बीड — भाजपचे जिल्हाध्यक्ष राजेंद्र मस्के यांनी पदाचा राजीनामा दिल्यानंतर मनोज जरांगे पाटील यांची भेट घेतली होती. त्यानंतर आज शरद पवारांच्या उपस्थितीत राष्ट्रवादी काँग्रेसमध्ये त्यांनी प्रवेश केला आहे.
राजेंद्र मस्के यांनी भाजप जिल्हाध्यक्ष पदाचा राजीनामा दिल्यानंतर राजकीय क्षेत्रात खळबळ माजली होती. त्यांनी दुसऱ्याच दिवशी अंतरवाली सराटी येथे जाऊन मनोज जरांगे पाटील यांची भेटही घेतली होती. राजेंद्र मस्के हे भाजपा आमदार पंकजा मुंडे यांचे कट्टर समर्थक मानले जात होते. त्यांच्या राष्ट्रवादी काँग्रेस मध्ये आज झालेल्या प्रवेशामुळे राष्ट्रवादी काँग्रेस शरद पवार गटाला जिल्ह्यात आणखी बळ मिळाले आहे. नुकताच डॉ. ज्योती मेटे यांनी राष्ट्रवादी शरदचंद्र पवार गटात प्रवेश केल्यानंतर राजेंद्र मस्के यांनी केलेला प्रवेश बीडच्या राजकारणाला कलाटणी देणारा ठरणार असल्याचं जाणकाराकडून सांगितलं जात आहे.
