बीड — पेशवाईची वस्त्र अंगावर यावीत यासाठी रघुनाथराव पेशव्यांनी नारायणराव पेशव्यांचा घात केला होता. याच इतिहासाची पुनरावृत्ती माजलगाव मध्ये प्रकाश दादा सोळंके यांनी केली. आरक्षण आंदोलनात सोळंकेंची भूमिका वादग्रस्त ठरली.जे जातीचे झाले नाहीत पुतण्याचे झाले नाहीत ते गोरगरीब जनतेचे भलं कसं करणार? असा मतप्रवाह जनतेत बनल्याने प्रकाश दादांसाठी धोक्याची घंटा वाजू लागली आहे.

प्रचाराचा नारळ फोडून पुरुषोत्तमाच्या साक्षीने डोळ्यात अश्रू आणणाऱ्या प्रकाश सोळंके यांचे मगरीचे अश्रू म्हणून गणना होऊ लागली आहे.
प्रत्येक वादा मतदार संघाला भकास करणारा आहे.राजकारणी हा कलाकार असतो;रडून केलेलं कर्म धुण्याचा प्रयत्न करत जनतेला मूर्ख बनवायच असतं याच हातखंड्याचा वापर सोळंकेंनी केला.प्रत्येक वेळी मतदारांनी संधी दिली.यामुळे राजकीय अनुभवाने त्यांच्यात कोडगेपणा इतका आला की अक्षरशःभावनाच संपल्या गेल्या. विकासाची वाट लावत त्यांनी स्वतःची सरंजामशाही निर्माण केली. मात्र लोकशाहीत असं होत असतं असं म्हणून जनतेने प्रत्येक वेळी दिलेली संधी जनतेच्या विकासाला घातक ठरली. त्यांच्या याच कोडगेपणातून मराठा आरक्षण आंदोलनाच्या काळात सगळ्यात वादग्रस्त ठरलेलं व्यक्तिमत्व म्हणून आपली ओळख प्रकाश सोळंके यांनी निर्माण केली. समाजात त्यांच्या वागणुकीमुळे प्रचंड चिडही निर्माण झाली. पण हा माझा शेवटचा कार्यकाळ आहे.असं म्हणून जनतेच्या मनात पेटलेली विरोधाची भावना त्यांनी शांत केली. हे करताना प्रकाश दादांनी आपला नवा राजकीय डाव खेळत समाजात असलेली आग शांत करण्यासाठी पुतण्याचा वापर केला. आपला राजकीय उत्तराधिकारी जाहीरही करून टाकला. मात्र ऐनवेळी राजकीय सारीपाटावर चाली खेळत पुतण्याच्या पाठीत खंजीर खुपसत “पेशवाईची आठवण करून दिली. पेशवाईत देखील पेशवाईची राज वस्त्र आपल्याला मिळावीत यासाठी रघुनाथराव पेशव्यांनी नारायणराव पेशव्यांचा असाच घात केला होता. आजही इतिहासाची पानं चाळली तर “काका मला वाचवा” ही हाक ऐकायला मिळते. “नुसता काका मला वाचवा”ही हाक कानी पडताच महाराष्ट्राच्या जनतेच्या डोळ्यासमोर पेशवाई चा इतिहास उभा राहतो. धोका, दगाबाजी साठी हे उदाहरण आवर्जून आजही दिलं जातं. प्रकाश सोळंके च्या बाबतीत देखील “ध”चा “मा” झाल्याचं पाहायला मिळालं.
जे प्रकाश दादा सोळंके प्रत्येक वेळी जनतेच्या भावनेशी खेळून त्यांची वाट लावण्यात वाकबगार झाले. ते कधी स्वार्थापुढे जनतेचे ही झाले नाहीत. स्वतःच्या जातीचे देखील झाले नाहीत. स्वतःच्या भावाने “धैर्यशील सोळंके काकांनी” त्याग करून प्रकाशदादांची पाठराखण केली.त्यांच्या मुलाच्या भवितव्य घडवण्याची वेळ आली त्यावेळी धाकट्या भावासोबतच पुतण्याच्या सोबत देखील दगाबाजी केली. एवढं करूनही धैर्यशील काकांनी धैर्याचा परिचय देत गप्प बसण्याचा मार्ग स्वीकारला. त्याचा परिणाम देखील प्रकाश सोळंकेवर यत्किंचितही झाला नाही. ते प्रकाशदादा माजलगावकरांच्या अंधारलेल्या वाटा म्हातारपणी म्हणे प्रकाशमान करणार आहेत. उमेदीच्या काळात मतदार संघाकडे त्यातील जनतेच्या भल्याकडे ढुंकूनही बघितले नाही. ते दादा आता शेवटच्या काळात जनतेचा भलं करणार आहेत. हे सांगूनही विश्वास कसा ठेवायचा? असा प्रश्न जनतेपुढे निर्माण झाला आहे. जातीचे न होणारे दादा, पुतण्याचे झाले नाहीत ते जनतेचे गोरगरिबांचे कसे होणार?
जाता जाता एकदा माजलगावची उरली सुरली सुद्धा वाऽऽट ते लावणार? असा मतप्रवाह सुरू झाल्याने प्रकाश दादांसाठी धोक्याची घंटा वाजू लागली आहे.

सभेला मोठ्या संख्येने उपस्थित राहा-आ.संदीप क्षीरसागर

बीड — बीड विधानसभा मतदार यांनी मतदारसंघातून महाविकास आघाडीचे उमेदवार आ.संदीप क्षीरसागर यांच्या विजय निश्चिततेसाठी राष्ट्रवादी काँग्रेस पार्टी (शरदचंद्र पवार) चे अध्यक्ष, महाविकास व इंडिया आघाडीचे प्रमुख नेते खा.शरदचंद्र पवार यांची बीड शहरात शनिवारी (दि.९) रोजी छत्रपती संभाजी महाराज क्रीडांगण येथे जाहीर प्रचार सभा होणार आहे. याबरोबरच खा. शरद पवार बीडमध्ये मुक्काम करून आपले डावपेच खेळणार असल्याने संदीप क्षीरसागर यांच्या विजयावर शिक्कामोर्तब होणार आहे. या मुक्कामात बीड जिल्ह्यात अनेक राजकीय भूकंप होण्याची शक्यता वर्तविली जात आहे.या सभेला मोठ्या संख्येने उपस्थित रहा असे आवाहन आ.संदीप क्षीरसागर यांनी केले आहे.

राष्ट्रवादी काँग्रेस पक्षात फूट पडल्यानंतर बीड जिल्ह्यात सगळे आमदार आणि पुढारी सत्तेत सहभागी झाले. परंतु जिल्ह्यात एकमेव निष्ठावंत आमदार संदीप क्षीरसागरांनी पवार साहेब व आपल्या पक्षाची साथ सोडली नाही. याच एकनिष्ठतेचे आणि आपली भूमिका व विचार न सोडण्याचे फळ म्हणून आ.संदीप क्षीरसागर यांना दुसर्‍यांदा संधी मिळाली आहे. दरम्यान राष्ट्रवादी काँग्रेस पार्टी (शरदचंद्र पवार), भारतीय राष्ट्रीय काँग्रेस, शिवसेना (उध्दव बाळासाहेब ठाकरे) व मित्रपक्षांची महाविकास आघाडी यांचे अधिकृत उमेदवार असलेले संदीप क्षीरसागर यांच्या प्रचारासाठी खा.शरदचंद्र पवार यांची  बीड शहरातील छत्रपती संभाजी महाराज क्रीडांगण येथे शनिवार दि. 9 नोव्हेंबर रोजी सायंकाळी ६:०० वाजता भव्य जाहीर सभा होणार आहे. या सभेच्या तयारीची पाहणी संदीप क्षीरसागर यांनी आज करत प्रसार माध्यमांशी देखील संवाद साधला. यावेळी त्यांनी शरद पवारांच्या मुक्कामामुळे बीड जिल्ह्यातील राजकीय समीकरण प्रचंड बदलणार असल्याचे संकेत दिले. त्यामुळे खा. शरद पवारामुळे बीड चा बालेकिल्ला मजबूत होणार असून मोठमोठे राजकीय भूकंपांना देखील विरोधकांना सामोरे जावं लागणार आहे.या जाहीर सभेला सर्वांनी मोठ्या संख्येने उपस्थित रहा असे आवाहन आ.संदीप क्षीरसागर यांनी केले आहे.

बीड — उपमुख्यमंत्री अजितदादा पवार हे अल्पसंख्याक समाजासाठी मदतीला धाऊन येणारे नेते आहेत. त्यांनी समाजाच्या योजना अंमलात आणल्या. राष्ट्रवादी पक्ष महायुतीसोबत गेल्यामुळे अल्पसंख्याक समाजाची विरोधकांकडून दिशाभूल केली जात आहे. अल्पसंख्याक समाजाच्या विकासासाठी धडपड करणारे युवा नेतृत्व डॉ.योगेश क्षीरसागर यांना एकदा संधी देऊन विधानसभेत पाठवा, असे आवाहन राष्ट्रवादी काँग्रेस पक्षाचे अल्पसंख्याक प्रदेशाध्यक्ष तथा आमदार इद्रिसजी नाईकवडी यांनी केले आहे.

बीडचे महायुतीचे उमेदवार डॉ.योगेश भारतभूषण क्षीरसागर यांच्या प्रचारार्थ शहरात बुधवारी आयोजित केलेल्या अल्पसंख्याक मेळाव्यात ते बोलत होते.

व्यासपीठावर बीडचे महायुतीचे उमेदवार डॉ.योगेश क्षीरसागर, राष्ट्रीय सरचिटणीस साजिद बेग काझी, राष्ट्रीय उपाध्यक्ष शेख शफीक, अल्पसंख्याक जिल्हाध्यक्ष इकबाल शेख, जिल्हा कार्याध्यक्ष रमिज खान, ज्येष्ठ माजी नगरसेवक सादेक उज्जमा, नसीर अन्सारी, जुनेद जहागीरदार, बागवान समाजाचे अध्यक्ष हशम बागवान, हाजी असीम बागवान, जकिरिया साहेब, इलियास मेंबर, युवा नेते इरफान बागवान, बिलाल भाई, सद्दाम भाई, जावेद खान, माजेद कुरेशी, साजेद जहागीरदार, नवगण शिक्षण संस्थेचे संचालक आमेर शेख यांच्यासह पदाधिकारी, कार्यकर्ते उपस्थित होते.

आ.इद्रिस नायकवडी म्हणाले की, अजितदादा पवार यांच्या नेतृत्वात अल्पसंख्याक समाजासाठी काम करता येत आहे. ते समाजासाठी शिक्षण, संरक्षण व आरक्षण हे महत्वाचे प्रश्न मार्गी लावण्यासाठी प्रयत्नशील असतात. सामान्य लोकांच्या हक्क व अधिकारांसाठी अजितदादा हे महायुतीत सहभागी झाले. राष्ट्रवादी काँग्रेस पक्ष जरी महायुतीत सहभागी झाला असला तरी आपली विचारधारा सोडलेली नाही. भविष्यात सोडणारही नाही. मात्र राष्ट्रवादी पक्ष महायुतीसोबत गेल्यामुळे अल्पसंख्याक समाजाची दिशाभूल केली जात आहे. समाजाच्या मनात गैरसमज निर्माण केले जात आहे. अजितदादांनी मागच्या अर्थसंकल्पात मौलाना आझाद आर्थिक विकास मंडळाचे ३० कोटीवरून ७०० कोटी वर नेले. प्रत्येक मदरसा लसाठी वर्षाला १० लाख रुपये देण्याचा निर्णय घेतला. मुस्लिम समाज कुठल्याही गोष्टीवर सहज विश्वास ठेवतो. त्यामुळे लोकसभेत ज्या चुकीच्या अफवा पसरवल्या गेल्या, त्यामुळे चुकीच्या लोकांना मतदान केले. मात्र यावेळी विधानसभेला ही चूक करू नका. लोकसभेला काय घडले कसे घडले याचा विचार न करता विधानसभा निवडणुकीत मात्र अजितदादा, धनुभाऊ आणि डॉ.योगेश क्षीरसागर यांच्या पाठीशी खंबीरपणे उभे राहावे असे आवाहन आ.इद्रिस नायकवडी यांनी केले.

माजी नगरसेवक जुनेद जहागीरदार यांचा प्रवेश

बीड नगरपरिषदेचे माजी नगरसेवक जुनेद जहागीरदार यांच्यासह साजेद जहागीरदार, आमेर जहागीरदार, समीर शेख, इम्रान शेख यांच्यास कार्यकर्त्यांनी राष्ट्रवादी काँग्रेस पक्षात प्रवेश केला. डॉ.योगेश क्षीरसागर यांनी त्यांचे स्वागत केले.

अल्पसंख्याक समाजाच्या विकासासाठी कायम प्रयत्नशील : डॉ.योगेश क्षीरसागर

डॉ.योगेश क्षीरसागर म्हणाले, अजितदादा यांनी वादा केल्याप्रमाणे विधानसभेत १० टक्के अल्पसंख्याक समाजाचे उमेदवार दिले. विधान परिषदेत २ पैकी १ आमदार इद्रिस नायकवडी यांच्या रूपाने अल्पसंख्याक समाजाचे नेतृत्व विधानपरिषदेत पाठवले. अल्पसंख्याक समाजासाठी मार्टी रिसर्च सेंटर मंजूर करून निधी उपलब्ध करून दिला. क्षीरसागर परिवार हा मागील ५० वर्षांपासून लोकांची सेवा करत आहे. बीडमध्ये तकिया मस्जिदशेजारील जागा ही कब्रस्थानसाठी दिली. बालेपीर येथील इदगाह, पेठ बीड भागातील जुना इदगाह यासाठी कंपाऊंड वॉलसाठी निधी उपलब्ध केला. अल्पसंख्याक समाजासाठी बीडमध्ये ५ तर ग्रामीण भागात २ कोटी रुपये मंजूर करून आणले. नवगण, विनायक संस्थेत अल्पसंख्याक समाजाचे १० टक्के कर्मचारी आहेत. आपण सर्व जातीधर्माला सोबत घेऊन विकासकामे करत राहू, असा विश्वास देत २० तारखेला मोठ्या संख्येने मतदान करून निवडून देण्याचे आवाहन डॉ.योगेश क्षीरसागर यांनी केले.

मुंबई — राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी आता कोणतीही निवडणूक लढवणार नसल्याचे संकेत दिले आहेत.विधानसभा निवडणुकीच्या अनुषंगाने शरद पवार बारामती मतदारसंघात दौरे करत आहेत, या प्रचारसभेत बोलताना शरद पवारांनी निवृत्तीचे संकेत दिले आहेत.वयाच्या 84 व्या वर्षीही शरद पवार राजकारणात सक्रिय असताना पाहायला मिळत आहे, तरीही शरद पवारांनी असं का म्हटलं आहे?

यावेळी शरद पवार यांनी निवृत्तीचे संकेत देताना म्हटलं की, इशारा देत आता नव्या लोकांना निवडून द्यावे, असे म्हटले आहे. यावेळी शरद पवार यांनी म्हटलं की, मी सांगू इच्छितो की, मी सरकारमध्ये नाही. अजून दीड वर्ष आहेत, पुन्हा राज्यसभेत जायचं का नाही याचा विचार मला करावा लागेल. आता मी निवडणुका लढवणार नाही, 14 वेळा मी निवडणुका लढवल्या आहेत. महाविकास आघाडीचा पाठिंबा युगेंद्र पवार यांना आहे, एक नवीन नेतृत्व आहे त्यांना साथ द्या असंही यावेळी शरद पवारांनी म्हटलं आहे.
निवृत्तीचे संकेत देताना राष्ट्रवादीचे अध्यक्ष शरद पवार म्हणाले की, आम्हाला कुठेतरी थांबावे लागेल, “मला आता कोणतीही निवडणूक लढवायची नाही. आता मला निवडणुका थांबवाव्या लागतील आणि नवीन लोकांना पुढे यावे लागेल.” मला जनतेची सेवा करायची आहे. सरकार आल्यास आम्ही सरकारच्या पाठीशी खंबीरपणे उभे राहू.

“मी सांगू इच्छितो की, मी सरकारमध्ये नाही. अजून दीड वर्ष आहेत, पुन्हा राज्यसभेत जायचं का नाही याचा विचार मला करावा लागेल. आता मी निवडणुका लढवणार नाही, 14 वेळा मी निवडणुका लढवल्या आहेत. महाविकास आघाडीचा पाठिंबा युगेंद्र पवार यांना आहे, एक नवीन नेतृत्व आहे त्यांना साथ द्या”.

या वर्षाच्या सुरुवातीला अजित पवार यांनी राष्ट्रवादीचे नेते शरद पवार यांच्यावर निशाणा साधला
होता आणि या वयात त्यांनी घरीच राहावे, ते कधी निवृत्त होतील हे माहीत नाही, असे म्हटले होते. यानंतर शरद पवारांनीही प्रत्युत्तर दिले. “अजित पवार माझ्या वयाबाबत वारंवार विधाने करतात. माझ्या राज्यसभेच्या कार्यकाळात अजून वेळ आहे. तोपर्यंत मी सेवा करेन. त्यानंतर मी कोणतीही निवडणूक लढवणार नाही.”