मूंबई : वांद्रे दंडाधिकारी न्यायालयाने काही दिवसांपूर्वी करुणा शर्मा यांना धनंजय मुंडे यांची पत्नी असल्याचा निकाल देताना दर महिन्याला 2 लाख रुपयांची पोटगी देण्याचे आदेश दिले होते.वांद्रे दंडाधिकारी न्यायालयाच्या या निकालाविरोधात धनंजय मुंडे यांनी माझगाव सत्र न्यायालयात धाव घेतली होती. या खटल्यावर 05 एप्रिल रोजी सुनावणी झाली, तेव्हा माझगाव सत्र न्यायालयाने वांद्रे दंडाधिकारी न्यायालयाचा निकाल कायम ठेवला होता. यानंतर आता माझगाव सत्र न्यायालयाचा सविस्तर आदेश समोर आला आहे. त्यानुसार, धनंजय मुंडे यांना पुन्हा एकदा झटका बसला आहे. धनंजय मुंडे यांचे करुणा शर्मांसोबतचे संबंध विवाहाच्या स्वरूपाचे असल्याचे दिसून येत आहेत. त्यामुळे घरगुती हिंसाचार कायद्याअंतर्गत त्या दिलासा मिळण्यास पात्र असल्याचे न्यायालयाने म्हटले आहे.
वांद्रे दंडाधिकारी न्यायालयाने 4 फेब्रुवारी रोजी करुणा शर्मा यांची याचिका मान्य केली होती. कोर्टाने धनंजय मुंडे यांना दरमहा 1,25,000 रुपये आणि करुणा शर्मा यांच्या मुलीला 75,000 रुपये देण्याचे आदेश दिले होते. मात्र या सुनावणीवेळी धनंजय मुंडे यांनी मुलांचा सांभाळ करण्याची तयारी दर्शवली होती. तर करुणा शर्मा यांना पत्नी मानण्यास नकार दिला होता. यानंतर माझगाव सत्र न्यायालयात झालेल्या पहिल्या सुनावणीवेळी धनंजय मुंडे यांच्या वकिलाने करुणा शर्मा यांना पोटगी मिळू नये, म्हणून दोघांचे अधिकृत लग्न न झाल्याचा दावा केला होता. मात्र करुण शर्मा यांच्या वकिलाने लग्नाचे पुरावे असल्याचे म्हटले. याप्रकरणी 5 एप्रिल रोजी सुनावणी झाली. तेव्हा करुणा शर्मा यांनी धनंजय मुंडे यांची मीच पहिली पत्नी असल्याचा पुरावा म्हणून धनंजय मुंडे यांचे अंतिम इच्छापत्र आणि स्वीकृती पत्र दिले होते. स्वीकृती पत्रात माझ्या घरच्यांच्या दबावापोटी मी लग्न करत आहे. पण करुणा मुंडे यांचा मी सांभाळ करणार असल्याचे धनंजय मुंडे यांनी म्हटले होते. हे सर्व पुरावे तपासल्यानंतर माझगाव सत्र न्यायालयाने वांद्रे दंडाधिकारी न्यायालया निर्णय कायम ठेवला होता. यानंतर आज (09 एप्रिल) न्यायालयाचा सविस्तर आदेश समोर आला आहे.
न्यायालयाने म्हटले की, धनंजय मुंडे आणि करुणा शर्मा यांच्यातील संबंध लग्नासारखे आहेत. कारण त्यांनी दोन मुलांना जन्म दिला आहे आणि एकाच घरात राहिल्याशिवाय हे शक्य नाही. तसेच एका प्रसिद्ध नेत्याची जीवनशैली लक्षात घेऊन, करुणा शर्मा यांना अंतरिम देखभालीचा आदेश देणे योग्य आहे. करुणा शर्मा आणि त्यांच्या मुलांनाही नेत्यासारखीच जीवनशैली मिळायला हवी. याशिवाय घरगुती हिंसाचाराची बळी पडलेली आणि लग्नासारख्या लिव्ह-इन रिलेशनशिपमध्ये राहिलेली महिला घरगुती हिंसाचार कायद्याअंतर्गत दिलासा मिळण्यास पात्र आहे, असे न्यायालयाने सविस्तर आदेशात म्हटले आहे.
