बीडमध्ये बीएसएनएल टॉवर वर चढून आंदोलन

बीड — लोकसभेतील विरोधी पक्षनेते राहुल गांधी यांनी आज पीडित मुलीची आई व मुंडे कुटुंबातील लोकांशी फोनवरून संवाद साधून त्यांचे सांत्वन केले. घाबरु नका आम्ही तुमच्या पाठीशी आहोत. संपदा मुंडे यांना न्याय मिळवून देण्यासाठी काँग्रेस पक्ष सरकारवर दबाव आणेल, असे आश्वासन त्यांनी दिले. राहुल गांधी यांनी संपदाच्या कुटुंबियांकडून व काँग्रेस प्रदेशाध्यक्ष हर्षवर्धन सपकाळ यांच्याकडून या प्रकरणाची संपूर्ण माहितीही घेतली.

काँग्रेस प्रदेशाध्यक्ष हर्षवर्धन सपकाळ यांनी आज बीड जिल्ह्यातील कवडगाव येथे जाऊन फलटण येथे आत्महत्या केलेल्या डॉ. संपदा मुंडे यांच्या कुटुंबियांची भेट घेऊन सांत्वन केले.याभेटीनंतर प्रसार माध्यमांशी बोलताना काँग्रेस प्रदेशाध्यक्ष म्हणाले की, डॉक्टर संपदा मुंडे यांच्यावर चुकीचे कामे करण्यासाठी प्रचंड दबाव आणला जात होता, त्यांचा प्रचंड छळ करण्यात आला. नाईक निंबाळकर यांच्या गुंडगिरीच्या अनेक घटना प्रकाशात आल्या आहेत. या घटनेतील कळस म्हणजे चौकशी करण्याआधीच मुख्यमंत्री देवेंद्र फडणवीस यांनी रणजितसिंह निंबाळकर यांना जाहिर क्लिन चिट देऊन टाकली हे संताप आणणारे आहे. या प्रकरणाची चौकशी फलटण बाहेर करावी, उच्च पदस्थ महिला अधिकाऱ्याची नेमणूक करावी अशी मागणी असून काँग्रेस पक्ष मात्र गप्प बसणार नसून डॉ. संपदा मुंडेला न्याय मिळवूण देण्यासाठी रस्त्यावर उतरेल. दिल्लीत कालच युवक काँग्रेसने आंदोलन केले आहे. महिला काँग्रेसही याप्रकरणी राज्यभर आंदोलन करेल, असे हर्षवर्धन सपकाळ म्हणाले.

काँग्रेस प्रदेशाध्यक्ष पुढे म्हणाले की, या प्रकरणी महिला आयोगाची भूमिकाही संताप आणणारी असून पीडित कुटुंबाला भेटून त्यांच्याकडून माहिती घ्यायला हवी होती पण त्यांनी आधी पोलीसांची भेट घेऊन सारवासारव करण्याचा प्रयत्न केला. महिला आयोगाने महिलांवर होणाऱ्या अन्यायाची दखल घेऊन काम करणे गरजेचे आहे पण त्यांनी तसे न करता पोलिसांची वकिली केली. डॉ. संपदा मुंडे ज्या समाजाची आहे त्या समाजातील एकही लोकप्रतिनिधी बोलत नाही. बीड जिल्ह्यात मध्यंतरी काही घटना झाल्या त्यावेळी येथील सत्ताधारी पक्षाचे एक आमदार दररोज प्रसार माध्यमासमोर येऊन भूमिका मांडत होते, आज ते गप्प आहेत. पंकजा मुंडे गप्प आहेत, त्यांनी मुख्यमंत्र्यांचा दबाव झुगारून बोलले पाहिजे. मुंबईतील एक सामाजिक कार्यकर्त्या अनेक विषयावर आक्रमक भूमिका घेत असतात त्यांनीही या विषयावर मौन बाळगलेले आहे. नारायण गड व भगवान गडाला आमचे साकडं आहे की त्यांनी या पीडित कुटुंबाला न्याय मिळावा यासाठी पुढे यावे, असे काँग्रेस प्रदेशाध्यक्ष यांनी म्हटले आहे.

बीडमध्ये बीएसएनएल टॉवरवर चढून आंदोलन

डॉ.संपदा मुंडे यांनी आत्महत्या केल्यानंतर राज्यात खळबळ उडाली आहे.डॉक्टर संपदा मुंडे यांना न्याय मिळावा यासाठी माऊली शिरसाठ,केशवतात्या तांदळे, मोहन आघाव यांनी बीड शहरात टॉवरवर चढून आज आंदोलन केले.बीडमध्ये डॉ. संपदा मुंडे यांना न्याय मिळावा या प्रकरणाची चौकशी करण्यासाठी एसआयटी स्थापन करावी आणि रणजित निंबाळकर यांच्यावर गुन्हा दाखल करावा तसेच रुपाली चाकणकर यांच्याकडून महिला आयोगाचा राजीनामा घ्यावा यासाठी आपण दोनशे फूटाच्या टॉवरवर चढून आंदोलन सुरू केले असे आंदोलकाचे म्हणणे होते.

चौसाळा —  येथील स्टेट बँक ऑफ इंडिया च्या शाखेमध्ये चौसाळा परिसरातील शेतकऱ्यांनी सर्व कागदपत्रांची पूर्तता करून खरीपाच्या पिकासाठी पीक कर्जाची मागणी केलेली आहे. परंतु सध्या खरिपाच्या पिकांची काढणी झाली तरी शेकडो शेतकऱ्यांना पिक कर्ज मिळालेले नसल्याने शिवशक्ती भीमशक्ती विचार मंचाचे प्रदेशाध्यक्ष बाळासाहेब मोरे पाटील हे २९ ऑक्टोबर बुधवार रोजी अमरण उपोषणाला बसले होते.
शिवशक्ती भीमशक्ती विचार मंचाचे प्रदेशाध्यक्ष बाळासाहेब मोरे पाटील यांनी याबाबत १४ ऑक्टोबर रोजी जिल्हा व्यवस्थापक, भारतीय स्टेट बँक क्षेत्रीय कार्यालय बीड, जिल्हा व्यवस्थापक अग्रणी बँक बीड व शाखा अधिकारी भारतीय स्टेट बँक चौसाळा तालुका बीड जिल्हा बीड यांना २९ ऑक्टोंबर रोजी अमरण उपोषण करणार असल्याचे लेखी निवेदन दिले होते. यावर वरील निवेदनाची तात्काळ दखल घेऊन जिल्हा अग्रणी बँकेचे अधिकारी यांनी चौसाळा येथील भारतीय स्टेट बँकेच्या शाखा अधिकारी यांना १५ ऑक्टोबर रोजी लेखी पत्र दिले होते. परंतु सदरील शाखा अधिकारी फनिकेश्वर कुंडा यांनी दखल न घेतल्याने बाळासाहेब मोरे पाटील हे चौसाळा येथील भारतीय स्टेट बँकेच्या समोर २९ ऑक्टोबर बुधवार रोजी उपोषणाला बसले होते.
यावेळी चौसाळा येथील स्टेट बँक ऑफ इंडियाचे शाखा अधिकारी फनिकेश्वर कुंडा व फिल्ड ऑफिसर यांनी आंदोलन कर्ते बाळासाहेब मोरे पाटील यांच्याशी चर्चा करून उपोषण मागे घेण्याची विनंती केली. व उर्वरित कर्ज प्रस्ताव पंधरा दिवसात निकाली काढण्याचे लेखी पत्र दिले. त्यानंतर शिवशक्ती भीमशक्ती मंचाचे प्रदेशाध्यक्ष बाळासाहेब मोरे पाटील यांनी उपोषण तात्पुरते मागे घेतले असून पंधरा दिवसात बँकेत कर्ज प्रस्ताव दाखल केलेल्या शेवटच्या शेतकऱ्यांना पीक कर्ज द्यावे पीक कर्ज वाटप न केल्यास पुन्हा बँकेच्या दारात अमरण उपोषणाला बसणार असल्याचे त्यांनी सांगितले.
सदरील आमरण उपोषणावेळी चौसाळा येथील राकाॅ ( शरद पवार ) गटाचे सतीश जोगदंड यांनी भेट दिली त्यांच्यासह परिसरातील शेतकरी पिंपळगाव घाटचे उपसरपंच संतोष तेलप, चंद्रकांत नाईकवाडे, प्रकाश गिरी, विशाल तेलप, सचिन तेलप, पांडुरंग आंधळे पाटील, सचिन शिंदे, अजिनाथ नाईकवाडे, बाळासाहेब सोनवणे, ज्ञानेश्वर नाईकवाडे पाटील, पंजाब नाईकवाडे, भीमराव शिंदे, व्यंकट चव्हाण, दत्तात्रय नागरगोजे आदी शेतकरी उपस्थित होते.

बीड. —  मराठवाड्यात पुन्हा पावसाने हाहाकार माजवायला सुरुवात केली आहे. थोडं फार हाताशी आलेलं सोयाबीन काढणी करून शेतात पडलेला आहे त्याची नासाडी होऊ लागली आहे ‌ फळ पिकांचे देखील मोठ्या प्रमाणावर नुकसान झाले असून रब्बी पेरणी लांबणीवर पडू लागली आहे गेल्या २४ तासांत विशेषतः मराठवाड्यातील छत्रपती संभाजीनगर, जालना, बीड, लातूर, परभणी या पाच जिल्ह्यातील ४० मंडळांत अतिवृष्टीची झाली आहे. लातूर जिल्ह्याच्या देवणी तालुक्यातील बोरोळ मंडळात सर्वाधिक १६३ मिलिमीटर पावसाची नोंद झाली आहे.

पुढील दोन दिवसात धुळे, नंदुरबार, जळगाव, छत्रपती संभाजीनगर जिल्ह्यात तुरळक ठिकाणी विजांच्या कडकडासह हलक्या ते मध्यम पावसाची शक्यता हवामान विभागाने वर्तवली आहे. पालघरमध्ये गुरुवारी सोसाट्याच्या वाऱ्यासह पावसाची शक्यता आहे.

छत्रपती संभाजीनगर जिल्ह्यातील चित्तेपिंपळगाव मंडळात, जालना जिल्ह्याच्या जालना तालुक्यातील विरेगाव, परतूर तालुक्यातील परतूर मंडळात अतिवृष्टी झाली आहे. बीड जिल्ह्याच्या अंबोजोगाई तालुक्यातील अंबाजोगाई, लोखंडी, घाटनांदूर, बर्दापूर, केज तालुक्यातील होळ, बनसारोळा, परळी तालुक्यातील परळी, नागपूर, लातूर जिल्ह्याच्या लातूर तालुक्याच्या लातूर, बाभळगाव, कासारखेडा मंडळात, अहमदपूर तालुक्यातील अहमदपूर, खंडाळी, किनगाव, अंधोरी, निलंगा तालुक्यातील निलंगा, निटूर, औराद, कासार बालकुंदा, अंबुलगा, हलगरा, भातांगळी मंडळात अतिवृष्टीची नोंद झाली आहे.

उदगीर तालुक्याच्या मोघा, हेर, तोंडार, झरी, रेणापूर तालुक्याच्या रेणापूर, पोहरेगाव, पानगाव, कारेपूर, पळशी, देवणी तालुक्यातील देवणी, बोरोळ, शिरूर अनंतपाळ तालुक्यातील हिसमाबाद, परभणी जिल्ह्याच्या गंगाखेड तालुक्यातील माखणी, पिंपळदरी मंडळात अतिवृष्टी झाली आहे.लातूर जिल्ह्यात मंगळवारी रात्री झालेल्या मुसळधार पावसाने खरीप पिकांचे नुकसान झाले. तर रब्बी पेरणीही खोळंबली आहे. येथील नदी, नाल्यांना पूर येऊन, नदीकाठच्या शेतपिकांचे नुकसान झाल्याचे दिसून आले आहे.