बीड — सरपंच संतोष देशमुख हत्या प्रकरणात मुख्य सूत्रधार म्हणून आरोप असलेल्या वाल्मीक कराडने जामीन मिळण्यासाठी सर्वोच्च न्यायालयात याचिका दाखल केली होती. मात्र बीड जिल्हा न्यायालय, औरंगाबाद खंडपीठ आणि आता सर्वोच्च न्यायालयातही कराडला दिलासा मिळू शकला नाही. यानंतर वाल्मिक कराडचा मुलगा सुशील कराड याने आता मात्र सर्वांसमोर सर्व काही बोलणार…”, अशी फेसबुक पोस्ट लिहून खळबळ उडवून दिली आहे.
सर्वोच्च न्यायालयात कराडवर लावण्यात आलेल्या मकोकावर चर्चा झाली. मकोका चुकीच्या पद्धतीने लावण्यात आला, असा युक्तीवादही कराडच्या वकिलांनी केला. मात्र कराडच्या सुटकेसाठी हाच मकोका महत्त्वाचा अडथळा ठरत आहे. त्यामुळे वाल्मिक कराडचा तुरुंगातील मुक्काम वाढला असल्याचे दिसत आहे.
काल जामीन फेटाळल्यानंतर वाल्मिक कराडचा मोठा मुलगा सुशिल वाल्मिक कराड याच्या फेसबुकवर एक पोस्ट शेअर करण्यात आली आहे. “आता मात्र सर्वांसमोर सर्व काही बोलणार…”, अशी पोस्ट सुशीलने आपल्या फेसबुक अकाऊंटवर लिहिल्यामुळे या प्रकरणाची चर्चा बीड जिल्ह्यात रंगली आहे. ही पोस्ट स्वतः सुशील कराडने केलीय की, या अकाउंटवरून दुसरे कुणी केली आहे हे सांगणं अवघड आहे ही पोस्ट सुशील कराडनेच केली असेल तर त्याला नेमके काय सांगायचे आहे? याचीही चर्चा होत आहे. सुशील कराडला नेमके काय बाहेर काढायचे आहे? याचा कयास बांधला जात आहे. याच पोस्टवर अनेकांनी कराड परिवाराच्या समर्थनार्थ कमेंट केल्या असून, काहींनी तर थेट परळीतील मोठ्या नेत्याचे नाव घेत त्यांच्याकडे बोट दाखवले आहे. त्यामुळे सुशील कराड विरोधकांवर बोलणार की त्यांच्यातीलच काही अंतर्गत गोष्टी बाहेर काढणार? याबाबत तर्क वितर्क लावले जात आहेत
सुशील कराडवरही मारहाण करणे, धमकावणे, आर्थिक गैरव्यवहार असे आरोप करण्यात आले आहेत. महादेव मुंडे प्रकरणातही कराडच्या मुलांची नावे घेतली गेली होती.याआधी वाल्मिक कराडच्या पत्नी मंजिली कराड यांनीही “भानगडी बाहेर काढणार, माझ्या नवऱ्याचा वापर करून घेतला, निवडणुकीत वापर केला” असे म्हणत काही गोष्टी बाहेर काढणार असल्याचा इशारा दिला होता. तेव्हाही त्या काही अंतर्गत गोष्टी बाहेर काढतात का? अशी चर्चा रंगली होती. मात्र त्यानंतर विशेष असे काही त्या बोलल्या नाहीत. आता मात्र वाल्मिक कराडचा अर्ज थेट सर्वोच्च न्यायालयानेच फेटाळल्याने कराडला जामीन मिळण्याची शक्यता कमी झाली आहे. त्यात त्याच्या मुलानेच अशी पोस्ट केल्याने मोठा काहीतरी गौप्यस्फोट होऊ शकतो, असे सांगितले जात आहे.
सर्वांसमोर सर्व काही…’ वाल्मिक कराडच्या मुलाची सोशल मीडिया पोस्ट
