बीड —  जिल्ह्यातील गुन्हेगारीने कळस गाठला असून आणखी एक हत्या झाल्यानंतर खळबळ माजली आहे.या हत्याप्रकरणाचा तपशील लक्ष वेधून घेणारा आहे. बीड जिल्ह्यातील शिरसाळा परिसरानजीक कान्हापूर गावात जुन्या वादातून स्वप्नील उर्फ बबलू देशमुख याची हत्या करण्यात आली. ही हत्या पूर्ववैमनस्यातून झाल्याचे समजते.
बीडच्या धारुर तालुक्यातील कान्हापूर हे गाव शिरसाळाजवळ येते. येथील स्वप्नील उर्फ बबलू देशमुखचा दगडाने ठेचून खून करण्यात आला. दोन वर्षांपूर्वी स्वप्निल देशमुख याच्या त्रासाला कंटाळून गावातीलच किराणा दुकानदार अविनाश देशमुख यांनी मार्च 2023 रोजी गळफास घेऊन आत्महत्या केली होती. याप्रकरणी पोलिसांनी बबलू देशमुख याच्यावर कलम 306, कलम 504, कलम 506, कलम 34 अंतर्गत गुन्हा दाखल होता. हा गुन्हा मागे घेण्यासाठीच संतोष देशमुख यांच्यावर आरोपी स्वप्नीलकडून वारंवार दबाव आणला जात होता. या त्रासाला कंटाळून संतोष देशमुख आणि त्यांची पत्नी सोनाली देशमुख यांनी बबलू देशमुख याच्यावर हल्ला करुन त्याला संपवले.
या हल्ल्यात संतोष देशमुख आणि त्याची पत्नी सोनाली देशमुख हे दोघेही गंभीर जखमी झाले आहेत. त्यांच्या पाठीवर बबलू देशमुख याने वार केले आहेत. पोलिसांनी या घटनेत वापरण्यात आलेली गुप्ती घटनास्थळावरुन जप्त केली आहे. बबलूची हत्या केल्यानंतर संतोष देशमुख आणि सोनाली देशमुख दोघेही स्वत: पोलीस स्टेशनमध्ये हजर झाले. त्यांनी पोलिसांत स्वप्निल देशमुख विरोधात फिर्याद दाखल केली. विशेष म्हणजे ज्या झाडाला लटकून अविनाश देशमुख यांनी गळफास घेऊन आत्महत्या केली होती, त्याच झाडाखाली संतोष देशमुख यांनी बबलू देशमुख याची हत्या केली. या घटनेमुळे बीड जिल्ह्यात खळबळ उडाली आहे.

बीड — जिल्हा कारागृहात कैद्यांमध्ये मारामारीची घटना घडली.सुदर्शन घुले आणि वाल्मीक कराडला महादेव गीते आणि अक्षय आठवलेने मारहाण केल्याची चर्चा होती.मात्र, असा प्रकार घडला नाही. सुदीप सोनवणे आणि राजेश वाघमोडे यांच्यात झटापट झाली. परंतू, सुरक्षा रक्षकांनी तातडीने त्यांना वेगळे केले, असा खुलासा कारागृह प्रशासनाने केला आहे. दरम्यान सायंकाळी महादेव गीते याच्यासह चार बंदींना हार्सुल कारागृहात हलवण्यात आले.

बीड जिल्हा मध्यवर्ती कारागृहात वाल्मीक कराड, सुदर्शन घुले, सुधीर सांगळे, जयराम चाटे, महेश केदार, प्रतिक घुले हे न्यायालयीन कोठडीत आहेत. याबरोबरच बापु आंधळे खून प्रकरणातील आरोपी महादेव गीते, मुकूंद गिते, राजाभाऊ नेहरकर, राजेश वाघमोडे हे देखील याच कारागृहात आहेत. याबरोबरच बनावट नोटा प्रकरणातील आरोपी अक्षय आठवले हा देखील याच ठिकाणी आहे. सोमवारी सकाळी महादेव गीते व अक्षय आठवले याने मिळून सुदर्शन घुले याला मारहाण केली तसेच वाल्मीक कराडला देखील मारहाण केल्याची माहिती समोर आली होती. यानंतर दुपारी कारागृह प्रशासनाने याबाबत स्पष्टीकरण देत सुदीप सोनवणे व राजेश वाघमोडे यांच्यात झटापट झाली परंतु सुरक्षा रक्षकांनी वेळीच हस्तक्षेप केल्याचे कारागृह प्रशासनाने म्हटले आहे. दरम्यान, सायंकाळच्या सुमारास महादेव गीते, राजाभाऊ नेहरकर, मुकूंद गिते, राजेश वाघमोडे या चार जणांना हर्सुल कारागृहात हलवण्यात आले आहे.
एकीकडे वाल्मीक कराड व सुदर्शन घुले याला मारहाण झाल्याची चर्चा होत असताना दुसरीकडे महादेव गीते याच्यासह अन्य चार कैद्यांना छ.संभाजीनगरच्या हार्सुल कारागृहात हलवण्यात आले. त्यांना कारागृहाबाहेर आणण्यात आल्यानंतर उपस्थित काही जणांसमोर त्यांनी आम्हाला वाल्मीक कराड याच्या सांगण्यावरुन मारहाण होत असून कारागृहातील सीसीटीव्ही चेक करा, अशी मागणी केल्याचा व्हिडीओ व्हायरल झाला आहे. एकंदरच या सर्व प्रकारामुळे जिल्हा कारागृहाची लक्तर टांगली गेली आहेत.

बीड — जिल्हा कारागृहात वाल्मिक कराड आणि सुदर्शन घुले आहेत, त्याच जेलमध्ये राडा झाला आहे. या भांडणांमध्ये वाल्मिक कराडसह सुदर्शन घुलेला मारहाण झाल्याची माहिती आहे.
जेल प्रशासनाने याबाबत अद्याप कुठलीही माहिती दिलेली आहे. मात्र वाल्मिक कराडला महादेव गित्ते आणि अक्षय आठवले या दोघांकडून मारहाण झाल्याची माहिती मिळत आहे. दोन गटात राडा झाला त्यामुळे जेलमध्ये तणावाचं वातावरण निर्माण झालेलं आहे.

महादेव गित्ते आणि अक्षय आठवले यांना वाल्मिक कराडने खोट्या गुन्ह्यामध्ये अडकवल्याचा राग असू शकतो, अशी प्रतिक्रिया आमदार सुरेश धस यांनी व्यक्त केली आहे. लोकांवर खोटे गुन्हे दाखल करण्याचे प्रकार कराडने केलेले आहेत. त्यामुळे चार दोन झापडी मारल्याच ते म्हणाले.

संतोष देशमुख यांच्या खून प्रकरणातील आरोपींना अमरावती आणि नागपूरच्या जेलमध्ये हलवावे, अशी मागणी सुरेश धस यांनी केली आहे. जेलमध्ये राडा झाल्याच्या बातमीला सुरेश धस यांनी एक प्रकारे दुजोरा दिलेला आहे. जेलमध्ये मारहाण होत असेल तर जेल सुरक्षेचा प्रश्न निर्माण झाला आहे.

सकाळी नाष्ट्याच्या वेळी गित्ते आणि आठवले हे दोघे कराडच्या अंगावर धाऊन गेले. त्यावेळी सुदर्शन घुले तिथेच होता. तो मध्ये पडला, त्यामुळे महादेव गित्ते आणि अक्षय आठवले या दोघांनी वाल्मिक कराडसह सुदर्शन घुलेला झोडपल असल्याची माहिती मिळत आहे. जेल प्रशासनाने या वृत्ताला अद्याप दुजोरा दिलेला नाही.

बीड — खोक्या उर्फ सतीश भोसले याला अमानुष मारहाण प्रकरणात न्यायालयीन कोठडी सुनावत कारागृहात रवानगी करण्यात आली. त्यावेळी कारागृह आवारात पोलिसांनी व्हीआयपी ट्रीटमेंट दिल्याचं वृत्त “सह्याद्री माझा” ने व्हिडिओसह प्रसिद्ध करताच पोलीस अधीक्षक नवनीत कावत यांनी संबंधित पोलिसांना निलंबित करण्याचे जाहीर करून कारणे दाखवा नोटीस देणार असल्याचे सांगितले आहे.
खोक्या उर्फ सतीश भोसले याच्यावर अमानुष मारहाणी सोबतच त्याच्या घरात वन्य जीवांची हत्या केल्याचे अवशेष सापडले. मारहाण प्रकरणात त्याला शिरूर न्यायालयाने न्यायालयीन कोठडीत ठेवण्याचे आदेश दिले. दरम्यान जिल्हा कारागृह आवारात बाहेरचा डबा आणून खोक्याला जेवण देण्यात आले. याबरोबरच खंडीभर कार्यकर्ते त्याच्या दिमतीला उपस्थित होते. खोक्याचे जेवण झाल्यानंतर मिनरल वॉटर हातावर ओततताना कार्यकर्ता दिसत आहे. राजा महाराजाला शोभेल अशी बडदास्त त्याची ठेवण्यात आली होती. या संदर्भातला कथित व्हिडिओ व्हायरल झाला होता. या प्रकरणाच्या अनुषंगाने सह्याद्री माझा ने वृत्त प्रसिद्ध करताच पोलीस अधीक्षक नवनीत कावत यांनी यावेळी कर्तव्यावर असलेल्या पोलिसांना निलंबित करून कारणे दाखवा नोटीस बजावण्यात येणार असल्याचे सांगितले. पोलीस अधीक्षक नवनीत कावत यांनी तडकाफडकी निलंबनाच्या आदेश दिल्यामुळे पोलीस दलात खळबळ माजली आहे ‌

बीड — अमानुष मारहाण तसेच वन्य प्राण्यांच्या शिकारी सारख्या गुन्ह्यातून न्यायालयीन कोठडीत रवानगी करण्यात आलेल्या खोक्या उर्फ सतीश भोसले ला व्हीआयपी ट्रीटमेंट भेटत आहे. न्यायालयीन कोठडीत रवानगी करण्यापूर्वी कारागृह आवारात जेवणाचा आस्वाद घेत कार्यकर्त्यांशी गप्पा मारत असतानाचा व्हिडिओ समोर आला आहे यामुळे खळबळ माजली आहे. एकूणच बीड पोलिस प्रशासनाची इभ्रत वेशीला टांगली गेली आहे.

संतोष देशमुख हत्या प्रकरणात आरोपी वाल्मीक कराडला जेलमध्ये व्हीआयपी ट्रीटमेंट मिळत असल्यावरून राज्यात खळबळ माजली होती. त्यावेळी धनंजय मुंडे यांच्यावर देखील टीका करण्यात आली होती. सामाजिक कार्यकर्त्या अंजली दमानिया यांनी देखील ट्विट करून गंभीर प्रश्न उपस्थित केले होते.

मात्र सुरेश धस यांचा कार्यकर्ता असलेल्या सतीश भोसले उर्फ खोक्या याला देखील पोलिस प्रशासन व्हीआयपी ट्रीटमेंट देऊ लागलं आहे. सतीश भोसलेला न्यायालयीन कोठडीत ठेवण्याचे आदेश शिरूर न्यायालयाने दिले आहेत.बीडच्या जिल्हा कारागृहात रवानगी करत असताना राजा महाराजांना शोभेल अशी खोक्याची बडदास्त जेलच्या आवारात ठेवली गेली असल्याचा व्हिडिओ समोर आला आहे. कारागृहाच्या बाहेर कार्यकर्त्यांसोबत मस्त राव रंभाच्या गप्पा मारत आलेल्या डब्यावर ताव मारताना या व्हिडिओत खोक्या दिसत आहे. त्याच्या दिमतीला पोलीस यंत्रणादेखील आहे. कार्यकर्त्यांसमोर बसून आलेल्या डब्यातील जेवणाचा आनंद त्याने घेतला. कार्यकर्त्यांनी त्याचे हात धुण्यासाठी पाणी ओतले त्यानंतर तो भेटायला आलेल्या लहान मुलीसह महिलांना बोलत असल्याचं या व्हिडिओतून दिसत आहे. पोलिसांसह जिल्हा प्रशासनाची अशा समोर येत असलेल्या व्हिडिओमुळे नाचक्की झाली असून जेल व पोलीस प्रशासन कधी सुधारणार? असा प्रश्न निर्माण झाला आहे.

माजलगाव — जुन्या मोंढ्यातील मुख्य रस्त्यावर असलेल्या दोन किराणा दुकानाची शटर तोडून सामानाची नासधूस केली. गल्ल्यात असलेली 95 हजाराची रोकड देखील लंपास केली.
रहदारीच्या मुख्य रस्त्यावर असलेल्या जुन्या मोंढ्यातील दिलीप बबन आप्पा खुरपे यांच्या मालकीचे चंद्रशेखर किराणा स्टोअर्स तसेच लक्ष्मीकांत रामहरी झुंजुर्के यांचे लक्ष्मी ट्रेडिंग कंपनी ही दोन किराणा दुकान शनिवारी मध्यरात्री अज्ञात चोरट्यांनी दुकानाचे शटर तोडून सामानाची नासधूस केली. दरम्यान रविवारी सकाळी दिलीप खुरपे यांना फोनवरून याची माहिती मिळाली. त्यावेळी चोरांनी नासधूस केलेली तसेच गल्ल्यातील 80 हजार पाचशे रुपये चोरीला गेल्याचे लक्षात आले. याबरोबरच चोरांनी सीसीटीव्ही कॅमेऱ्याचा डीसीआर देखील चोरून नेला. झिंजुर्के यांच्या दुकानातील कल्याण बारा हजार रुपये चोरट्यांनी लंपास केले. याप्रकरणी पीडित व्यापाऱ्यांनी केलेल्या तक्रारीवरून अज्ञात चोरट्या विरोधात माजलगाव शहर पोलीस ठाण्यात गुन्हा दाखल करण्यात आला आहे.