बीड — निवडणूक काळात सतर्कता बाळगली जात असताना चेक पोस्टवर नियुक्त केलेल्या पोलीस कर्मचाऱ्याने कामात दांडी मारल्याच्या कारणावरून नेकनूर पोलीस ठाण्यात गुन्हा दाखल करण्यात आला आहे.
मांजरसुंबा रोडवरील रत्नागिरी फाट्यावर वाहनांची तपासणी करण्यासाठी चेक पोस्ट उभारण्यात आला आहे या ठिकाणी पोलीस अंमलदार सुदाम सुखदेव शेलार यांची नियुक्ती करण्यात आली होती. अंमलदारांना या ठिकाणी बारा तासांची ड्युटी देण्यात आलेली आहे. मात्र 9 नोव्हेंबर रोजी सुदाम शेलार हे गैरहजर राहिले. ते कर्तव्यावर हजर झाले नाही म्हणून त्यांना मोबाईल वरून संपर्क साधण्याचा प्रयत्न केला मात्र त्यांच्याशी संपर्क होऊ शकला नाही. शेवटी निवडणूक निर्णय अधिकाऱ्यांच्या आदेशावरून सहशिक्षक अण्णा कसबे यांच्या फिर्यादीवरून नेकनूर पोलीस ठाण्यात सुदाम शेलार यांच्या विरोधात कलम 134 लोकप्रतिनिधीत्व कायद्यान्वये गुन्हा दाखल करण्यात आला आहे.
