केज — कळंब आगाराची बस केजहून कळंब कडे जाताना तिने अचानक पेट घेतला चालक व वाहकाच्या प्रसंगावधानाने 22 प्रवाशांचा जीव वाचला. या दुर्घटनेत तीन जण किरकोळ जखमी झाले आहेत. ही घटना सोमवारी दुपारी साडेतीन च्या सुमारास घडली.
कळंब बस आगाराची बस एम एच 11/ बी एल 9374 केज येथून दुपारी 3:20 वाजण्याच्या दरम्यान २२ प्रवाशांना घेऊन कळंबकडे निघाली. केज साळेगाव दरम्यान बोबडेवाडी शिवारातील शेख फरीद बाबा दर्ग्याजवळ बस आली असता बसच्या बोनटने अचानक पेट घेतला.ही बाब चालक बारकुल यांच्या निदर्शनास येताच प्रसंगावधान राखून बस रस्त्याच्या कडेला थांबवत प्रवाशांना तात्काळ खाली उतरण्यास सांगितले. यावेळी बस मधून बाहेर पडण्याचा प्रयत्न करत असताना झालेल्या गर्दीने तीन वृद्ध महिला किरकोळ जखमी झाल्या आहेत.
केज व कळंब येथील अग्निशामक दलाला पाचरण करण्यात आले. काहीवेळात आगीवर नियंत्रण मिळविण्यात यश आले. बस चालक बारकुल व वाहक भांगे यांनी प्रसंगावधान राखल्यामुळे अनुचित प्रकार घडला नाही. यात 22 प्रवाशांचा जीव वाचला आहे. दरम्यान याप्रकरणी केज पोलीस ठाण्यात गुन्हा नोंद करण्यात आला आहे.

बीड — मेहकर-पंढरपूर या पालखी महामार्गावरील तेलगाव-माजलगाव रस्त्यावर रविवारी रात्री 11 वाजेदरम्यान अपघात होऊन त्यात चार जण ठार तर काही गंभीर जखमी झाल्याची घटना घडली. जखमींना माजलगाव येथील रूग्णालयात उपचारार्थ पाठविण्यात आले. मयतांमध्ये पती-पत्नीचा समावेश आहे. हा अपघात एवढा भीषण होता की, आयशरने ऑटोला जवळपास 50 ते 60 फूट अंतरापर्यंत फरफटत नेले. घटनास्थळी दिंद्रुड पोलीस तात्काळ दाखल झाले.
यासंदर्भात समजलेली माहिती अशी की, माजलगाव तालुक्यातील भाटवडगाव येथील कांही लोक ऑटो क्र. एमएच 23 एन 0273 ने रविवारी अकरा ते साडे अकरा वाजेदरम्यान तेलगावकडून माजलगावकडे जात असताना सदरील ऑटो नित्रुड जवळील एका पेट्रोल पंपासमोर आला असता समोरून येणार्‍या आयशर क्र एमएच 23 एम 9255 ने ऑटोला जबरदस्त धडक दिली. आयशरने धडक देताच ऑटो जवळपास 50 ते 60 फूट दूर अंतरापर्यंत फरफटत नेले. या भीषण अपघातात ऑटोमधील तीन जण जागीच ठार झाले असून, मयतात एका महिलेचा समावेश आहे. याशिवाय आणखी एकाचाही मृत्यू झाला आहे. सर्व जखमी गंभीर आहेत. त्यांना तेलगाव येथील रूग्णवाहिकेने माजलगाव येथील रूग्णालयात उपचारार्थ पाठविण्यात आले. यात फारूक चॉद सय्यद, त्यांच्या पत्नी सय्यद शबाना फारूक, शेख नोहिद एजाज आणि फैजान रफिक सय्यद अशी चौघांची नावे आहेत.
मयताच्या जवळ असलेल्या आधारकार्डवरून त्यांची ओळख झाली. अपघातातील इतर मयत व जखमींचे नावे उपलब्ध होऊ शकले नाहीत. आयशर चालक घटनास्थळावरून पसार झाला. अपघाताची माहिती मिळताच दिंद्रुड पोलीस ठाण्याचे सपोनि महादेव ढाकणे यांच्यासह पोलीस कर्मचारी महेश साळुंखे, खलील मोमीन, सचिन गायकवाड, कानदास बनसोडे, चामनर आदि तात्काळ घटनास्थळी दाखल झाले.

रस्त्यावर पडलेल्या भेगांनी घेतला आणखी एक बळी

तेलगाव तालुका धारूर येथील लोकनेते सुंदररावजी सोळंके सहकारी साखर कारखान्यात नोकरी असलेले महारूद्र भिमराव लोंढे (रा. खालापुरी ता. जि. बीड ह. मु. सुंदरनगर तेलगाव) हे दुचाकी क्र. एम. एच. 23- 7424 ने रविवार (1 जून 2025) रोजी दुपारी तेलगावकडून माजलगावकडे जात असताना तेलगाव- माजलगाव रस्त्यावर टालेवाडी नजीक रोडला पडलेल्या भेगा चुकवताना समोरून भरधाव वेगात येत असलेल्या ट्रक क्र. एम. एच. 44- 7371 जोराची धडक दिली. ही धडक इतकी भीषण होती की महारूद्र लोंढे यांची गाडी ट्रकच्या समोरच्या भागात अडकली, तर या अपघातात महारूद्र लोंढे यांचा जागीच मृत्यू झाला आहे.

परळी — वैद्यनाथ मंदिर परिसरात सध्या तीर्थक्षेत्र विकासाची बांधकामे सुरु आहेत. मात्र वैद्यनाथाच्या पूर्व प्रवेशद्वारावरच कंत्राटदाराकडे कामाला असलेल्या कामगारांनी नियोजित दर्शन मंडपातच चुल मांडून आम्लेट आणि मांसाहारी अन्न शिजवल्याचा प्रकार समोर आला असल्याने खळबळ माजली आहे.
शिवसेना शिंदे गटाचे तालुकाप्रमुख व्यंकटेश शिंदे आणि भारतीय जनता युवा मोर्चाचे पदाधिकारी योगेश पांडकर यांनी हा सर्व प्रकार कॅमेरात कैद केला आहे.मंदिर परिसरात कामे करतांना ऐतिहासिक, धार्मिक महत्व लक्षात घेवून कामे करावी अशा वारंवार सुचना लोकप्रतिनिधी देत असतात. मात्र, तरीही दर्शन मंडपातच चुल मांडून आम्लेट आणि मांसाहारी अन्न शिजवल्याचा प्रकार प्रकार समोर आला आहे. खुद्द उपमुख्यमंत्री अजित पवारांनी याच इमारतीच्या बाजूला असलेल्या पायऱ्यांबाबत सबंधित गुत्तेदाराला खडे बोल सुनावले होते. आता तर वैद्यनाथ मंदिराच्या परिसरात धार्मिकदृष्ट्या निषिद्ध मानल्या जाणाऱ्या ठिकाणीच मांसाहार शिजवल्याचा प्रकार पुढे आला आहे. हा प्रकार उघडकीस आल्यानंतर खळबळ माजली असून या विरोधात काय कारवाई होते याकडे लक्ष लागलेले आहे.