मुंबई — एससटी महामंडळाने आपल्या विविध मागण्यासाठी येत्या १३ ऑक्टोबरपासून आंदोलन करण्याचा इशारा दिला होता. असे असतानाच आता एसटी कर्मचाऱ्यांसाठी एक आनंदाची बातमी आली आहे. एसटी कर्मचाऱ्यांच्या सप्टेंबर महिन्याच्या पगारासाठी काल राज्य शासनाने ४७१.०५ कोटीचा निधी देण्यास मंजूरी दिली आहे.

त्यातच आता दिपावली सणासाठी आता सण उत्सव अग्रीम उचल देण्यासाठी मोठा निर्णय घेण्यात आला आहे.

एसटीच्या ८३ हजार कर्मचाऱ्यांचे सप्टेंबरचे वेतन मिळणार आहे. आता एसटी कर्मचाऱ्यांना दिवाळीचा सण तोंडावर आल्याने ऊत्सव अग्रीम उचल मिळण्याचाही मार्ग मोकळा झाला आहे. या वर्षाचा दिपावली हा सण दि.२१ ऑक्टोबर २०२५ दरम्यान साजरा करण्यात येणार आहे. एसटी महामंडळाने या संदर्भात एक पत्रक प्रसिद्ध केले आहे. त्यानुसार ज्या कर्मचाऱ्यांची रु. १२,५००/- उत्सव अग्रीम घेण्याची इच्छा आहे त्यांनी त्यांचे विभाग नियंत्रकांकडे अर्ज जमा करावेत. त्या अर्जाची तपासणी करुन पात्र कर्मचाऱ्यांची यादी १५ ऑक्टोबर २०२५ पर्यन्त या कार्यालयास पाठवावी असे आदेश देण्यात आले आहेत.

उत्सव अग्रीम मिळण्यासाठी कमाल मूळ वेतन मर्यादा रु.४३४७७/- इतकी ठेवण्यात आली आहे. याचा अर्थ ज्या कर्मचाऱ्यांचे मूळ वेतन रु. ४३४७७/- पेक्षा जास्त आहे अशा कर्मचाऱ्यांना उत्सव अग्रीम मिळणार नाही असेही महामंडळाने स्पष्ट केले आहे. शिवाय ज्या कर्मचाऱ्यांची सेवानिवृत्ती अग्रीम वाटपापासून १० महिन्यांच्या आत असेल अशा कर्मचाऱ्यांनी उत्सव अग्रीम अर्जाचा विचार करु नये असेही या पत्रकात म्हटले आहे. अग्रीम वाटपाकरीता आपल्या घटकास किती रक्कम लागणार आहे याची माहिती दि. १५ ऑक्टोबर २०२५ पर्यंत विभागीय लेखा अधिकारी राज्य परिवहनाला कळवावी असे या पत्रकात म्हटले आहे.विभागिय कार्यालयातील इच्छुक कर्मचाऱ्यांनी त्यांचे अर्ज हे संबंधित शाखा प्रमुख यांच्या मार्फतच पाठवावेत. स्वतंत्रपणे अर्ज सादर करु नयेत, ते स्वीकारले जाणार नाहीत असेही पत्रकात म्हटले आहे.

बहुसंख्येने उपस्थित राहण्याचे
अभिष्टचिंतन सोहळा आयोजन समितीचे आवाहन

ना. राजन पाटील यांची प्रमुख उपस्थिती

गेवराई — तालुक्याचे भाग्यविधाते माजीमंत्री शिवाजीराव (दादा) पंडित यांच्या ८८ व्या वाढदिवसानिमित्त शुक्रवार , दि.१० ऑक्टोबर रोजी सकाळी १० वा. शिवनगरी, र.भ.अट्टल महाविद्यालय, गेवराई येथे भव्य अभिष्टचिंतन सोहळ्याचे आयोजन करण्यात आले आहे. राजस्थानचे राज्यपाल हरीभाऊ (नाना) बागडे, श्री क्षेत्र नारायणगडाचे मठाधिपती ह.भ.प. शिवाजी महाराज, श्रीक्षेत्र चाकरवाडी संस्थानचे महंत ह.भ.प. महादेव महाराज, राज्य सहकार परिषदेचे अध्यक्ष ना. राजन पाटील यांच्या शुभहस्ते शिवाजीराव पंडित यांचा यावेळी सत्कार करण्यात येणार आहे. त्यानंतर काल्याचे कीर्तन आणि महाप्रसादाने कीर्तन महोत्सवाचा समारोप होणार असून यावेळी हजारोच्या संख्येने उपस्थित राहण्याचे आवाहन अभिष्टचिंतन सोहळा समितीने केले आहे.

गेवराई तालुक्याचे भाग्यविधाते आणि बीड जिल्ह्याच्या राजकारणातील भिष्माचार्य म्हणून ओळख असलेले ज्येष्ठ नेते शिवाजीराव (दादा) पंडित यांच्या ८८ व्या वाढदिवसानिमित्त शुक्रवार, दि.३ ऑक्टोबर पासून गेवराई शहरात श्रीमद्‌‍ भागवत कथा आणि भव्य किर्तन महोत्सवाचे आयोजन करण्यात आले आहे. भावरत्न समाधान महाराज शर्मा यांच्या मधूर वाणीतून सुरु असलेल्या भागवत कथेमुळे गेवराईचे वातावरण भक्तिमय झाले आहे. अनेक नामांकित किर्तनकारांची सेवा सप्ताहभर सुरु आहे.

शुक्रवार दि.१० ऑक्टोबर रोजी सकाळी १० वा. राजस्थानचे राज्यपाल हरीभाऊ (नाना) बागडे यांच्या हस्ते माजी मंत्री शिवाजीराव (दादा) पंडित यांचा अभिष्टचिंतन सोहळा समितीच्या वतीने भव्य सत्कार आयोजित करण्यात आला आहे. यावेळी श्री क्षेत्र नारायणगड संस्थानचे मठाधिपती ह.भ.प.शिवाजी महाराज, श्री क्षेत्र चाकरवाडीचे ह.भ.प. महादेव महाराज यांच्यासह साधु, संत-महंत आणि गेवराई तालुक्यातील वारकरी सांप्रदायात काम करणारे किर्तनकार, गायक, वादक यांच्यासह मान्यवर उपस्थित राहणार आहेत.

काल्याचे कीर्तन आणि महाप्रसादाने होणार कीर्तन महोत्सवाचा समारोप

माजीमंत्री शिवाजीराव (दादा) पंडित यांच्या अभिष्टचिंतन सोहळ्यात गेवराई विधानसभा मतदार संघातील सर्व साधु, संत-महंत, किर्तनकार यांचाही हृदय सत्कार अभिष्टचिंतन सोहळा समितीच्यावतीने करण्यात येणार आहे. वाढदिवसानिमित्त होणाऱ्या भव्य सत्कार समारंभानंतर ह.भ.प.शिवाजी महाराज यांचे काल्याचे किर्तन होणार असून त्यानंतर महाप्रसाद वाटप केला जाणार आहे भाविक भक्तांनी त्याचा लाभ घेण्याचे आवाहनही आयोजन समितीने केले आहे.

कार्यकर्ते एकत्र येऊन
करत आहेत दादांचे अभिष्टचिंतन

शिवाजीराव पंडित आणि शिवछत्र परिवारावर प्रेम करणाऱ्या कार्यकर्त्यांनी एकत्र येवून अभिष्टचिंतन सोहळा समितीच्या माध्यमातून मागील तीन वर्षांपासून किर्तन महोत्सवाचे यशस्वी आयोजन केले आहे. र.भ.आट्टल महाविद्यालयाच्या मैदानावर उभारलेल्या शिवनगरीत गेल्या सप्ताहभर सुरु असलेल्या किर्तन महोत्सवाला भाविक भक्तांनी मोठा प्रतिसाद दिला आहे. याप्रसंगी हजारोंच्या संख्येने उपस्थित राहण्याचे आवाहन अभिष्टचिंतन सोहळा समितीच्या समितीच्या वतीने करण्यात आले आहे.

बीड — नुकत्याच झालेल्या अतिवृष्टीमुळे अनेक शेतकरी व शेतमजुरांचे मोठे नुकसान झाले आहे. पूरग्रस्तांच्या मदतीसाठी ’नवचेतना ’ सर्वांगीण विकास केंद्र सरसावले असून बीड जिल्ह्यातील दीड हजार पूरग्रस्तांना संसार उपयोगी वस्तू व किराणा साहित्याचे वाटप करण्यात आले आहे. बुधवारी बीड तालुक्यातील हिंगणी बुद्रुक येथील 65 गरजूंना संसार उपयोगी साहित्य व किराणा किट चे वाटप करण्यात आले. यावेळी संस्थेच्या प्रमुख मनीषा घुले यांची विशेष उपस्थिती होती.

मागील पंधरवड्यात मराठवाड्यात बहुतां जिल्ह्यामध्ये मोठ्या प्रमाणात अतिवृष्टी होऊन अनेक शेतकऱ्यांच्या जमिनी खरडून गेल्या होत्या, अनेक शेतकऱ्यांच्या शेतात आजही पाणी साचलेले आहे. हातात तोंडाशी आलेली पिके आसमानी संकटामुळे उध्वस्त झाली आहेत. या सगळ्या परिस्थितीमुळे शेतकरी व शेतमजुरांवर मोठे संकट ओढवले आहे. या बिकट परिस्थितीमध्ये बीड मधील नवचेतना सर्वांगीण विकास केंद्राच्या माध्यमातून सामाजिक कार्यकर्त्या मनीषा घुले यांनी शेतकरी व शेतमजूर यांना मदतीचा हात दिला आहे .

बीड जिल्ह्यात अति पावसामुळे झालेल्या नुकसानीचे प्रशासन पंचनामे करत आहे शासनाची मदत येण्यासाठी वेळ जाणार आहे तोपर्यंत जिल्ह्यातील गोरगरीब नागरिकांना मदत व्हावी हा उद्देश डोळ्यासमोर ठेवून नवचेतना सर्वांगीण विकास केंद्राच्या वतीने मदत केली जात आहे मराठवाड्यातल्या विविध भागांमध्ये अनेक संस्था शेतकरी व शेतमजुरांच्या मदतीसाठी धावून आलेल्या आहेत अनेक ठिकाणी मदत पोहोचवण्याचा प्रयत्न केला जात आहे याचाच एक भाग म्हणून नवचेतना सर्वांगीण विकास केंद्राच्या वतीने बीड तालुक्यातील गरजवंत शेतकरी व शेतमजूर यांना मदत केली जात आहे.

नवचेतना सर्वांगीण विकास केंद्राच्या वतीने सामाजिक कार्यकर्त्या मनीषा घुले यांनी बीड जिल्ह्यातील विविध भागात एकूण दीड हजार पूरग्रस्त नागरिकांना संसार उपयोगी वस्तू व किराणा साहित्याचे वाटप केले आहे. गेवराई सह इतर तालुक्यांमध्ये देखील संस्थेच्या वतीने मदतीचा हात गरजूंना दिला आहे. यामध्ये बुधवारी बीड तालुक्यातील हिंगणी बु. येथील गरजूंना संसार उपयोगी वस्तू व किराणा किटचे वाटप करण्यात आले. यावेळी सामाजिक कार्यकर्त्या मनीषा घुले, सुरज वैष्णव, दत्ता घुले, बबनदास वैष्णव, आदींची उपस्थिती होती.