बीड — मस्साजोगचे सरपंच संतोष देशमुख यांचे अपहरण करण्यासाठी त्यांचं लोकेशन देणारा मस्साजोग येथीलच सिद्धार्थ सोनवणे याच्या स्थानिक गुन्हे शाखा पोलिसांनी काल कल्याण (मुंबई) येथून एका उसाच्या गाडीवर काम करत असताना मुसक्या आवळल्या आहेत. त्यामुळे संतोष देशमुख हत्या प्रकरणाचा आता पूर्णपणे उलगडा होण्यास मदत होणार आहे.

केज तालुक्यातील मस्साजोग येथील सरपंच संतोष देशमुख यांचे अपहरण करून हत्या केल्याच्या घटनेने जिल्ह्यासह राज्याला हादरवून सोडले होते.या हत्या प्रकरणातील फरार प्रमुख आरोपी सुदर्शन घुले व सुधीर सांगळे या दोघांनाही बीडच्या पोलिसांनी शुक्रवारी (दि.३) रात्री पुण्यातून ताब्यात घेतले आहे. तर या आरोपींना सरपंचाचे अपहरण करण्यापूर्वी लोकेशन देणारा मस्साजोग गावातीलच सिद्धार्थ सोनवणे याला देखील मुंबईतून बेड्या ठोकल्या आहेत. ही कारवाई स्थानिक गुन्हे शाखेच्या पथकाने केली. यापूर्वीच जयराम चाटे, महेश केदार, प्रतीक घुले यांना अटक केली आहे. तर तर पुरवणी जबाब आवरून विष्णू चाटे यांना देखील अटक करण्यात आलेली होती. सध्या या प्रकरणात कृष्णा आंधळे हा फरार आहे.
दरम्यान संतोष देशमुख यांची हत्या झाल्यानंतर सिद्धार्थ सोनवणे हा गावातच होता. मयत देशमुख यांच्या अंत्यविधीला देखील तो उपस्थित होता. स्थानिक गुन्हे शाखेचे पोलीस सुरुवातीला आरोपींचा तपास करत असताना त्यांनी आपले लक्ष गावातच केंद्रित केलेले होते. अपहरण करण्यापूर्वी कोणीतरी जवळचा व्यक्ती लोकेशन देत असावा असा संशय पोलिसांना होता. लोकेशन देणाऱ्यांचा पोलीस शोध घेत असल्याची कुणकूण सिद्धार्थ सोनवणे याला लागली होती. घटनेच्या दोन दिवसानंतर तो देखील गावातून फरार झाला.
सिद्धार्थ सोनवणे फरार झाल्यानंतर त्याच्या संदर्भातील गोपनीय माहिती स्थानिक गुन्हे शाखेच्या पोलिसांनी मिळवण्यास सुरुवात केली. त्यानंतर सिद्धार्थ हा देखील या गुन्ह्यात सहभागी असल्याची खात्री स्थानिक गुन्हे शाखा पोलिसांना पटली. त्यानंतर 15 दिवसांपासून त्याचा शोध सुरू होता.
सिद्धार्थ सोनवणे हा फरार झाल्यानंतर मुंबईत लपून बसला होता. त्याने या काळात वेगवेगळी पाच सिम कार्ड देखील वापरली होती. स्थानिक गुन्हे शाखा पोलिसांना त्याचे मुंबईतील लोकेशन मिळताच त्या ठिकाणी त्यांनी सापळा लावला. एका मोकळ्या पटांगणात उसाच्या गाड्यावर काम करत असतानाच पोलिसांनी त्याच्यावर झडप मारली.
दरम्यान ही कामगिरी पोलीस अधीक्षक नवनीत काँवत, स्थानिक गुन्हे शाखेचे पोलिस निरीक्षक उस्मान शेख यांच्या मार्गदर्शनाखाली पीएसआय महेश विघ्ने, तुळशीराम जगताप, विकास वाघमारे, भागवत शेलार, गणेश मराडे, विक्की सुरवसे यांनी केली.

बीड — सरपंच संतोष देशमुख हत्या प्रकरणात फरार असलेल्या तीन आरोपी पैकी सुदर्शन घुले व सुधीर सांगळे या दोघांना एस पी च्या विशेष पथकाने पुण्यातून ताब्यात घेण्यात यश मिळवले आहे.

खंडणी व संतोष देशमुख हत्या प्रकरणातील आरोपी पकडण्यात पोलिसांना 25 दिवस उलटून गेल्यानंतर देखील अपयश येथे असल्याने जनतेतून संताप व्यक्त होत होता. परिणामी पोलिसांनी दोन दिवसापूर्वी सापडत नसलेल्या आरोपींना फरार घोषित करून माहिती देण्याचे आवाहन जनतेला केले होते. दरम्यान राज्यभरातून आरोपींच्या अटकेची मागणी होत आहे. या प्रकरणातील तीन आरोपी यापूर्वी पोलिसांनी पकडले होते तर वाल्मीक कराड याने सीआयडी समोर आत्मसमर्पण केले. त्यानंतर मसाजोग ग्रामस्थांनी जलसमाधी आंदोलन केले असता आरोपींना दहा दिवसात जेरबंद करण्यात येईल असं बीडचे पोलीस अधीक्षक नवनीत कावत यांनी आश्वासन दिलं होतं. दरम्यान या प्रकरणातील प्रमुख आरोपी असलेला सुदर्शन घुले आणि सुधीर सांगळे या दोघांना पोलिसांच्या विशेष पथकाने पुण्याजवळ ताब्यात घेतले आहे. दोन्ही आरोपींना पुढील तपासासाठी सीआयडीच्या ताब्यात देण्यात येणार आहे. या प्रकरणातील आरोपी पैकी कृष्णा आंधळे हा अद्यापही पोलिसांच्या हाती लागलेला नाही.

पुणे — सरपंच संतोष देशमुख यांच्या हत्या प्रकरणात चर्चेत असलेली आरोपी वाल्मिक कराड आज पुण्यात शरण आले आहेत. पुण्याच्या सीआयडी कार्यालयात येऊन त्यांनी स्वत: आत्मसमर्पण केले.

विशेष म्हणजे या घटनेच्या काही तासांपुर्वी त्यांनी एक व्हिडिओ संदेश जारी केला होता. या व्हिडिओत त्यांनी पुण्याच्या सीआयडी कार्यालयात आत्मसमर्पण केलं.त्यानंतर ते सीआयडी कार्यालयात दाखल झाले होते.या संबंधित आत्मसमर्पणाचा व्हिडिओ देखील समोर आला आहे.
सीआयडीला शरण जाण्यापुर्वी वाल्मिक कराडने एक व्हिडिओ जारी केला होता. या व्हिडिओत वाल्मिक कराड केज पोलिस स्टेशनला खोटी खंडणीची फिर्याद दाखल झाल्यामुळे मला अटकपुर्वचा अधिकार असताना मी सीआयडी ऑफिस पुणे पाशाण रोड येथे सरेंडर होत, अशी त्यांनी सूरूवातीला माहिती दिली. त्यानंतर संतोष भैय्या देशमुख यांच्या जे कुणी मारेकरी असतील त्यांना अटक करावी आणि फाशीची मागणी द्यावी,अशी कराड यांनी मागणी केली. आणि राजकीय द्वेषापोटी माझे नाव त्याच्याशी जोडले जातं आहे. तरी पोलीस तपासात मी दर दोषी आढळलो तर न्यायदेवता जी शिक्षा देईल ती भोगायला तयार आहे, असे शेवटी वाल्मिक कराडने सांगितले.

संतोष देशमुख हत्या प्रकरणात वाल्मिक कराडचे नाव समोर आले. विरोधकांनी सातत्याने कराडवर टीका केली. कराड हा मंत्री मुंडे यांचा निकटवर्तीय असल्याचा आरोप करण्यात आला होता. प्रकरण आणखीच तापल्यानंतर वाल्मिक कराड गायब झाला होता. त्याचा कसून शोध घेतला जात होता. अखेर वाल्मिक कराडने आज शरणागती पत्करली.संतोष देशमुख आतापर्यंत चार आरोपीला अटक करण्यात आली होती. तर तीन आरोपी फरार होते. या प्रकरणाचा तपास सीआयडी करत असून गेल्या 4 दिवसांपासून सीआयडीचे वरिष्ठ अधिकारी जिल्ह्यात तळ ठोकून आहेत. या प्रकरणाचा मास्टरमाईंड म्हणून वाल्मिक कराडचे नाव घेतले जात आहे. सीआयडीने वाल्मिक कराडच्या भोवती तपासाचा फास आवळला. संतोष देशमुखांची हत्या झाल्यानंतर वाल्मिक कराडचे नाव घेऊन आरोप होऊ लागले होते. सीआयडीने आपल्या वाल्मिक कराडच्या निकटवर्तीयांची कसून चौकशी सुरू केली होती.

बीड — संतोष देशमुख हत्या प्रकरण 9 डिसेंबरला घडल्यानंतर वाल्मीक कराड फरार असून शेवटचं लोकेशन उज्जैन पोहचला होता. त्याने उज्जैनच्या महाकाल मंदिराबाहेर काढलेला फोटोही त्याच्या फेसबुक अकाऊंटवरून शेअर केला आहे. विशेष म्हणजे यावेळी त्याचे अंगरक्षक असलेले पोलीस कर्मचारीही त्याच्यासोबत होते. दरम्यान वाल्मीक कराड वर तब्बल 26 गुन्हे नोंद असूनही पोलीस अंगरक्षक असल्याने नव्या चर्चेला तोंड फुटले आहे.
संतोष देशमुख हत्येनंतर व खंडणी प्रकरणाचे सीआयडी या धागेदोरे खंगाळत आहे. याच प्रकरणातील फरार आरोपी वाल्मिक कराडवर तब्बल 26 गुन्ह्यांची नोंद असूनही पोलिस संरक्षणात असल्याने भूवया उंचावल्या आहेत. तसेच, कराडला दोन पोलिस अंगरक्षक देखील आहेत. बीड पोलीस अधीक्षकांनी जिल्हाधिकाऱ्यांना पाठवलेला अहवालामध्ये ही माहिती नमूद आहे. बीड जिल्ह्यामध्ये विद्यमान आमदारांपैकी सुरेश धस, विजयसिंह पंडित, नमीता मुंदडा यांना अद्याप अंगरक्षक नाहीत.तर अमरसिंह पंडित, भीमराव धोंडे, प्रकाश सोळंके, पंकजा मुंडे, जयदत्त क्षीरसागर, राम खाडे, बजरंग सोनवणे, मयत सरपंच यांचे भाऊ धनंजय देशमुख, संदीप क्षीरसागर यांना एक पोलिस अंगरक्षक आहे. धनंजय मुंडे, सुभाष राऊत यांना प्रत्येकी दोन अंगरक्षक आहेत.दरम्यान, राज्याचे मुख्यमंत्री देवेंद्र फडणवीस यांनी फरार आरोपींची संपत्ती जप्त करण्याचे आदेश दिले आहेत. या कारवाईमुळे वाल्मिक कराड लवकरच पोलिसांसमोर शरण येण्याची शक्यता वर्तवली जात आहे.

बीड — सध्या राज्यात गाजत असलेल्या संतोष देशमुख हत्या प्रकरणातील आरोपींना वीस दिवस उलटून गेले असले तरी पकडण्यात यश आले नाही. मयत संतोष देशमुख यांचे बंधू धनंजय देशमुख यांनी आज सीआयडी अधिकाऱ्यांची भेट घेतली असता दोन दिवसात फरार आरोपी गजाआड करण्यात येतील असा विश्वास सीआयडीच्या वरिष्ठ अधिकाऱ्यांनी दिला असल्याची माहिती विश्वसनीय सूत्रांनी दिली आहे.

सरपंच संतोष देशमुख यांची हत्या झाल्यानंतर सीआयडी या प्रकरणाचा तपास करत आहे. या प्रकरणाचे धागेदोरे मिळवण्यासाठी सीआयडीची पथक बारकाईने लक्ष ठेवून आहेत. अनेक महत्त्वाचे पुरावे देखील सीआयडीच्या हाती सापडले आहेत. दरम्यान मयत संतोष देशमुख यांचे बंधू धनंजय देशमुख यांनी आज सीआयडी कार्यालयात जाऊन तपास कुठपर्यंत आला आहे या संदर्भातली माहिती घेण्याचा प्रयत्न केला. उद्या सीआयडी चे अधिकारी केज मध्ये जाऊन धनंजय देशमुख यांना तपासाची माहिती देणार असल्याचे सूत्रांनी सांगितले. या भेटीदरम्यानच या गुन्ह्यातील फरार आरोपींना दोन दिवसात पकडून गजाआड केले जाईल असा विश्वास सीआयडीच्या वरिष्ठ अधिकाऱ्यांकडून देण्यात आला असल्याची माहिती देखील मिळत आहे. धनंजय देशमुख यांनी सीआयडी करत असलेल्या तपासावर आपला विश्वास असल्याचं मत माध्यमांशी बोलताना व्यक्त केला. याच प्रकरणावरून सामाजिक कार्यकर्त्या अंजली दमानिया तसेच खासदार बजरंग सोनवणे आमदार सुरेश धस यांनी पोलीस अधीक्षक नवनीत कांवत यांची भेट घेतली.

बीड — सरपंच संतोष देशमुख हत्या प्रकरणामूळे वातावरण सध्या तापलेले आहे. बीडच्या रस्त्यावर जनतेच्या असंतोषाचा आक्रोश पाहायला मिळाला. दरम्यान हे प्रकरण सीआयडी कडे गेल्यानंतर फरार आरोपी वाल्मीक कराड सह चारही आरोपींचे बँक खाते सीज करण्यात आले आहे. संपत्ती जप्तीची कारवाई सीआयडीने सुरू केली असून संतोष देशमुख यांना चार वेगवेगळ्या ठिकाणी मारहाण झाल्याचे तपासातून उघड झाल्याची माहिती विश्वसनीय सूत्रांकडून मिळत आहे.

शनिवारी बीडच्या रस्त्यावर संतोष देशमुख हत्याप्रकरणी न्यायासाठी जनतेचा आक्रोश पाहायला मिळाला. जनक्षोभ लक्षात घेता मुख्यमंत्री देवेंद्र फडणवीस यांनी खंडणी व देशमुख हत्या प्रकरणातील आरोपींच्या मालमत्ता जप्तीची कारवाई करण्याच्या आदेश सीआयडीला दिले. यानुसार सीआयडीने वाल्मीक कराडसह फरार असलेल्या चारही आरोपींचे बँक खाते सिज करून संपत्ती जप्तीची कारवाई सुरू केली आहे. खून व खंडणी प्रकरणाचा तपास सीआयडी ची नऊ पथक सध्या करत असून जवळपास दीडशे अधिकारी व कर्मचारी ही जबाबदारी संभाळत आहे. सीआयडीने आतापर्यंत केलेल्या तपासात संतोष देशमुख खून झाला त्यावेळी वापरण्यात आलेल्या गाडीतील बोटांचे ठसे आरोपींच्या बोटांच्या ठशाशी मॅच झाले आहेत. दरम्यान गुन्हा करताना वापरण्यात आलेल्या गाडीत सापडलेल्या दोन मोबाईल मधील डाटा रिकव्हर करण्यात सीआयडी ला यश आले आहे. तसेच संतोष देशमुख यांचा खून केल्यानंतर आरोपींनी एका मोठ्या राजकीय नेत्याची संपर्क साधल्याची बाब देखील तपासात उघडकीस आल्याची माहिती मिळत आहे. संतोष देशमुख यांना मारहाण करताना आरोपींनी केलेल्या चित्रीकरणातून देशमुख यांना चार वेगवेगळ्या ठिकाणी नेऊन मारहाण केली असल्याची बाब उघडकिस आली आहे. सीआयडी ची पथक फरार आरोपींचा तपास राज्यासह देशभरात सध्या करत आहे. आरोपींच्या संपत्ती जप्ती सोबतच त्यांनी देशाबाहेर पलायन करू नये यासाठी पासपोर्ट रद्द करण्याची कारवाई सुरू केली असल्याची माहिती देखील विश्वसनीय सूत्रांनी दिली आहे.

बीड — सरपंच संतोष देशमुख हत्या प्रकरणावरून आज निघालेल्या आक्रोश मोर्चात जितेंद्र आव्हाड देखील सहभागी झाले होते. दरम्यान धनंजय मुंडे यांच्या नावाचा उल्लेख असलेला एक व्हाट्सअप चा स्क्रीन शॉट समाज माध्यमांवर फिरत आहे. यावर अजित वर गटातील नेत्यांनी जितेंद्र आव्हाड यांच्यावर जोरदार टिका केली आहे.

https://x.com/Awhadspeaks/status/1872966371652583486

जितेंद्र आव्हाड यांचा फोटो असलेला एक व्हाट्सअपचा स्क्रीन शॉट फिरत आहे. यामध्ये त्यांनी बीड जिल्ह्यात जाण्यापूर्वी एका अनोळखी व्यक्तीशी संवाद साधला आहे. त्या व्यक्ती त्या या स्क्रीन शॉटमध्ये धक्कादायक शब्दांचा उल्लेख करत धनंजय मुंडे तसेच इतर नेत्यांवर नेत्यांचा उल्लेख केला आहे. यावरूनच आता अजित पवार गटातील अमोल मिटकरी, सुरज चव्हाण तसेच इतर नेत्यांनी जितेंद्र आव्हाड यांच्यावर जोरदार टीका करत हे स्क्रीन शॉट अपलोड केला आहे.

दरम्यान, जितेंद्र आव्हाड यांनी या स्क्रीनशॉट फेक असल्याचा म्हटले आहे. तसेच माझ्या आजच्या बीड मधील भाषणांनी धनंजय मुंडेंचे कार्यकर्ते फार बिथरले आहेत. त्यांना सत्य पचना म्हणून माझ्या नावाचे फेक स्क्रीन शॉट बनवले आहेत. तरी माझी सायबर पोलिसांकडे तक्रार आहे की हा स्क्रीन शॉट कोणी बनवलाय त्याची पाळले मुळे शोधून काढा अशी विनंती जितेंद्र आव्हाड यांनी केले.

बीडचे रहिवाशी शिवराज बांगर यांच्यासोबतचे न केलेले चॅट माॅर्फ करून वायरल करण्यात आले. त्यात महत्वाची भूमिका राष्ट्रवादी काँग्रेस-अजित पवार गटाच्या ॲड. रूपाली ठोंबरे यांची आहे. हास्यास्पद आहे की, एक ज्येष्ठ वकील असूनदेखील सत्य – असत्य न तपासता त्यांनी हा माॅर्फ केलेला चॅट वायरल केला. ३ वाजून ०७ मिनिटांनी भाषण संपले आणि ३ वाजून २६ मिनिटांनी हा चॅट या भूमीवर अवतरला. मला समजतच नाही की, जर गुन्हा केलाच नाही तर एवढे अस्वस्थ का होतात? कर नाही तर डर कशाला? असो, बीड शहरातील शिवाजी नगर पोलीस स्टेशनमध्ये वरिष्ठ पोलीस निरीक्षक श्री. खेडकर यांना भेटून मी, संदीप क्षीरसागर, राजेश देशमुख, सातपुते आणि शिवराज बांगर यांनी गुन्हा नोंदविलेला आहे. ज्या शिवराज बांगरचा चॅट दाखविला गेलेला आहे. तो फेक असून पोलिसांनी या विरोधात कारवाई करावी अशी मागणी करण्यात आली आहे.