परळी — परीक्षेचा पेपर का दिला नाही अशी विचारणा करत शाळेतून गुरुकुला कडे जाणाऱ्या विद्यार्थ्यांना दोन तरुणांनी धक्काबुक्की केली. याबरोबरच सिद्धेश्वर नगर मध्ये असलेल्या नर्मदेश्वर गुरुकुलात शिरून अकरा विद्यार्थ्यांना बेल्ट तसेच बांबूच्या काठीने बेदम मारहाण केल्याची खळबळ जनक घटना परळी मध्ये घडली आहे.
एवढेच नाही तर याच तरुणांनी गुरुकुल चालकाचे वडिल बालासाहेब शिंदे यांच्यावर देखील प्राणघातक हल्ला केला आहे.अंबाजोगाईच्या स्वाराती रुग्णालयात त्यांच्यावर उपचार सुरू आहेत.
मिळालेल्या अधिकच्या माहितीनुसार
परळी येथील सिद्धेश्वरनगर येथे नर्मदेश्वर गुरूकुलम् नावाचे निवासी गुरुकुल असून या गुरुकुलात विद्यार्थी आध्यात्माचे शिक्षण घेत आहेत. या सोबतच ते शाळेत देखील जातात. सध्या सहामाही परीक्षा सुरू असून पेपर देण्यासाठी गुरुकुलातली मुलं शाळेत गेले. मात्र, परीक्षा देऊन मुलं गुरुकुलाकडे परत येत असताना रस्त्यात त्या मुलांना दोन जणांनी अडवले आणि परीक्षेचे पेपर द्या म्हणत मुलांना तंबी दिली. भयभीत मुलं त्यांना विरोध करत गुरुकुलात दाखल झाले. त्यांच्या पाठोपाठ हे दोन तरुण देखील गुरुकुलात धडकले. या गुरुकुलाचे चालक अर्जुन बालासाहेब शिंदे परळीतील सिध्देश्वर नगर येथे राहतात.’श्री क्षेत्र वारकरी शिक्षण संस्था’ चालवत आहेत. मात्र या घटनेवेळी ते गुरुकुलात उपस्थित नव्हते.श्री नर्मदेश्वर गुरुकुलमध्ये 42 विद्यार्थी आध्यात्माचे शिक्षण घेतात. गुरकुलाचे चालक अर्जुन शिंदे यांनी फिर्यादीत म्हटले आहे की, माझी भावजयी रेणुका सोपान शिंदे यांनी गुरुकुलातील विद्यार्थ्यांना मारहाण करत असल्याचे फोन करून कळविले. यावेळी दिनेश रावसाहेब माने, रा. चाळीस पुटी रोड जवळ परळी,बाळु बाबुराव एकिलवाळे रा. सिध्देश्वर नगर परळी ह्यानी विद्यार्थ्यांचे परीक्षा पेपर बघू द्या असे म्हणाले.परंतु विद्यार्थ्यांनी परीक्षा पेपर दिले नाही, याचा राग मनात धरून या दोन आरोपींनी गुरूकुलामधील विद्यार्थ्यांना त्यांनी जबर मारहाण केली आहे. यामध्ये अनेक मुलांना हाताला, पायाला, डोक्याला मारहाण झाली आहे.दरम्यान काही विद्यार्थी तक्रार देण्यासाठी संभाजीनगर पोलीस स्टेशनला गेले होते. तेव्हा वरील दोघे आरोपींनी परत गुरुकुलात जाऊन शिवीगाळ व धिंगाणा केला. घटनेची माहिती मिळताच फिर्यादीचे वडिल बालासाहेब शिंदे हे लागलीच गुरूकुलकडे गेले. यावेळी दिनेश रावसाहेब माने याने फर्शीचा तुकडा त्यांच्या डोक्यात मारला.बाळु बाबुराव एकिलवाळे याने शिवीगाळ करत लाथाबुक्याने मारहाण केली. त्यानंतर फिर्यादीचे वडीलांना (बालासाहेब शिंदे) भाऊ सुदाम बालासाहेब शिंदे यांनी मोटार सायकलवर परळीतल्या सरकारी रुग्णालयात नेले. त्या ठिकाणी त्यांना अॅडमिट केले मात्र त्यांची प्रकृती चिंताजनक असल्याने त्यांना पुढील उपचारासाठी अंबाजोगाई येथील रुग्णालयात दाखल करण्यात आले आहे. तर जखमी झालेल्या विद्यार्थ्यांना परळी येथील उपजिल्हा रुग्णालयात दाखल करण्यात आले आहे. या सर्व परिस्थितीमुळे गुरुकुलातील विद्यार्थ्यांमध्ये सध्या तणावाचे वातावरण आहे.याप्रकरणी, परळीच्या संभाजीनगर पोलिसांत दिनेश माने आणि बाळू एकीळवाले या दोघां विरोधात गुन्हा दाखल करण्यात आला असून पुढील तपास पोलिस करत आहेत.
