चमत्काराच्या नावाखाली सोन्याची अंगठी चोरणारा नाशिकचा भोंदू बीडमध्ये जेरबंद

बीड — चमत्कार दाखवतो असे सांगून एका वृद्ध व्यक्तीची सोन्याची अंगठी हातचलाखीने चोरी करणाऱ्या भोंदूला स्थानिक गुन्हे शाखेच्या पथकाने अटक केली असून चोरीस गेलेला मुद्देमाल जप्त करण्यात आला आहे.

याबाबत मिळालेल्या माहितीनुसार, फिर्यादी भीमा सोनाजी जाधवर (वय ५८, रा. काशीदवाडी ता. केज) यांनी केज पोलीस ठाण्यात फिर्याद दिली. दि. १ फेब्रुवारी २०२६ रोजी सकाळी ते पुणे येथे उपचारासाठी जाण्यासाठी केज बसस्थानकात बसची वाट पाहत होते. यावेळी दोन अनोळखी व्यक्तींनी त्यांच्याशी संवाद साधत चमत्कार पाहायचा आहे का? असे विचारले. त्यांनी फिर्यादींची सुमारे ६ ग्रॅम वजनाची सोन्याची अंगठी काढून पांढऱ्या रुमालात ठेवत असल्याचा बनाव केला व १० मिनिटे डोळे बंद करा, चमत्कार दिसेल असे सांगून हातचलाखीने अंगठी चोरून पसार झाला. याप्रकरणी केज पोलीस ठाण्यात गुन्हा नोंद करण्यात आला. दरम्यान, या गुन्ह्याचा समांतर तपास
स्थानिक गुन्हे शाखा करत होती. पोउपनि महेश विघ्ने यांच्या पथकाने घटनास्थळी भेट देऊन सीसीटीव्ही फुटेजची तपासणी केली असता दोन संशयित इसमांचे फुटेज मिळाले. गोपनीय माहितीच्या आधारे आरोपी हे येवला (जि. नाशिक) येथील असून मदारी खेळ व हातचलाखी करणारे असल्याचे निष्पन्न झाले. यानुसार पथक येवला येथे रवाना झाले व फुटेज मधील आरोपी अमजद नबाब मदारी (रा.
सावरगाव, ता. येवला, जि. नाशिक) यास ताब्यात घेऊन चौकशी केली असता त्याने साथीदार अशफाक राजू मदारी याच्यासह गुन्हा केल्याची कबुली दिली.पोलिसांनी
आरोपीकडून चोरीस गेलेली ६ ग्रॅम सोन्याची अंगठी (किंमत अंदाजे २४ हजार रुपये) तसेच गुन्ह्यात वापरलेली मोटारसायकल जप्त केली आहे. आरोपीस पुढील कारवाईसाठी केज पोलीस ठाण्याच्या ताब्यात देण्यात आले असून फरार साथीदाराचा शोध सुरू आहे. ही कारवाई पोलीस अधीक्षक नवनीत काँवत, अप्पर पोलीस अधीक्षक चेतना तिडके व स्थानिक गुन्हे शाखेचे पोलीस निरीक्षक शिवाजी बंटेवाड यांच्या मार्गदर्शनाखाली पोउपनि महेश विघ्ने, पोहेकॉ महेश जोगदंड, जफर पठाण, दिलीप गीते, गणेश मराडे यांनी केली.