लफडा पवनचक्कीचा:सुरक्षा रक्षकाचा गोळीबार, एक ठार;महाजनवाडी शिवारात मध्यरात्री थरार

नेकनूर — लिंबागणेश जवळ असलेल्या महाजनवाडी शिवारातील पवनचक्कीचे कार्यालय परिसरात साहित्य चोरण्यासाठी आलेल्या चोरट्यांच्या दिशेने पवनचक्कीवरील सुरक्षा रक्षकाने गोळीबार केला. या गोळीबारात एक संशयीत चोरटा जागीच ठार झाला.गोळीबाराची घटना ही रात्रीच्या दरम्यान घडली. घटनेची माहिती मिळताच नेकनूर पोलीसांनी घटनास्थळी धाव घेतली.दरम्यान या प्रकरणी पंचनामा झाला असून गुन्हा दाखल करण्याची प्रक्रिया सुरू आहे.या गोळीबारात राजू उर्फ तिच्या विष्णू काळे वय 24 असून रा. तुळजापूर जिल्हा धाराशिव असं आहे. गोळीबार घटनेने बीड जिल्ह्यात पुन्हा एकदा खळबळ उडवून दिली आहे.
बीड जिल्ह्यात गेल्या वर्षभरापासून पवनचक्कीवरून सातत्याने वाद होताना दिसून येत आहेत.पवनचक्की कंपन्यानी जिल्ह्याच्या शांततेलाच सूरंग लावला आहे.एकीकडे शेतकरी विरुद्ध पवनचक्की अधिकारी यांचे जेवढे वाद होत आहेत तेवढ्याच पद्धतीने पवनचक्कीचे साहित्य मोठ्या प्रमाणावर चोरीस जात असल्याच्या घटनाही घडत आहेत. लिंबागणेश परिसरात असलेल्या महाजनवाडी शिवारात पवनचक्की कंपनीचे कार्यालय आहे त्याठिकाणी पवनचक्कीसाठी लागणारे साहित्य मोठ्या प्रमाणावर आहे. या पवनचक्की प्रकल्प सुरक्षेसाठी पाटोदा येथील रूपसिंग टाक नावाचा बंदूकधारी सुरक्षा रक्षक नेमण्यात आलेला आहे. आज मध्यरात्री ते पहाटेच्या दरम्यान काही चोरटे या परिसरात घुसल्याची माहिती सुरक्षा रक्षकाला झाली. सदरचे चोरटे हे चोरीच्या उद्देशाने घुसले आहेत या संशयाने सुरक्षा रक्षकाने त्यांना अडवण्याचा प्रयत्न केला मात्र त्याठिकाणी वाद होत चोरट्याने आपली ताकद दाखवण्याचा प्रयत्न केल्याचे सांगण्यात येते. या वेळी आत्म सुरक्षेच्या हेतुने सुरक्षा रक्षकाने चोरट्याच्या दिशेने गोळीबार केला. या गोळीबारात एक चोरटा जागीच ठार झाला. या घटनेची माहिती नेकनूर पोलिसांना झाल्यानंतर तिडके मॅडम सहा.पो उपाधिक्षक अंबाजोगाई, मीना एएसपी केज , एपीआय गोसावी, पी एस आय रोकडे, पी एस आय आहेर, श्वान पथक फिंगरप्रिंट पथक, फॉरेन्सिक पथकाने घटनास्थळी धाव घेत घटनेचा पंचनामा सुरू केला. एक बाजेपर्यंत मृतदेह घटनास्थळावर पडून होता. सदरील मृत व्यक्ती कोण? त्याचा चोरीशी संबंध आहे की नाही? सुरक्षा रक्षकाकडे शस्त्र परवाना होता का? यासह अन्य प्रश्न उपस्थित होत असून या गोळीबाराच्या घटनेने परिसरामध्ये खळबळ उडाली आहे. गोळीबार करणारा सुरक्षा रक्षक रूपसिंह टाक असल्याचे सांगण्यात येते. त्याला पोलिसांनी बेड्या ठोकल्या आहेत.सदरच्या पवनचक्कीवर सुरक्षा रक्षक म्हणून पाटोदा येथील रिटायर्ड मिलिट्रीमॅन रूपसिंग टाक हे कार्यरत आहेत. रात्री एक ते दिडच्या सुमारास रूपसिंह टाक हे कर्तव्य बजावत असताना दहा पंधरा अज्ञात चोरटे आतमध्ये घुसले. त्यांना रुपसिंह टाक यांनी प्रतिकार सुरू केला तेव्हा टाक यांच्यावर चोरट्यांनी धारदार शस्त्रांसह रॉडने हल्ला सुरू केला. या दरम्यान आत्म सुरक्षेसाठी टाक यांनी चोरट्यांच्या पायाच्या दिशेने गोळीबार केला. मात्र त्यातील एक जणाने उडी मारल्याने त्याच्या पोटात गोळी लागली. असे टाक यांनी म्हटले. टाक यांच्या म्हणण्यानुसार चोरट्यांनी देखील यावेळी फायरींग केला असल्याचे म्हणणे आहे.