5 लाखासाठी पत्नीचा छळ करून दागिने लुटले; गर्भपात करुन तलाक दिला

आष्टी — माहेरहून पाच लाख रुपये आणावे यासाठी विवाहितेचा छळ करून तिचा गर्भपात केला. दागिने लुटून तलाख देत घराबाहेर काढल्याचा धक्कादायक प्रकार कडा येथे घडला आहे. याप्रकरणी सासरच्या पाच जणांविरोधात गुन्हा दाखल करण्यात आला आहे.

आठ वर्षांपूर्वी तब्बोसूम गुलामरसूल शेख (वय २६) यांचा विवाह गेवराई येथील गुलामरसूल इब्राहीम शेख याच्याशी मुस्लीम रीती रिवाजा प्रमाणे झाला होता.लग्नात ऐपतीप्रमाणे दागिने आणि संसारोपयोगी वस्तू माहेरच्या मंडळींनी दिल्या. लग्नानंतर सहा महिने चांगले वागवले. त्यानंतर मात्र सासरच्या मंडळींनी आपला खरा चेहरा दाखवायला सुरुवात केली. “तू वांझोटी आहेस, पांढऱ्या पायाची आहेस,” असे टोमणे मारत तिला उपाशीपोटी ठेवून तिचा शारीरिक व मानसिक छळ सुरू केला. पीडितेने तक्रारीत सांगितलेला प्रकार अंगावर शहारे आणणारा आहे. तिला यापूर्वी गर्भ राहिला असता पतीने जबरदस्तीने गोळ्या खाऊ घालून तिचा गर्भपात केला. आता पुन्हा दीड महिन्यांची गर्भवती असताना, पतीने तिला “तुला मूलबाळ होऊ देणार नाही, तुला फक्त कामासाठी आणले आहे,” असे म्हणत पोटावर लाथाबुक्क्यांनी मारहाण केली. “गाडी घेण्यासाठी तुझ्या बापाकडून ५ लाख रुपये घेऊन ये,” असा तगादा सासरच्यांनी लावला होता.१५ मार्च रोजी पीडितेच्या आईने सासरी येऊन याबाबत विचारणा केली की, “मुलगी गरोदर आहे, तिला दवाखान्यात का नेत नाही?” याचा राग येऊन पती गुलामरसूल, सासू अहेमदबी आणि नणंद आयेशा यांनी पीडितेचे हात दाबून धरले, तर पतीने तिचा गळा दाबून तिला जिवे मारण्याचा प्रयत्न केला. सासरे आणि नंदावा यांनी घराचा दरवाजा लावून घेत माय-लेकीला जिवे मारण्याच्या धमक्या दिल्या. याबरोबरच तिच्या अंगावरील सोन्याचे दागिने काढून घेत पतीने पीडितेला बेकायदेशीर रीत्या तलाक दिला. तसेच घराच्या बाहेर हाकलून दिले. पीडितेच्या फिर्यादीवरून पोलिसांनी गुलामरसूल इब्राहीम शेख (पती), अहेमदबी इब्राहीम शेख (सासू), इब्राहीम मोहम्मद शेख (सासरा), आशिया मौजम सय्यद (नणंद), मौजम सय्यद (नंदावा) यांच्याविरोधात आष्टी पोलिस ठाण्यात गुन्हा दाखल करण्यात आला आहे पुढील तपास आष्टी पोलीस करीत आहेत