नववर्षानिमित्त बीडकरांना अजितदादांकडून सुखद भेट
बीड — बीड शहरातील यशवंतराव चव्हाण नाट्यगृहाची अतिशय दुरावस्था झाल्यामुळे रसिक प्रेक्षकांसह रंगकर्मींनी या बाबत तिव्र नाराजी व्यक्त केली होती. नगर परिषद निवडणुकीच्या जाहिरनाम्यात या कामाचे आश्वासन राष्ट्रवादी काँग्रेस पार्टीच्यावतीने देण्यात आले होते. निवडणुकीनंतर राज्याचे उपमुख्यमंत्री तथा पालकमंत्री ना. अजितदादा पवार पहिल्यांदाच बीड शहरात आले, त्यांनी नववर्षाच्या प्रथमदिनी शासन निर्णय निर्गमित करून यशवंतराव चव्हाण नाट्यगृहाच्या नुतणीकरणासाठी ८.१९ कोटी रुपयांचा निधी मंजुर केला आहे. नववर्षानिमित्त बीडकरांना अजितदादांकडून सुखद भेट या माध्यमातून देण्यात आली असल्याचे प्रतिपादन आ. विजयसिंह पंडित यांनी केले असून आ. पंडित यांनी बीडकर नागरीकांच्यावतीने ना. अजितदादा पवार यांचे आभार व्यक्त केले आहेत. व्यासपीठावर उपमुख्यमंत्री ना. अजितदादा पवार यांनी याबाबतच्या शासन निर्णयाची प्रत आ. विजयसिंह पंडित यांच्याकडे सुपूर्द केली.
राज्य शासनाच्या नियोजन विभागाने दि.१ जानेवारी २०२६ रोजी निर्गमित केलेल्या शासन निर्णयात बीड शहरातील यशवंतराव चव्हाण नाट्यगृहाच्या नुतणीकरणासाठी ८.१९ कोटी रुपये किंमतीच्या विकास कामास शासन मान्यता दिली आहे. राज्याचे उपमुख्यमंत्री तथा बीड जिल्ह्याचे पालकमंत्री ना. अजितदादा पवार साहेब यांनी नववर्षाच्या प्रथमदिनी बीडकरांना या माध्यमातून सुखद भेट दिली आहे. आ. विजयसिंह पंडित यांनी या बाबत बीड शहरातील रसिक प्रेक्षक, नाट्यकर्मी व नागरीकांच्यावतीने पालकमंत्री ना. अजितदादा पवार यांचे आभार व्यक्त केले आहेत.
या बाबत आ. विजयसिंह पंडित यांनी माहिती देताना सांगितले की, बीड जिल्ह्यातील सुमारे १३६३ विकास कामांचा शुभारंभ करण्यासाठी राज्याचे उपमुख्यमंत्री तथा बीड जिल्ह्याचे पालकमंत्री ना. अजितदादा पवार बीड शहरात आले, नगर परिषद निवडणुकीनंतर पहिल्यांदाच ते बीड शहरात येत होते. बीड शहरातील नागरीकांसाठी महत्वाच्या विषयांच्या अनुषंगाने त्यांनी यावेळी चर्चा केली. एका कार्यक्रमाच्या निमित्ताने ना. अजितदादा पवार यांनी यशवंतराव चव्हाण नाट्यगृहाची दुरावस्था पाहिली होती, चर्चेदरम्यान त्यांना या बाबीची आठवण होताच त्यांनी तातडीने या बाबतची संचिका मागवून घेऊन त्यास मंजुरी दिली. त्यामुळे नववर्षाच्या प्रथमदिनी बीड शहरातील विकासपर्वाचा प्रारंभ या माध्यमातून होऊ शकला. बीड शहराच्या सांस्कृतिक वैभवात भर पडेल असे दर्जेदार काम यशवंतराव चव्हाण नाट्यगृहाचे करण्यात येईल असेही आ. पंडित यांनी यावेळी सांगितले.
पुढे बोलताना आ. विजयसिंह पंडित म्हणाले की, बीड शहराच्या विकासासाठी भविष्यात निधी कमी पडू दिला जाणार नाही असे आश्वासन पालकमंत्री ना. अजितदादा पवार साहेब यांनी दिले आहे. बीड शहरात भविष्यात दर्जेदार विकास कामे करून नागरीकांचा विश्वास संपादन करण्यासाठी आम्ही कटिबध्द असल्याचेही आ. पंडित यांनी सांगितले. मागील अनेक वर्षांपासून प्रलंबित असलेला नाट्यगृहाच्या दुरावस्थेचा प्रश्न निकाली निघाल्याबद्दल बीड शहरातील नागरीक, नाट्यकर्मी, कलावंत, रसिक प्रेक्षक यांनी आनंद व्यक्त केला आहे. व्यासपीठावर उपमुख्यमंत्री ना. अजितदादा पवार यांनी याबाबतच्या शासन निर्णयाची प्रत आ. विजयसिंह पंडित यांच्याकडे सुपूर्द केली.
