केज — महामार्गावर असलेल्या एका बियर बारचे कुलूप तोडून एक लाख 78 हजार रुपये किमतीची विदेशी दारू लंपास केली असल्याची घटना केज मध्ये घडली आहे.
अधिक माहिती अशी की, केज केज-मांजरसूंबा या राष्ट्रीय महामार्ग क्र. ५४८-डी वर असलेल्या रेणू पेट्रोल पंपाच्या शेजारी रघुनाथ अभिमान थोरात यांचे रेणू बियर बार व हॉटेल आहे. शनिवारी २८ सप्टेंबर रोजी रात्री सुमारे १२ वा. च्या सुमारास हॉटेलचे मॅनेजर गौरव महिंन्द्र दास व ७ ते ८ कामगार हॉटेलची दारे कुलूप लावून हॉटेलच्या स्टाफरुमध्ये झोपले होते. मध्यरात्री चोरट्यांनी हॉटेलच्या दरवाजाचे दोन्ही बाजूची कुलुपे कटरने कापून बियरबारच्या असलेल्या गोदामातील विदेशी मद्याचे १ लाख ७८ हजार ५८० रूपये किमतीचे २७ बॉक्स चोरून नेले. चोरी केल्यानंतर चोरट्यांनी दोन्ही दरवाजे बाहेरून बंद केले होते. रविवारी सकाळी ही घटना उघडकीस आली. रघुनाथ थोरात यांनी दिलेल्या फिर्यादी नुसार केज पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे. केज पोलीस पुढील तपास करत आहेत.
