वडवणी — चिंचवण रोडवर असलेल्या पतंगे ट्रेडर्स या दुकानाला गुरुवारी सकाळी सहाच्या सुमारास भीषण आग लागली. अग्निशमन दल वेळेवर पोहोचू न शकल्याने दुकानातील फर्निचर, प्लायवूड, कलर आणि अन्य बांधकाम साहित्याचा मोठा साठा आगीत जळून लाखों रुपयांचे नुकसान झाले आहे.
गुरुवारी सकाळी सहाच्या सुमारास तीन मजली दुकानाला आग लागल्याची माहिती मिळताच दुकान मालक विशाल पतंगे आणि नागरिकांनी चिंचवण रोडवरील दुकानाकडे धाव घेतली. मात्र, शहरात केवळ अग्निशमन गाडी असून प्रशिक्षित कर्मचारीच नसल्याने आगीत दुकानाची राख होताना नागरिक आणि दुकान मालकाला दुसरे गत्यंतर राहिले नाही.
कलर आणि प्लायवूडने आगीचे रौद्ररूप
दुकानामध्ये खालच्या मजल्यावर फर्निचर तर वरच्या मजल्यावर सनमाईक, प्लायवूड, कलर यासह अन्य बांधकाम साहित्य आहे. हे साहित्य ज्वलनशील असल्याने आगीने काही वेळातच भीषण रूप धारण केले. त्यात अग्निशमन यंत्रणा तोकडी पडल्याने संपूर्ण दुकानास आगीने कवेत घेतले. दरम्यान, तेलगाव, माजलगाव आणि बीड येथील अग्निशमन दलास पाचारण करण्यात आले आहे. दरम्यान नगरपंचायत चे अग्निशमन दल शोभेची वस्तू बनले आहे. अग्निशमन दलाची वेळेवर मदत न मिळाल्यामुळे मोठ्या नुकसानाला सामोरे जावे लागले यामुळे व्यापारी वर्गात संतप्त भावना व्यक्त केल्या जात आहेत.
