गेवराई — पोटच्या मुलाने गळफास घेऊन आत्महत्या केल्याची माहिती मिळताच दुःख सहन न झाल्याने आईनेही विष पिऊन आपली जीवन यात्रा संपवली. ही घटना गेवराई तालुक्यातील वाहेगाव आमला येथे घडली.
अभिमन्यू भागवत खेत्रे वय- 45 वर्ष व कौशल्या भागवत खेत्रे वय-70 वर्ष रा. वाहेगाव -आमला, ता. गेवराई, जि. बीड असे आत्महत्या केलेल्या माय लेकराचे नाव आहे.सोमवारी सकाळी अभिमन्यू याने घरातील आडूला गळफास घेऊन आत्महत्या केली.आपल्या मुलाने आत्महत्या करुन जीवन संपविल्याने आई कौशल्या खेत्रे यांना दुःख सहन न झाल्याने त्यांनी देखील विष घेतले. आधीच मुलगा गेला त्यातच आईने विष घेतल्याने कुटुंबीयाने कौशल्या खेत्रे यांना तात्काळ बीडच्या जिल्हा रुग्णालयात उपचारास दाखल करण्यात आले. मात्र, आज सकाळीच आई कौशल्या खेत्रे यांचा उपचार सुरु असताना मृत्यू झाला.या दोन्ही घटना घडल्यानंतर तलवाडा पोलीस घटनास्थळावर दाखल होऊन अभिमन्यू खेत्रे याचा मृतदेह शवविच्छेदन जातेगाव प्राथमिक आरोग्य केंद्रात दाखल करण्यात आला. तर आई कौशल्या खेत्रे यांच्या मृतदेहाचे बीड जिल्हा रुग्णालयात आज शवविच्छेदन करण्यात आले. दरम्यान याप्रकरणी पोलिसांनी आकस्मिक मृत्यूची नोंद केली असून पोलीस पुढील तपास करत आहेत.

बीड — बीड जिल्ह्यात कधी काय घडेल याचा नेम नाही.चोरीचा नवा धक्कादायक पॅटर्न उघडकीस आला असल्याने नव्या चर्चेला उधाण आले आहे. एका शेतकऱ्याच्या विहिरीतील सहा टँकर पाणी चोरीला गेल्याची खळबळजनक घटना घडली आहे. त्यामुळे ऐन उन्हाळ्यात जनावरांना पाणी कोठून आणायचं? आंब्याची झाड कशी जगवायची? असा प्रश्न शेतकऱ्यांने विचारला आहे. ही घटना साक्षाळ पिंपरीत घडली आहे.
चोरीच्या घटना सामान्य बनलेल्या आहेत. पैसे दाग दागिने किमती वस्तू चोरीला गेल्याचे प्रकार आजपर्यंत ऐकल्या गेले. मात्र बीडच्या साक्षाळ पिंपरीत त्रिंबक काशीद या शेतकऱ्याच्या विहिरीमधील चक्क सहा टँकर पाणी चोरीला गेलं आहे. जिल्ह्यामध्ये भयंकर दुष्काळ आणि पिण्याच्या पाण्याची भासत असलेली टंचाई या अनुषंगाने त्रिंबक काशीद या शेतकऱ्याने गेल्या दोन महिन्यांपूर्वी आपल्या शेतातील असलेल्या विहिरीमध्ये अडीच परस पाणी साठवून ठेवलं होतं.हे पाणी त्यांच्या गुरा-ढोरांसाठी त्याचबरोबर त्यांनी वीस गुंठ्यामध्ये आंब्याचे झाड लावले आहेत, ते जगवण्यासाठी साठवून ठेवलं होतं. मात्र पाणी चोरण्याचा उद्योग काही चोरट्यांनी केला आहे. तसेच काही पाणी शेतामध्ये वाया घालवले आहे.
शेतकरी त्रिंबक काशीद व पत्नी रंभा काशीद हे दोन दिवस आपल्या नातेवाईकांकडे लग्नाच्या कार्यक्रमासाठी गेले होते. याचाच फायदा घेऊन हे कृत्य केल्याचं त्यांनी सांगितलं आहे. घटना घडल्यानंर महिला शेतकऱ्याला अश्रू अनावर झाले होते. जाणून-बुजून कोणीतरी खोडसाळपणा केल्याचा शेतकऱ्याचा आरोप आहे.
”मला पाणी मागितलं असतं तर आम्ही दिला असतं. मात्र कोणीतरी जाणून-बुजून हे केलं आहे. आमचे जनावर त्याचबरोबर आंब्याची झाडं आम्ही जगवायची कशी? असा प्रश्न रंभा काशीद यांनी उपस्थित केला. संबंधित पाणी चोरणाऱ्यावर कारवाई करण्याची मागणी जोर धरू लागली आहे. दरम्यान पाण्याची चोरीला गेल्याची चर्चा जिल्ह्यात वाऱ्यासारखी पसरली आहे.

बीड — “सकाळून चौसाळा दुपारून बावचळला” ही म्हण प्रचलित आहे. त्याला कारणही तसंच आहे. हातभट्टीसह देशी दारूचा झटका शहराच्या वातावरणात नवा तडका लावण्याच काम करतय तर शहराची अर्थव्यवस्थाच मटक्यावर तरली आहे. हे कमी की काय म्हणून वेश्याव्यवसाय देखील फुलू लागल्याचं चित्र पाहायला मिळत आहे. यात गरिबांचे संसार मात्र उध्वस्त होऊ लागले आहेत.
चौसाळा जि प शाळेच्या प्रांगणातच जुगाऱ्यांचे अड्डे निर्माण झाले आहेत. झाडांच्या सावलीला बसून राजरोस मटका नावाचा जुगार घेत स्वतःचं बुकी वाले कल्याण करून घेण्यात दंग आहेत. या ठिकाणी ज्ञानार्जनाचं काम चालतं याचा विसर देखील पडला आहे. मटक्यातल्या प्रोफेसरांची वाढती वर्दळ विद्यार्थ्यांची डोकेदुखी वाढवू लागले आहेत. नुसतं मटक्यावरच काम भागत नाही तर त्याला जोड हातभट्टी, देशी दारूची ही लागत आहे. राजरोसपणाने विक्री होणाऱ्या दारूला अवैध तरी कसं म्हणायचं? त्याला नेकनूर ठाणे प्रमुखाची मूकसंमती आहे. झिंगाटलेले बेवडे रस्त्यावर सुखाची लोळण घेत रहदारीला अडथळा निर्माण करत आहेत. स्वर्ग सुख मदिराधीन झालेल्यांना मिळत असलं तरी बस स्थानकासमोरील त्यांचं भजनासह सुरू असलेलं कथ्थक महिला प्रवाशांना डोकेदुखीच बनलं आहे. अहो स्वर्ग सुख काय असतं हे पाहायचं असेल जीवाची मुंबई करायची असेल तर रंभा अप्सरा उर्वशी मेनका देवाची नाव वापरत असलेल्या हॉटेल मधून आंबट शौकिनांना उपलब्ध आहेत. मग सकाळून चौसाळा दुपारून बावचळला ही म्हण का प्रचलित होऊ लागली आहे याची अनुभूती शहरात प्रवेश केल्यावर आल्याशिवाय राहत नाही. गोरगरिबांचे संसार उघड्यावर पडत अंगाला राख फासून‌ ” संन्यासी “बनण्याची वेळ अनेकांवर येऊन ठेपली आहे.
कायदा सुव्यवस्था याच्याशी देणं घेणं नाही. पोलीस अधीक्षक नवनीत कावत किती जरी अवैध धंद्यावर लगाम लावण्याचे काम करत असले तरी त्यांच्या प्रामाणिकतेला सुरुंग लावण्याचे काम केलं जात आहे. वरिष्ठांचं ऐकायचं नाही याचा विडा उचललाय की काय ? अशी स्थिती निर्माण झाली आहे.यावर आळा घालण्याची मागणी सुजाण नागरिकांकडून केली जात आहे.

केज — तुमची मुलगी मला का देत नाहीत? म्हणून मुलीच्या शिक्षक वडिलांच्या गाडीला ट्रॅक्टरने धडक देऊन नंतर बंदुकीच्या धाक दाखवत बेदम मारहाण केल्याची घटना तालुक्यातील वरपगाव शिवारात आज, मंगळवारी दुपारी 12 वाजण्याच्या दरम्यान घडली. जखमी शिक्षकावर बीड येथील खाजगी रुग्णालयात उपचार सुरू आहेत.

केज तालुक्यातील वरपगाव येथील जय किसान विद्यालयात शिक्षक असलेले बाजीराव डोईफोडे हे बीडहून आपल्या कारमधून शाळेला येणे जाणे करतात. मंगळवारी डोईफोडे हे त्यांच्याच शाळेतील गर्जे नावाच्या शिक्षकासोबत आपल्या कार क्र. एम एच 23 / बी एच 8161 ने गावी परतत होते.केज-नांदूरघाट-चौसाळा या रोडवर असलेल्या हनुमंत पिंपरीच्या बोरगाव चौकाजवळ ते आले असता सुरज दिलीप गुंड रा. गुंड गल्ली केज याने ट्रॅक्टरने त्यांच्या कारला जोराची धडक दिली. त्यानंतर बंदुकीच्या धाकावर तुझी मुलगी मला का देत नाहीस म्हणत मारहाण केली. डोईफोडे यांना गंभीर जखमी करत गुंड तेथून पसार झाला. कारमधील दुसरे शिक्षक गर्जे यांनी डोईफोडे यांना बीड येथील खाजगी रुग्णालयात दाखल केले.
या प्रकरणी पोलीस उपनिरीक्षक आनंद शिंदे आणि पोलीस नाईक शिवाजी कागदे हे पोलीस अधिकारी व कर्मचारी जखमी बाजीराव डोईफोडे यांच्यावर उपचार सुरू असलेल्या रुग्णालयात त्यांचा जवाब घेण्यासाठी गेले असता त्यांच्यावर उपचार करणाऱ्या डॉक्टरांनी डोईफोडे हे बेशुद्ध असल्याने ते जवाब देवू शकत नसल्याचे सांगितले. त्यामुळे याप्रकरणी गुन्हा दाखल झालेला नाही. मात्र संशयित आरोपीला शोधून त्याला बेड्या ठोकण्यासाठी पोलीस त्याच्या मागावर आहेत.
दरम्यान या प्रकरणी मुलीचे आजोबा महादेव रंगनाथ भुमरे यांनी सांगितले की, सुरज दिलीप गुंड याचे शिक्षकाच्या मुलीवर एकतर्फी प्रेम आहे. यातून त्याने यापूर्वी ही आक्षेपार्ह फोटो, व्हिडिओ व्हायरल केले. त्यावरून त्याच्यावर गुन्हाही दाखल झाला होता. शिक्षक कुटुंबियांचा या विवाहाला विरोध असला तरीही गुंड हा मुलीचा पिच्छा सोडायला तयार नाही यातूनच हा प्रकार घडला आहे.

माजलगाव — पात्रुड येथील विज वितरणच्या कार्यकारी अभियंत्याससह लाईनमन व खाजगी इसमासह चोरीचा दोन लाखाचा दंड न टाकण्यासाठी 50 हजार रुपये ची लाच स्विकारणारा लाईनमनने कार्यकारी उपअभियंता यांच्या सांगण्यावरून लाच स्वीकारल्याचे कबूल केले.असल्याचे सांगितले.या प्रकरणी महावितरणचे कार्यकारी उपअभियंता विवेक जनार्धन मवाडे, वायरमन शेख जलील शेख अब्दुला, खाजगी इसम मोईन रशीद मोमीन यांच्या विरोधात माजलगाव ग्रामीण पोलीस स्टेशन मध्ये गुन्हा दाखल करण्यात आला.
जिल्ह्यात लाचखोरीच्या प्रकरणात वाढ झाली असून लाचलुचपत प्रतिबंधक विभागाच्या कारवायाने अधिकारी कर्मचारी जाळ्यात अडकत आहेत माजलगाव तालुक्यातील पात्रुड येथे तक्रारदाराचे चहापाण्याचे, वडापाव स्नॅक्सचे हॉटेल आहे. त्यांचे मीटर जळाल्यामुळे वायरमनच्या परवानगीने दुसरीकडून लाईट घेतली. ही बाब वायरमनने कार्यकारी उपअभियंता यांना सांगून दंडाची भीती दाखवून पैसे उकळण्याचा प्लॅन बनवला. त्याप्रमाणे हॉटेलची झडती घेऊन वीजचोरी पकडली व एक लाख 82 हजार रुपये दंडाची भीती दाखवली. याप्रकरणी कारवाई करायची नसेल तर पैसे द्यावे लागतील असे सांगण्यात आले होते. तडजोडीत 50 हजार रुपये स्विकारण्याचे मान्य केले. यावरून बीड एसीबीने सापळा रचला. कार्यकारी उपअभियंत्याच्या सांगण्यावरुन वायरमनने ही लाच खाजगी इसमाच्या स्वाधीन केली. याप्रकरणी माजलगाव ग्रामीण पोलीस ठाण्यात गुन्हा दाखल करण्यात आला आहे. ही कारवाई उपअधीक्षक शंकर शिंदे यांच्या उपस्थितीत सुरेश सांगळे, श्रीराम गिराम, भरत गारदे, खरसाडे, राठोड, हनुमान गोरे, गणेश म्हेत्रे, पुरी यांनी केली