फलटण — बीडच्या कोठरबन येथील डॉ.संपदा मुंडे या वैद्यकीय अधिकारी म्हणून फलटण येथील उपजिल्हा रुग्णालयात कार्यरत असताना पोलीस निरीक्षक गोपाल बदने व पोलीस कर्मचारी प्रशांत बनकर यांनी चार वेळा बलात्कार करून मानसिक छळ केला. तसेच पोस्टमार्टम रिपोर्ट बदलण्यासाठी खासदाराच्या पीए कडून दबाव येत असल्याची सुसाईड नोट आपल्या हातावर लिहून आत्महत्या केल्याची खळबळ जनक घटना घडली आहे.
मानसिक तसेच लैंगिक अत्याचाराला बळी पडलेल्या डॉ संपदा मुंडे यांचे वडील श्रीकृष्ण श्रीपती मुंडे (रा. कोठारबन, सध्या रा. कवडगाव, ता. वडवणी, जि. बीड) येथील रहिवासी असून शेती करतात. शेती करून मुलीचे शिक्षण पूर्ण केले होते. डॉ. संपदा मुंडे यांचे माध्यमिक व उच्च माध्यमिक शिक्षण ढेकणमोहा येथे झाले. तर वैद्यकीय शिक्षण हे एमबीबीएस शिक्षण जळगाव येथे पूर्ण केले.सातारा फलटण येथे 2022 पासून उपजिल्हा रुग्णालयात वैद्यकीय अधिकारी म्हणून कार्यरत होत्या. पहिलीच पोस्टिंग फलटण येथे झाली होती.
गुरुवारी रात्री संपदा मुंडे या डॉक्टरने फलटण शहरातील एका हॉटेलमध्ये गळफास लावून आत्महत्या केली. ही घटना उघडकीस आल्यावर पोलिसांनी मृतदेह खाली उतरला. सुरवातीला हा आत्महत्या कोणत्या कारणावरुन केली याचा तपास सुरू असताना आत्महत्या केलेल्या महिला डॉक्टरच्या हातावर सुसाईड नोट पहायला मिळाली. त्यामध्ये असे नमूद केले आहे की “पोलिस निरीक्षक गोपाल बदने याने माझ्यावर चारवेळा बलात्कार केला. तर पोलिस कर्मचारी प्रशांत बनकर मला सतत मानसिक त्रास दिला” या धक्कादायक सुरसाईट नोटनंतर पोलिस प्रशासन आणि आरोग्य विभागात खळबळ उडाली
या प्रकरणात आता मृत डॉक्टरच्या आतेभावाने माध्यमांशी बोलताना सांगितलं की, “मागील वर्षभरापासून संपदावर राजकीय तसेच पोलिसांकडून दबाव टाकण्यात येत होता. तिला चुकीचे आणि खोटे पोस्टमॉर्टम रिपोर्ट तयार करण्यास भाग पाडले जात होते. ती घरी सगळं सांगत नव्हती, पण आपल्या बहिणीला सगळी माहिती देत होती.” त्याचबरोबर त्यांनी सांगितलं की, “या त्रासाला कंटाळून तिनं हे टोकाचं पाऊल उचललं. जून महिन्यात तिनं या प्रकरणाची तक्रार डीवायएसपींकडे केली होती, परंतु अद्याप कोणतीही ठोस कारवाई झालेली नाही.”

आतेभावाने आणखी गंभीर आरोप करत सांगितलं की, “त्या तक्रारीत संपदाने एका खासदाराचे, त्यांच्या दोन पीएंचे आणि काही पोलिसांचे नाव स्पष्टपणे नमूद केले होते. या सर्वांचा राजकीय दबाव तिला सतत जाणवत होता.” त्यामुळे आत्महत्येच्या या प्रकरणामागे राजकीय आणि पोलीस साखळीतील दबाव हे महत्त्वाचे कारण असल्याचं कुटुंबीयांचे म्हणणे आहे.

या प्रकरणात डॉ. संपदा मुंडे यांच्या कुटुंबीयांनी उच्चस्तरीय चौकशीची मागणी केली आहे. “माझ्या बहिणीला न्याय मिळावा, या प्रकरणातील दोषींना शिक्षा व्हावी आणि खोट्या रिपोर्टसाठी दबाव टाकणाऱ्यांना उघड करावं,” अशी मागणी डॉ. मुंडे यांच्या आतेभावाने केली आहे. दरम्यान, पोलिसांकडून या प्रकरणाचा तपास सुरू असून, आत्महत्येपूर्वी सापडलेली माहिती, तिच्या मोबाईलमधील चॅट्स आणि तक्रारींचा तपास तपशीलवार केला जात आहे. या घटनेमुळे वैद्यकीय क्षेत्रात आणि पोलीस विभागातही चिंतेचे वातावरण निर्माण झाले आहे.

बीड — सावरगाव घाट मध्ये पार पडलेल्या दसरा मेळाव्यात एकाच्या गळ्यातील सोन्याची साखळी अज्ञात चोरट्याने लंपास केली होती.याप्रकरणी अंमळनेर पोलीस ठाण्यात अज्ञात चोरट्या विरोधात गुन्हा दाखल झाला होता. यानंतर स्थानिक गुन्हे शाखेने तपास करून आरोपीला जेरबंद केले आहे.

पाटोदा तालुक्यातील रोहतवाडी येथील लहू काशिनाथ नागरगोजे हे दसरा मेळावा निमित्त सावरगाव या ठिकाणी आले होते. परंतु या ठिकाणी आल्यानंतर अज्ञात चोरट्याने त्यांच्या गळ्यातील सोन्याची चैन लंपास केली. यानंतर नागरगोजे यांच्या फिर्यादीवरून अंमळनेर पोलीस ठाण्यात अज्ञात चोरट्या विरोधात गुन्हा नोंद करण्यात आला होता. यानंतर स्थानिक गुन्हे शाखेने या संदर्भात तपास सुरू केला. खबऱ्या मार्फत सोन्याची चैन विकण्यासाठी चोर बीड मध्ये थांबला आहे. अशी माहिती मिळाल्यानंतर स्थानिक गुन्हे शाखेने चोरटा आकाश सोपान ससाणे रा.राजूरी ता.जि.बीड यास ताब्यात घेतले. त्याच्याकडुन दोन तोळ्याची सोन्याची साखळी जप्त करण्यात आली.ही कारवाई पोलीस अधीक्षक नवनीत काॅंवत, अप्पर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे प्रमुख शिवाजी बंटेवाड, सहा. पोलीस निरीक्षक धनराज जारवाल, आशोक दुबाले, सोमनाथ गायकवाड, आनंद मस्के, बळी सानप, यादव, सिध्देश्वर मांजरे यांनी केले. संबंधित आरोपीला अंमळनेर पोलिसांच्या ताब्यात दिले.

जालना — महानगर पालिकेचे आयुक्त तथा प्रशासक संतोष खांडेकर याला तब्बल दहा लाख रुपयाची लाच घेताना लाचलुचपत प्रतिबंधक विभागाच्या पथकाने रंगेहात पकडले ही कारवाई गुरुवारी 16 ऑक्टोबरला मोतीबाग परिसरात असलेल्या त्यांच्या शासकीय निवासस्थानी सायंकाळी उशिरा करण्यात आली.
मिळालेल्या माहितीनुसार, एका तक्रारदाराकडून प्रशासकीय काम सोडवून देण्यासाठी आयुक्तांनी दहा लाख रुपयांची लाच मागितली होती. तक्रारदाराला लाच देण्याची इच्छा नसल्याने त्यांनी याबाबत लाचलुचपत प्रतिबंधक विभागाकडे अधिकृत तक्रार दाखल केली. त्यानंतर लाच लुचपत प्रतिबंधक विभागाच्या पथकाने सापळा रचून ही कारवाई केली.कारवाई दरम्यान आयुक्तांनी कथित लाच स्वीकारल्याचे स्पष्ट झाल्यानंतर त्यांना तात्काळ ताब्यात घेण्यात आले. सध्या या प्रकरणाचा तपास लाचलुचपत प्रतिबंधक विभागाच्या अधिकाऱ्यांकडून सुरू आहे. या प्रकरणानंतर जालना महानगरपालिकेत आणि शहरात चर्चेला उधाण आले.आयुक्त स्तरावरील अधिकाऱ्यावर झालेल्या कारवाईमुळे प्रशासनातील पारदर्शकतेवर मोठा प्रश्नचिन्ह निर्माण झाले आहे. नागरिकांनी ही कारवाई स्वागतार्ह असल्याची प्रतिक्रिया दिली आहे. तर कर्मचारी वर्गात मात्र खळबळ माजली आहे. रात्री उशिरापर्यंत गुन्हा दाखल करण्याची प्रक्रिया सुरू होती.
दोन वर्षांपूर्वी जालना नगरपालिकेचे महानगरपालिकेत रुपांतर करण्यात आले. दरम्यान, स्थानिक स्वराज्य संस्थांवर प्रशासक राज आल्यामुळे जालना महानगरपालिकेचे प्रशासक तथा आयुक्त म्हणून तत्कालीन मुख्याधिकारी संतोष खांडेकर यांचीच नियुक्ती करण्यात आलेली होती. जालना महानगरपालिकेचे पहिले आयुक्त होण्याची संधीही खांडेकर यांना मिळाली होती. मात्र, गुरुवारी ते लाच घेताना पकडल्या गेल्यामुळे पहिलेच आयुक्त लाचखोरीत अडकले. यामुळे उलटसुलट चर्चा सुरू झाली आहे.