बीड — सरकारी वकील विनायक लिंबाजी चंदेल वय 47वर्ष, रा. इंदेवाडी, जि. परभणी यांनी बुधवारी वडवणी न्यायालयातच गळफास घेऊन आत्महत्या केली होती. याप्रकरणी दोन दिवसानंतर न्यायाधीशासह लिपिकावर गुन्हा दाखल करण्यात आला आहे.
ऍड. विनायक चंदेल यांनी आत्महत्येपूर्वी लिहिलेल्या चिठ्ठीत न्यायाधीशासह लिपीकावर मनमानी कारभार, वारंवार अपमान करून मानसिक छळ केल्याचा आरोप केल्याने हे प्रकरण अधिक गंभीर बनले आहे.विनायक चंदेल यांचा मुलगा विश्वजित चंदेल वय 19 वर्ष यांनी वडवणी पोलीस ठाण्यात दिलेल्या फिर्यादीनुसार, त्यांचे वडील जानेवारी 2025 मध्ये एमपीएससी परीक्षेद्वारे सरकारी वकील म्हणून वडवणी न्यायालयात रूजू झाले होते. जून 2025 पासून वडवणी कोर्टातील नवनियुक्त न्यायाधीश रफीक शेख आणि लिपीक आण्णासाहेब तायडे हे त्यांना विनाकारण मानसिक त्रास देत होते. कामामध्ये अपमानित करणे, मनमानी काम करणे आणि त्यांचे म्हणणे न ऐकल्यामुळे ते सतत ताणतणावात राहत असत. त्यातूनच त्यांनी आत्महत्यासारखे टोकाचे पाऊल उचलल्याचे विश्वजित याने दिलेल्या फिर्यादीत म्हटले आहे
दरम्यान बुधवारी सकाळी सरकारी वकील विनायक चंदेल यांनी आत्महत्या केल्यानंतर त्यांच्या खिशात सुसाईड नोट सापडल्याची जोरदार चर्चा सुरू होती. परंतू त्यात न्यायाधिशांचे नाव असल्याने वडवणी पोलिसांकडून ही माहिती दडवण्यात आली होती. शिवाय विनायक यांचा मुलगा विश्वजीत यानेही पोलिसांवर गुरूवारी आरोप केला होता. या प्रकरणात सगळीकडून टीका होत असल्याने अखेर गुन्हा दाखल करण्यात आला नातेवाईकच तक्रार द्यायला येत नव्हता, असा खुलासा पोलिसांनी केला असला तरी विश्वजीत यांच्या आरोपामुळे त्यात किती तथ्य आहे हा मोठा प्रश्न निर्माण झाला

बीड — बेपत्ता झालेल्या महिला होमगार्ड चा मृतदेह पांगरी च्या पुढे नाल्यात आढळून आल्याने खळबळ माजली असून घातपाताचा संशय व्यक्त केला जात आहे. अयोध्या राहुल व्हरकटे (वय २६) असं मयत महिलेचं नाव आहे.
पांगरीच्या पुढे असलेल्या एका नाल्यात अयोध्या यांचा मृतदेह आढळून आला आहे.घटनास्थळी शिवाजीनगर पोलिस आणि स्थानिक गुन्हे शाखेचे टीम पोहोचली आहे. दरम्यान अयोध्या यांच्या मृत्युमागचं कारण अद्याप समोर आलेलं नाही. शिवाजीनगर पोलीस या प्रकरणाचा पुढील तपास करीत आहे. मयत महिलेचा मृतदेह पोलिसांनी ताब्यात घेतला असून त्याला शासकीय रुग्णालयात उत्तरीय तपासणीसाठी पाठवण्यात आला.अयोध्या व्हरकटे बेपत्ता झाल्याबाबत शिवाजीनगर ठाण्यात तक्रार देण्यात आली होती. दोन दिवसांपासून त्या बेपत्ता होत्या. वासनवाडीच्या पुढे पांगरी जवळील एका नाल्यात अयोध्या यांचा मृतदेह आढळून आल्यामुळे आता पोलिसांनी एका महिलेस ताब्यात घेतलं असून त्या महिलेची चौकशी देखील सुरु असल्याचं सांगण्यात येत आहे . या घटनेमागे हत्येचा संशय व्यक्त करण्यात येतं असून पोलीस पुढील तपास करीत आहेत.

परळी — तालुक्यातील रत्ननगर तांड्यात एका तरुणाची कौटुंबिक वादातून डोक्यात कोयत्याने वार करून हत्या केल्याची धक्कादायक घटना बुधवारी रात्री जळगव्हाण ता.परळी येथे घडली. अतिशय निघृणपणे खून करून डोके पुर्णतः ठेचण्यात आल्याचे दिसून येत आहे. ही घटना परिसरात खळबळ उडवणारी ठरली असून, स्थानिक नागरिकांमध्ये भीतीचे वातावरण पसरले आहे. मृत तरुणाचे नाव भीमराव

शिवाजी राठोड असून, आरोपीचे नाव अनिल चव्हाण आहे, जो घटना स्थळावरून फरार झाला आहे. दरम्यान मयत भिमराव राठोड हे आरोपी अनिल चव्हाणचे मेव्हणा असून कौटूंबिक वादातूनच हा प्रकार घडल्याचे सांगण्यात येते.

स्थानिक पोलिसांच्या माहितीनुसार, अनिल बाबासाहेब चव्हाण वय 30 वर्ष, रा.रामनगर तांडा आणि पप्पु उर्फ भीमराव शिवाजी राठोड वय 26 वर्ष, रा.रामनगर तांडा, ता. परळी यांच्यात घरगुती वाद सुरू होता.हा वाद अनेक दिवसांपासून सुरू होता आणि यावरून अनिल चव्हाणने भीमरावला संपवण्याचा कट रचला. घटनेच्या दिवशी अनिलने भीमरावला रत्ननगर तांड्यात बोलावले. या भेटीत दोघांमध्ये पुन्हा एकदा वाद पेटला. बाचाबाची झाली आणि नंतर हाणामारीत रूपांतर झालं. या हाणामारी दरम्यान अनिलने जवळच असलेला कोयता उचलून भीमरावच्या डोक्यात अनेकदा वार केले. यात भीमराव गंभीर जखमी झाला आणि घटनास्थळीच मृत्यू झाला. घटनेनंतर आरोपी अनिल चव्हाण घटनास्थळावरून फरार झाला आहे.या घटनेची माहिती मिळताच सिरसाळा पोलिस ठाण्याचे सपोनि. गोरखनाथ दहिफळे, सोनवणे, देशमुख, तौर, मुंडे यांनी तातडीने घटनास्थळी धाव घेतली. त्यांनी पंचनामा करून मृतदेह ताब्यात घेतला आणि शवविच्छेदनासाठी पाठवला. पोलिसांनी आरोपी अनिल चव्हाणच्या शोधासाठी विविध पथके रवाना केली आहेत.
या हत्येच्या घटनेमुळे रत्ननगर तांडा आणि आसपासच्या परिसरात तणावाचे वातावरण निर्माण झाले आहे. स्थानिक नागरिक आणि शेजारी घाबरलेले आहेत. पोलिसांनी येथील नागरिकांना शांत राहण्याचे आवाहन केले आहे आणि घटनास्थळी अधिक सुरक्षाबळ तैनात केले आहे. पोलिसांनी या प्रकरणी तातडीने सखोल तपास सुरू केला आहे. आरोपीच्या शोधासाठी सीसीटीव्ही फुटेज, शेजाऱ्यांचे जबाब आणि मोबाइल लोकेशन यांचा आधार घेतला जात आहे. तसेच पोलिसांनी हे प्रकरण गंभीरतेने हाताळत अनिल चव्हाणला लवकर पकडण्यात येईल असे सांगण्यात येत आहे.

बीड — विविध ठिकाणी चोरी गेलेल्या मोटरसायकल चोर त्याच्या राहत्या घरासमोर उभा असल्याची गुप्त माहिती स्थानिक गुन्हे शाखेच्या पोलिसांना मिळाली पोलिसांनी आरोपीला ताब्यात घेतले असता त्याच्याकडून सात मोटार सायकल जप्त करण्यात आल्या.
याबाबत पोलीस सूत्रांनी दिलेल्या माहितीनुसार निलेश विष्णू गायकवाड वय 33 वर्ष सुभाष कॉलनी पेठ बीड याने अनेक ठिकाणावरून मोटार सायकल चोरी केल्याची माहिती स्थानिक गुन्हे शाखेच्या पोलिसांना मिळाली. सध्या तो घरासमोर उभा असल्याची खात्रीलायक माहिती मिळताच पोलिसांनी त्याला जेरबंद केले. पोलिसांनी आपला खाक्या दाखवताच शिवाजी यलप्पा जाधव वय 34 वर्ष रा.डोमरी ता. पाटोदा याच्याकडे विक्रीसाठी ठेवल्याची कबुली दिली. जाधव कडून पोलिसांनी सात मोटरसायकल जप्त केल्या आहेत. चार लाख 40 हजार रुपयांचा मुद्देमाल यावेळी जप्त करण्यात आला.त्याचे कडुन मिळुन आलेल्या मोटारसायकल वरुन खालीलप्रमाणे मोटार सायकल चोरीचे गुन्हे उघडकीस आले आहेत.
पोलीस ठाणे बीड शहर गु.र. नं 109/2025 कलम 303(2) बी.एन.एस
पोलीस ठाणे बीड शहर गु.र.नं 256/2024 कलम 303 (2) बी.एन.एस
पोलीस ठाणे बीड शहर गु.र. नं 303/2024 कलम 303 (2) बी.एन.एस.,पोलीस ठाणे बीड शहर गु.र. नं 59/2025 कलम 303(2) बी.एन.एस
पोलीस ठाणे पेठ बीड गु.र.नं 190/2025 कलम 303 (2) बी.एन.एस
पोलीस ठाणे पेठ बीड गु.र.नं 299/2024 कलम 303 (2) बी.एन.एस
पोलीस ठाणे शिवाजीनगर गु.र.नं 403/2025 कलम 303 (2) बी.एन.एस. दरम्यान पकडलेल्या दोन्ही आरोपींना बीड शहर पोलिसांच्या स्वाधीन करण्यात आले आहे. ही कारवाई पोलीस अधीक्षक नवनीत कांवत, अप्पर पोलीस अधीक्षक सचिन पांडकर, स्थानिक गुन्हे शाखेचे शिवाजी बंटेवाड, यांचे मार्गदर्शनाखाली पोलीस उपनिरीक्षक श्रीराम खटावकर, पोलीस हवालदार, आनंद म्हस्के, विकास राठोड, सोगनाथ गायकवाड, राहुल शिंदे, बाळु सानप, अर्जुन यादव, आशपाक सय्यद, मनोज परजणे, विकी सुरवसे, चालक नितीन वडमारे, सुनिल राठोड सर्व नेमणुक स्थानिक गुन्हे शाखा बीड यांनी केली आहे.

बीड — वडवणी न्यायालयातील सहाय्यक सरकारी वकील ऍड विनायक एल चंदेल यांनी बुधवारी सकाळी वकिलांच्या चेंबरमध्ये गळफास घेऊन आत्महत्या केल्याच्या घटनेनंतर खळबळ माजली.
सात महिन्यापूर्वीच एड. विनायक चंदेल वय 45 वर्ष यांची सरकारी वकील म्हणून वडवणी न्यायालयात नियुक्ती झाली होती. चंदेल यांनी वकिलांच्या चेंबरमधील खिडकीच्या गजाला शालीच्या साह्याने गळफास घेऊन आत्महत्या केली. दहा-साडेदहाच्या सुमारास न्यायालयीन कर्मचारी व वकील कामकाजासाठी हजर झाले असता. ही बाब निदर्शनास आली. ही घटना समजताच सर्वत्र खळबळ माजली. या घटनेची माहिती मिळताच अप्पर पोलीस अधीक्षक चेतना तिडके वडवणी ठाण्याच्या सपोनी वर्षा व्हगाडे यांनी तात्काळ घटनास्थळी धाव घेतली. दरम्यान आत्महत्या केलेल्या वकिलाच्या खिशात सुसाईड नोट सापडली असून त्यातील मजकूर अद्याप समोर आला नाही. सात आठ महिन्याच्या कालावधीतच त्यांनी आपले जीवन संपवल्यामुळे सर्वत्र हळहळ व्यक्त होत असून चंदेल यांच्या आत्महत्येने खळबळ माजली.