अंबाजोगाई — तालुक्यातील डोंगर पिंपळा येथे 15 वर्षीय मुलाने दोन वर्ष पाच महिन्याच्या चिमुरडीवर लैंगिक अत्याचार केल्याची घटना ताजीच आहे या घटनेला पाच दिवसही उलटत नाहीत तोच आणखी एका अडीच वर्षांच्या चिमुरडीवर गावातीलच 13 वर्षीय मुलाने लैंगिक अत्याचार केल्याची धक्कादायक घटना 31 मार्च रोजी घडली. या घटनेने खळबळ माजली आहे.
याबाबत मिळालेल्या माहितीनुसार, 31 मार्च रोजी सायंकाळी साडेपाच वाजेच्या सुमारास पीडित चिमुरडी तिच्या घरामागील मोकळ्या मैदानात खेळत होती. यावेळी गावातीलच 13 वर्षीय मुलाने तिला गाठून तिच्यावर लैंगिक अत्याचार केला. या घटनेमुळे चिमुरडीला गंभीर दुखापत झाली आहे .तिच्यावर रुग्णालयात उपचार सुरू आहेत. पीडित चिमुरडीच्या आईने 1 एप्रिल रोजी बर्दापूर पोलीस ठाण्यात धाव घेऊन तक्रार नोंदवल्यानंतर पोलिसांनी तातडीने कारवाई केली. याप्रकरणी मुलाविरुद्ध भारतीय न्याय संहितेच्या (बीएन एस) कलम 64(1), 65(2) तसेच पाॅक्सो कायद्याच्या कलम 4,8 आणि 13 अंतर्गत गुन्हा दाखल करण्यात आला आहे. दरम्यान पाच दिवसापूर्वीच 15 वर्षाच्या मुलाने मोबाईलवर अश्लील चित्रफीत पाहून दोन वर्ष पाच महिने वयाच्या मुलीवर असाच लैंगिक अत्याचार केला. या घटनांमुळे खळबळ माजली असून लहान मुलांच्या हातामध्ये मोबाईल देणं किती घातक ठरू शकतं व मुले कशी गुन्हेगारीच्या विळख्यात सापडत असल्याचे चित्र पाहायला मिळत आहे.
