बीड — गेवराई विधानसभेची जागा महायुतीतील कोणत्या पक्षाला सुटेल असा प्रश्न निर्माण झाला होता. मात्र राष्ट्रवादी काँग्रेसचे अजित पवार गटाने आज जाहीर केलेल्या तिसऱ्या यादीत उमदा चेहरा असलेल्या विजयसिंह पंडित यांची उमेदवारी जाहीर केली आहे.

गेवराईतील लढतीचे चित्र आज स्पष्ट झाले असून शिवसेना ठाकरे गटाचे बदामराव पंडित मैदानात उतरलेले आहेत. त्याबरोबरच आज राष्ट्रवादी काँग्रेसच्या अजित पवार गटाकडून विजयसिंह पंडित यांची उमेदवारी जाहीर झाल्यानंतर ही लढाई तुल्यबळ पंडितांमध्ये होणार असल्याचे सध्या तरी दिसत आहे. दरम्यान भाजपाला राम राम केल्यानंतर आमदार लक्ष्मण पवार यांनी निवडणूक लढवणार नसल्याचं जाहीर केलं होतं. मात्र ते देखील निवडणुकीच्या मैदानात अपक्ष उतरून लढतीत रंग भरण्याच काम करतील का? असा प्रश्न निर्माण झालेला आहे.
आज राष्ट्रवादी काँग्रेस अजित पवार गटाने तिसरी यादी जाहीर केली असून गेवराईतून विजयसिंह पंडित तर फलटण मधून सचिन सुधाकर पाटील, निफाड मधून दिलीप काका बनकर तसेच पारनेर मधून काशिनाथ दाते यांची उमेदवारी जाहीर करण्यात आली आहे.

माजलगाव — राष्ट्रवादी काँग्रेस अजित पवार गटाचे उमेदवार जाहीर झाला असला तरी शरद पवार गटाच्या उमेदवाराच्या नावाची प्रतीक्षा आहे. त्यातच पंकजा मुंडे यांचे समर्थक रमेश आडसकर यांनी तुतारी हाती घेतली आहे. त्यामुळे त्यांच्या नावावर शिक्का मुहूर्त होईल अशी शक्यता वर्तवली जात आहे.

गेल्या एक वर्षात मराठा आंदोलनामुळे माजलगाव मतदार संघ ढवळून निघाला होता.आ. प्रकाश सोळंके यांनी मराठा आरक्षण आंदोलना बाबत एका कार्यकर्त्याशी फोनवर बोलताना अपशब्दांचा वापर केला होता. ही ऑडिओ क्लिप व्हायरल झाल्यानंतर त्याचे पडसाद मोठ्या प्रमाणावर उमटले होते. लोकसभा निवडणुकीत देखील जरांगे फॅक्टरचा प्रभाव माजलगाव मतदार संघात दिसून आला. माजलगाव मतदार संघात शरद पवार गटाकडून उमेदवारी मिळावी यासाठी अनेक जण प्रयत्नशील असल्याचे पाहायला मिळाले.दोन दिवसांपूर्वी अजित पवार गटाच्या राष्ट्रवादी काँग्रेसकडून आ. प्रकाश सोळंके यांची उमेदवारी जाहीर करण्यात आली. परंतु शरद पवार गटाकडे अनेक जण इच्छुक असल्यामुळे पहिले यादीत माजलगाव मतदार संघातील उमेदवाराचे नाव जाहीर झाले नव्हते. यातच शुक्रवारी रमेश आडसकर यांचा शरद पवार गटात प्रवेश झाल्याने त्यांची उमेदवारी निश्चित मानली जात आहे.
रमेश आडसकर हे गोपीनाथराव मुंडे व पंकजा मुंडे यांचे समर्थक मानले जातात. मागील विधानसभा निवडणुकीत मतदारसंघा बाहेरील असताना देखील केज व परळी मतदारसंघातील भाजपच्या उमेदवाराला फायदा व्हावा म्हणून रमेश आडसकर यांना माजलगावची उमेदवारी जाहीर झाली होती. नवखे असताना रमेश आडसकर यांनी चांगली फाईट दिली. त्यांचा अल्पमताने पराभव झाला होता. महायुतीमध्ये माजलगाव मतदार संघ हा राष्ट्रवादी काँग्रेसला सुटल्यामुळे रमेश आडसकर यांना पक्ष बदलल्याशिवाय पर्याय नव्हता. त्यामुळे त्यांनी शरद पवार यांची जवळीक करत आज शरद पवार गटात प्रवेश केला. मतदारसंघातील राजकीय गणिते पाहता त्यांची उमेदवारी फिक्स मानली जात आहे. मात्र, आडसकर यांनी ‘तुतारी’ हाती घेत राष्ट्रवादी शरद पवार गटात प्रवेश केल्यामुळे पंकजा मुंडे यांना हा मोठा धक्का मानला जात आहे.

बीड — जिल्ह्याच्या राजकारणात गेल्या चार दशकाहून अधिक काळापर्यंत क्षीरसागर घराण्याचा “शब्द”परवलीचा मानला गेला. कार्यकर्त्यांचा राबता हा बंगल्यावर कायम असायचा निवडणुका आल्या की त्याला अक्षरशः भरती यायची मात्र घरात बेकीच राजकारण निर्माण झाल्यामुळे बीडच्या सारीपाटावर या निवडणुकीत मात्र क्षीरसागरांना आतापर्यंत डावललं गेल्याचा चित्र पाहायला मिळतं. भूमिका स्पष्ट नसल्यामुळे जयदत्त क्षीरसागर संधी कोणाकडे मिळते यावर लक्ष ठेवून आहेत. तर संदीप क्षीरसागर एकनिष्ठतेचं फळ मिळेल या आशेवर विसंबून आहेत.योगेश क्षीरसागर देखील अनिश्चिततेच्या हिंदोळ्यावर झोके घेत असल्याचे सध्यातरी पाहायला मिळत आहे. कधी नव्हे ते बंगला अलग थलग पडल्याचं तर दिसतच आहे पण अनेक वावड्या नुसत्याच घोंगावत आहेत.

केशरबाई क्षीरसागर यांच्या काळापासून जिल्ह्याच्या राजकारणात बंगल्याच महत्व जयदत्त क्षीरसागर यांच्या पर्यंत कायम राहिल्या गेलं. जिल्ह्यातील प्रत्येक विधानसभा मतदारसंघात क्षीरसागरांची ताकद कायम राहिली गेली. त्यामुळे त्यांना वजा करून मतदार संघाच गणित मांडणं मी मी म्हणणाऱ्या धुरंधर राजकारण्याला देखील कधीच जमलं नाही. ही बीडची परिस्थिती माहिती असल्यामुळे ते ज्या पक्षात राहिले त्या पक्षाने देखील कधीच क्षीरसागर यांचा उपमर्द होईल अशी कृती होऊ दिली नाही. उलट त्यांना विचारात घेऊनच मतदार संघाची त्यातील उमेदवारांची आखणी केली जायची. प्रशासनावर असलेली मजबूत पकड जनतेशी जोडली गेलेली नाळ यामुळे पराभव स्वीकारावा लागला असला तरी क्षीरसागरांच वलय त्या काळातही तितकच महत्त्वाचं राहिला गेलं. त्यामुळे अडकलेलं प्रत्येक काम हे बंगल्यावर गेलं तर होणारच ही आशा कायम जनतेच्या मनात असायची परिणामी निवडणुका असो अथवा नसो कार्यकर्त्यांसह समर्थकांची गर्दी बंगल्यात पाहायला मिळायची. एवढच की निवडणुकीत त्याला उधाण आलेलं असायचं‌. हा जवळपास 40 – 45 वर्षाचा इतिहास आहे. मात्र कालाय तस्मै नमः घरातील प्रत्येकाचीच राजकीय महत्त्वकांक्षा जागी झाली अन घराला घरघर लागली. 2019 च्या निवडणुकीत त्याचा परिणाम जाणवला गेला जयदत्त क्षीरसागर यांना पुतण्याकडूनच निसटता पराभव स्वीकारावा लागला. तसं काका पुतण्याच्या राजकारणाची समाजकारणाची पद्धती बदलली गेली. यातून बंगल्याचे महत्व कमी होऊ लागलं. जसजसं निवडणूक जवळ येऊ लागली तसं तसं बीडच्या नगरपालिकेवर अधिराज्य गाजवणाऱ्या भारत भूषण क्षीरसागर यांच्या मुलाची राजकीय महत्त्वकांच्या देखील वाढली गेली. त्याने देखील नवे राजकीय डावपेच निवडणूक आखाड्यात उतरण्यासाठी आखायला सुरुवात केली. त्यामुळे एकाच घरातून विधानसभा उमेदवारीसाठी वेगवेगळ्या पक्षातून का होईना तिघांची दावेदारी केली जाऊ लागली. जयदत्त क्षीरसागर यांनी राज्याच्या राजकारणाची बदलती समीकरणे पाहून वेट अँड वॉच असं म्हणत भूमिका स्पष्ट केली नाही.कुठल्याही राजकीय पक्षाशी त्यांनी बांधील की जपली नाही. कदाचित ते पूर्वीच्या आपलं जनतेवर असलेलं वर्चस्व आपल्याला तारुन नेईल. राजकीय पक्ष आपल्याला पायघड्या घालतील अशी अपेक्षा कदाचित त्यांना असावी. ती आता फोल ठरू लागल्याचं दिसू लागला आहे. काहीशी अशीच अवस्था संदीप क्षीरसागर यांची देखील आहे. पक्ष फुटीच ग्रहण लागल्यानंतर शरद पवारांची त्यांनी साथ सोडली नाही. लोकसभा निवडणुकीत मातब्बर समजल्या जाणाऱ्या पंकजा मुंडे यांचा भावाची साथ मिळवून देखील पराभव करून विजयाची माळ पवारांच्या गळ्यात घालता आली. याच एकनिष्ठतेचा फळ आपल्याला मिळेल असा आशावाद “गृहीत” धरला गेला. राजकारणात “गृहीत”या शब्दाला फारसा अर्थ नसतो. हे मात्र संदीप क्षीरसागर यांना कळालं नाही. राज्याच्या राजकारणात शरद पवारांसारखं व्यक्तिमत्व कधी काय डावपेच अखेल त्यात कोण चित पट होईल हे कुणालाच सांगता आलं नाही. हा इतिहास संदीप क्षीरसागरांना लक्षात राहिला नाही. त्याहूनही वेगळी स्थिती डॉ.योगेश क्षीरसागर यांची आहे. त्यांची मदार सर्वस्वी दुसऱ्यावर अवलंबून आहे. दुसऱ्यावर विसंबला त्याचा कार्यभाग बुडाला ही जुनी म्हण अजूनही बदलली नाही. धनंजय मुंडे, पंकजा मुंडे यांच्यावर ते विसंबून आहेत. वास्तविक पाहता बीडची जागा शिवसेनेच्या शिंदे गटालाच मिळाली पाहिजे यासाठी राष्ट्रवादी अजित पवार गटासोबत रस्सीखेच सुरू आहे. त्यामुळे शिंदे गटाला जागा सुटली तर योगेश क्षीरसागरांचे भवितव्य अंधारात जाणार आहे. तसंही उमेदवारी मिळाली तरी त्यांचा जनसंपर्क मतदारसंघात कमीच आहे.
एकंदरच क्षीरसागर घराण्याचे तीन मल्ल निवडणूक आखाड्यात उतरण्यासाठी तेल लावून सज्ज असले तरी वरिष्ठांच्या खेळीने मैदानात उतरण्याआधीच चितपट होतात की काय? याकडे जिल्ह्याचे लक्ष लागले आहे. यातील संदीप क्षीरसागर याची  उमेदवारी निश्चित मानली जात आहे. जयदत्त क्षीरसागर यांच्या राष्ट्रवादी काँग्रेस शरद पवार गटात प्रवेश करण्याच्या वावड्या उडत आहेत. तर बीडची जागा आपल्याच पक्षाला मिळावी यासाठी पक्षश्रेष्ठींच्या खेळीत योगेश क्षीरसागरांची कोंडी झाली आहे.तरी बीडच्या राजकारणात महत्त्वाचं राजकीय घराणं समजल्या जाणार क्षीरसागर घराण्यातील प्रत्येक नेता अनिश्चिततेच्या हिंदोळ्यावर झुलत असल्याचं पाहायला मिळत आहे.