहित्य असा एकूण 25 लाख रुपयांचा मुद्देमाल पोलिसांनी जप्त केला. विविध ठिकाणी मोटार सायकल चोरी करून आरोपी शेख असेम शेख मझर रा. नेकनूर यांच्याकडे घेऊन जात व असीम शेख हा अवघ्या दोन तासात मोटार सायकलचे सर्व स्पेअर पार्ट वेगळे करून मोटार सायकलची विल्हेवाट लावत असे.पोलिसांनी छापा मारला

त्यावेळी सय्यद अब्रार सय्यद जैनुद्दीन वय 31 वर्ष व्यवसाय गॅरेज रा.छ. संभाजीनगर एमआयडीसी, सय्यद इमदाद हुसेन अरशद हुसेन वय 22 वर्ष व्यवसाय प्लंबिंग रा. मासूम कॉलनी,मोमीनपुरा बीड, शेख असेम शेख मझर वय 32 वर्ष व्यवसाय भंगारवाला रा. नेकनुर यांना पोलिसांनी जेरबंद केले. एक आरोपी अद्याप फरार आहे. पकडलेल्या आरोपींनी छत्रपती संभाजी नगर, बीड परभणी हिंगोली जिल्ह्यातील चोरी केलेल्या मोटार सायकलचे सांगाडे व इंजन असण्याची शक्यता पोलिसांनी वर्तविली आहे. चेसिज् व इंजन नंबर घेऊन तपासाची व्याप्ती वाढविण्यात येणार आहे. दरम्यान ही कारवाई पोलीस अधीक्षक नवनीत कांवत, अप्पर पोलीस अधीक्षक सचिन पांडकर, उपविभागीय पोलीस अधिकारी अनिल कटके, यांच्या मार्गदर्शनाखाली पोलीस निरीक्षक किशोर पवार, सपोनी दीपक लंके, सपोनी संतोष जंजाळ, उपनि प्रदीप आढाव,पोउपनि निशिगंधा खुळे सुरेश पारधी श्रीमंत उबाळे रवींद्र राऊत अशोक हंबर्डे कल्याण राठोड घोलप राजू सांगळे ऋषी पोटे व महादेव पाटोळे यांनी कामगिरी पार पाडली.

बीड — वस्तू व सेवा कर विभागाचे अधिकारी सचिन नारायण जाधवर यांचा कपिलधार कडे जाणाऱ्या रस्त्यावरील कमानी जवळ मृतदेह आढळला होता. जाधवर आत्महत्येस कारणीभूत ठरलेला व पोलिसांना सापडत नसलेला आरोपी प्रदीप फाटे यास पुण्यातील वाघोली मधून जेरबंद करण्यात स्थानिक गुन्हे शाखेसह ग्रामीण पोलीस ठाण्याचे सपोनी बाळराजे दराडे यांना यश मिळाले आहे.

जीएसटी अधिकारी सचिन जाधवर यांचा 17 जानेवारी 2026 रोजी मांजरसुंबा घाटातील कपिलधारवाडी कडे जाणाऱ्या रस्त्यावरील कमानीजवळ गाडीत संशयास्पद रित्या मृतदेह आढळला होता. ड्युटीला जातो म्हणून घरातून सांगून गेलेले जाधवर परत आले नाहीत म्हणून त्यांच्या पत्नीने पोलिसात तक्रार देखील दाखल केली होती. दरम्यान सचिन जाधवर यांच्या मृत्यूस कारणीभूत ठरलेला वरिष्ठ अधिकारी प्रदीप फाटे गुन्हा दाखल होऊनही फरार होता. अटकपूर्व जामीन मिळावा यासाठी त्याने न्यायालयात देखील धाव घेतली होती. मात्र न्यायालयाने फाटेचा जामीन अर्ज फेटाळला होता. प्रदीप फाटे अटक केली जात असल्याच्या कारणावरून पोलीस यंत्रणेवरच प्रश्नचिन्ह निर्माण होऊ लागले होते. दरम्यान मयत सचिन जाधवर यांच्या कुटुंबीयांनी पोलीस अधीक्षक कार्यालयासमोर 25 फेब्रुवारी रोजी उपोषण देखील केले. पोलिसांनी आरोपीला अटक करण्यात येईल अस आश्वासन दिल्यानंतर उपोषण मागे घेण्यात आले. या उपोषणानंतर मात्र पोलीस यंत्रणेवर प्रचंड दबाव निर्माण झाला होता. हे प्रकरण प्रसारमाध्यमांनी देखील चांगलेच उचलून धरले होते. अखेर पुण्यातील वाघोली येथून आरोपी प्रदीप फाटे यास स्थानिक गुन्हे शाखेच्या पथकाने जेरबंद करण्यात यश मिळवले. ही कारवाई पोलीस अधीक्षक नवनीत कांवत, अप्पर पोलीस अधीक्षक सचिन पांडकर, स्थानिक गुन्हे शाखेचे पोनि. बंटेवाड यांच्या मार्गदर्शनाखाली अशोक दुबाले, महेश विघ्ने तसेच ग्रामीण पोलीस ठाण्याचे सपोनी बाळराजे दराडे यांनी पार पाडली.

बीड — शाळेत जात असताना मैत्रिणीला भेटायला गेलेल्या 9 वर्षीय चिमुकलीला चॉकलेटचे आमिष दाखवून तिच्यावर अघोरी पूजा केली. त्यानंतर तिच्यावर अत्याचार करणाऱ्या 83 वर्षीय नराधमाचा जामीन केजच्या जिल्हा व सत्र न्यायालयाने फेटाळून लावला आहे.
मिळालेल्या माहितीनुसार, माजलगाव तालुक्यातील दिंद्रुड पोलीस स्टेशनच्या हद्दीतील एका वाडीमध्ये ही धक्कादायक घटना 28 जानेवारी 2026 रोजी घडली होती. बाबुराव केरबा निरडे (वय 83 वर्ष) याने शाळेत जाताना मैत्रिणीला भेटायला गेलेल्या नऊ वर्षीय बालिकेला चॉकलेटचे आमिष दाखवून आपल्या घरात बोलावले. सुरुवातीला तिला हात-पाय दाबायला लावून नंतर तिचे कपडे काढले. त्यानंतर आरोपीने पीडित बालिकेच्या खासगी भागाला हळद-कुंकू लावून, अंगावरून लिंबू फिरवले आणि तोंडातून मंत्रोच्चार करत किळसवाणी ‘अघोरी पूजा’ केली. तेवढ्यावरच हा नराधम थांबला नाही तर तिच्यावर लैंगिक अत्याचार केला. या अमानवीय प्रकारामुळे खळबळ माजली होती.
पीडितेच्या आईने दिलेल्या फिर्यादीवरून दिंद्रुड पोलीस ठाण्यात आरोपीविरुद्ध बलात्कार (भारतीय न्याय संहिता/आयपीसी) पोक्सो कायदा, जादुटोणा विरोधी कायदा या कलमान्वये गुन्हा दाखल करण्यात आला होता. लैंगिक अत्याचार करणारा आरोपी सध्या न्यायालयीन कोठडीत आहे .त्याने जामिनासाठी केजच्या जिल्हा व सत्र न्यायालयात अर्ज केला होता. दरम्यान जामीन अर्जावर सुनावणी करताना माननीय सत्र न्यायाधीश श्रीमती आर. के. शेख यांनी गुन्ह्याचे गांभीर्य लक्षात घेत. “आरोपीने केलेले कृत्य हे केवळ अत्याचार नसून समाजाला अंधश्रद्धेच्या गर्तेत नेणारे आणि अत्यंत घृणास्पद आहे,” असे नमूद करत 26 फेब्रुवारी 2026 रोजी आरोपीचा जामीन अर्ज फेटाळून लावला. या प्रकरणात सरकार पक्षातर्फे सरकारी वकील अ‍ॅड. आर. बी. बिरंगळ यांनी प्रभावी युक्तिवाद केला, त्यांना सहाय्यक सरकारी वकील अ‍ॅड. डी. बी. इंगळे यांनी सहकार्य केले.

गेवराई — वन्य प्राण्यांपासून पिकांचे संरक्षण करण्यासाठी बसवलेल्या झटका मशीनचा शॉक लागून 55 वर्षीय शेतकऱ्याचा मृत्यू झाल्याची घटना मानमोडी येथे घडली.

सुधाकर रावसाहेब जाधव असे मयत शेतकऱ्याचे नाव आहे.मानमोडी येथील रहिवासी असलेले सुधाकर जाधव यांच्या मालकीची शेतजमीन गावालगत आहे. सध्या त्यांच्या शेतात ज्वारी, गहू, हरभरा व भुईमूग ही पिके उभी आहेत. वन्य प्राण्यांपासून विशेषतः रानडुक्कर व हरीण – पिकांचे संरक्षण करण्यासाठी त्यांनी शेतात झटका मशीन बसवले होते.रविवारी सकाळी जाधव हे शेतात गेले असता तोल जाऊन झटका मशीनला त्यांचा स्पर्श झाला. त्यामुळे त्यांना विजेचा जबरदस्त धक्का बसला व त्यातच त्यांचा मृत्यू झाला. ही घटना कळताच परिसरात हळहळ व्यक्त करण्यात आली. दरम्यान, दुपारी चार वाजता गावातील स्मशानभूमीत त्यांच्या पार्थिवावर अंत्यसंस्कार करण्यात आले. त्यांच्या पश्चात पत्नी, दोन मुले, सुना, नातू व भाऊ असा परिवार आहे. या घटनेमुळे मानमोडी परिसरात शोककळा पसरली असून शेतकऱ्यांनी अशा विद्युत यंत्रणांचा वापर करताना योग्य सुरक्षिततेची खबरदारी घेण्याची आवश्यकता निर्माण झाली आहे.