माजलगाव — सार्वजनिक रस्त्यावर वाढदिवस साजरा करत नागरिकांमध्ये भीतीचे वातावरण निर्माण होईल, अशा पद्धतीने केलेल्या कृत्याचा व्हिडिओ सोशल मीडियावर व्हायरल झाल्यानंतर माजलगाव शहर पोलिसांनी संबंधितांविरुद्ध कायदेशीर कारवाई केली आहे. या प्रकरणातील अजीज सालेम चाऊस याने पोलिसांसमोर आपल्या कृत्याबद्दल माफी मागितली असून, भविष्यात अशा प्रकारची पुनरावृत्ती न करण्याची समज त्याला देण्यात आली आहे.
माजलगाव शहरातील बसस्थानकासमोरील सार्वजनिक रस्त्यावर वाढदिवस साजरा करताना काही जणांनी केलेल्या प्रकाराचा व्हिडिओ सोशल मीडियावर मोठ्या प्रमाणात प्रसारित झाला. या प्रकारामुळे सार्वजनिक ठिकाणी दहशतीचे वातावरण निर्माण होण्याची शक्यता तसेच वाहतुकीला अडथळा निर्माण होण्याची परिस्थिती निर्माण झाल्याचे पोलिसांच्या निदर्शनास आले.
व्हिडिओची गंभीर दखल घेत माजलगाव शहर पोलिसांनी गुन्हा क्रमांक 285/2026 दाखल केला आहे. भारतीय न्याय संहितेतील कलम 285, 126(2) तसेच महाराष्ट्र पोलीस अधिनियमातील कलम 135 अंतर्गत ही कारवाई करण्यात आली आहे.
या प्रकरणात अजीज सालेम चाऊस, सिकंदर चाऊस, दिनेश आहाड, निहाल पटेल, महेंद्र कांबळे, करण कांबळे, वीर बलवीर अल्हांडे, अक्षय पोपटके आणि कृष्णा रा. टाकरवन यांचा आरोपी म्हणून समावेश करण्यात आला आहे.
दरम्यान, अजीज सालेम चाऊस याने पोलिसांसमोर आपल्या कृत्याबद्दल माफी मागितली. सार्वजनिक ठिकाणी अशा प्रकारे वाढदिवस किंवा अन्य कार्यक्रम साजरा करून नागरिकांना त्रास होईल, वाहतुकीला अडथळा निर्माण होईल अथवा कायदा-सुव्यवस्थेचा प्रश्न निर्माण होईल, असे कोणतेही कृत्य करू नये, अशी समज पोलिसांनी संबंधितांना दिली आहे.
व्हिडिओतील इतरांचीही चौकशी
या घटनेच्या व्हिडिओमध्ये आरोपींसोबत आणखी 10 ते 15 जण वाढदिवस साजरा करताना दिसत आहेत. या व्यक्तींची ओळख पटविण्याचे काम पोलिसांकडून सुरू आहे. तपासात त्यांचा सहभाग आढळल्यास त्यांच्यावरही कायद्यानुसार कारवाई केली जाणार असल्याचे पोलिसांनी स्पष्ट केले आहे.
सोशल मीडियासाठी दहशतीचे प्रदर्शन करू नका
सोशल मीडियावर प्रसिद्धी मिळवण्यासाठी सार्वजनिक ठिकाणी कायदा व सुव्यवस्थेला बाधा आणणारे किंवा नागरिकांमध्ये भीती निर्माण करणारे प्रकार करू नयेत, असे आवाहन बीड जिल्हा पोलिसांनी केले आहे. अशा घटनांचे व्हिडिओ किंवा माहिती नागरिकांनी तात्काळ जवळच्या पोलीस ठाण्याला द्यावी. सार्वजनिक शांतता आणि कायदा-सुव्यवस्था अबाधित ठेवण्यासाठी संबंधितांवर नियमानुसार कठोर कायदेशीर कारवाई केली जाईल, असा इशाराही पोलिसांनी दिला आहे.
