केज — ऊसतोड कामगाराच्या 15 वर्षीय अल्पवयीन मुलीच अपहरण करून मुलीच्या वडिलालाच तुमची मुलगी माझ्यासोबत आहे असं सांगितलं. या घटनेने खळबळ माजली आहे.
एका खेडेगावातील अल्पवयीन मुलीचे वडील ऊस वाहतूक करणाऱ्या वाहनावर चालक म्हणून काम करतात. शनिवार, दि. 1 नोव्हेंबर रोजी रात्री साडेआठ वाजण्याच्या सुमारास ही 15 वर्षीय मुलगी बेपत्ता झाली. मुलीच्या आई-वडिलांनी रात्री उशिरापर्यंत सर्व नातेवाईकांकडे तिचा शोध घेतला, पण ती कुठेही आढळली नाही.दरम्यान
रविवार, दि.2 नोव्हेंबर रोजी दुपारी 3 वाजण्याच्या सुमारास मुलीचे वडील केज येथे पाहुण्यांकडे मुलीचा शोध घेत असतानाच, गावातील ऊसतोड मजुरीचे काम करणाऱ्या अविवाहित तरुणाने त्यांना त्यांच्या मोबाईलवर कॉल केला. आरोपीने अत्यंत बेधडकपणे सांगितले, “तुमची मुलगी माझ्यासोबत आहे!” यावर मुलीच्या पित्याने घाबरून, “गुपचूप माझ्या मुलीला घरी आणून सोड,” अशी विनवणी केली. मात्र, आरोपी तरुणाने मुलीला कुटुंबाच्या ताब्यात देण्यास नकार दिला. या घटनेमुळे मुलीच्या वडिलांनी तातडीने रविवारी (दि. २) केज पोलीस ठाण्यात फिर्याद दिली.अल्पवयीन मुलीचे अपहरण करणाऱ्या आरोपी तरुणाविरुद्ध केज पोलिसात गुन्हा नोंद करण्यात आला आहे. पोलीस निरीक्षक स्वप्नील उनवणे यांच्या मार्गदर्शनाखाली पोलीस उपनिरीक्षक उमेश निकम हे अल्पवयीन मुलीचा आणि आरोपी तरुणाचा शोध घेत आहेत

नाशिक — माजी केंद्रीय मंत्री आणि भाजपचे ज्येष्ठ नेते रावसाहेब दानवे यांचा नातू शिवम मुकेश पाटील यांच्यासह आठ जणांवर तब्बल 10 कोटी रुपयांच्या फसवणुकीचा गंभीर गुन्हा दाखल झाला आहे.
नाशिक जिल्ह्यातील सातपूर पोलीस ठाण्यात दाखल झालेल्या या तक्रारीने राजकीय वर्तुळात खळबळ उडाली असून, भाजपच्या ‘प्रामाणिक’ प्रतिमेला धक्का बसला आहे. तक्रारदार स्वतः भाजपचे पदाधिकारी आणि उद्योगपती कैलास अहिरे असल्याने प्रकरणाला अधिक राजकीय रंग चढला आहे.

कैलास अहिरे हे नाशिकमधील सातपूर औद्योगिक वसाहतीत यशस्वी उद्योग चालवतात. २०१८ मध्ये रावसाहेब दानवे यांचे सहकारी गिरीश नारायण पवार आणि इतरांनी अहिरे यांच्याशी संपर्क साधला. मुंबईत दानवे यांची भेट घेतल्यावर त्यांनी आश्वासन दिले की, “मी मंत्री आहे, तुमच्या कंपनीला सरकारी कंत्राटे मिळवून देईन. कंपनीचा टर्नओव्हर २०० ते ५०० कोटी रुपयांपर्यंत वाढवून देईन. माझ्या नातूला तुमच्या व्यवसायात भागीदार करा.” दानवे यांच्या या बोलण्यावर विश्वास ठेवून अहिरे यांनी कंपनीतील १४ टक्के शेअर्स शिवम पाटील यांच्या गटाला देण्याचा २५ कोटी रुपयांचा करार केला.

सुरुवातीला सर्व काही सुरळीत वाटले. दानवे यांच्या सूचनेनुसार अहिरे यांनी दोन चेक प्रत्येकी ५० लाख रुपयांचे दिले. पण उर्वरित १० कोटी रुपये मिळाले नाहीत. शिवम पाटील आणि सहकाऱ्यांनी वारंवार आश्वासने दिली, पण पैसे कधीच हस्तांतरित झाले नाहीत. यानंतर अहिरे यांना संशय आला. कागदपत्रे तपासली असता, करारपत्रे बनावट आणि अपूर्ण असल्याचे उघड झाले. शिवम पाटील यांनी शेअर्स परस्पर त्यांच्या नावावर करून घेतले, पण बदल्यात काहीच दिले नाही. “तो मोठा माणूस असल्याने मी विश्वास ठेवला, पण नंतर फसवणूक झाल्याचे कळले,” असे अहिरे यांनी तक्रारीत नमूद केले आहे.

सातपूर पोलीस ठाण्यात दाखल गुन्ह्यात शिवम मुकेश पाटील व्यतिरिक्त गिरीश पवार, सतीश अग्रवाल, संजय कतीर, सुभाष कतीरा, कौस्तुभ लटके, धीरेंद्र प्रसाद आणि मंदार टाकळकर यांचा समावेश आहे. हे सर्वजण स्वतःला व्यापारी म्हणून सादर करत होते. भारतीय दंड संहितेतील (BNS) फसवणूक, विश्वासघात आणि आर्थिक अनियमिततेशी संबंधित कलमांतर्गत गुन्हा दाखल करण्यात आला आहे.

प्राथमिक चौकशीत पोलिसांना अनेक आर्थिक अनियमितता आढळल्या आहेत. बँक ट्रान्झॅक्शन, करार दस्तऐवज, ईमेल आणि संवादांच्या नोंदी तपासल्या जात आहेत. तपास अधिकारी म्हणाले, “प्रकरण जटिल आहे, पण लवकरच आरोपींना चौकशीसाठी बोलावले जाईल. यात सरकारी कंत्राटांच्या आमिषाचा वापर झाल्याचे दिसते.” सध्या कोणत्याही अटकेची माहिती नाही, पण तपासाचा व्याप्ती वाढवण्यात येत आहे.

बीड — स्थानिक गुन्हे शाखेच्या पथकाने छापा मारून तब्बल एक कोटी 37 लाख रुपयाचा 490 किलो गांजा शेतातून जप्त केला. ही कारवाई चकलांबा पोलीस ठाणे हद्दीतील धुमेगाव शिवारात करण्यात आली. याप्रकरणी पोलिसांनी आरोपीला अटक केली आहे.
गेवराई तालुक्यातील चकलांबा पोलीस ठाणे हद्दीत अवैध धंदे सुरू असले तरी त्याकडे ठाणे प्रमुखांकडून दुर्लक्ष होत आहे.परिणामी पोलिसांच्या नाकावर टिच्चून गांजा पिकवून त्याची सर्रास तस्करी केली जात असली तरी हप्ते खोरी पुढे कायदे धाब्यावर बसवण्याचं काम राजरोस सुरू आहे. दरम्यान
पोलीस अधीक्षक नवनीत काँवत यांनी जिल्हयातील सर्वच प्रकारचे अवैध धंद्यावर कारवाई करण्यासाठी स्थानिक गुन्हे शाखेचे पोलीस निरीक्षक शिवाजी बंटेवाड. यांना आदेश दिलेले आहे. त्या अनुषंगाने दि. 1नोव्हें. रोजी पोनि. शिवाजी बंटेवाड यांना गोपनिय माहिती मिळाली की, मौजे धुमेगाव शिवारातील पिराचे शेतात नारायण मगर याने त्याचे आर्थीक फायद्यासाठी बेकादेशीररित्या अंमली पदार्थ गांजाच्या झाडाची लागवड केलेली आहे. त्यावरून ही माहिती पोलीस अधीक्षक, बीड व उपविभागीय पोलीस अधिकारी गेवराई यांना कळवुन त्यांनी कारवाई करण्याचे आदेश दिल्याने पो.नि. शिवाजी बंटेवाड व प्रभारी अधिकारी पो.स्टे. चकलांबा यांचे संयुक्त पथक मौजे धुमेगाव शिवारातील पिराचे शेताजवळ गांजाची लागवड केलेल्या नारायण मगर यांचे शेतामध्ये छापा टाकला असता कापसाच्या पिकाच्या शेतामध्ये काही ठराविक ज्ञअंतरावर गांजाच्या झाडाची लागवड केल्याचे दिसुन आले. शेत मालक नारायण शेषेराव मगर वय 44 वर्षे व्य. शेती, रा. धुमेगाव ता. गेवराई यांना विचारपुस केली असता त्याने सदर गांजाचे झाडे लागवड केल्याचे सांगितले. तसेच सदर शेताचे शेजारी असलेल्या परिसराची पाहणी केली असता तेथे आरोपी सुरेश सर्जेराव मगर याच्या शेतात देखील गांजाची झाडे मिळून आली. त्यावरुन सदर दोन्ही शेतातील सर्व गांजाच्या झांडाचा सविस्तर पंचनामा करुन आरोपी नारायण शेषेराव मगर याचे गट क्र. 109 मध्ये 44 गांजाची झाडे वजन 153.15 ग्राम याचे अंदाज किंमत 42 लाख 88 हजार 200 रू. व आरोपी नामे सुरेश सर्जेराव मगर याचे मालकीचे शेतामध्ये 131 गांजाची झाडे वजन 337.55. ग्राम कि.अं. 94लाख 51 हजार 400 असा एकुण 490.70 किलो ग्राम वजनाचा गांजा 1 कोटी 37 लाख39 हजार 600  रु अंमली पदार्थ गांजाचा मुद्देमाल मिळुन आला. आरोपी नारायण शेषेराव मगर रा. धुमेगाव ता. गेवराई याला ताब्यात घेण्यात आले असून दोन आरोपी विरुध्द पो.स्टे. चकलांबा गुरनं 376/2025 कलम 8 (ब), 20 (ब), 20 (ब) (1), 20 (ब) (2) गुंगीकारक औषधीद्रव्य आणि मनोव्यापारावर परिणाम करणारे पदार्थ अधिनियम 1985 अन्वये आज गुन्हा दाखल करण्यात आला. ही कारवाई पोलीस अधीक्षक नवनीत काँवत अप्पर पोलीस अधीक्षक सचिन पांडकर, उपविभागीय पोलीस अधिकारी अनिल कटके यांच्या मार्गदर्शनाखाली पोलीस निरिक्षक  शिवाजी बंटेवाड (स्थागुशा), सपोनि गडवे, स्थागुशा पथकातील  गोविंद राख, अंकुश वरपे, विकास राठोड, युनूस बागवान, सुनिल राठोड तसेच चकलांबा पो.स्टे.चे पोना कैलास गुजर व अंमलदार व महसुल विभागाचे चकलंबा मंडळ अधिकारी व तलाठी यांनी मिळुन केली आहे.

सातारा — फलटण उपजिल्हा रुग्णालयातील महिला डॉक्टर आत्महत्या प्रकरणाचा तपास करण्यासाठी राज्य सरकारने विशेष तपास पथक म्हणजेच SIT ची स्थापना करणार असल्याची घोषणा केली होती. 24 ऑक्टोबर रोजी समोर आलेल्या या प्रकरणात आतापर्यंत दोन आरोपींना पोलिसांनी ताब्यात घेतले आहे. दरम्यान या प्रकरणाचा तपास आयपीएस तेजस्वी सातपुते यांच्या नेतृत्वाखाली एस आय टी करणार आहे.

फलटणच्या उपजिल्हा रुग्णालयात कार्यरत महिला डॉक्टरने 23 ऑक्टोबर रोजी आत्महत्या केली होती. तिने तळहातावर लिहिलेल्या सुसाईड नोटमध्ये पोलीस उपनिरीक्षक गोपाळ बदने आणि प्रशांत बनकर यांचे नाव लिहिले होते. दोन्ही आरोपींना पोलिसांनी अटक केली. त्यनंतर या प्रकरणामध्ये अनेक महत्त्वाच्या आणि मोठ्या नावांचा समावेश असल्याने पीडित डॉक्टरच्या कुटुंबासह विरोधकांनी सातत्याने या आत्महत्येच्या घटनेची एसआयटी चौकशी मागणी करण्यात येत होती. सातारा पोलिसांकडून या प्रकरणाचा तपास झाल्यास त्यांच्यावर राजकीय दबाव येण्याची शक्यता असल्याने नि:पक्ष तपासासाठी विशेष तपास पथक नेमणे आवश्यक आहे, असे विरोधक म्हणत होते.

एका प्रकरणात महिला डॉक्टरने आपल्या तक्रारीमध्ये वरिष्ठांचा आणि पोलिसांचा दबाव असल्याचे नमूद केले होते. शवविच्छेदन अहवाल बदलण्यासाठी खासदाराचे सहाय्यक दबाव टाकत असल्याचा उल्लेख तिने केला होता. पण, पोलीस आणि आरोग्य अधिकाऱ्यांनी तिच्या तक्रारीकडे दुर्लक्ष केले. याच दबावामुळे तिने शेवटी आत्महत्या केल्याचा संशय विरोधकांनी यावेळी व्यक्त केला होता. दरम्यान, या प्रकरणात शिवसेना उद्धव बाळासाहेब ठाकरे पक्षाच्या उपनेत्या सुषमा अंधारेंनी भाजपचे माजी खासदार रणजितसिंह निंबाळकर यांचे नाव घेतले आहे. फलटणमधील अनेक घटना निंबाळकर आणि त्यांच्या लोकांच्या हस्तक्षेपामुळे घडत असल्याचा दावा सुषमा अंधारे यांनी केला होता. असे असताना संबधित प्रकरणाचे गांभीर्य आणि संवेदनशीलता लक्षात घेऊन मुख्यमंत्री देवेंद्र फडणवीस यांनी नुकतेच पोलीस महासंचालकांना एसआयटी स्थापन करण्याचे निर्देश दिले​​​​​​​ होते. अखेर एसआयटी स्थापन करण्यात आली असून IPS तेजस्वी सातपुते यांच्या नेतृत्वात तपास करण्यात येणार आहे. तेजस्वी सातपुते या 2012 मधील आयपीएस अधिकारी आहेत. त्यांनी यापूर्वी सातारा तसेच सोलापूर जिल्ह्यांमध्ये पोलीस अधीक्षक म्हणून काम केले आहे.

केज — महिलांच सक्षमीकरण व्हावं यासाठी गावोगाव बचत गटाची संकल्पना राबविण्यात आली‌.याच बचत गटांना अल्प व्याजदराने कर्ज देणाऱ्या एका फायनान्स कंपनीच्या क्षेत्रीय अधिकाऱ्याने महिला बचत गटांकडून वसूल केलेली कर्जाच्या रक्कम हडपल्याचा खळबळ जनक प्रकार समोर आला आहे. 79 महिलांकडून तब्बल 16 लाखांपेक्षा अधिकची रक्कम वसूल केली मात्र ती कंपनीच्या खात्यावर जमा केलीच नाही.
केज येथील भारत फायनान्शियल इनक्ल्यूजन लि. या कंपनीच्या शाखेत अरबाज रशीदखाँ पठाण वय 27 वर्ष, रा. अजीजपुरा, केज हा फिल्ड ऑफिसर म्हणून काम करत होता.त्याने 23 ऑगस्ट2023 ते 3 मे 2024 या कालावधीत केज तालुक्यातील महिला बचत गटांना दिलेल्या कर्जाची परतफेड म्हणून 79 महिलांकडून हप्त्यापोटी 16 लाख 9 हजार 863 एवढी रक्कम गोळा केली. मात्र, स्वतःकडे जमा करून घेतलेली रक्कम अरबाज पठाण याने कंपनीच्या खात्यावर जमाच केली नाही. या रकमेवर अरबाजने डल्ला मारल्याचे
फायनान्स कंपनीच्या वरिष्ठ अधिकाऱ्यांच्या लक्षात आले.
महिला बचत गट प्रामाणिकपणे वेळेवर हप्त्यांची परतफेड करत असताना, अरबाज पठाणने मात्र या पैशांचा अपहार करून कंपनीची फसवणूक केली. केज येथील कंपनीचे शाखाधिकारी श्रीहरी मुळे यांनी बुधवारी 29 ऑक्टोबर रोजी याप्रकरणी केज पोलीस ठाण्यात फिर्याद दिली. फिर्यादीवरून, फिल्ड ऑफिसर अरबाज रशीदखाँ पठाण याच्या विरुद्ध फसवणुकीचा कलम 406, 420 अन्वये गुन्हा दाखल करण्यात आला आहे. पोलीस निरीक्षक स्वप्नील उनवणे यांच्या मार्गदर्शनाखाली सहाय्यक पोलीस निरीक्षक संदीप मांजरमे हे या प्रकरणाचा पुढील तपास करत आहेत.