बीड – लोकसभा निवडणुकीत मराठवाड्यात महाविकास आघाडीने महायुतीला जोरदार दणका दिला. त्याचीच पुनरावृत्ती करण्यासाठी राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार सिद्ध झाले आहेत.
महायुतीत परळी विधानसभा मतदारसंघ राष्ट्रवादी काँग्रेस अजित पवार गटाला मिळणार हे जवळपास निश्चित झाले आहे. अजित पवार यांचे अतिशय जवळचे आणि राज्याचे कृषीमंत्री धनंजय मुंडे यांच्याविरोधात राष्ट्रवादी काँग्रेस शरद पवार गटाकडून कोण उमेदवार असणार याची कित्येक दिवसांपासून उत्सूकता आहे.
अजित पवार गटाकडून कृषीमंत्री धनंजय मुंडे यांचे परळीत मोठे आव्हान शरद पवार गटासमोर असणार आहे. लोकसभा निवडणुकीत भाजप उमेदवार पंकजा मुंडे यांचा पराभव केल्यामुळे शरद पवार गटाचा आत्मविश्वास दुणावला आहे. मात्र धनंजय मुंडेंना टक्कर देणारा उमेदवार मैदानात उतरवण्याचे त्यांच्यासमोर आव्हान आहे.
बीड मधील परळीच्या जागेसाठी अनेक जण इच्छूक आहेत. परभणी जिल्ह्यातील गंगाखेडचे आमदार रत्नाकर गुट्टे यांचे जावई राजाभाऊ फड यांनी नुकतीच शरद पवार यांची भेट घेतली आहे. राजाभाऊ फड उद्या (बुधवार) मुंबईत शरद पवार गटात प्रवेश करणार असल्याची माहिती आहे. राजाभाऊ हे परळीचे आहेत. राष्ट्रीय समाज पक्षाचे (रासप) युवा प्रदेशाध्यक्ष म्हणून त्यांनी काम केलेले आहे. परळी विधानसभा निवडणूक लढण्यासाठी ते इच्छूक आहेत. शरद पवारांनी पाठीवर हात ठेवण्याची फक्त ते वाट पाहात असल्याचे सांगितले जाते. राजाभाऊ फड यांचा परळी विधानसभा मतदारसंघात चांगला जनसंपर्क आहे. रासपच्या निमित्ताने कार्यकर्त्यांची फळीही त्यांची तयार आहे.
लोकसभा निवडणूक निकालाने महाविकास आघाडीमध्ये इच्छूकांची भाऊगर्दी आहे. काँग्रेसचे जिल्हाध्यक्ष राजेसाहेब देशमुख, बबन गित्ते, सुदामती गुट्टे यांची देखील निवडणूक लढण्याची इच्छा आहे. त्यामुळे उद्या प्रवेश होणारे राजाभाऊ फड हे उमेदवार असणार की, महाविकास आघाडीतील जुण्या नेत्यांना संधी मिळणार,यासंबंधी शरद पवार काय उलटफेर करतात ते पाहावे लागेल.
