गेवराई — 25 वर्षीय विवाहितेने आपल्या दोन वर्षाच्या चिमुकलीला फाशी देऊन स्वतः देखील गळफास घेऊन आत्महत्या केल्याची खळबळजनक घटना मालेगाव मध्ये सोमवारी दुपारच्या सुमारास घडली
सोमवारी 18 ऑगस्टला दुपारच्या सुमारास अंकिता बळीराम घवाडे वय 25 वर्ष या विवाहितेने घरातील माळवदाच्या हलकडीला दोरीच्या साहाय्याने आपल्या मुलगी शिवप्रीती बळीराम घवाडे व दोन वर्ष हिला फाशी दिली आणि तिचा जीव घेतला. त्यानंतर तिने स्वतःही त्याच ठिकाणी गळफास घेत आपलं आयुष्य संपवलं आहे. ही घटना लक्षात आल्यानंतर तातडीने शेजाऱ्यांनी आणि नातेवाईकांनी पोलिसांना कळविले. या घटनेने परिसरात एकच खळबळ माजली.
पोलिसांना माहिती मिळताच त्यांनी तात्काळ घटनास्थळी धाव घेतली. त्यांनी घटनास्थळाचा पंचनामा केला आणि दोन्ही मृतदेह ताब्यात घेत ते बीड येथील जिल्हा सरकारी रुग्णालयात शवविच्छेदनासाठी पाठविण्यात आले आहेत. सध्या पोलिस शवविच्छेदन अहवालाची वाट बघत आहेत. अद्याप या प्रकारामागचे नेमके कारण समजू शकले नाही.
घरगुती कलह, आर्थिक समस्या किंवा मानसिक ताणतणावामुळे हा प्रकार घडला असावा, असा प्राथमिक अंदाज पोलिसांकडून व्यक्त केला जात आहे. तथापि, याबाबतचे खरे कारण पोलिसांच्या पुढील तपासानंतरच स्पष्ट होणार आहे.आईने आपल्या दोन वर्षांच्या लेकीचा जीव घेऊन स्वतःचेही जीवन संपवल्याने गावकऱ्यांमध्ये मोठी खळबळ उडाली आहे. या हृदयद्रावक घटनेबद्दल सर्वत्र हळहळ व्यक्त केली जात असून, परिसरात दुःखाचे वातावरण पसरले आहे. या आईने हे टोकाचं पाऊल का उचललं याबाबत मात्र सध्या काहीही माहिती नाही.

गेवराई — वरिष्ठांच्या त्रासाला कंटाळून एसटी कर्मचाऱ्याने गळफास घेऊन आत्महत्या केल्याची घटना घडली आहे. सहा महिन्यापूर्वीच हा कर्मचारी अनुकंपा तत्वावर नोकरीला लागला होता. दरम्यान संतप्त नातेवाईकांनी आगार प्रमुखाच्या कार्यालयासमोर मृतदेह नातेवाईकांनी आणून ठेवत ठिय्या दिला त्यामुळे काही काळ तणाव निर्माण झाला होता.
प्रितेश जयराम मोहीते वय 32 वर्ष रा. मादळमोही, ता. गेवराई, जि. बीड असे आत्महत्या केलेल्या एसटी कर्मचा-याचे नाव आहे.
सहा महिन्यांपूर्वीच अनुकंपा तत्वावर एसटी महामंडळात प्रितेश मोहीते नोकरीला लागले होते. मात्र, नोकरी करत असताना कर्मचाऱ्यास गेवराईच्या आगारातील वरिष्ठांच्या त्रासाला सामोरे जावे लागत होते.
सतत होत असलेल्या त्रासाला कंटाळून अखेर एसटी कर्मचारी प्रितेश मोहीते यांनी राहत्या घरी मंगळवारी सकाळी गळफास घेऊन आत्महत्या केली. त्यानंतर शवविच्छेदन केल्यानंतर एसटी कर्मचारी यांचा मृतदेह संतप्त नातेवाईकांनी थेट गेवराई आगार प्रमुख यांच्या कार्यालयासमोर ठेवून ठिय्या मांडला. दोषीवर कारवाई होत नाही तोपर्यंत मृतदेह ताब्यात घेणार नाही, असा पवित्रा घेतला.
या घटनेची माहीती मिळताच गेवराईचे एपीआय प्रविणकुमार बांगर, एपीआय दिपक लंके, संतोष जंजाळ आगारात दाखल होऊन योग्य तो पोलिस तपास करुन दोषी आढळल्यास गून्हा दाखल करण्यात येईल असे आश्वासन पोलिसांनी दिले.तेव्हा नातेवाईकांनी मृतदेह ताब्यात घेऊन अंत्यसंस्कार करण्यासाठी नेला. दरम्यान, प्रितेश मोहीते हे नेहमी प्रमाणे आज मंगळवार एसटी आगारात हजेरी लावली होती. त्यानंतर ते गावी मादळमोहीला गेले अन् सकाळी दहा वाजेच्या सुमारास त्यांनी रहात्या घरी गळफास घेऊन आत्महत्या केली. या दुर्घटनेनंतर गावात हळहळ व्यक्त होत आहे.

छत्रपती संभाजी नगर — गेवराई पंचायत समितीच्या माजी सभापतीचा पती दीपक सुरवसे याने महिला कर्मचाऱ्याला नोकरीवरून काढण्याची धमकी देत तिच्यावर रेल्वेस्टेशन भागातील हॉटेलसह, नाशिक, नगर येथे नेऊन वारंवार अत्याचार केला. ही घटना उघडकीस आल्यानंतर खळबळ माजली आहे.
अत्याचार पीडित ग्रामसेवक महिलेचे फोटो, व्हिडिओ व्हायरल करण्याची धमकी देऊन पतीपासून घटस्फोट घ्यायला लावला. शहरात राहण्यास भाग पाडले. त्यानंतर तिच्यासह मुलांना जीवे मारण्याच्या धमक्या देऊन गारखेडा भागातील घरासमोर गोंधळ घातला. हा प्रकार १४ सप्टेंबर २०२२ ते २ जुलै २०२५ या काळात घडला. १ ऑगस्ट रोजी बीड येथे गुन्हा दाखल होऊन वेदांत नगर ठाण्यात वर्ग करण्यात आला आहे.दीपक प्रकाश सुरवसे (रा. खांडवी, ता. गेवराई, जि. बीड) असे आरोपीचे नाव आहे. ३५ वर्षीय पीडित महिलेच्या तक्रारीनुसार, ती सहा वर्षांपूर्वी गेवराई पंचायत समितीमध्ये नोकरीला लागली. तेव्हा पंचायत समितीच्या सभापती म्हणून दीपक सुरवसेची पत्नी कार्यरत होती. मात्र, दीपक हाच पंचायत समितीच्या कार्यालयात बसून कामकाज पहायचा. कर्मचाऱ्यांना तो सूचना देत असल्याने तेव्हा पीडितेची त्याच्याशी ओळख झाली.

सप्टेंबर २०२२ मध्ये सुरवसेने पीडितेला फोन करून रेल्वेस्टेशन भागातील हॉटेल विट्स येथे बोलावले. कामाचे बोलणार असेल या समजुतीतून पीडिता गेली. तेव्हा सुरवसेने तिच्यावर जबरदस्ती केली. विरोध करताच नोकरी गमवावी लागले अशी धमकी दिली. पीडितेने आरडाओरड केली मात्र, तिचा आवाज बाहेर गेला नाही. सुरवसेने तिच्यावर बलात्कार केला. त्यानंतर सुरवसेने फोटोसुद्धा काढले असून कोणाला काही सांगितले तर नोकरी घालविल आणि तुझ्या घरी सांगेल अशी असे धमकावले. अधिक तपास महिला उपनिरीक्षक संगीता गिरी करत आहेत.
नाशिक, नगरच्या रिसॉर्टमध्ये नेऊन अत्याचार

सुरवसेने पीडितेला ब्लॅकमेल करून नाशिकच्या केव्हज कंट्री, इगतपुरीचे मानस रिसॉर्ट, दौलताबाद भागातील हिरण्य रिसॉर्ट, अहिल्यानगर येथील ओरोस हॉटेलमध्ये नेऊन वारंवार बलात्कार केला. तो तिला सातत्याने बाहेरगावी नेऊन अत्याचार करू लागला. लग्राचे आमिष दाखवू लागला. तसेच तिचे फोटो आणि व्हिडिओ व्हायरल करण्याची धमकी देऊन देत होता.

पीडितेच्या पतीला मारण्याचा कट रचला

सुरवसेने पीडितेच्या पतीला मारण्याचा कट रचला. असाच धाक दाखवून त्याने मे २०२५ मध्ये पीडितेला पतीपासून घटस्फोट घेण्यास भाग पाडले. त्यानंतर छत्रपती संभाजीनगर येथे गारखेडा भागात राहण्यास आलेल्या पीडितेच्या घरी येऊन सतत अत्याचार करू लागला. २ जुलै रोजी कारमधून (एमएच-२३-एयु ५००१) घरासमोर येऊन गोंधळ घातला. तुझे व्हिडिओ तुझ्या मुलांना दाखवतो अशी धमकी दिली. हा फक्त ट्रेलर आहे, जास्त शहाणपणा केलास तर इज्जत उतरविल अशी धमकी दिली.

बीड — जनावरांची मोठी बाजारपेठ असलेल्या नेकनूर मध्ये गोवंशाची हत्या करून गोमांसाची तस्करी मोठ्या प्रमाणावर होत असल्याच्या घटना समोर आल्याने खळबळ माजली आहे. गोवंश हत्या विधेयकाची गळचेपी ठाणे प्रमुखाच्या वरदहस्ताने होत असल्याने संतप्त भावना व्यक्त होत आहेत.
नेकनूर पोलीस ठाणे हद्दीतील गावामधून जुगारासह बनावट व अवैध दारूचा पूर वाहू लागला आहे. शेतीमालावर दरोडे टाकणाऱ्यांचे आश्रयस्थान बनले आहे. माध्यमामधून तसेच जनतेकडून पोलीस अधीक्षकांपर्यंत याची तक्रार केली जात असली तरी पोलीस अधीक्षक नवनीत कांवत देखील याकडे दुर्लक्ष करत आहेत. याचाच परिणाम म्हणून ठाणे प्रमुख गोसावींना वरिष्ठांचा धाक वाटेना असा झाला आहे. पोलीस अधीक्षक नवनीत कावत जरी प्रामाणिक अधिकारी असले तरी त्यांचा वचक कर्मचाऱ्यावर राहिलेला नसल्याने गुन्हेगारी घटनांमध्ये मोठ्या प्रमाणावर वाढ होत आहे. अवैध धंद्यामधून मिळत असलेल्या कमाईचा लाभ वरिष्ठांपर्यंत पोहोचत असल्याने गोसावींना अभयदान मिळत असल्याची चर्चा जनतेत होऊ लागली आहे. पत्यांचे क्लब ,मटका, हातभट्टी, दारू, केमिकल युक्त ताडी यासारखे अवैध धंद्यांमधून मिळणारी कमाई कमी आहे म्हणून की काय पण गोवंश हत्येकडे देखील दुर्लक्ष केले जात आहे. याचाच परिणाम म्हणून नेकनूर गोमांस विक्रीच केंद्र बनलं आहे. गोवंश हत्या बंदी विधेयकाचे तीन तेरा वाजवले जात आहेत. या ठिकाणावरून बीडमध्ये मोठ्या प्रमाणावर गोमांस तस्करी ऑर्डर प्रमाणे केली जात आहे. बीडच्या पेठ बीड पोलीस ठाण्यात 27 जुलै 2025 रोजी गोमांस विक्री करणाऱ्या दोघांना बार्शी नाका भागात पकडल्याची घटनेची नोंद करण्यात आली होती. अरबाज जलाल खान पठाण वय वर्ष 26, दर्गा कॉलनी नेकनुर याला पकडले देखील.यावेळी पोलिसांनी गोमांस सुद्धा जप्त केले होते. असं असतानाही पेठ बीड पोलिस ठाण्याचे प्रमुख मूदीराज यांना प्रकरणाच्या मुळाशी जाण्याची आवश्यकता वाटली नाही. थोडाफार पैसा घेऊन तात्काळ जामीनही देण्यात आल्याने त्यांच्या देखील प्रामाणिकतेवर जनतेकडून प्रश्नचिन्ह उपस्थित केले जात आहेत. राज्यभरात कुरेशी समाजाने बहिष्कार टाकल्याने जनावरांचा बाजार ठप्प झालेला असला तरी गोवंशाच्या हत्या करणाऱ्यांना मात्र सुगीचे दिवस आल्याच पाहायला मिळत आहे. अशा घटना उघडकीस येऊनही नेकनूर पोलिसांकडून कारवाई होत नसल्याने जनतेतून संतप्त भावना व्यक्त केल्या जात आहेत. पोलीस अधीक्षकांनी या प्रकरणात लक्ष घालून गोवंश हत्या करणारा विरोधात कारवाई करावी. तसेच त्यांना आश्रय देणाऱ्या ठाणे प्रमुखावर देखील कारवाई करावी अशी मागणी जोर धरू लागली आहे.