बीड — इराण इजराइल अमेरिका युद्धामुळे स्वयंपाकाच्या गॅसची टंचाई निर्माण होण्याची शक्यता निर्माण झाली आहे. या पार्श्वभूमीवर घरगुती गॅस सिलेंडरचा वापर करून व्यावसायिक नफा कमवणाऱ्या जिल्हाधिकारी कार्यालयासमोरील तीन हॉटेलवर पुरवठा विभागाने कारवाई केली आहे. या छाप्यामुळे हॉटेल व्यवसायिकांमध्ये खळबळ माजली आहे.
युद्धजन्य परिस्थिती निर्माण झाल्यामुळे इंधन टंचाईचं संकट उभा राहिला आहे. घरगुती गॅस सिलेंडर ग्राहकांना उपलब्ध व्हावं. यासाठी केंद्र सरकारने तात्काळ पावलं उचलत एस्मा कायदा लागू करत व्यावसायिक गॅस सिलेंडर चा पुरवठावर बंधन आणले आहे. यामुळे मोठमोठ्या शहरांमधील हॉटेलिंग व्यवसाय धोक्यात आला आहे. मात्र बीडमध्ये घरगुती गॅस सिलेंडरचा वापर व्यावसायिक वापरासाठी मोठ्या प्रमाणावर केला जातो. जिल्ह्याचा पुरवठा विभाग ही याकडे आज पर्यंत कानाडोळा करत आल्याचे चित्र पाहायला मिळाले. मात्र बीडमध्ये सिलेंडरची उपलब्धता सर्वसामान्य जनतेला व्हावी या उद्देशाने तहसीलदार चंद्रकांत शेळके यांच्या मार्गदर्शनाखाली पुरवठा विभागाने मोठी कारवाई पहिल्यांदाच केली आहे. जिल्हाधिकारी कार्यालयासमोरील “श्री” हॉटेल, समाधान हॉटेल आणि रायगड हॉटेल वर छापा मारला. या हॉटेलमधून अवैध पद्धतीने नफाखोरीसाठी घरगुती गॅस वापर होत असल्याचे छाप्यात उघड झाले. या तीनही हॉटेलमधून घरगुती गॅस सिलेंडर जप्त करण्यात आले. नायब तहसीलदार प्रशांत सुपेकर, मंडळ अधिकारी अनील तांदळे, तलाठी शब्बीर पठाण, तालुका पुरवठा विभागातील अवल कारकून श्रीराम वैभव आणि संतोष मुळीक यांनी केली. याप्रकरणी शिवाजीनगर पोलीस ठाण्यामध्ये गुन्हा दाखल करण्याची प्रक्रिया सुरू आहे.या कारवाईमुळे हॉटेल, खानावळ, धाबे चालकांच्या धंद्याला लगाम लागणार असून गॅस संकटाच्या पार्श्वभूमीवर अशा कारवाया वाढवण्यात येणार असल्याचे पुरवठा विभागाने स्पष्ट केले.
