निवडणूक आयोगाविरोधात सी जे पी मैदानात; २ ऑक्टोबरला शिवाजी पार्कवर आंदोलन

मुंबई — निवडणूक आयोगाच्या कामकाजातील कथित अनियमितता आणि निवडणूक प्रक्रियेतील उत्तरदायित्वाच्या मुद्द्यावरून कॉकरोच जनता पार्टी (CJP) कडून मुंबईत आंदोलनाची तयारी करण्यात आली आहे. 2 ऑक्टोबर 2026 रोजी दादर येथील शिवाजी पार्कमध्ये आंदोलन करण्यासाठी मुंबई पोलिसांकडे परवानगी मागण्यात आल्याचे पक्षाकडून सांगण्यात आले आहे. राष्ट्रीय संघटन प्रमुख अजिंक्य शिंदे यांच्या वतीने पोलिसांना यासंदर्भात पत्र देण्यात आले आहे.

पोलिसांना दिलेल्या पत्रात आंदोलन संविधानाला अनुरूप आणि शांततापूर्ण पद्धतीने करण्यात येणार असल्याचे नमूद करण्यात आले आहे. निवडणूक प्रक्रियेत पारदर्शकता आणि संस्थात्मक उत्तरदायित्वाचा मुद्दा उपस्थित करत हे आंदोलन करण्यात येणार असल्याचे CJP कडून सांगण्यात आले आहे.

सोनम वांगचुक यांचा आंदोलनाला पाठिंबा

दरम्यान, सामाजिक कार्यकर्ते सोनम वांगचुक यांनी CJP च्या या आंदोलनाला पाठिंबा दर्शवला आहे. निवडणूक प्रक्रिया आणि संस्थात्मक उत्तरदायित्व सुधारण्यासाठी सुरू असलेल्या प्रयत्नांना पाठिंबा देणे आवश्यक असल्याचे त्यांनी म्हटले आहे.

मात्र, 2 ऑक्टोबर रोजी मुंबईतील आंदोलनात आपण प्रत्यक्ष सहभागी होण्याची शक्यता नसल्याचे वांगचुक यांनी स्पष्ट केले. कोणतीही चळवळ एका व्यक्तीवर अवलंबून न राहता स्वयंपूर्ण असावी, अशी भूमिका त्यांनी मांडली. CJP च्या आंदोलनाला वांगचुक यांनी यापूर्वीही पाठिंबा दिला असून, जून 2026 मध्ये त्यांनी पक्षाच्या आंदोलनात सहभाग घेतला होता.

निवडणूक आयोगातील 14 आक्षेपांची चर्चा

या आंदोलनाच्या पार्श्वभूमीवर निवडणूक आयोगातील दोन आयुक्तांनी नोंदवलेल्या कथित लेखी आक्षेपांचा मुद्दाही चर्चेत आला आहे. द इंडियन एक्स्प्रेसच्या वृत्तानुसार, निवडणूक आयुक्त सुखबीर सिंह संधू आणि विवेक जोशी यांनी मागील दहा महिन्यांत किमान 14 वेळा आयोगाच्या काही निर्णयांवर किंवा प्रक्रियांवर लेखी आक्षेप नोंदवले. हे आक्षेप मतदार नोंदणी, मतदारांची नावे वगळणे आणि पुन्हा समाविष्ट करणे, मतदार याद्यांचा डेटाबेस, फॉर्म-6 तसेच सॉफ्टवेअर आणि तांत्रिक प्रक्रियांशी संबंधित असल्याचे वृत्तात नमूद करण्यात आले आहे.

या 14 आक्षेपांच्या पार्श्वभूमीवर बॉम्बे हायकोर्टाच्या कोल्हापूर खंडपीठातही याचिका दाखल झाल्याचे वृत्त आहे. या याचिकेत निवडणूक प्रक्रियेतील निर्णय आणि प्रशासकीय प्रक्रियांबाबत प्रश्न उपस्थित करण्यात आले आहेत.

निवडणूक आयोगाची वेगळी भूमिका

मात्र, या प्रकरणावर निवडणूक आयोगाने वेगळी भूमिका मांडली आहे. आयोगाच्या म्हणण्यानुसार, आयुक्तांमधील मतभेद किंवा अंतर्गत चर्चा ही संस्थेच्या नियमित विचारविनिमय प्रक्रियेचा भाग आहे. SIRसह निवडणूक प्रक्रियेशी संबंधित अंतिम निर्णय तीनही निवडणूक आयुक्तांच्या सहमतीने घेण्यात आल्याचे आयोगाने स्पष्ट केले आहे.

त्यामुळे एका बाजूला दोन निवडणूक आयुक्तांनी नोंदवलेल्या 14 लेखी आक्षेपांबाबतचे वृत्त आणि दुसऱ्या बाजूला सर्व अंतिम निर्णय एकमताने झाल्याचे निवडणूक आयोगाचे स्पष्टीकरण, अशी दोन्ही बाजू सध्या चर्चेत आहेत.

आता CJP कडून 2 ऑक्टोबर रोजी शिवाजी पार्क येथे प्रस्तावित आंदोलनाला मुंबई पोलिसांकडून परवानगी मिळते का, तसेच आंदोलनाचे स्वरूप काय राहते, याकडे लक्ष लागले आहे.