चौसाळा गावच्या सुपुत्राची महत्त्वपूर्ण पदावर नियुक्ती; कायदेविषयक आणि प्रशासकीय अनुभवाची शासनाकडून दखल
बीड — बीड जिल्ह्याच्या शिरपेचात आणखी एक मानाचा तुरा रोवला गेला आहे. बीड जिल्ह्यातील चौसाळा गावचे सुपुत्र तथा अभियोग संचालनालय, महाराष्ट्र राज्याचे सेवानिवृत्त संचालक अशोककुमार भगवानराव भिल्लारे यांची विभागीय पोलीस तक्रार प्राधिकरण, पुणे यांच्या अध्यक्षपदी नियुक्ती करण्यात आली आहे. महाराष्ट्र शासनाच्या गृह विभागाने यासंदर्भातील अधिसूचना आणि नियुक्ती आदेश जारी केले आहेत.
अशोककुमार भिल्लारे यांनी अभियोग संचालनालयात संचालक म्हणून जबाबदारी सांभाळताना कायदेविषयक तसेच प्रशासकीय क्षेत्रात प्रदीर्घ अनुभव मिळवला आहे. त्यांच्या या अनुभवाची दखल घेत राज्य शासनाने पुणे विभागातील महत्त्वाच्या पोलीस तक्रार निवारण यंत्रणेच्या अध्यक्षपदाची जबाबदारी त्यांच्यावर सोपविली आहे.
गृह विभागाकडून अधिकृत नियुक्ती
महाराष्ट्र पोलीस अधिनियम, १९५१ मधील कलम २२-स नुसार पुणे विभागीय क्षेत्रासाठी विभागीय पोलीस तक्रार प्राधिकरणाची स्थापना करण्यात आली आहे. या प्राधिकरणाच्या अध्यक्षपदाचा कार्यकाळ पूर्ण झाल्यानंतर हे पद रिक्त झाले होते. त्यानंतर शासनाने अशोककुमार भिल्लारे यांची अध्यक्षपदी नियुक्ती केली.
गृह विभागाचे प्रधान सचिव (विशेष) अनुप कुमार सिंह यांच्या मार्गदर्शनाखालील प्रक्रियेनंतर उपसचिव बापूसाहेब सोनवणे यांच्या स्वाक्षरीने १ सप्टेंबर २०२६ रोजी अधिसूचना, तर ४ सप्टेंबर २०२६ रोजी नियुक्ती आदेश जारी करण्यात आला.
चौसाळा ते राज्याच्या महत्त्वाच्या प्रशासकीय पदापर्यंतचा प्रवास
चौसाळा येथील भूमिपुत्र असलेल्या अशोककुमार भिल्लारे यांनी आपल्या कार्यक्षमतेच्या जोरावर प्रशासकीय आणि कायदेविषयक क्षेत्रात वेगळी ओळख निर्माण केली. अभियोग संचालनालयाचे संचालक म्हणून त्यांनी बजावलेली जबाबदारी आणि प्रदीर्घ प्रशासकीय अनुभव आता पुणे विभागीय पोलीस तक्रार प्राधिकरणाच्या कामकाजासाठी उपयुक्त ठरणार आहे.
या नियुक्तीमुळे बीड जिल्ह्यातील विविध क्षेत्रांतून भिल्लारे यांचे अभिनंदन होत असून, चौसाळा परिसरातही त्यांच्या नियुक्तीबद्दल उत्साहाचे वातावरण आहे.
कुटुंबाचीही प्रशासकीय आणि कायदेविषयक क्षेत्रात वाटचाल
अशोककुमार भिल्लारे यांच्या कुटुंबाचीही प्रशासकीय आणि कायदेविषयक क्षेत्राशी घट्ट नाळ आहे. त्यांचे जावई आयपीएस अधिकारी असून सध्या दिल्ली येथे कार्यरत आहेत. त्यांचा मुलगा निहार मुंबई उच्च न्यायालयात वकिलीच्या क्षेत्रात कार्यरत आहे.
दरम्यान, आपल्या जन्मभूमी चौसाळा येथे अशोककुमार भिल्लारे यांचा लवकरच मित्रमंडळी आणि ग्रामस्थांच्या वतीने सत्कार करण्यात येणार असल्याची माहिती त्यांच्या मित्रमंडळींनी दिली आहे.
