अंबाजोगाई — तालुक्यातील धर्मापुरी शिवारात मूर्ती फाट्याजवळ पट्टीवडगाव रोडवरील एका शेतात कारवाई करून दहा लाखाचा गांजा पोलिसांनी जप्त केला. याप्रकरणी एकाला पकडले आहे. ही कारवाई अंबाजोगाई उपविभागाचे सहाय्यक पोलीस अधीक्षक ऋषिकेश शिंदे यांच्या पथकाने बर्दापूर पोलीस ठाणे हद्दीत बुधवारी केली.
याबाबत अधिक माहिती अशी की, नितीन कांदे आणि भाऊसाहेब चौधरी हे दोघे धर्मापुरी येथील भास्कर रोकडोबा फड याच्या शेतातील पत्र्याच्या खोलीत गांजा विक्री करण्यासाठी घेऊन आले होते. हा गांजा भास्कर फड याने आर्थिक फायद्यासाठी विक्री करण्याच्या उद्देशाने मागवला होता. सहाय्यक पोलीस अधीक्षक ऋषिकेश शिंदे यांना माहिती मिळताच त्यांनी पोलीस अधीक्षकांच्या मार्गदर्शनाखाली पथकासह धर्मापुरी शिवारात छापा टाकला. या ठिकाणी दोन पोत्यांमध्ये पान, फुले आणि बियांसहित दाबेलेला उग्र वासाचा गांजा आढळून आला. पोलिसांनी यावेळी जप्त केलेल्या गांजाच्या पोत्याचे वजन 24 किलो 560 ग्रॅम आणि दुसऱ्या पोत्याचे वजन 8 किलो 800 ग्रॅम असे एकूण 33 किलो 360 ग्रॅम भरले.बाजारभावाप्रमाणे याची अंदाजे किंमत 10 लाख 800 रुपये आहे. याप्रकरणी पोलिसांनी नितीन लिंबाजी कांदे वय 30 वर्ष रा. कांदेवाडी रंगेहात पकडले. फरार आरोपी भाऊसाहेब चौधरी आणि बबलू फड पोलीस कारवाई वेळी पळून जाण्यात यशस्वी झाले. पोलीस शोध फरार आरोपींचा शोध घेत आहेत.
अंबाजोगाईमध्ये दहा लाखाचा गांजा पकडला
