देवेंद्र फडणवीस यांची घोषणा

मुंबई — श्री क्षेत्र भगवानगड ट्रस्ट परिसरातील वन विभागाची ४ हेक्टर जमीन भक्त निवास, रुग्णालय, प्रशिक्षण केंद्र आदींच्या उभारणीसाठी केंद्र सरकारकडून उपलब्ध करून देण्यात आली असून याबाबतची अधिसूचना केंद्रीय पर्यावरण व वन विभागाने प्रसिद्ध केली आहे.

माजी मंत्री आमदार धनंजय मुंडे यांनी यासाठी राज्याचे मुख्यमंत्री देवेंद्र फडणवीस यांच्या माध्यमातून सातत्याने पाठपुरावा केला होता, त्यास भगवान गडाच्या स्थापना दिनाच्या पूर्व संध्येस यश आले आहे.

गडाचे महंत न्यायचार्य डॉ. नामदेव शास्त्री यांनी अनेक वर्षांपासून ही जमीन हस्तांतरित होण्यासाठी मागणी केली होती.

विजयादशमी म्हणजेच भगवान गडाचा स्थापना दिवस, आज विजयादशमीच्या पूर्व संध्येला हा निर्णय घोषित झाल्याने गडाच्या भक्तांमध्ये आनंदाचे वातावरण असून, या निर्णयासाठी धनंजय मुंडे यांनी देशाचे पंतप्रधान नरेंद्र मोदी, केंद्रीय पर्यावरण व वन मंत्री भूपेंद्र यादव, त्याचबरोबर राज्याचे मुख्यमंत्री देवेंद्र फडणवीस यांचा गडाच्या सर्व भक्तांच्या वतीने आभार मानले आहेत.

बीड तालुक्यातील अतिवृष्टीने नुकसान झालेल्या गावांची केली पाहणी

बीड — मराठवाड्यासह बीड जिल्ह्यात अतिवृष्टी आणि ओल्या दुष्काळामुळे शेतकऱ्यांचे मोठ्या प्रमाणावर नुकसान झाले असून त्यांना हेक्टरी ५० हजार रुपयांची सरसकट मदत करावी, अशी मागणी राष्ट्रवादी काँग्रेस (शरदचंद्र पवार) गटाचे आमदार रोहित पवार यांनी केली आहे.

आ.रोहित पवार हे बुधवार दि.(०१) रोजी बीडमध्ये अतिवृष्टीने नुकसान झालेल्या गावांची पाहणी करण्यासाठी आले होते. त्याअगोदर त्यांनी बीडचे जिल्हाधिकारी यांचसोबत आढावा बैठक घेतली. यावेळी त्यांनी शेतकऱ्यांना हेक्टरी ५० हजार रुपयांची मदत करावी. त्यांना सरसकट नुकसान भरपाई द्यावी. शेतकऱ्यांना मदत करण्याची हेच योग्य वेळ असून शासनाने तात्काळ नुकसान भरपाई द्यावी अशी मागणी केली. कपिलधारवाडी येथे जाऊन नुकसान पाहणी केली. याठिकाणी रस्ते,जमीन व डोंगर खचले आहे. जमिनीला मोठ्या भेगा पडल्या आहेत. माळीणसारखी गंभीर घटना घडण्याची शक्यता असल्याने स्थानिक नागरिकांचे जीवन आणि संपत्ती धोक्यात आली आहे. याठिकाणी आ.रोहित पवार यांनी परिस्थितीची पाहणी करत पुनर्वसनाची गरज असल्याचे सांगितले. तसेच आपत्ती व्यवस्थापनाकडून संरक्षण भिंत बांधून देण्याची निर्देश दिले.
बीड तालुक्यातील हिंगणी खुर्द या गावात जाऊन नुकसानीची पाहणी केली व नागरिकांशी संवाद साधला. यावेळी स्थानिक नागरिकांनी आपल्या व्यथा मांडल्या व शासनाच्या माध्यमातून तात्काळ मदत मिळवून देण्याची मागणी केली.

आ.रोहित पवारांनी बीडच्या जिल्हाधिकाऱ्यांसोबत घेतली आढावा बैठक

बीड जिल्ह्यात अतिवृष्टीमुळे शेतकऱ्यांचे अतोनात नुकसान झाले आहे. जमिनीवरील माती वाहून गेली, घरात पाणी शिरून संसार उध्वस्त झाला, पिके नष्ट झाली – असे न भूतो न भविष्यति संकट शेतकऱ्यांवर ओढवले आहे. या कठीण प्रसंगी शेतकरी बांधवांसोबत ठाम उभे राहत, राष्ट्रवादी काँग्रेस पक्षाचे (शरदचंद्र पवार) प्रदेश सरचिटणीस तथा कर्जत-जामखेडचे आमदार रोहित पवार यांनी बीड जिल्हाधिकारी यांची भेट घेऊन शासनाने तातडीने व भरीव मदत द्यावी तसेच नागरिकांच्या पुनर्वसनाची गरज असून नागरिकांना शासनाच्या माध्यमात तात्काळ सुरक्षित ठिकाणी ठेवण्याची मागणी केली.

रोहित पवारांनी पुराच्या प्रवाहात वाहून गेलेल्या तरुणाच्या कुटुंबाची घेतली भेट

बीड मतदारसंघातील चौसाळा ते पिंपळगाव घाट गावाला जोडणाऱ्या रस्त्यावर अतिवृष्टीच्या काळात पुलावरून प्रवास करत असताना श्री. स्वप्निल विक्रम शिंदे हे दुर्दैवाने पुराच्या प्रवाहात वाहून गेले. अद्याप त्यांचा शोध सुरूच आहे. आ.रोहित पवार यांच्यासमवेत आ.संदीप क्षीरसागर यांनी त्यांच्या कुटुंबीयांची भेट घेतली. यावेळी प्रशासनाला शोध मोहिमेला गती द्यावी अशी विनंती रोहित पवार यांनी केली.

आ.संदीप क्षीरसागर यांचे प्रशासनाला कपिलधारवाडी आणि हिंगणी खुर्द या गावाचे पुनर्वसन करण्यासंदर्भात पत्र

आ.संदीप क्षीरसागर यांनी बीड तालुक्यातील कपिलधारवाडी येथे भूस्खलन झाल्याने रस्ते, जमीन आणि डोंगर खचल्याने माळीण सारखी दुर्घटना घडू शकते. तसेच हिंगणी खुर्द अतिवृष्टीने संपूर्ण गावाला पाण्याचा वेढा घातल्याने गावकरी मोठ्या प्रमाणात भयभीत झाले आहेत. त्यांच्या जीविताला धोका निर्माण झाला आहे. त्यामुळे गावाच्या पुनर्वसनासाठी महसूल आणि वन विभागाला परिपूर्ण प्रस्ताव सादर करण्याचे निर्देश दिले आहेत.

कपिलधारवाडी प्रश्न मा.अजित पवार यांची डॉ. ज्योती मेटे यांनी घेतली

गावात आणि परिसरात अनेक ठिकाणी रातोरात पडल्या भेगा

बीड — तालुक्यातील कपिलधार वाडी हे गाव डोंगराच्या कुशीत बसलेले आहे. या गावात आणि परिसरात अनेक ठिकाणी मोठ्या भेगा पडल्याचे पहावयास मिळत आहे. मागील काळात झालेला मुसळधार पाऊस आणि येणाऱ्या काळात परतीचा पाऊस पडल्यास या ठिकाणी माळीण सारखी दुर्घटना घडण्याची शक्यता आहे. गावकऱ्यांचे रात्रीतून स्थलांतर करण्यात आले असून भविष्यातील दुर्घटना टाळण्यासाठी प्रतिबंधात्मक उपाययोजना गरजेची आहे. यासाठी आज राज्याचे उपमुख्यमंत्री तथा बीड जिल्ह्याचे पालकमंत्री अजित दादा पवार यांची शिवसंग्राम अध्यक्ष डॉ. ज्योती विनायकराव मेटे यांनी भेट घेतली.

परतीच्या पावसाने मराठवाड्यासह बीड जिल्ह्यात हाहाकार माजवला आहे. जनजीवन विस्कळीत झाले आहे. शेतकऱ्यांचा हाता तोंडाशी आलेला घास अतिवृष्टीमुळे हिरावून गेला आहे. रस्ते पूल वाहून गेले आहेत. शेतकऱ्यांच्या शेतजमिनी देखील वाहून गेले आहेत. यातच बीड तालुक्यातील कपिलधार वाडी या गावाला भूस्खलनासारख्या संकटाला समोर जाण्याची वेळ आली आहे. या गावांमध्ये अनेक ठिकाणी जमिनींना भेगा पडल्या आहेत प्रशासनाने याची दखल घेत गावकऱ्यांना या ठिकाणाहून कपिलधार येतील मन्मथ स्वामी मंदिर येथे स्थलांतरित केले आहे. परंतु या गावकऱ्यांना कायमस्वरूपी दिलासादायक उपाययोजना करणे गरजेचे आहे.

शिवसंग्राम अध्यक्ष डॉ. ज्योती मेटे यांच्याशी संवाद साधून व्यथा मांडल्यानंतर लागलीच डॉक्टर ज्योती मेटे यांनी जिल्ह्याचे पालकमंत्री अजित दादा पवार यांच्याकडे तज्ञांमार्फत या गावाचे परिसराची पाहणी करण्यात येऊन यथोचित कार्यवाहीस्तव कृपया जिल्हाधिकारी यांस सुचित करावे तसेच गावकऱ्यांना आवश्यक ती मदत पुरविण्यात यावी आणि अतिवृष्टीमुळे ज्या गावातील रस्ते, पूल वाहून गेले आहेत त्या रस्ते व पुलांचे काम तत्काळ हाती घेण्यात यावे असे निवेदन सादर केले.